Junio

Desde axkanya techpaleuijtok maj Cristo toka momikiliani, porin ika nejon Jehová techtapojpoluilia totajtakoluan. Yejua techtapojpoluia porin kineki ijkon kichiuas uan amo porin aksa kichikaujkauia maj techtapojpolui (Sal. 103:​3, 10-13). Sekin kimachiliaj ke amo kinnamiki maj Jehová kintapojpolui. Sayoj ke tein melauj nion akin kinamiki maj kitapojpoluikan. Tatitanil Pablo kijtoj: “Amo nechnamiki maj nechnotsakan tatitanil”. Uan satepan kijtoj: “Kemej Dios nechnextilij itatiochiualis tein amo technamiki, ueli nikchiua nejin tekit” (1 Cor. 15:​9, 10). Keman timoyolpataj porin titajtakolchiujkej, Jehová techtapojpoluia. ¿Keyej? Amo porin technamiki ta kichiua porin techtasojta. Yejua ika komo titayokoyaj porin tiknemiliaj ke amo technamiki maj Jehová techtapojpolui, maj tikelnamikikan ke kitemakak iKonetsin para kiixtauas inintajtakoluan akin moyolpataj (Luc. 5:32; 1 Tim. 1:15). w25.01 26, 27 § 3, 4

Tejuan amo ueli tiktsakuiliaj tein kijtouaj oso tein kichiuaj oksekin, sayoj ke tejuan tikmatij toni tikchiuaskej keman panos nejon. Uan miakpa, xa monekis maj titetapojpoluikan. ¿Keyej? Porin tiktasojtaj Jehová uan yejua kineki maj ijkon tikchiuakan. Uan no, komo tiksentokaj tikualantokej uan amo titetapojpoluiaj, uelis tikchiuaskej teisa tein amo kuali uan hasta tejuan timokokolispeualtiskej (Prov. 14:​17, 29, 30). Keman amo tiksentokaj tikualantokej, kuali timouikaj iniuan oksekin. No semi techpaleuia keman titetapojpoluiaj porin tikelkauaj uan oksepa tiyolpakij. ¿Toni mitsonpaleuis amo xionkualantook nion xionmoyolkokojtook? Yekinika, xikonkaua maj pano tepitsin tiempo. Keman aksa kipanoua teisa uan motelkokoua, satepan ke kipajtiaj moneki panos tiempo para yekpajtis. No ijkon tejuan, moneki tikauaskej maj pano tiempo para kuali timomachiliskej uan uelis titetapojpoluiskej ika nochi toyolo (Ecl. 3:3; 1 Ped. 1:22). Ojpatika, xikontataujti Jehová maj mitsonpaleui xiontetapojpolui. w25.02 16, 17 § 8-11

Seki taman tein timomachtijkej yejua ke moneki timoyolpataskej, titakuaujtamatiskej ke moneki se moauis uan ke mikemej oksepa nemiskej (Heb. 6:​1, 2). Nochin akin tikchiuaj kemej Cristo moneki kuali tikajsikamatiskej nejin. Yejua ika, Pedro ika tajtoj nejin keman kinnojnotsak miakej itech Pentecostés (Hech. 2:​32-35, 38). Moneki tikneltokaskej nochi nejin tamachtilismej para uelis timochiuaskej imomachtijkauan Cristo. Yejua ika Pablo kijtoj ke komo amo tikneltokaj ke mikemej oksepa nemiskej amo uelis tikijtoskej ke tikneltokaj Cristo (1 Cor. 15:​12-14). Yejua ika, amo sayoj moneki tikmatiskej seki taman tamachtilis. No onkak okseki taman tamachtilis tein ouij se kiajsikamatis tein kipia Biblia. Amo sayoj moneki timomachtiskej itanauatiluan, ta no moneki tikmatiskej tein yejuatsin kiita ke kuali yetok uan tein amo, porin nejin techpaleuia maj tikajsikamatikan keniuj tanemilia. Yejua ika, moneki timomachtiskej Biblia, itech titanemiliskej uan timochikauaskej tikchiuaskej tein ompa timomachtiaj. Nejon techpaleuia maj tikixpejpenakan tein kiyolpaktia Jehová. w24.04 5 § 12, 13

Dios kielnamiktij Jonás ke akin nemiaj Nínive ‘yejuan nion no kimatiaj toni kuali uan toni amo kuali’ (Jon. 1:​1, 2; 3:10; 4:​9-11). Satepan, Jesús ika tajtoj tein kichiujka Jehová keman moyolpatakej akin nemiaj Nínive para kinextis ke kichiua tein kuali yetok uan ke teiknelia. Sayoj ke “keman Dios taixejekos”, ¿toni kinpanos akin nemiaj Nínive keman oksepa nemiskej? Jesús kijtoj ke ‘moixtalis tein kinnamikis kiseliskej’ akin oksepa nemiskej (Juan 5:29). Jesús ika tajtojtoya keman taixyekantos mil xiujmej, keman “Dios kichiuas maj oksepa nemikan akin yolmelaujkej uan akin amo yolmelaujkej” (Hech. 24:15). Satepan ke oksepa nemiskej akin amo yolmelaujkej, Jehová uan Jesús kinitstoskej ox tatakamatij uan kichiuaj tein momachtiaj para “kiixtaliskej tein kinnamiki kiseliskej”. Komo se akin nemia Nínive oksepa nemi, sayoj ke amo kiueyichiua Jehová, yejuatsin kiixpolos (Is. 65:20). Sayoj ke komo kiixtalia kiueyichiuas Jehová, amo teyi kipanos uan uelis nemis nochipaya (Dan. 12:2). w24.05 5 § 13, 14

Jesús teikneliaya ijkon kemej kichiua iTajtsin (Juan 14:9). Kemej kinnojnotsaya oksekin uan kemej mouikaya iniuan, kinextij ke Jehová kiniknelia uan kintasojta akin tajtakolejkej uan kineki kinpaleuis. Jesús kinpaleuiaya maj mopatakan akin tajtakolchiuayaj uan maj kinekinij kitojtokaskej (Luc. 5:​27, 28). Jesús kimatia ke yaya motemaktiti para maj kimiktikan. Miakpa kiniluij itatojtokakauan ke kiixnamikiskiaj uan ke kikoujpampiloskiaj (Mat. 17:22; 20:​18, 19). No kimatia ke inemilis tein kitemakaskia kichiuaskia maj amo titajtakolejkejok. Uan no tamachtij ke satepan ke kimiktiskiaj kichiuaskia maj iuan motokikan “akin pouij itech nochi tataman xolalmej” (Juan 12:32). Akin takuaujtamatiskiaj iuan Jesús uan kichiuaskiaj kemej yejua, ueliskia kiyolpaktiskej Jehová uan ‘kinmakixtiskiaj imako tajtakol’ (Rom. 6:​14, 18, 22; Juan 8:32). Jesús uelik kichiuak nejin porin katka yolchikauak uan motemakak maj kiteltajyouiltikan uan maj kimiktikan (Juan 10:​17, 18). w24.08 5 § 11, 12

No xikonnemili keniuj tionmomachiliaya keman mitsonmachtijtoyaj Biblia. Tionmomachtij ke Jehová mitsontasojta, ke kineki xikonueyichiua iniuan oksekin tokniuan, ke motenkaua kiixpolos nochi tein techtajyouiltia uan ke itech xochital kichiuas maj oksepa nemikan akin tikontasojta (Mar. 10:​29, 30; Juan 5:​28, 29; Rom. 8:​38, 39; Apoc. 21:​3, 4). Semi tikonuelitak nochi nejon tein tionmomachtij (Luc. 24:32). Tikontasojtak tein tionmomachtijtoya uan tikonnekia tikontapouis nochin (no xikonita Jeremías 20:9). Komo yekmelauj tiktasojtaj tein tamachtia Biblia, tiknekiskej ika titajtoskej (Luc. 6:45). No timomachiliaj kemej tokniuan itech yekinika siglo akin kijtojkej: “Tiksentokaskej ika titajtoskej tein tikitanij uan tikakinij” (Hech. 4:20). Semi tiktasojtaj tein Biblia tamachtia uan tiknekij tikintapouiskej nochin akin tiueliskej. w24.05 15 § 5; 16 § 7

Tiitekitikauan Jehová titanojnotsaj porin tiktasojtaj toTajtsin uan tiknekij maj oksekin kiixmatikan. Sayoj ke oksekin kiitaj ke ouij porin semi pinauaj uan kimachiliaj ke amo uelis tamachtiskej. Oksekin amo kuali momachiliaj takalpanoskej keman amo akin kinyoleuj. Sekin mouij maj kiniluikan ke amo kinekij kinkakiskej. Uan oksekin kinmachtijkej maj amo takualantikan. Sayoj ke kinouijkisa kinnojnotsaskej akin amo kinixmatij. ¿Uan tejuatsin? ¿Mitsonouijkisa tionyolpakis keman tiontanojnotsa? Komo ijkon, amo xionmosenkaua. Nejon kinextia ke tionyolyemanik, ke amo tikonneki maj mitsonueyitalikan, uan ke amo tikonneki tionmotajtolteuis iniuan oksekin. Xa amo no tikonuelita maj mitsonixtopeuakan, okachiok komo sayoj tikonneki tiontapaleuis. MoTajtsin kiajsikamati keniuj tionmomachilia, uan kineki mitsonpaleuis (Is. 41:13). w24.04 14 § 1, 2

Ijkon kemej tikonixtajtoltijtias, amo xikonixtali tikonchiuas sepasan nochi tein tikonixtajtoltia, ta yekinika uelis tikonchiuas sayoj se oso ome taman. Xikonchiua nejin: xikonijkuilo seki taman tein moneki okachi kuali tikonchiuas, xikonixpejpena se oso ome taman tein tikonuelitaskia ika tionpeuas uan satepan xikonchiua okseki taman tein poliuis. ¿Toni yekinika uelis tikonchiuas? Xa yekinika ueliskia tikonixtalis tikonchiuas tein okachi amo ouij oso tein tikonitas ke okachi mitsonpoloua xikonpata. Keman tikonixtalisya toni yekinika tikonneki tikonchiuas, xikontemo tamachtilis itech toamaixuan. Xikontataujti Jehová uan xikonilui maj mitsonpaleui ‘xikonnejneki tikonchiuas nochi tein kiuelita’ (Filip. 2:13). Satepan xikonchiua tein tionmomachtij. Keman tikonitas ke uelik tikonchiuak, tikonnekis tikonchiuasya okseki taman. Nejon mitsonpaleuis maj satepan okachi ijsiujka ueli xikonpata okseki taman tein no tikonixtalij tikonchiuas. w24.09 6 § 13, 14

Xa semi timotekipachoua porin tein tikchiujka kinyolkokoj oksekin. ¿Toni uelis tikchiuas? Xikinilui maj mitstapojpoluikan uan xikchiua tein mitspaleuis oksepa kuali ximouika iniuan. Xikilui Jehová maj kinpaleui akin tikinyolkokoj. Yejuatsin uelis namechpaleuis xiksentokakan xiktekitilikan uan oksepa xiyolseujtokan. Maj mitsmachti teisa tein amo kuali tein tikchiuak uan xikaua maj Jehová kiita keniuj uelis okachi kuali tiktekitilis. Xikelnamiki tein kipanok tanauatijkej Jonás. Yejua amo yajki Nínive kemej Jehová kinauatijka, ta choloj uan yajki oksekopa. Jehová kimelauak uan tanauatijkej momachtij miak taman (Jon. 1:​1-4, 15-17; 2:​7-10). Jehová kisentokak kitekimakak Jonás, uan oksepa kititanik maj youi Nínive, uan Jonás niman tatakamatik. Maski semi kiyolkokouaya tein kichiujka, nejon amo kitsakuilij maj kichiua tein Jehová kinauatijka (Jon. 3:​1-3). w24.10 8, 9 § 10, 11

Jehová amo sayoj techiluia ke amo teyi tiktauikiliajok, ta no ke senkis kiixpoloua totajtakoluan oso senkis techtapojpoluia. Maj itech titanemilikan keman itech se amat kitacharouaj tein aksa tauika. Maski kitacharouaj, kisentoka moita kanachi tauikaya. Itech nejin versículo amo kijtoua ke sayoj kitacharouaj teisa, ta ke senkis kiixpolouaj. Maj tikelnamikikan ke tein ika tajkuilouayaj ne uejkauj uelia ijsiujka kipojpolouayaj ika at. Yejua ika keman kiixpolouayaj tein aksa tauikaya, senkis ixpoliuia. Amo moitayaok nion teyi, uan amo akin kimatia tein ompa ijkuiliujtoya. Kemej yeskia amo keman tauikaskia teisa. Semi tiktasojkamatij porin keman Jehová techtapojpoluia, senkis kiixpoloua totajtakoluan (Sal. 51:9). w25.02 10 § 11

Komo aksa kinemilia tein amo kuali de tejuan oso techchiuilia tein amo kuali, uelis titakuaujtamatiskej ke Jehová nochi kimati. Kemej tikmatij ke Jehová kiyektalis nochi, nejon techpaleuia maj titaxikokan keman techchiuiliaj tein amo kuali. Keman titakuaujtamatij iuan Jehová uan tikchiaj maj yejua kimelaua nochi, amo tikualantokej nion titetauelitstokej. Komo tikualanij xa tikchiuaskej tein amo kuali, amo tiyolpakiskejok uan amo kuali timouikaskejok iuan Jehová. Amo ueli senkis tikchiuaj kemej Jesús porin kemansa xa tikchiuaskej oso tikijtoskej teisa tein satepan techyolkokos (Sant. 3:2). Uan seki taman tein techchiuilijkej xa kisentokas techtajyouiltis uan techyolkokos hasta keman Dios kiixpolos nochi tein amo kuali. Komo ijkon mitsonpanotok, xikonelnamiki ke Jehová kimati keniuj tionmomachilia. Uan Jesús, akin no tajyouij porin kichiuilijkej tein tel amo kuali, kiajsikamati nochi tein tikonmachilia (Heb. 4:​15, 16). Semi tiyolpakij porin Jehová techyolmajxitia ika Biblia kampa techiluia toni tikchiuaskej keman techchiuiliskej tein amo kuali. w24.11 6 § 12, 13

Para uelis ‘tinemiskej nochipaya’, moneki titakuaujtamatiskej iuan Jesús. Uan Jesús ipa ika tajtojkaya nejon (Juan 3:​16-18, 36; Juan 17:3). Miakej judíos amo kineltokayaj ke monekia takuaujtamatiskej iuan Jesús. Yejua ika kitajtanijkej: “¿Toni milagro tikchiuati para maj tikitakan uan maj timitsneltokilikan?” (Juan 6:30). Yejuan kiluijkej ke akin nemiaj keman Moisés nemia, Jehová kinmakaka maná para takuaskej uan yejua nejon tein kikuayaj mojmostaj (Neh. 9:15; Sal. 78:​24, 25). Nejin kinextia ke yejuan sayoj kinekiaj maj kintamakakan. Yejua ika amo kitajtanijkej Jesús maj kinmelauiliani keman ika tajtoj “yekmelauj takual tein ualeua ne iluikak” uan nejon amo katka kemej maná porin nejon takual kichiua maj se nemi nochipaya (Juan 6:32). Yejuan sayoj kinekiaj maj kinmakakan tein kinpolouaya, yejua ika amo kichiujkej cuenta tein Jesús kinekia kinmachtis. w24.12 5, 6 § 10, 11

Itech escuela mokonetsin kimachtiskej keniuj chijchiujtok seki taman tein onkak. Xa kemej se kouit kisa imakoujyo uan itech imakoujyo kisa okseki imakoujyo uan ijkon kijkistiouij uan moxexelojtiouij hasta tein okachi tsikitsitsin, nejin moixmati kemej fractales. Uan no ijkon kichijchiujtok okseki taman tein onkak. Sayoj ke, ¿akoni kichijchiuak nejin taman tein tel kualtsitsin? Komo mokonetsin okachi momachtia tein Jehová kichijchiuak, xa kipaleuis maj okachi takuaujtamati ke yejuatsin kichijchiuak nochi. Keman mokonetsin moskaltijtias, tejuatsin uelis tikonpaleuis maj kiajsikamati keyej moneki tikchiuaskej tein Dios technauatia. Para ijkon tikonchiuas uelis tikontajtanis nejin: “Komo Dios techchijchiuak, ¿tiknemilia ke yejuatsin kimati toni moneki tikchiuaskej para uelis tiyolpakiskej?”. Satepan uelis tikonmelauilis ke Dios techmakak Biblia para techmachtis keniuj uelis tiyolpakiskej. w24.12 16 § 8

Jehová kichiuak maj tatitanil Pablo kinijkuilouiliani tokniuan de Corinto ke monekia kikalankixtiskej de nechikol akin tajtakolchiujka uan amo moyolpataya (1 Cor. 5:13). ¿Toni amo monekia kichiuaskej tokniuan? Pablo kiniluij maj amo iuan mouikanijok nion maj iuan tamajseuanij (1 Cor. 5:11). Keman titakuaj iuan aksa ipa iuan titajtouaj uan okachi iuan timouikaj. Yejua ika Pablo kiniluij maj amo mouikanijok iuan nejon takat para amo no kichiuaskiaj kemej yejua (1 Cor. 5:​5-7). Nejon no kipaleuiaya akin tajtakolchiuak maj kiitani ke semi kiyolkokojka Jehová, maj mopinaujmatini uan maj moyolpatani. w24.08 15 § 4, 5

Itech tonal keman Dios kiixpolouaya inintajtakoluan, tayekankatiopixkat kintemaktiaya tapialmej para kinpaleuis israelitas uan nejin mochiuaya sepa itech xiuit. Maski ijkon, tapialmej amo senkis kiixpolouaya inintajtakoluan porin tonemilis ipa kipia okachi ipatiuj ke den tapialmej. Sayoj ke Jehová kintapojpoluiliaya inintajtakoluan israelitas nochipa keman moyolpatayaj uan kitemakayaj tein kiniluiaya (Heb. 10:​1-4). Tein kitemakayaj itech tonal keman Dios kiixpolouaya inintajtakoluan kinelnamiktiaya ke katkaj tajtakolejkej. Maski ijkon, ¿toni kichiuak Jehová para senkis techtapojpoluilis totajtakoluan? Kichiuak maj iKonetsin ‘sayoj sepa motemaktiani para kinkixtilis inintajtakoluan miakej’ (Heb. 9:28). Jesús kitemakak inemilis uan ijkon taxtauak “para kinmakixtis miakej” (Mat. 20:28). w25.02 4 § 9, 10

“Namejuan nankinekij nankichiuaskej tein kuali, sayoj ke namonakayo tein tajtakolej amo chikauak” (Mat. 26:41b). Ika nejin tajtolmej, Jesús kinextij ke kiajsikamatia ke timopolouaj porin titajtakolejkej, sayoj ke no kinekik technejmachtis ke amo moneki tiknemiliskej ke nochipa uelis tikchiuaskej tein kuali yetok. Tepitsin achto ke Jesús kijtoskia nejin, itatitaniluan kijtojkaj ke amo keman kikauaskiaj (Mat. 26:35). Yejuan kinekiaj kichiuaskej tein kuali, sayoj ke amo momakayaj cuenta ke keman kipiaskiaj ouijkayomej okachi ouij kinkisaskia amo tajtakolchiuaskej. Yejua ika Jesús kiniluij tajtolmej tein axkan timomachtiaj. ¿Toni kichiujkej tatitanilmej keman kikitskijkej Jesús para kitsakuaskej? Yejuan moujkej uan amo ijsatoyaj kemej Jesús kiniluijka. Uan kichiujkej tein kijtojkej ke amo keman kichiuaskiaj: kikaujteujkej Jesús uan cholojkej (Mat. 26:56). w24.07 14 § 1, 2

Keman Adán uan Eva tajtakolchiujkej amo kuali mouikakejok iuan ininTajtsin, Jehová. Achto ke tajtakolchiuaskiaj, Adán uan Eva pouiaj iniuan ichankauan Dios (Luc. 3:38). Sayoj ke keman amo kitakamatkejok Jehová, amo ueliaok pouiaj iniuan ichankauan. Nejon panok achto ke kinpiaskiaj ininkoneuan (Gén. 3:​23, 24; 4:1). Yejua ika, kemej nion semej tiikoneuan ueliskia tipouiskej iniuan ichankauan Jehová, monekia techpaleuiskej maj oksepa ueli timouikakan iuan (Rom. 5:11). Kemej timouejkatilijkej de Dios monekia oksepa kuali iuan timouikaskej. Semi kualtsin porin yejua Jehová akin yekinika kitemoj maj oksepa kuali iuan timouikakan. ¿Keniuj kichiuak? Kemej titajtakolejkej, Jehová kiixtalij keniuj techmakixtis para maj ueli kuali iuan timouikakan. Para kiixtauas tein Adán kipoloj, Jehová kitemakak teisa tein no kitelpia ipatiuj kemej tein mopolojka. w25.02 3, 4 § 7, 8

Tatitanil Pablo kijtoj: “Nankitatsakuiltijkejya nejon takat. Amo xikixtopeuakanok” (2 Cor. 2:​5-8). Nejin kijtosneki ke keman takat akin tajtakolchiujka porin auilnemia iuan itakpanan kikalankixtijkaj de nechikol, kiitak ke monekia maj moyolpata uan satepan ke moyolpataskia tokniuan amo monekiaok kiixtopeuaskej (Heb. 12:11). Satepan, Pablo kiniluij tayekananij ke monekia kikauaskej maj oksepa poui itech nechikol takat akin moyolpatakaya, yejua kijtoj: “Xiktapojpoluikan ika nochi namoyolo uan xikyolseuikan”. Uan no kijtoj: “Namechyolchikaua xiknextilikan ke nankitasojtaj”. Pablo amo sayoj kinekia maj kikauanij maj oksepa pouini itech nechikol, ta maj kinextianij ika tein kijtouayaj uan kichiuayaj ke senkis kitapojpoluijkajya uan kitasojtayaj. Nejin kipaleuiskia takat akin moyolpataka maj kiita ke tokniuan yolpakiaj porin oksepa pouia itech nechikol. w24.08 15 § 4; 16, 17 § 6-8

Tatitanil Pablo kuali kimatia toni monekia kichiuaskej para taxikoskej. Yejua ika, kinelnamiktij ke amo monekia inintech takuaujtamatiskej, ta iuan Jehová. Yejua moyolchikauak uan kijtoj: “Jehová nechpaleuia. Amo nimouis” (Heb. 13:6). Axkan miakej tokniuan no kintajyouiltijtokej. Uelis tikinnextiliskej ke tikintasojtaj uan tikinpaleuiaj keman ininka timotataujtiaj, uan komo ueli, keman tikinmakaj tein kinpoloua. Biblia kijtoua: “Nochin akin kinekiskej kiueyichiuaskej Dios kemej itatojtokakauan Cristo Jesús, no kintajyouiltiskej” (2 Tim. 3:12). Nejin kijtosneki ke tinochin moneki tikmatiskej toni tikchiuaskej keman techtajyouiltiskej. Yejua ika, moneki senkis titakuaujtamatiskej iuan Jehová uan tikneltokaskej ke yejua techpaleuis maj tikxikokan tein yeski ouijkayot tein tikpiaskej. Yejua kinpaleuis itekitikauan maj yolseujtokan keman okachi monekis (2 Tes. 1:​7, 8). w24.09 13 § 17, 18

¿Toni kinpaleuij maj moauikan akin nemiaj Corinto? (2 Cor. 10:​4, 5). Dios kinpaleuij ika iTajtol uan ichikaualis maj kipatakan kemej nemiaj (Heb. 4:12). Akin nemiaj Corinto kuali kiselijkej kuali tanauatilmej uan amo kichiuayajok seki taman tein amo kuali, kemej tauanaskej, tachtekiskej uan auilnemiskej iniuan inintakaikniuan oso ininsiuaikniuan (1 Cor. 6:​9-11). Sekin akin nemiaj Corinto, monekik kipataskej miak taman para ueliskia moauiskej, sayoj ke amo keman kinemilijkej ke amo ueliskia kichiuaskej. Yejuan semi mochikaujkej para yaskej itech ‘ojti kampa takopitsyan tein teajxitia kampa se nemis nochipaya’ (Mat. 7:​13, 14). ¿Uan tejuatsin? ¿Tionmochikaujtok tikonkauas seki taman tein amo kuali yetok? ¡Amo xionmosenkaua! Xikontajtani Jehová maj mitsonpaleui ika ichikaualis para uelis tikonixtopeuas tein amo kuali tein tikonnejneki tikonchiuas. w25.03 6 § 15-17

Jehová motenkaua ke kintelpaleuis maj mochiuakan tamatinij nochin akin kitajtaniskej ‘uan amo kualanis iniuan’. Komo timochiuaj titamatinij techpaleuis maj tikmatikan ox kiyolpaktis oso amo tein tiknekij tikixpejpenaskej. Satepan ke tikontataujtis Jehová maj mitsonpaleui, kuali xikonita keniuj mitsonnankilia. Xikonnemili nejin, komo tionyajtok tionnemiti uan tionmopoloua, xa tikontajtanis maj mitsonpaleui aksa akin ompa nemi. Xa ompa tionmochiaskia hasta maj mitsonilui toni tikonchiuas uan kuali tikonkakiskia toni mitsoniluia. No ijkon panoua keman tikontajtania Jehová maj mitsonpaleui xiontamatkej, moneki kuali tikonkakis toni mitsoniluia uan tikontemos tamachtilis itech Biblia tein ika tajtoua tein mitsonpanotok. Maj oksepa itech titanemilikan iluit tein mitsonyoleujkej uan moneki tikonitas ox tionyas oso amo. Keman tikonitas ox tionyas, moneki tikontemos toni kijtoua Biblia den iluimej kampa eliuistij, tein uelis panos komo timouikaj iniuan akin amo yolkualmej uan ke moneki tiktayekanaltiskej iTaixyekanalis Dios uan amo tein tejuan tikuelitaj (Mat. 6:33; Rom. 13:13; 1 Cor. 15:33). w25.01 16 § 6, 7

Tein kijtoj Isaías kinextia keniuj tel taman se nemi keman se kiueyichiua Jehová iniuan oksekin uan keman amo ijkon tikchiuaj. Jehová kinmaka itekitikauan nochi tein moneki para maj kisentokakan kiueyichiuakan. Techpaleuia ika ichikaualis, iTajtol uan tataman tamachtilis tein mokixtia itech Biblia para maj kemej yeskia titakuakan, titatayikan uan tiyolpakikan (no xikonita Apocalipsis 22:17). Akin amo kiueyichiuaj Dios iniuan oksekin kemej yeskia “mayanaj”, “amikij” uan “mopinaujtiaj”. Amo kichiuaj tein kinpaleuis maj kuali mouikakan iuan Dios (Amós 8:11). Jehová kinmakaskia ixolal miak takual tein okachi monekia (Joel 2:​21-24). Joel kinekia kijtos ke Jehová kinmakaskia ixolal nochi tein kinpoloskia uan no tein kinpaleuiskia maj iuan motokikan. ¿Keniuj kichiua axkan? Ika Biblia, toamaixuan, jw.org, nechikolmej uan uejueyi nechikolmej. Nejin techpaleuia maj kuali timomachilikan uan maj tikpatakan tein moneki. w24.04 21 § 5, 6

¿Keniuj uelis tikiluis ke tikneki tiyeski tiinovio oso tiinovia? Xa ueliskia iuan timonojnotsas kampa yetokej miakej, ika teléfono oso ika videollamada. Xikyekilui ke mitsyolnotsa uan ke tikuelitaskia okachi tikixmatis (1 Cor. 14:9). Komo mitsiluia ke moneki kinemilis, xikilui ke tikchias uan ke amo moneki niman mitsnankilis (Prov. 15:28). Uan komo mitsiluia ke amo, xikpoujkaita tein kimachilia. ¿Toni uelis tikchiuas komo aksa mitsiluia ke kineki okachi mitsixmatis? Xikelnamiki ke monekik moyolchikauas para mitsiluis tein kimachilia, yejua ika xikpoujkaita uan kuali xiknojnotsa. Komo moneki tiknemilis, xikilui. Sayoj ke amo semi xiuejkaua (Prov. 13:12). Komo amo tikneki iuan timoixmatis, xikyekilui uan kuali xiknojnotsa. Komo tikneki iuan timoixmatis, xikilui tein tikmachilia uan tein nankinekij maj mochiua keman nanyeskij novios. Xa tataman nantanemiliskej porin tataman namechiskaltijkej uan nantatamamej. w24.05 23, 24 § 12, 13

Keman David xa katkaok telpoch, kinkalpanoto soldados israelitas. Kiitak ke soldados moujtoyaj porin se ueyi takat filisteo akin monotsaya Goliat kiniluijtoya: “¡Xinechualtitanilikan se takat para maj timoteuikan!” (1 Sam. 17:​10, 11). Soldados semi kimouiliayaj Goliat porin kiitayaj ke tel ueyi katka uan kinmojmoujtiaya tein kijtouaya (1 Sam. 17:​24, 25). Sayoj ke David amo mouik porin kimatia ke keman Goliat kinkejkelojtoya soldados de Israel, tein melauj kiixnamiktoya “Dios akin nochipa yoltok” (1 Sam. 17:26). David nochipa kielnamikia Jehová, takuaujtamatia ke yejuatsin kipaleuiskia ijkon kemej achto kipaleuijka keman kinyekpiaka ichkamej. Uan ijkon panok, Jehová kipaleuij maj kiixnamiki Goliat uan maj kitani (1 Sam. 17:​45-51). w24.06 21 § 7

Maj titanemilikan itech nochi tein Jehová techmakani uan keniuj tinemiskiaj komo amo tiktekitiliskiaj. Komo ijkon tikchiuaj amo keman tikauaskej Jehová uan no tikijtoskej kemej salmista: “Nejua, semi kuali maj nimotoki iuan Dios” (Sal. 73:28). Uelis tikixnamikiskej tein yeski ouijkayot porin ‘tiktekitiliaj Dios akin melauak uan nochipa yoltokʼ (1 Tes. 1:9). Yejua yekmelauj toka motekipachoua uan nochipa techpaleuis. Ijkon kichiuak iniuan itekitikauan ne uejkauj uan ijkon kisentokas kichiuas. Amo uejkaua mochiuati tetsaujkatajyouilis, sayoj ke ijkuak Jehová amo techsenkauas. “Yejua ika, maj amo timouikan, ta maj tikijtokan: ‘Jehová nechpaleuia. Amo nimouis’” (Heb. 13:​5, 6). w24.06 25 § 17, 18

Biblia ininka tajtoua panoua 40 takamej akin tekiuajtikej ompa Israel uan kijtoua toni kichiujkej sekin. Sekin akin katkaj yolmelaujkej no kichiujkej tein amo kuali. Maj ika titajtokan David. Tikmatij ke yejua kuali taixyekanak porin Jehová kijtoj: “Yejua nochipa kitakamatik tein nitanauatia, kiuelitaya nechtekitilis uan kichiuak tein nechyolpaktia” (1 Rey. 14:8). Sayoj ke motekak iuan se siuat akin kipiaya itakatsin uan tanauatij maj kimiktikan itakauj nejon siuat keman yaskiaj moteuitiuij (2 Sam. 11:​4, 14, 15). Biblia no kijtoua seki taman tein kuali tein kichiujkej seki tekiuanij akin amo yolkualmej katkaj. Maj tikitakan tein kichiuak Rehoboam. Jehová kijtoj ke “kichiuak tein amo kuali” (2 Crón. 12:14). Sayoj ke, keman Jehová kiluij maj amo kinteui majtakti uejueyi kalyetonij ompa Israel uan maj kinkaua maj kiixpejpenakan akoni kinixyekanaskia, yejua kitakamatik Jehová. Uan no, kichiuak maj itech xolalmej amo kalakinij akin kinixnamikiskiaj (1 Rey. 12:​21-24; 2 Crón. 11:​5-12). ¿Keniuj Jehová kiixtaliaya akonimej katkaj yolkualmej uan akonimej amo? Jehová kiitaya komo kitasojtaya ika nochi iyolo, komo yekmelauj moyolpataya keman tajtakolchiuaya uan komo kiueyichiuaya kemej yejuatsin kinekia. w24.07 20 § 1-3

¿Toni kichiuaj tayekananij keman akin tel tajtakolchiuak ayamo kiajxitia 18 xiujmej? Oloch tayekananij moneki kinixpejpenaskej ome tokniuan tayekananij para maj iuan mosentilikan, uan no iuan itatuan akin itaixpantijkauan Jehová. Tokniuan tayekananij kitemoskej kimatiskej toni kichiuanijya tetatmej para kipaleuiskej ininkonetsin maj kipata tein kichiujtok uan maj moyolpata. Komo telpoch oso ichpoch kinkaki itatuan uan mokaua maj kipaleuikan, nejon ome tayekananij xa kiixejekoskej ke amo monekiok maj moixtali tayekananij akin iuan mosentiliaj se tajtakolchiujkej. Tayekananij kimatij ke Jehová kinkaujtok tetatmej maj kinmelauakan ininkoneuan kemej yejuatsin kineki (Deut. 6:​6, 7; Prov. 6:20; 22:6; Efes. 6:​2, 3). Satepan, tayekananij kemansa moneki tajtoskej iniuan tetatmej para kiitaskej ox kisentokaj kipaleuiaj ininkonetsin. ¿Toni kichiuaj tayekananij keman telpoch oso ichpoch akin moauijya kisentoka kichiua tein amo kuali? Kemaj ijkon panoua, tayekananij akin kipaleuiaj se tajtakolchiujkej mosentiliskej iuan yejua uan itatuan akin itaixpantijkauan Jehová. w24.08 24 § 18

Sayoj ke okachi tiyolpakij keman tejuan tikinpaleuiaj oksekin. Kemej Jehová ijkon techchijchiuak, tejuan uelis tikchiuaskej tein techpaleuis maj okachi tiyolpakikan. Komo tiktemouaj keniuj tikinpaleuiskej oksekin, okachi tiyolpakiskej. ¡Semi kualtsin kemej Jehová techchijchiuak! (Sal. 139:14). Kemej Biblia tamachtia ke akin kiuelitaj tepaleuiskej okachi yolpakij, amo ouij techkisa tikajsikamatiskej keyej Jehová yejua “Dios akin yolpaki” (1 Tim. 1:11). Jehová yejua akin yekinika kinpaleuij oksekin, uan amo akin okachi kitemaka ke yejuatsin. Kemej kijtoj tatitanil Pablo, “yejua kichiua maj tiyoltokan, maj timoolinikan uan maj tinemikan” (Hech. 17:28). Uan no, Jehová techmaka “nochi tatiochiualismej tein kuali uan tein amo teyi kinpoloua” (Sant. 1:17). ¿Toni uelis tikchiuaskej komo tiknekij okachi tiyolpakiskej keman tikinpaleuiskej oksekin? Kemej tikitaskej itech nejin tamachtilis, uelis tikchiuaskej kemej Jehová (Efes. 5:1). w24.09 26 § 1-4

Sekin tokniuan tapaleuianij xa kinemiliskej ke amo keman uelis mochiuaskej tayekananij porin moneki kichiuaskej miak tamanok. Sayoj ke moneki kielnamikiskej ke nion Jehová nion inechikol kichiaj maj tel kuali kichiuakan nochi nejin (1 Ped. 2:21). Uan no, ichikaualis Jehová kinpaleuis maj ueli kichiuakan nejin tekit (Filip. 2:13). Uan tejuatsin, ¿tikonuelitaskia okachi kuali tikonchiuas oso tikonnextis seki taman tein timomachtijkej? Komo ijkon, xikontataujti Jehová, xikontemo tamachtilismej uan xikontajtani tayekananij keniuj uelis okachi kuali tikonchiuas teisa. Xikonilui Jehová maj mitsonmachti uan maj mitsonpaleui para okachi tikontekitilis uan tiontapaleuis itech nechikol (Is. 64:8). Jehová mitsontatiochiuis komo tionmochikaua tionmochiuas tayekankej. w24.11 25 § 17, 18

Maski miak xiujmejya tiktekitilijtokej Jehová, amo keman moneki tiknemiliskej ke technamiki maj techtapojpolui. Yejuatsin kielnamiki nochi tein kuali tein tikchiuanij para tiktekitiliskej. Sayoj ke Jehová amo techmakak iKonetsin para ika techtaxtauis keman tiktekitiliaj, ta kichiuak porin kinekia techtayokolis. Yejua ika amo kuali yeskia komo tiknemiliskiaj ke technamiki maj Jehová techtapojpolui porin tiktekitilijkejya, komo ijkon tiknemiliskiaj kemej yeskia tikijtojtoskiaj ke amo monekia maj Cristo toka momikili (no xikonita Gálatas 2:21). Tatitanil Pablo kimatia ke maski semi kitekitiliskia Jehová, nejon amo kichiuaskia maj Dios kitapojpolui. Komo ijkon, ¿keyej semi mochikauaya kitekitilis? Porin kinekia kinextilis Jehová ke semi kitasojkamatiliaya maj kiikneliani uan porin katka kualtakat iuan (Efes. 3:7). Tejuan tiksentokaj tiktekitiliaj Jehová amo porin tiknekij maj techikneli uan maj yolkuali touan, ta tiknekij tiknextiliskej ke tiktasojkamatiliaj porin techiknelia. w25.01 27 § 5, 6