Julio

Sekin itekitikauan Jehová amo ueli semi kitekitiliajok kemej kinekiskiaj porin xiuejkejya, mokokouaj oso amo ueli kichiuaj seki taman. Yejua ika xa kimachiliaj ke Jehová amo kinpatiuitaok uan motajtaniaj: “¿Kiita Jehová ke ueliok niktekitilia?”. Akin kijkuiloj Salmo 71 no ijkon momachiliaya. Yejua kiluij Jehová: “Amo xinechkaua keman tantokya nochikaualis” (Sal. 71:​9, 18). Sayoj ke maski ijkon momachiliaya, kimatia ke komo kisentokaya kitekitiliaya Jehová, yejuatsin kiixyekanaskia uan kipaleuiskia. Salmista kiitaka ke Jehová semi yolpaki keman kiita ke sekin mochikauaj kitekitiliskej maski amo ueli kichiuaj nochi tein kinekiskiaj (Sal. 37:​23-25). Komo tejuatsin tionxiuejya, xikonnemili keniuj mitsonita Jehová, yejuatsin uelis mitsonpaleuis xikonsentoka xikontekitili maski amo ueli tikonchiuaok miak taman (Sal. 92:​12-15). Amo sayoj xikonnemilijto tein amo ueli tikonchiua, ta xikonnemili tein kemaj ueli tikonchiua. w24.10 28 § 14-16

Tokniuan akin amo kuali taixejekouaj kinouijkisa kuali taixpejpenaskej keman amo moajsi itech Biblia se tanauatil tein kijtoua toni moneki kichiuaskej. Uelis kinemiliskej ke uelis kichiuaskej tein kinekiskej. Oksekin kinemiliskej ke moneki moixtalis se tanauatil, maski amo moneki. Kemej ijkuak tokniuan de Corinto kiluijkej tatitanil Pablo maj kiixtaliani ox ueliskia kikuaskej takual tein kinmaktilijkaj tatadiosmej. Pablo amo kiniluij toni monekia kichiuaskej, ta kinmelauilij ke sejse monekia kiixpejpenas toni kichiuas ijkon kemej momachtijka. Kinelnamiktij seki tamachtilis tein kipia Biblia tein kinpaleuiskia maj kuali taixpejpenanij uan tein amo kinuetsiltiskia oksekin (1 Cor. 8:​7-9). Pablo kinmachtijtoya akin nemiaj Corinto maj kikuinij iTajtol Dios para maj kuali taixpejpenanij uan maj amo kichiuanij tein oksekin kichiuayaj. w24.04 5 § 14

Itech itonaluan Jonás, akin nemiaj Nínive uelik moyolpatakej. Uan no, maj tikelnamikikan ke Jesús kijtoj ke ‘kiixtaliskejok tein kinnamiki kiseliskej’ “akin kichiujkej tein amo kuali” (Juan 5:29). Yejua ika uelis tiknemiliskej ke xa oksepa nemiskej akin nemiaj Sodoma uan Gomorra. Xa sekin oksepa nemiskej uan tikinpaleuiskej maj kiixmatikan Jehová uan Jesús. Jehová nochipa kiita toyolo uan tein tiknemiliaj. Keman kiixtalis akoni oksepa nemis, kiitas ox kichiuak tein kuali oso amo para ‘kimakas tein kinamiki’ kiselis. Jehová kichiuas tein kuali keman kiixtalis ox aksa oksepa nemis oso amo, uan teiknelis keman kiitas ke monekis kichiuas. Yejua ika, komo Biblia amo teyi kijtoua, amo keman uelis tikijtoskej ke aksa amo oksepa nemis porin amo tikyekmatij. w24.05 5, 6 § 15, 16

Ijkon kemej panouanij xiujmej, iTajtol Dios kinyolchikauani itekitikauan keman kiitayaj ouij kichiuaskej se tekit. Maj tikitakan tein kipanok tanauatijkej Jeremías. Keman Jehová kinauatij maj tanojnotsati, yejua kinemilij ke amo ueliskia kichiuas uan kijtoj: “Nejua amo nikmati toni nikijtos, porin niokichpilok” (Jer. 1:6). ¿Toni kipaleuij maj ueli tanojnotsa? Tein Dios kiluij kiyolchikauak. Yejua kijtoj: “Itajtoluan katkaj […] kemej tit itech noomiyouan, uan monekia nitajtos” (Jer. 20:​8, 9). Ouij katka para Jeremías tanojnotsas kampa yetoya, sayoj ke tein monekia kitematiltis kiyolchikauak uan kipaleuij maj ueli tanojnotsa. Tejuan no techyolchikaua tein kijtoua iTajtol Dios. Tatitanil Pablo kiniluij ke komo kuali kiixmatiskiaj tein Dios kineki kinpaleuiskia maj nemikan “kemej moneki nemiskej akin kitekitiliaj Jehová” uan no ueliskia ‘kichiuaskej tein kuali’ (Col. 1:​9, 10). w24.04 14, 15 § 2-4

Sadoc nochipa kitakamatik Jehová maski tiotapixkat Abiatar kiixnamikik David, uan peuak kipaleuia Adonías, ikoneuj David, yejua kitemoaya kikuilis itaixyekanalis. David nochipa iuan takuaujtamatik Sadoc. Keman David kiluijkej tein Adonías yaya kichiuati kintemoj Sadoc, Natán uan Benaya para maj kiixtalikan Salomón kemej tekiuaj (1 Rey. 1:​32-34). No semi kipaleuij Sadoc tein kichiujkej okseki itekitikauan Jehová akin nochipa kitakamatkej Dios uan kipaleuijkej David, kemej Natán. Keman Salomón mochiuak tekiuaj, kiixtalij tiopixkat Sadoc para “maj kiixpata Abiatar” (1 Rey. 2:35). ¿Keniuj uelis tikonchiuas kemej Sadoc komo aksa akin semi tikontasojta kikaua Jehová? Xikonnexti ke sayoj tikonneki tikontakamatis yejuatsin (Jos. 24:15). Jehová mitsonpaleuis uan mitsonyolchikauas para tikonchiuas tein kuali yetok. Nochipa xikontataujti uan kuali xionmouika iniuan itekitikauan. Jehová semi kiyolpaktia keman kiita ke tikontakamati, uan semi mitsontatiochiuis (2 Sam. 22:26). w24.07 6, 7 § 16, 17

Itech Salmo 15:2 kijtoua ke akin kuali mouika iuan Dios “chipaujkanemi” uan “kichiua tein kuali”. Uan nochipa moneki ijkon tikchiujtoskej. Sayoj ke, ¿yekmelauj uelis ‘tichipaujkanemiskej’? Kemaj. Maski tinochin titajtakolejkej, komo timochikauaj tiktakamatiskej, yejuatsin kiitas ke tichipaujkanemij. Uan peua ijkon tikchiuaj keman timotemaktiaj iuan Dios uan timoauiaj. Ne uejkauj, amo sayoj porin aksa katka israelita kijtosnekia ke uelia yetoya ichan Jehová. Maski sekin kinotsayaj Dios, amo kichiuayaj tein kuali uan taixkajkayauayaj (Is. 48:1). Akin yekmelauj kitasojtayaj Jehová monekia kimatiskej uan kichiuaskej tein tanauatiaya. No ijkon axkan, komo tiknekij tikyolpaktiskej Dios amo sayoj moneki tipouiskej itech inechikol uan timoauiskej, ta moneki tiksentokaskej tikchiuaskej tein kuali. w24.06 9 § 4; 10 § 6

¿Keniuj Jehová kinextiani ke kiuelita techpaleuis? Yejuatsin techmaka tein techpoloua. Xa amo nochipa tikpiaj tein tikuelitaskiaj tikpiaskej, sayoj ke Jehová nochipa techmaka tein techpoloua, kemej tein tikuaskej, tein timotaliliskej uan kani tinemiskej (Sal. 4:8; Mat. 6:​31-33; 1 Tim. 6:​6-8). Jehová amo techmaka nejin porin kimachilia ke ijkon moneki kichiuas. Maj tikitakan tein Jesús kijtoj itech Mateo 6:​25, 26. Itech nejin versículos, Jesús ininka tajtoj totomej uan kijtoj: “Amo tatokaj nion kitekij tatok nion kisentiliaj”. Uan no kijtoj: “Sayoj ke namoTajtsin akin yetok ne iluikak kintamaka”. Satepan tajtanik: “¿Xe namejuan amo okachi nantayekantokej ke totomej?”. Komo yejuatsin kinyekpia tapialmej, tikyekmatij ke tejuan no techyekpias. Kemej Jehová yejua toTajtsin uan techtasojta, techmaka nochi tein techpoloua (Sal. 145:16; Mat. 6:32). w24.09 26, 27 § 4-6

Dios ika ichikaualis kinixtalia nejin takamej akin moauijkejya para maj kinpaleuikan tayekananij itech miak tataman tekit tein motelneki. Tokniuan tapaleuianij kitayekanaltiaj kuali mouikaskej iuan Jehová, kitasojtaj uan kitakamatij. Uan no, semi kintasojtaj tokniuan (Mat. 22:​37-39). ¿Toni moneki kichiuas se tokniuj takat para maj mochiua tapaleuijkej itech nechikol? Itech Biblia kijtoua toni moneki kichiuas se takat para mochiuas tapaleuijkej (1 Tim. 3:​8-10, 12). Komo tikonneki tionmochiuas tapaleuijkej para tikonpaleuis oksekin, moneki tionmomachtis tein Biblia tajtani uan tionmochikauas tikonchiuas. Sayoj ke achto moneki tikonitas keyej tikonneki ijkon tiontapaleuis. w24.11 15 § 4, 5

Sekin kijtouaj ke miakpa kiixtajtoltianij Biblia. Sayoj ke, ¿yekmelauj kineltokaj tein Biblia tamachtia uan nemij kemej tanauatia? Amo, tel miakej amo kitakamatij. Sayoj ke tejuan, akin tiktekitiliaj Jehová tikchiuaj tein kijtoua Biblia. Timochikauaj tikchiuaskej tein tayolmajxitia. Kemansa techouijmaka tikixtajtoltiskej tein kijtoua iTajtol Dios uan tikchiuaskej. Xa amo techajsi tiempo para tikixtajtoltiskej. Xa ijsiujka tikixtajtoltiaj uan amo itech titanemiliaj. Oso xa tiknekij timosenkauaskej porin tikitaj ke miak tamanok moneki tikpataskej. Sayoj ke komo ijkon mitsonpanoua, Jehová ipa mitsonpaleuis. Xikonkaua maj mitsonpaleui tein kijtoua iTajtol Dios. Keman okachi tikonixtajtoltis Biblia uan tikonchiuas tein kijtoua okachi tionyolpakis (Sant. 1:25). w24.09 7 § 15, 16

Keman titeltajyouiaj oso techpanoua teisa tein tel amo kuali, Jehová kikui ichikaualis para techyolseuis. Komo semi titajyouijtok uan titayokoxtok porin mitspanotok tein amo kuali, xiktapoui Jehová nochi tein tikmachilia. Uelis iuan titajtos keman tiknekis uan tiempo tein tiknekis (Sal. 86:3; 88:1). Xiksentoka xiktajtani maj mitsmaka ichikaualis. Xikyekmati ke yejuatsin mitskakis keman tiktataujtis. ¿Kemansa tikpanouani se ouijkayot uan axkan tikmachilia ke amo tichikauakok para tikchiuas teisa? Ichikaualis Jehová uelis mitspaleuis xiksentoka xiktekitili uan amo xikaua (Efes. 3:16). ¿Toni moneki tikchiuas satepan ke tiktataujtia Jehová maj mitsmaka ichikaualis? Xikchiua seki taman tein mitspaleuis xikseli ichikaualis, kemej tias nechikolmej uan titanojnotsas. Mojmostaj xikixtajtolti Biblia, ijkon tikmatis keniuj tanemilia Jehová (Filip. 4:​8, 9). Keman tikixtajtoltis, xikita akonimej ininka tajtoua uan toni ouijkayomej kipanokej uan itech xitanemili keniuj Jehová kinpaleuij maj taxikokan. w24.10 9 § 12-14

Ijkon kemej Jehová uan Jesús, tejuan no tikintasojtaj oksekin (Prov. 8:31). Tikinikneliaj akin amo kichiaj tein kuali uan akin ‘amo kiixmatij Dios’ (Efes. 2:12). Yejuan kemej yeskia atojtolojtokej porin kipiaj kuejmolmej uan tejuan tikpiaj tein kinpaleuis: kuali tanauatilmej tein ika tajtoua iTaixyekanalis Dios. Kemej tikintasojtaj uan tikinikneliaj tiknekij tikchiuaskej nochi tein tiueliskej para tikinnojnotsaskej. Nejon kinpaleuia maj kichiakan tein kuali, maj yolpakikan axkan uan ‘maj yekmelauj kualtsin nemikan’ nochipaya itech xochital (1 Tim. 6:19). Kemej titetasojtaj tiknekij tikiniluiskej oksekin ke amo uejkaua tamis nochi tein amo kuali (Ezeq. 33:​7, 8). Tiknekij maj kimatikan tein panos ijkuak: yekinika ixpoliuiskej nochi taneltokalismej tein takajkayauaj, uan satepan itech Armagedón, ixpoliuis nochi tein amo kuali (Apoc. 16:​14, 16; 17:​16, 17; 19:​11, 19, 20). w24.05 16, 17 § 8, 9

Tatitanil Pablo kinyolmajxitij tokniuan maj ‘kikauakan maj Dios kinexti iueyi kualanyo’. Uan tejuan tikchiuaj nejin keman tikauaj maj yejua Jehová kiita kemanian uan keniuj kinmelauas akin techtajyouiltiaj. Yejua nejon tein kichiuak John keman se tokniuj kichiuilij tein amo kuali. John kijtoj: “Monekia nimochikauas amo nikualanis para amo nikchiuas tein amo kuali, sayoj ke katka ouij. Romanos 12:19 nechpaleuij maj amo niyolijsiui uan maj iuan nitakuaujtamati Jehová”. Semi techpaleuia keman tikauiliaj Jehová maj yejua kiyektali tein techpanotok. Keman ijkon tikchiuaj, amo timotekipachouaj nion timoyolkokouaj porin amo ueli tikmelauaj tejuan toselti kuejmol tein tikpiaj. Jehová kineki techpaleuis. Kemej yeskia techiluiskia: “Xinechkauili maj nejua nikyektali nochi tein amo kuali tein mitspanotok”. Jehová motenkaua ke kimelauas kuejmol tein tikpiaj uan ke kichiuas kemej moneki. Komo tikneltokaj ke Jehová kinmelauas akin kichiuaj tein amo kuali ijkon kemej kijtoua, amo tikualantoskejok porin tikmatij ke yejuatsin kichiuas tein kuali. w24.11 6 § 14, 15

Sayoj ke amo moneki tiktayekanaltiskej nejin. Uan yejua tein tatitanil Pablo kiniluij tokniuan. Kinijkuilouilij seki taman tein amo kuali tein kichiujkaj israelitas ompa taluakyan, uan no tein kichiujkaj itech tepet Sinaí. Kiniluij maj amo ‘kinejnekikan kichiuaskej tein amo kuali’ kemej kichiujkej israelitas (1 Cor. 10:​6, 7, 11). Jehová kintamakak israelitas ika se milagro, sayoj ke ‘kichiujkej tein amo kuali’ porin okachi kinekiaj yektakuaskej (Núm. 11:​4-6, 31-34). Uan no ijkon kichiujkej keman kiueyichiujtoyaj kuakuejkonet tachijchiuj ika oro, takuajkej, tatayikej uan moyolpaktijkej (Éx. 32:​4-6). Pablo kijtoj nejin para kinnejmachtis tokniuan itech xiuit 70 tepitsin achto ke kiixpoloskiaj Jerusalén uan itemplo. Tejuan no tinemij itech tonalmej keman tatamitiya, yejua ika no moneki tikakiskej tein tanejmachtij Pablo. w24.12 6 § 13

Jehová yejua “Dios akin yolpaki” uan kineki maj no tiyolpakikan (1 Tim. 1:11). Techtayokoliani miak taman tein techyolpaktia (Sant. 1:17). Uan no yejua kiixtalij maj se takat uan se siuat monamiktikan. Keman se takat uan se siuat monamiktiaj motenkauaj motasojtaskej, motakachiuaskej uan moyekpiaskej. Uan semi yolpakij keman nochin omen tel kuali mouikaj. Axkan miakej takamej uan siuamej amo kisentokaj motasojtaj nion motakachiuaj ijkon kemej motenkaujkej keman monamiktijkej, uan yejua ika amo yolpakij. ¿Keniuj kineki Jehová maj mouikakan iniuan ininsiuatsin? Jehová kinnauatia takamej maj kinpatiuitakan ininsiuatsin. Keman tikpatiuitaj aksa tiknextiaj ke tiktakachiuaj uan yejua ika kuali iuan timouikaj. Uan se takat kinextia ke kipatiuita isiuatsin keman kualtakat iuan uan kitasojta (1 Ped. 3:7). w25.01 8 § 1, 2; 9 § 4, 5

Tein Pablo kinijkuilouilij tokniuan hebreos xa semi kinpaleuij maj kimatinij toni kichiuaskiaj keman kintajyouiltiskiaj. Pablo kinyolchikauak maj okachi kiixmatinij uan kiajsikamatinij iTajtol Dios. Ijkon, ueliskia kimatiskej komo se tamachtilis amo melauak katka uan kiixtopeuaskej, porin nejon tamachtilismej kichiuaskia maj amo takuaujtamatikanok. No kiniluij ke monekia okachi takuaujtamatiskej para kichiuaskej tein Jesús kinnauatijka uan kintakamatiskej akin kiixyekanayaj nechikol. Uan kinpaleuij tokniuan maj kiitanij ke okachi taxikoskiaj keman kipiaskiaj ouijkayomej komo kiitayaj toni kinmachtiaya tein kinpanotoya. Komo tejuan no tikchiuaj tein tayolmajxitij Pablo, uelis titaxikoskej hasta keman tamis tein amo kuali (Heb. 3:14). w24.09 13 § 17, 19

Biblia kijtoua ke Jehová kiitak ke monekia maj aksa taxtaua para techmakixtis uan ijkon ueliskia techtapojpoluilis totajtakoluan uan iuan timouikaskej. ¿Toni monekia motemakas para ika motaxtauas uan ijkon ueliskia oksepa tikpiaskej tein Adán kipolojka? Maj tikelnamikikan ke Adán uan Eva tajtakolchiujkej uan amo ueliskiaok nemiskej nochipaya. Yejua ika tein motemakaskia monekia maj no ipatiuj kemej tein kipolojka Adán (1 Tim. 2:6). Sayoj ueliskia taxtauas se takat akin kipiaskia nejin eyi taman: maj amo tajtakolej, maj uelini nemini nochipaya nikan taltikpak uan maj kinekini toka momikilis. Maj tikitakan eyi taman tein kinextia keyej Jesús uelik taxtauak para techmakixtis: 1) amo yolik tajtakolej uan “amo kichiuak nion se tajtakol”, 2) yejua ika ueliskia nemis nochipaya nikan taltikpak uan 3) kinekik toka motemakas uan momikilis (1 Ped. 2:22; Heb. 10:9). w25.02 4, 5 § 11, 12

Amo xikonelkaua ke Jehová mitsontasojta uan kineki xionpoui iniuan ichankauan, uan nochipa ijkon yeski hasta keman monekis tikonixnamikis miak taman para uelis tionmoauis. Jesús kiniluij sekin imomachtijkauan: “Komo namotakuaujtamatilis tamati kemej se pisiltik xinach tein kiluiaj mostaza, uelis nankiluiskej nejin tepet ‘Ximoajchiua’, uan moajchiuas; nochi uelis nankichiuaskej” (Mat. 17:20). Nejon imomachtijkauan Jesús sayoj seki xiujmej iuan yetoyaj, yejua ika monekia kisentokaskej okachi takuaujtamatiskej. Maski ijkon, Jesús motenkauak iniuan ke komo semi takuaujtamatiaj, Jehová kinpaleuiskia maj kiixnamikikan tein yeski taman tein kemej yeskiaj tepemej. ¡Uan tejuatsin no mitsonpaleuis! Komo tikonita ke teisa mitsontsakuilia para uelis tionmoauis, niman xikonchiua tein monekis. Tionmotemaktis iuan Jehová uan tionmoauis. ¡Komo ijkon tikonchiua yejua tein okachi kuali yeski! w25.03 7 § 18-20

Ijkon kemej David, tejuan no uelis titaxikoskej komo tikelnamikij ke Dios akin yoltok nochipa techpaleuis. Komo titanemiliaj itech tein Dios kichiuani techpaleuis maj okachi iuan titakuaujtamatikan (Is. 37:​17, 33-37). Uan no, xikonita tamachtilis tein moajsi itech jw.org tein kinextia keniuj Jehová kinpaleuiani itekitikauan itech nejin tonalmej. No xikonelnamiki keniuj Jehová mitsonpaleuiani. Xa tikonnemilis ke Jehová amo mitsonpaleuiani xikonmikti se tekuani oso xikonmikti se oso. Sayoj ke Jehová ipa miakpa mitsonpaleuiani. Tikmatij nejin porin no mitsonyoleuak kuali iuan xionmouika (Juan 6:44). Yejua ika, xikonilui Jehová maj mitsonpaleui xikonelnamiki keniuj mitsonnankiliani, keniuj mitsonpaleuij keman okachi monekia oso keniuj mitsonyekpiak itech se ouijkayot. Keman itech tiontanemilis nejin, okachi tikonneltokas ke kisentokas ijkon kichiuas. w24.06 21 § 8

Tejuan amo no moneki tiknemiliskej ke niman uelis tikchiuaskej tein kuali. Maski tikixtalijkejya amo keman tikauaskej Jehová, moneki tikelnamikiskej ke kemej titajtakolejkej ueliskia tiknejnekiskej tikchiuaskej tein amo kuali (Rom. 7:​21-23). Xa ijsiujka uelis panos teisa tein kichiuas maj tiknejnekikan titajtakolchiuaskej. Komo amo keman tiknekij tikauaskej Jehová uan Jesús, moneki nochipa tiijsatoskej ijkon kemej Jesús tanejmachtij. Tinochin kemansa tiknejnekij titajtakolchiuaskej, sayoj ke tisejsemej tataman tein amo kuali tein techyoltilana. Yejua ika tataman tein ueliskia ika titajtakolchiuaskej. Xa sekin mochikaujtokej amo auilnemiskej, oksekin xa mochikaujtokej amo kichiuaskej tein tel pitsotik kemej momajmatokaskej ininselti oso kiitaskej auilnemilis. Oksekin xa mochikaujtokej amo niman kualaniskejok, amo moueyinekiskej oso amo kimouiliskejok tein oksekin kijtoskej para kichiuaskej tein kuali yetok. w24.07 14 § 3; 15 § 5

¿Keniuj momachiliskia takat komo tayekananij amo kikauaskiaj maj oksepa poui itech nechikol satepan ke moyolpatakaya? ¿Oso keniuj momachiliskia komo tokniuan amo kitasojtaskiaj satepan ke mokepaskia? Nejon takat akin moyolpatakaya xa kinekiskia mosenkauas uan semi tayokoxtoskia. Xa kinemiliskia ke amo kemanok ueliskia kitekitilis Jehová uan hasta kinemiliskia ke yejuatsin amo keman kitapojpoluiskia uan ke amo monekia mopatas. ¿Toni no ueliskia panos komo tokniuan amo kitapojpoluiskiaj takat akin moyolpataka? Nejon kichiuaskia maj amo kuali mouikanijok iuan Jehová. ¿Keyej? Porin amo kichiujtoskiaj kemej Jehová akin kintapojpoluia akin moyolpataj, ta kichiujtoskiaj kemej Satanás akin tel amo yolkuali uan amo teiknelia. Kikaujtoskiaj maj Satanás kinchiualtiani tein kinekia para maj nejon takat amo kinekiniok kitekitilis Jehová (2 Cor. 2:​10, 11; Efes. 4:27). w24.08 17 § 7, 10, 11

Jesús no kinixtalij okseki tokniuan para maj tapaleuikan itech nechikolmej. Itech yekinika siglo, kichiuak maj tokniuan tayekananij ompa Jerusalén kintitanikan Pablo, Bernabé uan oksekin tokniuan para maj kinkalpanotij nechikolmej (Hech. 11:22). ¿Keyej? Para maj kinyolchikauanij tokniuan itech nechikolmej ijkon kemej kichiuaj tokniuan tapaleuianij uan tayekananij (Hech. 15:​40, 41). Tokniuan takalpanouanij moneki miakkan yajtinemiskej. Sekin moneki yaskej miak horas para ajsiskej kampa takalpanotij porin nechikolmej ueuejka moajsij. Sejse semana kitemakaj miak tanojnotsmej, kinkalpanouaj tokniuan para kinyolchikauaskej, kipiaj nechikol iniuan precursores, iniuan tayekananij uan kichiuaj nechikol achto ke tanojnotsatiuij. No kiitaj keniuj mochiuaskej uejueyi nechikolmej tein uejkauaj se tonal uan eyi tonal uan momachtiaj para kipanoltiskej tanojnotsmej. Uan no yejuan kiixyekanaj nemachtil tein kiseliaj precursores, kichiuaj nechikol iniuan nochin precursores itech inincircuito, uan no moneki kichiuaskej seki taman tein Betel kinnauatia, uan kemansa moneki niman kichiuaskej. w24.10 21 § 12, 13

Tanauatijkej Jeremías ika tajtoua Jehová itech tajkuilol tein axkan timomachtiaj. Tatitanil Pablo ika tajtoj nejin versículo keman kijtoj: “Amo kemanok nikinelnamikilis inintajtakoluan” (Heb. 8:12). ¿Toni kijtosneki nejin? Itech Biblia, tajtol kielnamikis amo nochipa kijtosneki keman aksa kielnamiki teisa tein panokya, ta no kijtosneki ke niman kichiua teisa keman kielnamiki. Takat akin pilkatoya inakastan Jesús, kiluij: “Xinechelnamiki keman titaixyekantosya kemej tekiuaj” (Luc. 23:​42, 43). Tikmatij ke amo sayoj kiluijtoya Jesús maj kielnamikini. Uan Jesús kiteajsikamatiltij ke ipa kipaleuiskia nejon takat porin kichiuaskia maj oksepa nemi. Yejua ika keman Jehová kijtoua ke amo kielnamikisok totajtakoluan, kijtosneki ke senkis techtapojpoluijya uan amo kichiuasok nion teyi para techtatsakuiltis. w25.02 10, 11 § 14, 15

Nejin kijtosneki ke para tikajsikamatiskej nochi moneki maj tikmatikan keniuj tamati Jehová, tein kiixtalijtok kichiuas, tein kiyolpaktia uan tein kitauelita. Xionmotajtani: “Kemej nikixmattokya seki taman de Jehová, ¿toni niknemilia ke uelis kiyolpaktis?” (Efes. 5:17). Para tikyolpaktiskej Jehová kemansa monekis tikchiuaskej tein tochankauan oso totasojikniuan amo kiuelitaskej. Xikonnemili ke seki tetatmej kiteliluiaj ininsiuapil maj iuan monamikti se tokniuj akin kipia miak tomin sayoj ke amo tel kuali kitekitilijtok Jehová. Tetatmej ijkon kichiuaj porin amo kinekij maj tajyoui ininsiuapil. Sayoj ke yejua uelis motajtanis: “Komo iuan nimonamiktia, ¿nechpaleuis maj okachi kuali nimouika iuan Jehová?”. ¿Toni kinemilia Jehová? Tanankilil tikajsij itech Mateo 6:​33, kampa kinyolchikaua tokniuan maj kisentokakan kitayekanaltikan “iTaixyekanalis Dios”. Maski tikintakachiuaj totatuan uan akin nemij itech toxolal, nochipa tiktemouaj tikchiuaskej tein kiyolpaktis Jehová. w25.01 17 § 9, 10

Axkan no miakej techixnamikij, yejua ika moneki maj Jehová techpaleui para maj tiksentokakan tiknekikan titanojnotsaskej (Apoc. 12:17). Tein Jesús motataujtij itech Juan capítulo 17 kinextia ke Jehová no techpaleuis tisejsemej. Yejua kitajtanij iTajtsin maj kinyekpiani itatitaniluan uan yejua kikakik. Amatajkuilol Hechos kijtoua keniuj Dios kinpaleuij itatitaniluan maj kinekikan tanojnotsaskej maski kinixnamikiaj. Keman Jesús motataujtij no kitajtanij Jehová maj kinyekpia akin satepan kineltokaskiaj tein tatitanilmej ika tanojnotsayaj, nejon kijtosneki ke no toka motataujtij. Yejua ika uelis tikneltokaskej ke Jehová kisentokas kikakis tein Jesús motataujtij uan techpaleuis ijkon kemej kinpaleuij tatitanilmej (Juan 17:​11, 15, 20). Kemej amo uejkaua ixpoliuisya tein amo kuali, xa satepan okachi ouij yeski titanojnotsaskej. Sayoj ke Jesús techiluij ke Jehová nochipa techpaleuiskia maj tiksentokakan tiknekikan titanojnotsaskej (Luc. 21:​12-15). w25.03 18 § 13, 14

Tiitekitikauan Dios kuali timomachiliaj uan yejua ika semi tiyolpakij. ¿Uan keyej semi tiyolpakij? Porin semi techyolchikaua tikajsiskej itech iTajtol Dios tein melauak uan tatiochiualismej tein tikpiaskej. Tejuan tikmatij ke tein Jehová motenkaua yekmelauj mochiuas porin Jesús toka motemaktiko. Uan semi tiyolpakij keman ika titajtouaj nejin iniuan tokniuan (Sal. 34:8; 133:​1-3). Tiitekitikauan Jehová tiknextiaj nejin ome taman: timotasojtaj uan amo tixexeliujtokej. Uan kemej timotasojtaj, kuali timouikaj. Nejin techpaleuia maj tiknemilikan keniuj tinemiskej itech xochital. Ijkuak, okachi timotasojtaskej uan okachi kuali timouikaskej (Col. 3:14). Akin kineki yolpakis uan kuali momachilis moneki kiueyichiuas Jehová iniuan oksekin. Maski techijtouiliskej tein amo melauak, Jehová uan nochin akin iniuan tikueyichiuaj kuali techitaj (Is. 65:15). w24.04 21 § 7, 8

¿Toni uelis tikchiuaskej tinochin para tikinpaleuiskej akin kinekij monamiktiskej? Moneki kuali tiknemiliskej tein tikijtouaj (Efes. 4:29). Maj timotajtanikan: “¿Nikijtoua teisa tein ‘teuetskitia’ sayoj ke yejuan uelis kinyolkokos? Keman nikita se tokniuj takat monojnotstok iuan se tokniuj siuat, ¿niman niknemilia ke moueuelitaj?” (1 Tim. 5:13). Uan no, maj amo tikchiuakan teisa tein kichiuas maj tokniuj kimachili ke teisa kipoloua porin ayamo monamiktia. Yejua ika, moneki tikiniluiskej teisa tein kinyolchikauas. ¿Uan komo tikitaj ke se tokniuj takat uan se tokniuj siuat ueliskia monamiktiskej? Biblia techmachtia ke moneki tikpoujkaitaskej tein oksekin kimachiliaj uan tein kinemiliaj (Rom. 15:2). Miakej akin ayamo monamiktiaj amo kiuelitaj maj oksekin kichiuakan maj kiixmatikan aksa, uan moneki tikpoujkaitaskej tein kinekij (2 Tes. 3:11). Sekin xa kinekiskej maj tikinpaleuikan, uan tikchiuaskej sayoj komo techtajtaniaj (Prov. 3:27). w24.05 24, 25 § 14, 15

Kemansa tikixnamikiskej miak ouijkayomej tein uelis kipatas kemej tinemij. ¡Semi tiktasojkamatiliaj Jehová maj techpaleui! Keman tikitaj keniuj techpaleuia okachi tikneltokaj ke “Jehová yoltok”, ijkon kemej kijtoj David itech Salmo 18:46. Sayoj ke satepan David kijtoj ke Jehová kemej se “ueyi tet”. ¿Keyej David kijtoj ke Dios akin nochipa yoltok kemej yeskia se ueyi tet tein amo yoltok? Biblia kijtoua ke Jehová kemej yeskia se ueyi tet uan nejin techpaleuia maj tikajsikamatikan keniuj tamati yejuatsin. Keman itekitikauan Jehová kiueyichiuayaj, kijtouayaj ke yejua katka kemej se ueyi tet. Yekinika texto kampa kijtoua ke Jehová kemej yeskia “se ueyi tet” yejua Deuteronomio 32:4. Keman Ana motataujtij kijtoj ke ‘sayoj Jehová chikauak kemej se ueyi tet’ (1 Sam. 2:2). Habacuc kijtoj ke kiitaya Jehová kemej se ‘ueyi tet’ (Hab. 1:12). Uan no, Jehová kijtoj ke yejua katka kemej se ‘ueyi tet’ (Is. 44:8). w24.06 26 § 1, 3

Tekiuanij akin taixyekanayaj Israel akin Jehová kinitaya ke yolkualmej katkaj, yejuan akin semi kitasojtayaj. Keman Biblia ika tajtoua Josías, kijtoua: “Josías kichiuak maj israelitas oksepa kiueyichiuanij Jehová uan sayoj yejua kitekitilij” (2 Rey. 23:25). Sayoj ke Salomón, keman katka xiuejya kichiuak tein amo kuali, uan “amo senkis kitekitilijok iDios Jehová” (1 Rey. 11:4). Biblia no ijkon ika tajtoua tekiuaj Abiyam akin amo no kiyolpaktij Jehová, kijtoua: “Amo senkis kitekitilij iDios Jehová” (1 Rey. 15:3). ¿Toni kijtosneki tiktemoskej senkis tiktekitiliskej Jehová? Kijtosneki ke tikueyichiuaj porin tiktasojtaj uan tikpoujkaitaj, uan moneki tiksentokaskej tiktasojtaskej nochipaya. w24.07 21 § 4, 5

Jehová no ika tajtoua nejin para technextilis keniuj techtapojpoluia: “Nikinixpolos monepololuan kemej yeskia nikixtsakuas ika se mixti, uan motajtakoluan kemej yeskia nikixtsakuas ika miak mixti” (Is. 44:22). Keman Jehová techtapojpoluia kemej yeskia ika miak mixti kiixtsakua totajtakoluan para amo kiitasok uan para maj tejuan amo no tikitakanok. ¿Toni techmachtia nochi tein tikitakejya? Keman Jehová techtapojpoluia, amo moneki maj tiksentokakan timoyolkokojtokanok. Kemej iesyo Jesús senkis kiixtauakya tein titauikayaj, amo monekiok titaxtauaskej. Senkis ixpoliujkejya totajtakoluan uan kemej yeskia amo keman titajtakolchiuaskiaj. Ijkon techtapojpoluia Jehová keman yekmelauj timoyolpataj. No techpaleuia maj oksepa mochiua totasojikniuj. Jehová techiknelia uan senkis techtapojpoluia amo moneki tiksentokaskej timotajtakoltijtoskej tein tikchiujkej. w25.02 10 § 11-14

Tayekananij akin mosentiliaj iuan tajtakolchiujkej kinekij kinyekpiaskej tokniuan itech nechikol porin Jehová ijkon kinnauatia. Nejin tapaleuia para maj tokniuan amo kichiuakan kemej akin amo kinekij kitakamatiskej itanauatiluan Dios (1 Cor. 5:7). Sayoj ke no mochikauaj kipaleuiskej akin tajtakolchiuak maj moyolpata uan keman kipaleuiaj kinemiliaj ke uelis mopatas. Ijkon kichiuaj kemej Jehová akin “semi tetasojta uan teiknelia” (Sant. 5:11). Maj tikitakan nejin tajtolmej tein tatitanil Juan kijkuiloj keman katka xiuejya: “Nokoneuantsitsin, namechijkuilouilia nejin para amo xikchiuakan se tajtakol. Sayoj ke, komo aksa kichiua se tajtakol, tikpiaj se akin techpaleuia akin yetok iuan toTajtsin: Jesucristo, se akin yolmelauak iixpan Dios” (1 Juan 2:1). Kemansa, akin tel tajtakolchiuak amo kineki moyolpatas. Keman ijkon panoua, moneki kikalankixtiskej de nechikol. w24.08 25 § 19, 20

Xa no tikonnekis tikonitas tein oksekin kichiuaj uan tein tejuatsin tikonchiua, sayoj ke amo xikonita nejon. ¿Keyej? Porin Jehová amo keman ijkon kichiua (Gál. 6:4). Se tonal, María kimetstekilij Jesús aceite tein kualtsin ajuiyak uan patiyoj (Juan 12:​3-5). Uan itech templo, se siuatsin pobre akin momikilijkaya itakatsin kipantalij ome centavitos tein amo semi kipiaya ipatiuj (Luc. 21:​1-4). Sayoj ke Jesús amo kiitak ke se okachi kitemakaka ke okse, ta kiitak ke nochin omen kinextijkej ke semi takuaujtamatiaj. Jesús senkis kichiuak kemej iTajtsin. Yejua ika uelis tikonmatis ke Jehová kiita nochi tein tikonchiua porin iuan tiontakuaujtamati uan tikontasojta, uan semi kipatiuita maski tikonnemilia ke amo ueli tikonchiua miak taman. Tinochin kemansa tiknemiliaj tein amo techpaleuia, sayoj ke Biblia uelis techpaleuis maj amo ijkon titanemilikanok. Yejua ika xikontemo tein mitsonyolseuis para amo tionmoyolkokojtosok. Jehová kuali mitsonixmati, kipatiuita nochi tein tikonixtalij tikonchiuas para tikontekitilis uan motenkaua mitsontatiochiuis. Jehová semi kitasojta uan ika motekipachoua sejse itekitikauj. w24.10 25 § 3; 29 § 17, 18