Mayo

Satepan ke Jehová kinkixtij israelitas de Egipto, kinixtalij tiopixkamej para maj tekitikan itech ikaltsin Dios. Uan no kinixtalij levitas maj kichiuanij okseki tekimej ompa. ¿Okachi kuali kinyekpiak Jehová akin tekitiaj itech ikaltsin oso akin amo uejka nemiaj de ompa? Amo, Jehová kinyekpiak nochin. Nochin israelitas uelia kuali mouikayaj iuan Jehová. Jehová kichiuak maj nochin israelitas ueli kiitakan mixti uan tit tein yetoya ajko den kaltsin (Éx. 40:38). Ijkon, keman mixti peuaya mooliniaya para yas okseko, hasta akin okachi uejka nemiaj ueliaj kiitayaj, kiyektaliayaj tein kipiayaj, kiuejuelouayaj ininkaltsitsin uan nochin senyayaj (Núm. 9:​15-23). No ijkon axkan, kampa yeski tinemiskej Jehová techtasojta, techyekpia uan techpaleuia. w24.06 4 § 10-12

David ueliskia kimiktiskej. Absalón, ikoneuj David kiixtalijka kimiktis para mochiuas tekiuaj (2 Sam. 15:​12, 13). Yejua ika David monekia niman cholos de Jerusalén. Kemej itekitikauan cholojkajya, David kiitak ke monekia maj aksa mokaua Jerusalén para maj kimati tein kiixtaliskia kichiuas Absalón. Yejua ika kititanik Sadoc uan okseki tiopixkamej maj tapijpiatij (2 Sam. 15:​27-29). Monekia moyekpiaskej porin tein David kiniluijka maj kichiuakan ouij katka uan ueliskia kinmiktiskej. Absalón sayoj itech tanemiliaya, tateuiaya uan takajkayauaya. David kiluij Sadoc uan okse itasojikniuj Husái maj kipaleuianij ika tein kinemilijtoya kichiuas (2 Sam. 15:​32-37). Husái monekia kinextis ke kipaleuiaya Absalón uan kiyolmajxitij keniuj monekia kiteuis David. Nejon kipaleuiskia David maj kimati toni kichiuas komo kiteuiayaj. Satepan, Husái kiluij Sadoc uan Abiatar tein kichiuaskiaj (2 Sam. 17:​8-16). Uan yejuan kinauatijkej uan okseki tiopixkamej maj kimakixtikan David (2 Sam. 17:​21, 22). w24.07 4, 5 § 9, 10

Sekin itekitikauan Jehová kisentokaj tel amo kuali momachiliaj porin tajtakolchiujkaj achto ke moauiskiaj oso satepan ke moauijkej. Sayoj ke maj tikelnamikikan ke Jehová kitemakak iKonetsin maj toka momikili porin semi techtasojta. Yejua ika uelis tikneltokaskej ke yejuatsin kineki maj tikselikan tein kitemakak. Jehová techiluia: “Xiualakan uan maj tikyektalikan kuejmolmej”. Uan techmatiltia ke keman tikchiuajya nejon senkis techtapojpoluia totajtakoluan. Semi tiktasojkamatij maj toTajtsin akin semi techtasojta kielkaua tein amo kuali tein tikchiujkaj uan maj nochipa kielnamikto tein kuali tein tikchiuanij (Sal. 103:​9, 12; Heb. 6:10). ¿Toni uelis mitspaleuis komo semi mitsyolkokoua tein achto tikchiujka? Okachi kuali itech xitanemili tein tikchiujtok axkan uan tein uelis tikchiuas satepan. Tejua uelis tikpatas tein panokya, sayoj ke uelis itech titanemilis keniuj tinemis amo uejkaua uan keniuj uelis tikueyitalis uan tikyolpaktis Jehová axkan. w24.10 8 § 8, 9

Keman tikonixtajtoltis Biblia, xa kemansa tikonnekis tionmosenkauas porin tikonitas ke miak tamanok moneki tikonchiuas. Maj tiknemilikan nejin. Se tonal tikonixtajtoltia seki versículos tein kijtoua ke amo kuali yetok maj titechikoitakan (Sant. 2:​1-8). Uan tikonixtalia ijkon tikonchiuas porin tikonita ke uelis tikonpatas seki taman uan okachi kuali tionmouikas iniuan oksekin. Mostika tikonixtajtoltia seki versículos kampa kijtoua ke moneki achto kuali tiknemiliskej tein tikijtouaj (Sant. 3:​1-12). Uan tikonelnamiki ke tikonijtouani seki taman tein teyolkokoj, yejua ika tikonixtalia okachi tikonyolchikauas oksekin keman iniuan tiontajtos. Uiptika tikonixtajtoltia ke amo moneki timouikaskej iniuan akin amo kitekitiliaj Jehová (Sant. 4:​4-12). Tikonajsikamati ke amo moneki tikonixtajtoltis, tikonitas nion tikonkakis tein amo mitsonpaleuia. Naujpatika tonal xa tikonnekis tionmosenkauas porin tikonita ke miak taman moneki tikonpatas. Amo xionmosenkaua. No xikonelnamiki ke nochipa moneki “tinemiskej kemej Dios kineki”. w24.09 5, 6 § 11, 12

Jesús nochipa kimatia toni kichiuas porin “kikauak nochi imako juez akin kiixtalia nochi kemej moneki”. Kimatia ke Jehová kiitaya nochi tein amo kuali tein kichiuiliayaj uan takuaujtamatia ke kiyektaliskia nochi keman kiixtalijkaya. Keman techchiuiliskej tein amo kuali, uelis tikchiuaskej kemej Jesús uan achto kuali tiknemiliskej toni tikijtoskej. Kemansa amo moneki tikijtoskej oso tikchiuaskej teisa porin tein techchiuilijkej amo tel fiero. Oso uelis tikixtaliskej amo teyi tikijtoskej porin komo tikchiuaj okachi timokuejmolkalakiskej (Ecl. 3:7; Sant. 1:​19, 20). Sayoj ke kemansa xa monekis tiktenpaleuiskej aksa akin kichiuilijtokej tein amo kuali oso xa monekis tikijtoskej tein melauak tein tikneltokaj (Hech. 6:​1, 2). Uan keman titajtoskej moneki tiknextiskej ke titapoujkaitaj uan ke tiyolnejmachmej. No uelis tikchiuaskej kemej Jesús keman tikauaskej nochi “imako juez akin kiixtalia nochi kemej moneki” (1 Ped. 2:23). w24.11 5, 6 § 10-12

Tinochin semi tiyolpakij keman se tajtakolchiujkej moyolpata (Luc. 15:7). Maski tayekananij mochikauaj kipaleuiskej akin tajtakolchiuak, ¿akoni yekmelauj kipaleuia maj moyolpata? Maj tikelnamikikan ke tatitanil Pablo kijtoj ke “Dios xa kinkauas maj moyolpatakan” akin tajtakolchiujkej (2 Tim. 2:25). Yejua ika, yejua Jehová akin kipaleuia maj se tokniuj kipata tein kinemilia uan tein kichiua uan amo aksa. Satepan, Pablo kimelauak sekin taman tein kuali tein panoua keman aksa moyolpata: okachi kuali kiixmati tein melauak, yektanemilia uan momakixtia imako in Amokuali (2 Tim. 2:26). Keman se tajtakolchiujkej moyolpata, tayekananij moneki kisentokaskej kikalpanoskej para kipaleuiskej maj okachi takuaujtamati iuan Jehová. No moneki kikalpanoskej para kipaleuiskej maj kiixtopeua tein amo kuali uan maj kichiua tein kuali (Heb. 12:​12, 13). w24.08 23 § 14, 15

Nochin akin Jesús kintamakak kinextijkej ke sayoj kinekiaj maj kinpaleui uan maj kinmaka tein kinpolouaya. Mostika kualkan keman kiitakej ke Jesús uan itatitaniluan yajkajya, yejuan tejkokej itech barcos tein ualayaj de Tiberíades uan yajkej Capernaúm para kitemoskej Jesús (Juan 6:​22-24). ¿Yajkej para okachi kikakiskej tein kijtouaya Jesús de iTaixyekanalis Dios? Amo, ta sayoj kinekiaj maj kintamaka. ¿Keniuj tikmatij? Maj tikitakan tein panok keman moajsikej iuan Jesús amo uejka de Capernaúm. Jesús kiniluij ke sayoj kitemouayaj para maj oksepa kintamaka. Maski ‘kikuajkej pantsin hasta ke ixuikej’ kiniluij ke katka kemej “takual tein uejueliui”. Uan kinyolchikauak maj tekitikan para kipiaskej “takual tein amo uejueliui uan kichiua maj se nemi nochipaya” (Juan 6:​26, 27). Uan no kiniluij ke iTajtsin Jesús kinmakaskia nejon takual. w24.12 5 § 8, 9

Keman se tayekankej tamachtia senteixtenoj uan keman kiyolmajxitia aksa, kiita maj kisa itech Biblia nochi tein kijtoua. Yejua ika moneki kuali momachtis Biblia uan toamaixuan (Prov. 15:28). Keman momachtia, kuali kiita keniuj toamaixuan kimelauaj versículos. Uan keman tamachtia, mochikaua kinpaleuis oksekin maj okachi kitasojtakan Jehová uan maj kinekikan kichiuaskej tein momachtiaj. Okachi kuali tamachtis komo kiniluia maj kiyolmajxitikan okseki tayekananij akin miak xiujmejya tapaleuijtokej uan komo kichiua tein kiluiaj (1 Tim. 5:17). Tayekananij moneki kimatiskej keniuj ‘kinyolchikauaskejʼ tokniuan maski kemansa monekis kinyolmajxitiskej oso hasta ‘kinnextiliskej ke amo kuali’ tein kichiujtokej. Sayoj ke moneki yeskij yolkualmej nochipa keman kichiuaskej nejon. Komo kualtakamej uan teikneliaj uan nochi tein tamachtiaj kikixtiaj itech iTajtol Dios, kuali tamachtiskej porin kichiujtoskej kemej Jesús akin tel kuali tamachtiaya (Mat. 11:​28-30; 2 Tim. 2:24). w24.11 24 § 16

Uelis tikueyitaliskej Jehová komo kuali ika titajtouaj. Nejin versículos kijtouaj ke itekitikauan Dios moneki kicantarouiliskej Jehová, kiueyitaliskej itokay, noyampa kiteixmatiltiskej keniuj temakixtia uan ke yejua semi ueyi (Sal. 96:​1-3). Nejin seki taman kemej uelis tikueyitaliskej toTajtsin Jehová (Hech. 4:29). Tejuan uelis titemakaskej tein tikpiaj para tikueyitaliskej Jehová. Akin yekmelauj itekitikauan Dios kitemakanij tein kipiaj para kiueyitaliskej (Prov. 3:9). Ijkon kichiujkej israelitas keman kitemakakej tein kipiayaj para kichijchiuaskej templo uan kiitaskej maj amo uejueliui (2 Rey. 12:​4, 5; 1 Crón. 29:​3-9). Sekin imomachtijkauan Cristo kikuiaj “tein kipiayaj” para kipaleuiskej Jesús uan itatitaniluan (Luc. 8:​1-3). Uan Biblia kijtoua ke keman seki tokniuan amo kipiayajok toni kikuaskej, okseki tokniuan kintitaniliayaj miak taman (Hech. 11:​27-29). Uan axkan, tejuan no tikueyitaliaj Jehová keman tiktemakaj tomin para titapaleuiskej. w25.01 4 § 8; 5 § 11

¿Toni kipaleuij Cornelio maj moaui? Biblia kijtoua ke “kimojkatokaya Dios iniuan nochin akin nemiaj ichan” uan ‘nochipa kitataujtiaya’ (Hech. 10:2). Keman Pedro kimatiltij kuali tanauatilmej, Cornelio uan ichankauan kineltokakej Cristo uan niman moauijkej (Hech. 10:​47, 48). Tikmatij ke Cornelio kinekik kipatas seki taman para uelis kiueyichiuas Jehová iniuan ichankauan (Jos. 24:15; Hech. 10:​24, 33). Ijkon kemej Saulo, Cornelio katka ueyichiujkej uan nejon ueliskia kitsakuilis maj kitojtoka Cristo. Sayoj ke yejua amo kikauak maj nejon kitsakuili. Uan tejuatsin, ¿no moneki tikonpatas miak taman para tionmoauis? Komo ijkon, Jehová mitsonpaleuis. Yejua mitsontatiochiuis komo tionmochikaua tikonchiuas tein Biblia kijtoua. w25.03 5 § 12, 13

Yejua ika, komo tikakij ke kitakajkayauiliaj inechikol Dios uan tokniuan akin taixyekanaj, maj tikelnamikikan toni kinchiuilijkej Jesús uan imomachtijkauan. Yejua kijtoj ke miakej kiixnamikiskiaj itekitikauan Jehová uan kintakajkayauiliskiaj (Mat. 5:​11, 12). Akin techtauelitaj amo techkajkayauaskej komo niman tikelnamikij akoni kichiua maj techtakajkayauilikan uan niman tikchiuaj tein techpaleuis. ¿Toni moneki tikchiuaskej para timoyekpiaskej? Maj tikixtopeuakan nochi taman tein ika kitakajkayauiliaj inechikol Dios. Tatitanil Pablo kijtoj toni moneki tikchiuaskej. Itech 1 Timoteo 1:​3, 4 tanauatij ‘maj amo tikakikan tein amo melauak tein tetapouiaj’. Uan no kiyolmajxitij Timoteo: “Xikixtopeua tein amo melauak tein kitetapouiaj”. Tejuan amo tikinkakij akin tetapouiaj tein amo melauak, ta sayoj tikakij “kuali tajtolmej” tein kijtouaj tein melauak (2 Tim. 1:13). w24.04 11 § 16; 13 § 17

Xikonueyichiua Jehová iniuan akin amo keman kikauaj. Dios kineki maj tinochin tiksenueyichiuakan, uan uelis ijkon tikchiuaskej komo tiktakamatij tein tamachtia Biblia. Akin amo kineltokajok tein Biblia tamachtia uan kiixnamikij, kinxexelouaj tokniuan itech nechikol. Yejua ika Dios techiluia maj amo iniuan timouikakan porin ueliskia peuas tikneltokaskej tein amo melauj uan amo tiktakamatiskejok Jehová (Rom. 16:17). Komo tikmatij toni tein melauak uan amo keman tikauaj, nochipa kuali timouikaskej iuan Jehová (Efes. 4:​15, 16). Amo no tikneltokaskej nochi tein Satanás tamachtis uan tein ika takajkayauas, uan Jehová nochipa techpaleuis keman mochiujtos tetsaujkatajyouilis. Amo keman xikonkaua tein melauak uan “Dios akin teyolseuia” nochipa mouan yetos (Filip. 4:​8, 9). w24.07 13 § 16, 17

Jesús okachi kitemoj kinpaleuis akin kinyolkokouaya tajtakol tein kichiujkaj uan kinyoleuaya maj kitojtokakan. Yejua kimatia ke nochin tajyouiayaj porin katkaj tajtakolejkej. Yejua ika okachi kintemouaya takamej uan siuamej akin tajtakolchiujkaj para kinpaleuis. Ijkon kinextij keman kijtoj nejin: “Akin paktokej amo moneki maj kiitatij tapajtijkej, sayoj ke akin mokokouaj kemaj”. Uan no kijtoj: “Amo nikinnotsako akin yolmelaujkej, ta akin tajtakolejkej” (Mat. 9:​12, 13). Uan yejua nejon tein kichiuak Jesús, keman se siuat kimetspajpakak ika iixayo, yejua kualtsin kinojnotsak uan kitapojpoluij itajtakoluan (Luc. 7:​37-50). Uan no, Jesús kimachtij siuatsin akin katka kayot Samaria, maski kimatia ke nemia iuan se takat akin amo katka itakatsin (Juan 4:​7, 17-19, 25, 26). Tinochin timomikiliaj porin titajtakolejkej, sayoj ke Dios kimakak Jesús chikaualis para kichiuaskia maj oksepa nemikan takamej, siuamej uan konemej akin momikilijkajya (Mat. 11:5). w24.08 4 § 9, 10

¿Keniuj Jehová kiueyitalis itokay amo uejkaua? Keman kichiuas maj nochin kiselikan tein kinnamiki. Amo uejkaua kiixpolos Ueyi Babilonia porin kichiuani maj amo kuali ika tajtokan itokay (Apoc. 17:​5, 16; 19:​1, 2). Sekin akin kiitaskej keniuj ixpoliuiskej taneltokalismej tein amo melaujkej, xa kiixtaliskej no touan kiueyichiuaskej Jehová. Uan itech Armagedón, Jehová kiixpolos nochi tein Satanás kiixyekana. Kinixpolos nochin akin kitauelitaj uan kitakajkayauiliaj, uan kinmakixtis nochin akin kitasojtaj, kitakamatij uan kiuelitaj kiueyitaliskej (Mar. 8:38; 2 Tes. 1:​6-10). Satepan ke tamisya itaixyekanalis Cristo tein uejkauas mil xiujmej, keman Satanás kinyejyekosya nochin, Jehová kinextis ke sayoj yejua kinamiki kiueyichiuaskej (Apoc. 20:​7-10). Ijkuak, “nochin kimatiskej ke Jehová semi ueyi ijkon kemej at pexontok itech mar” (Hab. 2:14). ¡Semi kualtsin yeski keman nochin kiueyitaliskej Jehová kemej kinamiki! w25.01 7 § 15, 16

¿Toni kinpaleuiskia tokniuan maj taxikokan keman kintajyouiltiskiaj? Pablo kinekia kinpaleuis tokniuan maj kiitanij keniuj kinpaleuiskia komo taxikouayaj. Yejua ika kinmelauilij ke Dios uelis kikauas maj aksa tajyoui para maj momachti teisa. Yejuan monekia kiitaskej ke nejon kinpaleuiskia maj kinextikan okseki taman tein kuali. Komo kinemiliayaj keniuj semi kinpaleuiskia maj kichiuakan tein kuali, okachi amo ouij kinkisaskia taxikoskej (Heb. 12:11). Pablo kinyolchikauak tokniuan maj taxikokan uan maj amo mosenkauakan. Uan tein kiniluij semi kinpaleuij. ¿Keyej? Porin yejua no kintajyouiltijka tokniuan, yejua ika kuali kimatia toni ueliskia kinpanos. Uan miakpa yejua no kitajyouiltijkaj porin satepan ke peuak kichiua kemej Cristo miakej peujkej kiixnamikij (2 Cor. 11:​23-25). w24.09 12, 13 § 16, 17

Ijkon kemej panotiuj tonalmej okachi moneki maj titanojnotsakan. ¿Keyej? Porin amo uejkaua tamisya nochi tein amo kuali, ijkon kemej kijtoua Marcos 13:10. Maj tikelnamikikan keniuj kijtoj Jesús ke titanojnotsaskiaj itech tonalmej keman tatamitiya. Itech amatajkuilol Mateo, kampa no ika tajtoua nejin, Jesús kijtoj ke kuali tanauatilmej moteixmatiltiskiaj itech nochi taltikpak achto ke “tatamis” (Mat. 24:14). Nejin kijtosneki keman ixpoliuis nochi tein kiixyekana Satanás. Jehová kiixtalijya “tonal uan hora” keman mochiuas tein kijtoj (Mat. 24:36; Hech. 1:7). Uan ijkon kemej panotiuj tonalmej okachi amo poliuiok para mochiuas (Rom. 13:11). Sayoj ke, kemej ayamo ejko nejon tonal moneki tiksentokaskej titanojnotsaskej. Tinochin moneki timotajtaniskej nejin: ¿keyej tikteixmatiltiaj kuali tanauatilmej? Porin titetasojtaj. Keman titanojnotsaj tiknextiaj ke tiktasojtaj tein Biblia tamachtia, ke tikintasojtaj nochin uan ke tiktasojtaj Jehová uan itokay. Maj timomachtikan sejse taman. w24.05 14, 15 § 2, 3

Tetatmej, xikinyolchikaua mokonetsin maj kiita tein Jehová kichijchiuak. Keman namoixpetaniskej koujtaj oso nantekitiskej, xikonnextili mokoneuan keniuj nochi kualtsin chijchiujtok. Xikinpaleui maj kiajsikamatikan ke aksa akin tamattok kichijchiuak nochi. Miak taman tein Dios kichijchiuak ijtiyoyoualiujtok, uan miakej taixmatinij semi ika momachtianij nejin. Se motelmachtijkej akin monotsa Nicola Fameli, kijtoua ke keman se kipoua seki taman tein ijtiyoyoualiujtok, se kiita ke tapoualmej mototojtokaj, nejin tapoualmej moixmatij kemej sucesión de Fibonacci. Uan miak taman tein onkak ueli tikitaj ke ijtiyoyoualtik kemej seki galaxias, ininpankakaujyo seki xoktsitsin, seki xiujtsitsin uan xochit girasol. w24.12 16 § 7

Moisés, David uan Juan nenkej ne uejkauj. Uan miak taman mopatak kemej nemiaj yejuan uan kemej tinemij axkan. Sayoj ke, miak taman tein kichiujkej no tikchiuaj tejuan. Yejuan kiueyichiuayaj akin yekmelauj Dios, uan tejuan no. Ijkon kemej yejuan, tejuan no tiktataujtiaj Jehová, iuan titakuaujtamatij uan tiktemouaj maj techixyekana. Uan ijkon kemej nejon takamej, tejuan no tikmatij ke Jehová semi kintatiochiuia akin kitakamatij. Maj tikchiuakan tein tayolmajxitijkej nejon takamej akin xiuejkejya katkaj uan maj tikchiuakan tein technauatia Jehová. Komo ijkon tikchiuaj, yejuatsin techtatiochiuis uan techpaleuis. Uelis tinemiskej “miak tonalmej”, tein kijtosneki tinemiskej nochipaya. Uan tiyolpakiskej porin tikyolpaktiskej toTajtsin akin kichiua nochi tein motenkaua. Yejuatsin semi techtatiochiuis (Efes. 3:20). w24.11 13 § 20, 21

Itech yekinika siglo, sekin tokniuan takamej kinixtaliayaj kemej tapaleuianij (1 Tim. 3:8). Nesi ke yejuan ‘akin tapaleuiayajʼ akin tatitanil Pablo ininka tajtoj. Xa yejuan tapaleuiayaj ika miak taman para maj tayekananij uelinij tamachtianij uan maj kinyolchikauanij tokniuan. Xa tapaleuiayaj maj moijkuilouanij amatajkuilolmej oso xa kikouayaj tein mokuiskia para mochiuas nejon tekit. ¿Toni tekimej kichiuaj tokniuan tapaleuianij axkan? (1 Ped. 4:10). Sekin xa kipouaj tomin tein mosentilia itech nechikol, kiitaj maj tanojnotsanij kipiakan amaixmej uan kiitaj kani motanojnotsas. Xa kitaliaj videos uan tatsotson itech nechikolmej, kiniluiaj tokniuan kanika motaliskej, oso kiyekpiaj Kali kampa tiMosentiliaj para maj amo uejueliui. Nochi nejin tapaleuia maj tiyolpakikan keman timosentiliaj uan maj motanojnotsa kemej ixyetok (1 Cor. 14:40). w24.10 19 § 4, 5

Uelis tikxikoskej tein yeski ouijkayot komo tikelnamikij ke Jehová yoltok uan ke nochipa techpaleuis. Yejuatsin amo teyi kitsakuilia porin kipia nochi chikaualis uan uelis techpaleuis maj tikxikokan tein yeski taman. Yejua ika, ueli tikneltokaj ke nochipa techpaleuis keman monekis. Keman tikitaj keniuj Jehová techpaleuia keman techpanoua teisa, okachi tikneltokaj ke no techpaleuis keman tikpiaskej okseki ouijkayomej. Maj tikitakan ome taman tein kipanok tekiuaj David tein kipaleuij maj okachi takuaujtamati iuan Jehová. Keman katka telpoch uan kinyepiaya ichkamej, se tekuani kiuikak se ichkat tein katka de itat, uan okse tonal se oso no ijkon kichiuak. Keman ijkon panok, David moyolchikauak uan kinpaleuij ichkamej. Yejua kimatia ke Jehová kipaleuijka uan amo kijtoj ke kichiuak iselti (1 Sam. 17:​34-37). Yejua kielnamikia tein kipanok. David nochipa kielnamikia uan nejon kipaleuij maj okachi kineltoka ke Dios akin nochipa yoltok no kiyolchikauaskia satepan. w24.06 21 § 5, 6

Xikonnemili ke mitsonyoleuaj se convivio. ¿Moneki tionyas? Komo amo semi tikonixmati akin kichiuati iluitsin uan amo tikonmati toni mochiuas, moneki tikontajtanis nejin: “¿Kani uan kemanian mochiuas? ¿Kanachimej yeskij? ¿Akoni kiitas maj amo mochiua tein amo moneki? ¿Akonimej yaskej? ¿Toni tikonixtalijtok maj mochiua? ¿Onkas tayil tein teuintij?”. Keman tikonmatis nejin, mitsonpaleuis kuali xiontaixpejpena. Keman tikonmatisya nochi tein tikonnekia, kuali xikonnemili nochi tein uelis panos. ¿Toni tikonchiuas komo tikonmati ke no ompa yetoskej akin amo kitakamatij Jehová, oso onkas tayil uan amo akin kintakaualtis maj amo tel tayikan? ¿Tikonnemilia ke uelis mochiuas tein amo kuali uan semi eliuistiskej? (1 Ped. 4:3). Komo tikonnemilia toni uelis panos mitsonpaleuis kuali xiontaixpejpena. w25.01 15 § 4, 5

Maj tikitakan okseki taman tein no techpaleuis maj tikajsikamatikan ke komo timoyolpataj, Jehová ueli techtapojpoluilia totajtakoluan porin Jesús taxtauak para techmakixtis. Tajtakolmej tamatij kemej tein “titauikaj” (Mat. 6:12; Luc. 11:4). Yejua ika nochipa keman titajtakolchiuaj kemej yeskia okachi momiakilia tein tiktauikiliaj Jehová. Sayoj ke keman yejua techtapojpoluia, kemej yeskia techiluiskia ke amo teyi tiktauikiliajok. Nejin kijtosneki ke amo techtaxtaualtiaok nion teyi porin techtapojpoluijya. Ijkon kemej yolseui aksa keman amo kitaxtaualtiajok tein tauika, no ijkon semi tiyolseuij keman Jehová techtapojpoluia. w25.02 9, 10 § 9, 10

Keman tetatmej yeskij xiuejkejya xa ipa monekis maj ininkoneuan kinmakakan tomin oso okseki taman, uan miakej tekoneuan yolpakij kinpaleuiskej inintatuan (1 Tim. 5:4). Sayoj ke tetatmej akin takuaujtamatij iuan Jehová kimatij ke okachi yolpakiskej komo kinpaleuiaj ininkoneuan maj kitekitilikan Jehová, uan amo komo kiniskaltiaj para maj satepan yejuan kintekipanokan (3 Juan 4). Tetatmej, keman nankinpaleuiskej namokoneuan maj momachtikan keniuj motekipanoskej xikinnextilikan ke nantakuaujtamatij iuan Jehová. Keman yeskij pilimejok xikinmachtikan ke semi moneki maj tekitikan (Prov. 29:21; Efes. 4:28). Uan keman moskaltiskejya xikinpaleuikan maj kuali momachtikan keman yaskej escuela. No uelis nankitemoskej tamachtilismej itech toamaixuan para maj namokoneuan kuali kiixtalikan ox kisentokaskej momachtiskej. Xikinpaleuikan maj kimatikan keniuj uelis moixpanoltiskej, uan no maj ueli okachi tanojnotsakan oso hasta maj mochiuakan precursores. w25.03 30, 31 § 15, 16

Itech amatajkuilol Isaías capítulo 65, Jehová kijtoj keniuj kualtsin tikueyichiuaskiaj iniuan tokniuan. Tein kijtoj Isaías yekinika mochiuak itech xiuit 537 achto ke ualaskia Cristo. Itech nejon tonalmej babilonios kinkaujkej judíos akin moyolpatakajya maj kisakan de Babilonia uan maj mokepanij kampa achto nemiaj. Kemej Jehová kintatiochiuij uan kinpaleuij, kiyekchijchiujkej Jerusalén, uan kichiujkej maj oksepa kualtsin moitani. Kiyektalijkej templo para maj oksepa kiueyichiuanij Jehová ompa Israel ijkon kemej yejua kineki (Is. 51:11; Zac. 8:3). Tein kijtoj Isaías no mochiujtok axkan. Peuak itech xiuit 1919, keman itekitikauan Jehová kiskej de Ueyi Babilonia, tein kijtosneki nochi taneltokalismej tein takajkayauaj. Desde ijkuak peuak tiksenueyichiuaj Jehová itech nochi taltikpak. Miakej tokniuan akin kiuelitayaj tanojnotsaskej tapaleuijkej maj mochiuanij miakej nechikolmej. Uan axkan miakej takamej uan siuamej akin achto semi tateuiayaj uan auilnemiaj amo kichiuajok nochi nejon taman uan ‘nemijya ijkon kemej Dios kineki’. w24.04 20, 21 § 3, 4

Itech seki altepemej, momattokej maj tetatmej oso akin xiuejkejya kiixpejpenakan akoni iuan monamiktis aksa. Itech okseki xolalmej, itasojikniuan oso ichankauan akin ayamo monamiktia, kitemoliaj akoni ueliskia yeski inovio oso inovia uan satepan kiixtaliaj maj moixmatikan uan maj kiitakan ox uelis kuali mouikaskej. Komo techtajtaniaj maj tikchiuakan nejin, moneki tikitaskej tein omen kiuelitaj uan tein kinekij. Komo tiknemiliaj ke tikajsikej se kuali tokniuj para se tochankauj oso se totasojikniuj, moneki kuali tikixmatiskej, tikmatiskej keniuj tamati, uan okachiok keniuj kitekitilijtok Jehová. Okachi moneki maj kuali mouika iuan Jehová ke tomin, tamachtilis tein kipia uan ox ueyichiujkej oso amo. Maski ijkon, moneki tikelnamikiskej ke yejuan kimatij ox monamiktiskej. w24.05 23 § 11

No uelis tikinpaleuiskej akin novios komo kuali tiknemiliaj tein tikijtouaj. Kemansa xa monekis timotsakuiliskej uan amo teyi tikijtoskej (Prov. 12:18). Xa tiknekiskej niman tikijtoskej keman tikmatiskej ke sekin mochiujkej novios, sayoj ke xa yejuan kinekiskej kijtoskej. Amo moneki ininka titajtojtinemiskej nion tikinijijtoskej (Prov. 20:19; Rom. 14:10; 1 Tes. 4:11). Maj amo tikijtokan nion maj tikintajtanikan teisa tein ika tikteajsikamatiltiskej ke ipa monamiktitij.¿Uan komo sekin novios kiixtaliaj mokauaskej? Maj amo tiktemokan tikmatiskej keyej mokaujkej, nion maj tiktajtakoltikan semej (1 Ped. 4:15). Komo sekin novios mokauaj, amo moneki tiknemiliskej ke amo kuali tein kichiujkej, porin keman katkaj novios kinpaleuij maj kimatikan tein monekia kiixtaliskej. Maski ijkon, xa ipa moyolkokoskej uan momachiliskej ininselti, yejua ika moneki tikinpaleuiskej. w24.05 31 § 15, 16

Se taman tein okachi techyolkokoua yejua keman se tochankauj oso se totasojikniuj kikaua Jehová (Sal. 78:40). Uan komo kuali iuan timouikayaj xa okachi techyolkoua. Komo ijkon mitsonpanouani, tein kipanok Sadoc semi mitsonpaleuis. Keman David katka xiuejya uan yaya momikilitia. Ikoneuj Adonías kinekia mochiuas tekiuaj maski Jehová kinekia maj Salomón kiixpatani David (1 Crón. 22:​9, 10). Sadoc nochipa kitakamatik Jehová, sayoj ke itasojikniuj Abiatar kiixtalij kipaleuis Adonías (1 Rey. 1:​5-8). Nejin kinextiaya ke Abiatar amo kitakamatik David uan Sadoc nion no Jehová. Miak xiujmej Sadoc uan Abiatar sentekitikej kemej tiopixkamej (2 Sam. 8:17; 15:29; 19:​11-14). w24.07 6 § 14, 15

¿Techpaleuia keman timoyekpiaj para amo titajtakolchiuaskej? ¡Kemaj! Xa ueliskia timoyolpaktiskej komo titajtakolchiuaj, sayoj ke amo uejkauas. Okachi kuali maj tiktakamatikan itanauatiluan Jehová porin ijkon tiyolpakiskej nochipaya (Heb. 11:25; Sal. 19:8). Uan nejin ueli tikchiuaj porin yejuatsin techchijchiuak kemej tiknekiskej tiktakamatiskej (Gén. 1:27). Keman tinemij kemej Jehová kineki, techpaleuia maj kuali timomachilikan uan satepan maj tinemikan itech se xochital (1 Tim. 6:12; 2 Tim. 1:3; Jud. 20, 21). Maski ‘tonakayo tein tajtakolej amo chikauak’, amo kijtosneki ke amo uelis timopataskej (Mat. 26:41). Jehová touan yetok para techpaleuis (2 Cor. 4:7). Tikyekmatij ke yejuatsin techmaka chikaualis tein toselti amo ueli tikpiaj. Sayoj ke tejuan moneki nochipa timochikauaskej amo tikchiuaskej teisa tein ueliskia ika titajtakoskej. Uelis titakuaujtamatiskej ke Jehová technankilis keman tiktataujtiskej maj techpaleui (1 Cor. 10:13). Yejuatsin techpaleuis maj timoyekpiakan uan maj amo titajtakokan. w24.07 19 § 19-21

Tatitanil Pablo kiluij Timoteo akin no katka tayekankej tajtolmej tein axkan timomachtiaj, ke keman aksa kichiuaskia se tajtakol monekiskia kinextis “senteixtenoj” ke amo kuali yetoya tein kichiujka. ¿Akonimej ininixtenoj? Amo nochipa yeski ininixtenoj nochin tokniuan den nechikol, ta sayoj akin kimatij tajtakol tein kichiuak. Xa porin kiitakej oso porin yejua kiniluij. Tayekananij sayoj yejuan kiniluiskej ke kinojnotskejya uan kipaleuijkejya akin tajtakolchiuak. Kemansa, nochin tokniuan itech nechikol kimatij keman aksa tajtakolchiua oso xa satepan kimatij. Keman ijkon panoua, tajtol “senteixtenoj” kijtosneki nochin tokniuan den nechikol. Yejua ika semej tokniuan tayekananij, kitematiltis itech nechikol ke tokniuj kimelaujkej. ¿Keyej? Pablo kijtoj ke “para maj oksekin” amo no tel tajtakolchiuakan kemej yejua. w24.08 23, 24 § 16, 17

Moneki tiksentokaskej tiktekitiliskej Jehová hasta keman tatamis. No tikitakej ke Jesús tamachtij ke taijitalmej moneki tachixtoskej para uelis kalakiskej itech iTaixyekanalis Dios ompa iluikak (Mat. 24:40). Yejuan kinekij maj ejkoya tonal keman ‘mosentiliskej’ iuan Jesús ne iluikak. Keman tamis Armagedón, yejuan yeskij novia “keman Ichkatsin monamiktis” (2 Tes. 2:1). Amo uejkaua Jesús kiixtalis toni technamiki tikseliskej, sayoj ke amo moneki timomoujtiskej. Komo amo keman tikauaj Jehová techmakas “chikaualis tein toselti amo ueli tikpiaj” uan ijkon uelis ‘tiijkatoskej iixpan akin yolik kemej takat’ (2 Cor. 4:7; Luc. 21:36). Yejua ika maski tikchiaskej tinemiskej nikan taltikpak oso ne iluikak, moneki tiksentokaskej tikchiuaskej tein Jesús tanejmachtij. Komo ijkon tikchiuaj, tikyolpaktiskej toTajtsin, uan kemej yejua yolkuali, totokay “ijkuiliujtos itech amatajkuilol” kampa ixnesij akin nemiskej (Dan. 12:1; Apoc. 3:5). w24.09 24, 25 § 19, 20

Ijkon kemej salmista, tejuatsin no uelis tikonchiuas teisa para amo tikonnemilisok tein amo mitsonpaleuia. ¿Keniuj? Xikonelnamiki ke tikonyolpaktia Jehová uan tikonpia okseki tatiochiualismej, uan ke akin amo kitekitiliaj, yejuatsin amo kinpaleuia. Miakej akin amo kitekitiliaj Jehová amo kichiaj tein kuali satepan, yejua ika kinemiliaj ke okachi moneki maj kipiakan se kuali tekit uan maj kualtsin nemikan. Sayoj ke Jehová amo sayoj mitsontatiochiuia axkan, ta no motenkaua ke mitsontatiochiuis satepan (Sal. 145:16). Uan no, amo tikonmati keniuj tionnemiskia axkan komo tikonixtaliskia tikonchiuas okse taman. Sayoj ke xikonmati ke komo tikonixtalia tikonchiuas teisa porin tikontasojta Jehová uan oksekin, nochipa tikonpias tein kuali tein mitsonyolpaktis. w24.10 27 § 12, 13