Agosto

Tiktajtaniaj Jehová maj miakej kinekikan techkakiskej uan maj kinekikan kitekitiliskej touan axkan. Sayoj ke, ¿toni kinpanos akin amo kinekiskej techkakiskej uan sekin xa yeskij tochankauan? Jehová kinmakixtis akin moyolpataskej keman kiitaskej ke ixpoliui Ueyi Babilonia. Nejin techpaleuia maj tikajsikamatikan keyej moneki tiksentokaskej titanojnotsaskej. ¿Keyej? Tein axkan tikiniluiskej xa yejua tein kielnamikiskej satepan (no xikonita Ezequiel 33:33). Xa kielnamikiskej tein tikiniluiaj uan kiixtaliskej touan kitekitiliskej Jehová achto ke ixpoliuis nochi tein amo kuali. Ijkon kemej kipanok tajpixkej de Filipos keman taneltokak porin chikauak talolinik. Xa axkan amo kinekij kikakiskej tein Biblia tamachtia, sayoj ke xa kinekiskej kikakiskej keman kemej yeskia ‘talolinis’ keman ixpoliuis Ueyi Babilonia (Hech. 16:​25-34). w24.05 17 § 9, 10

Tein kinijkuilouilij Pablo tokniuan hebreos no techmachtia se taman. Sekin amo kuali mouikayajok iuan Jehová, yejua ika kiniluij: “Oksepa namechpoloua leche uan amo tapalol” (Heb. 5:12). Amo kiselijtoyaj yankuik taman tein Jehová kinmachtijtoya itechkopa nechikol (Prov. 4:18). Miakej judíos kinemiliayaj ke monekiaok kitakamatiskej iTanauatil Moisés, maski panokajya 30 xiujmej ke Cristo kichiuak maj amo tapaleuiok nejon tanauatil (Tito 1:10). Yejua ika, Pablo kinekia kinpaleuis maj kiajsikamatikan tamachtilis tein ouij. Tein Pablo kinijkuilouilij kinpaleuij maj kiitakan ke kemej kiueyichiuaskiaj Jehová okachi kuali katka, kinpaleuiskia maj yolchikaujkej uan maj kisentokanij tanojnotsanij (Heb. 10:​19-23). w24.04 6 § 15

Desde ke Adán uan Eva kipaleuijkej Satanás maj kiixnamiki Jehová, tel miakej momikilianij. ¿Toni kinpanos nochin akin momikilijkejya? Ompa iluikak nemiskej 144 mil tokniuan akin amo kikaujkej Jehová uan amo keman momikiliskejok (Apoc. 14:1). Uan Dios kichiuas maj oksepa nemikan miakej takamej uan siuamej “akin yolmelaujkej” katkaj uan kitasojtayaj Jehová. Uan komo amo kikauaj yejuatsin keman Jesús taixyekanas mil xiujmej uan keman oksepa kikajkauaskej Satanás, uelis nemiskej nochipaya nikan taltikpak (Dan. 12:13; Heb. 12:1). Uan no, itech nejon xiujmej “akin amo yolmelaujkej”, sekin akin amo keman kitekitilijkej Jehová oso “akin kichiujkej tein amo kuali”, uelis mopataskej uan kiueyichiuaskej Dios (Juan 5:29; Luc. 23:​42, 43). Sayoj ke sekin tel amo yolkualmej katkaj, yejua ika kiixtalij maj amo oksepa nemikan (Luc. 12:​4, 5). w24.05 2 § 3; 5 § 15; 6 § 17

Salmo 15:2 kijtoua ke akin yetok ichan Jehová “kijtoua tein yekmelauj kisa itech iyolo”. Amo sayoj moneki maj amo titakajkayauakan, ta Jehová kineki maj timelaujkej itech nochi (Heb. 13:18). Nejin semi moneki, “porin Jehová amo kineki kinitas akin kinextiaj ke yolkualmej sayoj ke amo melauak, sayoj ke semi kuali mouika iniuan akin yolmelaujkej” (Prov. 3:32). Komo aksa kitakamati Dios keman kiitstokej, sayoj ke keman yetok iselti amo, ¿kijtosneki ke “kijtoua tein yekmelauj kisa itech iyolo”? Amo. ¿Keniuj se tokniuj ueliskia peuas ijkon kichiuas? Xa peuas kinemilis ke tein Jehová tanauatia amo tapaleuia (Sant. 1:​5-8). Xa kemansa amo kitakamatis porin kinemilia ke amo motelneki. Uan komo kiita ke amo teyi kipanoua, satepan kichiuas okachi tajtakolmej. Maski kinemilia ke kitekitilijtok Jehová, yejuatsin amo kiyolpaktia tein kichiua (Ecl. 8:11). Tejuan amo tiknekij titakajkayauaskej ika tein tikijtouaj uan tein tikchiuaj. w24.06 10 § 7, 8

Tiitekitikauan Jehová tiktasojtaj tein Biblia tamachtia uan itech titakuaujtamatij (Rom. 10:17). Tikneltokaj ke Jehová kiixtalij inechikol “tein kemej yeskia kalikxit uan tein kipaleuia tamachtilis tein melauak” (1 Tim. 3:15). Satanás kiuelitaskia maj amo tikneltokakanok tein Biblia kijtoua uan tein technauatia inechikol Jehová (Efes. 4:14). Amo uejkaua Satanás kijtos tein amo melauak para kichiuas maj miak altepemej kiixnamikikan Jehová (Apoc. 16:​13, 14). No tikmatij ke Satanás okachi kitemos kinkajkayauas itekitikauan Dios (Apoc. 12:9). Yejua ika semi moneki maj tikmatikan toni tein melauak uan toni amo, no moneki maj tiktakamatikan tamachtilis tein melauak (Rom. 6:17; 1 Ped. 1:22). Moneki tikchiuaskej nejon para timakisaskej keman mochiuas tetsaujkatajyouilis. w24.07 8 § 1-3

Keman israelitas kiselijkej itanauatiluan Jehová, yejuan motenkaujkej ke kintakamatiskiaj. Uan Jehová motenkauak ke kinyekpiaskia uan kintiochiuaskia komo yejuan kitakamatiaj. Sayoj ke, komo yejuan amo kitakamatiaj oso kinueyichiuayaj tatadiosmej, Jehová amo kinpaleuiskiaok uan tajyouiskiaj. Komo ijkon panouaya, ¿ueliskia oksepa kiyolpaktiskej Dios? Kemaj, iTanauatil kijtouaya ke oksepa ueliskia iuan mokepaskej uan kikakiskej (Deut. 30:​1-3, 17-20). Nejin kijtosneki ke yejuan ueliskia moyolpataskej. Komo ijkon kichiuayaj, Jehová kinseliskia uan oksepa kintatiochiuiskia. Israelitas tel miakpa kiixnamikkej Jehová. Sayoj ke Jehová amo kinsenkauak uan kisentokak kinpaleuij para maj oksepa kitekitilianij, yejuatsin kisentokaya kintitania tanauatianij para maj kinpaleuianij maj moyolpatanij uan maj oksepa senkis kitekitilianij (2 Rey. 17:​13, 14). w24.08 9 § 4, 5

Satepan ke Jesús momikilij itech xiuit 33, tokniuan de Jerusalén uan Judea kipanokej ouijkayomej. Ijkuak peuak moajsi nechikol kampa kichiuaj kemej Cristo, uan peuak semi kintajyouiltiaj. Uan kemej 20 xiujmej satepan, tokniuan peuak tajyouiaj porin amo kipiayaj toni kikuaskej uan keniuj moixpanoltiskej (Hech. 11:​27-30). Itech xiuit 61, amo semi kintajyouiltiayajok tokniuan, sayoj ke amo nochipa ijkon yeskia. Ijkuak no kiselijkej se amatajkuilol tein tatitanil Pablo kinijkuilouilij, tein semi kinpaleuiskia satepan. Amatajkuilol tein kinijkuilouilijkej hebreos kiselijkej keman okachi kinpaleuiskia, porin satepan oksepa yaya tajyouitij. Pablo kinyolmajxitij tokniuan tein kinpaleuiskia maj taxikokan keman okachi kintajyouiltiskiaj. w24.09 8 § 1, 2

Keman titajyouiaj, tokniuan semi techpaleuiaj uan techyolchikauaj. Jehová kinextia ke semi techtasojta keman kichiua maj tokniuan techpaleuikan. Tokniuan techyolseuiaj keman touan yetokej oso keman tikiniluiaj keniuj timomachiliaj uan yejuan techkakij. Xa techyolchikauaj ika se texto oso touan motataujtiaj (Rom. 15:4). Xa se tokniuj techelnamiktia keniuj tanemilia Jehová uan nejon techpaleuia maj tiksentokakan titaxikojtokan. Tokniuan no uelis techpaleuiskej ika seki taman, xa keman techuikiliskej toni tikuaskej. Kemansa, xa monekis tikiniluis oksekin maj mitspaleuikan (Prov. 17:17). Yejuan xa amo kimatij keniuj timomachilia oso toni mitspoloua (Prov. 14:10). Xikinilui motasojikniuan keniuj timomachilia. Xikinilui keniuj uelis mitspaleuiskej. Uelis titajtos iuan se oso ome tayekananij akin iniuan titakuaujtamati. Kemansa, se tokniuj siuat okachi kuali momachilia komo tajtoua iuan okse tokniuj siuat akin uelis kipaleuis. w24.10 10 § 15, 16

Miakej moyekpiaj ika tein kikuaj uan kichiuaj ejercicio para kuali momachiliskej uan nemiskej miak xiujmej. Sayoj ke yejuan kimatij ke maski kichiuaj nejin, amo kinpaleuis maj amo keman ueuentsintiakan uan maj amo keman momikilikan. Xa kinemiliaj ke amo keman uelis nemiskej nochipaya. Sayoj ke Jesús kijtoj ke kemaj uelis ‘tinemiskej nochipaya’, kemej kijtoua Juan 3:16 uan 5:24. Se tonal, Jesús kichiuak se milagro para kintamakas tel miakej ika pantsin uan pescadojtsitsin. Semi kualtsin tein kichiuak sayoj ke tein kijtoj mostika okachi kimojkaitakej. Miakej kitojtokakej hasta Capernaúm, itech ueyiatenoj de Galilea, uan ompa kiniluij ke ueliskia kichiuas maj oksepa nemikan akin momikilijkejya uan maj nemikan nochipaya (Juan 6:39). Tein Jesús kijtoj techmachtia ke miakej akin momikilijkejya uelis oksepa nemiskej, uan tejuatsin uan mochankauan no uelis nanemiskej nochipaya. w24.12 8 § 1, 2

Organización Mundial de la Salud kitematiltij ke miakej takamej kinteuiaj ininsiuatsin, kiniluiaj tein kinyolkokoua oso kinchiuiliaj okseki taman tein ika kintajyouiltiaj. Xa teixtenoj kinextiaj ke kintasojtaj, sayoj ke keman amo akin kinitstok amo ijkon kichiuajok. ¿Keyej seki takamej kintajyouiltiaj ininsiuatsin? Xa inintat semi tateuiaya, uan yejua ika kinemiliaj ke nejon kuali yetok. Uan okseki takamej kintajyouiltiaj ininsiuatsin porin kampa nemij, takamej ipa ijkon kichiuaj. Yejuan xa kinemiliaj ke moneki kinajuaskej ininsiuatsin para maj kimatikan ke yejuan kimatij kalijtik. Oso oksekin amo kinmachtijkej ke amo moneki niman kualaniskej. Uan kemej seki takamej kiitaj pornografía kinemiliaj ke siuamej sayoj para iniuan motekaskej. Uan no, miakej motelmachtianij kiitanij ke keman momoyaujtoya ueyi kokolis COVID-19, okachi miakej takamej peuak kintajyouiltiaj ininsiuatsin. Maski ijkon, se takat amo keman monekiskia kichiuilis tein amo kuali isiuatsin. w25.01 8 § 2, 3

Jesús kijtoj katiyejua okachi tayekantoya de nochi iTanauatil Moisés, yejua kijtoj: “Xiktasojta moDios Jehová ika nochi moyolo, ika nochi monemilis, ika nochi motanemilil uan ika nochi mochikaualis” (Mar. 12:30). Yejua ika senkis tiktasojtaj Jehová. Nejon kijtosneki ika nochi tein tiknejnekij, tein tikmachiliaj uan tochikaualis. Uan no tiknextiliaj kemej titanemiliaj. Kemej semi tiktasojtaj Jehová techpaleuia maj no tiknekikan titanemiliskej kemej yejua maski amo ueli senkis tikajsikamatij keniuj tanemilia. Sayoj ke uelis techpaleuis komo timomachtiaj keniuj ‘tanemilia Cristo’, porin yejua senkis tanemiliaya kemej iTajtsin (1 Cor. 2:16). w25.03 8 § 1

Jesús amo no katka tajtakolej ijkon kemej katka yekinika takat Adán achto ke motajtakolmakaskia (1 Cor. 15:45). Kemej toka momikilij, Jesús uelik kiixtauak nochi tein Adán kipolojka (Rom. 5:19). Ijkon, Jesús mochiuak “okse Adán”. Amo monekiok maj uiki okse takat akin amo tajtakolej uan maj kiixtaua tein Adán kipoloj. Jesús “motemaktij sayoj sepa” (Heb. 7:27; 10:12). Kemej tikitakejya, ¿keyej ueli kuali timouikaj iuan Jehová? Yejua kitemakak tein tapaleuiskia maj techtapojpoluili totajtakoluan keman Jesús, akin amo tajtakolej motemakak mikis para kiixtauas totajtakoluan (Heb. 9:14). w25.02 5 § 12, 13

Tikmatij ke Jehová yejua Dios akin nochipa yoltok uan nejon techpaleuis maj tiknemilikan tein okachi moneki keman tikpiaskej ouijkayomej. Satanás kijtoua ke keman titajyouiskej, tikauaskej Jehová (Job 1:​10, 11; Prov. 27:11). Yejua ika komo amo tikauaj, tiknextiliskej Jehová ke tiktasojtaj uan ke Satanás se xolopij. Xa kampa tionnemi tekiuanij amo kikauaj xikueyichiuakan Jehová, xa amo mitsonajsi tomin, xa kampa tiontanojnotsa amo kinekij kikakiskej kuali tanauatilmej oso xa tikonpanotok okse taman tein mitsontajyouiltia. Sayoj ke xikonelnamiki ke ijkon no uelis tikonnextis ke tikonyolpaktia Jehová. Amo xikonelkaua ke yejua nochipa mitsonpaleuis xikonxiko tein yeski ouijkayot. Yejuatsin mitsonpaleuis xionmoyolchikaua para uelis tiontaxikos. w24.06 22 § 9

¿Tikonmati toni tein amo kuali mitsonyoltilana? Sayoj timokajkayaujtoskiaj komo tiknemiliaj ke nochipa uelis tikchiuaskej tein kuali, uan ke amo keman tiknejnekiskej tikchiuaskej tein amo kuali (1 Juan 1:8). Uan Pablo hasta kijtoj ke ‘akin kinixyekana ichikaualis Dios moneki motachiliskej amokan no kichiujkej tein amo kuali’ (Gál. 6:1). Yejua ika moneki tikmatiskej toni tein amo kuali techyoltilana uan tein ueliskia ika titajtakolchiuaskej (2 Cor. 13:5). Komo tikmatijya toni uelis kichiuas maj titajtakolchiuakan, ¿toni moneki tikchiuaskej? Maj tikchiuakan tein techpaleuis maj tikixtopeuakan. Maj tiknemilikan nejin: ne uejkauj, se xolal tein youaliujtoya ika tepamit, akin taixnamikiaj okachi ueliaj ijsiujka kalakiaj kampa yetoyaj puertas, yejua ika ompa itech puertas monekia okachi yetoskej tajpianij para kiyekpiaskej xolal. No ijkon moneki timoyekpiaskej ika tein tejuan tikmattokej ke uelis ijsiujka kichiuas maj titajtakolchiuakan (1 Cor. 9:27). w24.07 15 § 5-7

Nankichiuaskej tein kuali, kemej kijtoua itech tajkuilol tein axkan timomachtiaj, yejua tikteixmatiltiskej kuali tanauatilmej. Kemej tikitaj, keman tikixtajtoltiaj Biblia uan titanemiliaj itech tein timomachtiaj, okachi titakuaujtamatij iuan Jehová uan okachi tikajsikamatij keyej moneki titanojnotsaskej. Komo tiknekij maj iTajtol Dios okachi techpaleui, moneki tikxeloskej tiempo para tikixtajtoltiskej, timomachtiskej uan itech titanemiliskej. ¿Uan toni moneki tikonchiuas komo amo tikonajsikamati se versículo? Xikontemo toni kijtosneki nejon versículo itech Nepaleuil tein ika momachtiaj itaixpantijkauan Jiova oso itech okse amaix tein kimelaua nejon versículo. Komo tikonxeloua tiempo para kuali tionmomachtis, okachi tiontakuaujtamatis itech iTajtol Dios (1 Tes. 5:21). Uan kemej okachi tiontakuaujtamatis itech Biblia, okachi mitsonyolpaktis tikontapouis oksekin tein tionmomachtiani. w24.04 15 § 4, 5

David kiluij: “Tiyolkuali uan tikneki titetapojpoluis” (Sal. 86:5). Miqueas kijkuiloj: “¿Akoni se Dios kemej tejua, akin titetapojpoluia keman se mopoloua uan amo titeelnamikilia tein se kichiua [...]?” (Miq. 7:18). Uan no, Isaías kijtoj: “Akin amo yolkuali maj amo kichiuaok tein amo kuali, uan akin kinchiuilia tein amo kuali oksekin maj amo kinemiliok tein amo kuali, uan maj mokepa iuan Jehová akin kiiknelis, maj mokepa iuan toDios porin kitapojpoluis” (Is. 55:7). Para kinextiskiaj tokniuan de Corinto ke kichiuayaj kemej Jehová, monekia kitapojpoluiskej takat akin moyolpatakaya uan kinextiliskej ke kitasojtayaj uan ke yolpakiaj porin oksepa mokepka. Komo kitapojpoluiayaj takat akin moyolpatakaya, kinextiskiaj ke “tatakamatiaj itech nochi”. Maski takat amo miak metsti kikalankixtijkaj de nechikol, nejon kipaleuij maj moyolpata. Yejua ika tokniuan tayekananij amo monekia uejkauak mochiaskej para kikauaskej maj oksepa poui itech nechikol. w24.08 17, 18 § 12, 13

Amo uejkaua Jesús kiixtalis tein kinnamikis kiseliskej nochin akin nemij nikan taltikpak. ¿Keniuj tikmatij ke amo uejkaua mochiuas? Porin Jesús kiniluij imomachtijkauan se taman tein ‘kinextiskia’ ke Jesús tekiuajtitokya itech iTaixyekanalis Dios uan ke “tamitiya tein mochiujtok itech taltikpak” (Mat. 24:3). Uelis tikixtajtoltiskej tein Jesús kijtoj ke panoskia itech Mateo capítulos 24 uan 25, Marcos capítulo 13 uan itech Lucas capítulo 21. Jesús kitetapouij eyi taman tein techpaleuiskia maj tikchixtokan nejon tonalmej. Ika tajtoj ichkamej uan chivos, majtakti ichpochmej uan takeualmej akin kinkauilijkej bolsa tomin. Sejse taman tein ika tamachtij kinextij ke Jesús kiitas tein tikchiuaj tisejsemej keman kiixtalis tein technamiki tikseliskej. w24.09 20 § 1, 2

Jesucristo technextilij keyej moneki titapaleuiskej. Yejua kitasojtaya iTajtsin uan oksekin. Yejua ika, kichiuaya nochi tein uelia para kinpaleuis maski monekia kichiuas tein kichiuayaj takeualmej (Mat. 20:28; Juan 13:​5, 14, 15). Tokniuj, komo tejuatsin no tiontetasojta, Jehová mitsontatiochiuis uan mitsonpaleuis maj mitsonixtalikan kemej tapaleuijkej itech nechikol (1 Ped. 5:5). Noyampa semi kuali kiitaj akin ininselti moueyitaliaj. Sayoj ke itech inechikol Jehová amo ijkon panoua. Tokniuj akin kichiua kemej Jesús, tetasojta uan amo kitemoua taixyekanas oso kinextis ke okachi ueyichiujkej ke oksekin. Komo se akin kiuelita moueyitalis kiixtaliskiaj maj taixyekana itech nechikol, xa amo kinekiskia kichiuas seki taman tein ika kinpaleuis itekitikauan Jehová. Uelis kinemilis ke seki tekimej sayoj kichiuaj akin amo ueyichiuanimej (Juan 10:12). w24.11 15 § 6, 7

Itech nochi nechikolmej monekij okachi takamej akin kemej yeskiaj “tatiochiualismej” para maj tapaleuikan (Efes. 4:8). Komo tionmoauijya, ¿uelis ijkon tiontapaleuis? (Prov. 3:27). ¿Tionmochikaujtok tionmochiuas tapaleuijkej itech nechikol? Uan komo ijkon tiontapaleuijtokya, ¿tionmochikaujtok tionmochiuas tayekankej? ¿Uelis tikonpatas tein tikonchiujtok para tikonselis Tamachtilis para akin kiteixmatiltiaj iTaixyekanalis Dios? Komo tikonselia nejin tamachtilis, Jesús uelis mitsonmakas okachi tekimej. Komo tikonmachilia ke amo uelis tikonchiuas, xikontapoui Jehová. Xikonilui maj mitsonpaleui ika ichikaualis para tikonchiuas tein yeski tekit tein mitsonmakaskej (Luc. 11:13). Nochi tekit tein kichiuaj takamej akin Jesús kintemakak kemej “tatiochiualismej” kinextia ke yejua techixyekantok itech nejin tonalmej keman tatamitiya (Mat. 28:20). Semi tiktasojkamatiliaj totekiuaj porin semi techtasojta, yolkuali, kimati nochi tein techpoloua uan kinixtalia tokniuan para maj techpaleuikan. w24.10 23 § 16, 17

¿Toni kinpanos itekitikauan Dios? ¿Kisentokaskej tajyouiskej? Jehová motenkaua: “Kielkauaskej tein kintekipachouaya, uan amo oksepa nikitasok” (Is. 65:16). Yejua kiixpolos nochi tein techtajyouiltia uan yolik kichiuas maj tikelkaujtiakan. Maski axkan miak taman techtekipachoua, kuali timomachiliaj uan tiyolseujtokej keman tietokej nechikolmej. ¿Keniuj uelis titapaleuiskej maj nochin yolseujtokan keman tiksenueyichiuaj Jehová? Moneki maj tiknextikan ke techixyekana ichikaualis Dios keman titetasojtaj, tiyolpakij, tiyolseujtokej, tikualtakamej uan tiyolnejmachmej (Gál. 5:​22, 23). ¡Semi kualtsin maj tipouikan itech inechikol Dios! Komo tiksentokaj tikueyichiuaj Dios, uelis tikitaskej keniuj kichijchiua se“yankuik iluikak uan se yankuik taltikpak”. w24.04 22 § 9, 10

Keman se tokniuj takat uan se tokniuj siuat mochiuaj novios semi yolpakij, sayoj ke amo moneki kiauilmatiskej porin satepan uelis monamiktiskej. Tonal keman monamiktiaj motenkauaj iixpan Jehová ke nochipa motasojtaskej uan mopoujkaitaskej. Achto ke timotenkauaskej nejin oso okse taman, moneki kuali tiknemiliskej. Keman omen mochiuaj novios kinpaleuia maj okachi kuali moixmatikan uan ijkon uelis kiixtaliskej toni kichiuaskej. Kemansa kiixtaliaj monamiktiskej oso mokauaskej. Komo mokauaj amo kijtosneki ke nenkaj mochiujkej novios, ta kijtosneki ke kinpaleuij maj kimatikan toni monekia kiixtaliskej. ¿Keyej moneki tikajsikamatiskej para toni tapaleuia maj omen mochiuakan novios? Porin komo akin ayamo monamiktiaj kuali kiajsikamatij nejin, amo kinekiskej moixmatiskej iuan aksa komo amo kinekij monamiktiskej. w24.05 26, 27 § 3, 4

Kemansa telpochmej mouiskej ika tajtoskej tein kineltokaj. Xa keman ika tajtouaj evolución mopinaujmatij kimelauaskej keyej amo kineltokaj. Miakej tamachtianij kijtouaj ke evolución amo sayoj moijtoua ta ke yekmelauj mochiuak. ¿Keniuj uelis nankinpaleuiskej namokoneuan maj senkis takuaujtamatikan ke melauak tein kineltokaj? Xikonyekilui ke amo moneki mopinaujmatiskej porin kineltokaj ke aksa tachijchiuak. Hasta miakej taixmatinij no kineltokaj ke nochi tein yoltok amo iselti nesik. Nejin taixmatinij momakaj cuenta ke aksa akin tel tamatkej kichijchiuak nochi tein yoltok, yejua ika amo kineltokaj evolución. No kipaleuis mokonetsin maj okachi takuaujtamati iuan Dios komo kimati toni kinpaleuiani oksekin tokniuan maj kineltokakan ke aksa kichiuak maj tinemikan. w24.12 18 § 14, 15

Jesús kimatia ke miakej kikakiskiaj kuali tanauatilmej uan nejon kipaleuij maj yolpaki uan maj kisentoka tanojnotsa. Kemej se xiuit satepan ke Jesús peuak tanojnotsa, momakak cuenta ke miakej kinekiaj kikakiskej kuali tanauatilmej uan kijtoj ke yejuan katkaj kemej tatok tein chikauakya uan tein ueliskiaya se kisentilis (Juan 4:35). Kemej se xiuit satepan, kiniluij imomachtijkauan: “Onkak miak tatok tein moneki mosentilis” (Mat. 9:​37, 38). Satepan oksepa kiniluij: “Onkak miak tatok tein moneki mosentilis, […] xiktataujtikan akin iaxka tatok maj kintitani tekitinij maj kisentilikan itatok” (Luc. 10:2). Jesús kimatia ke miakej kikakiskiaj kuali tanauatilmej uan keman semej ijkon kichiuaya, semi yolpakia. Jesús kinpaleuij imomachtijkauan maj kinekikan tanojnotsaskej keman kiniluij ke amo nenkaj yeskia. w25.03 18, 19 § 15, 16

Jehová nochipa techpaleuis. Keman chikauak kioui ueli timopaleuiaj itech se tepekoyok oso itampa se ueyi tet. No ijkon, Jehová ueli techpaleuia keman tikpiaj ouijkayomej. Yejua techpaleuia maj kuali tietokan uan techyekiluia ke maski axkan titajyouiaj, amo nochipa ijkon yeski. Uan no motenkaua ke satepan senkis kiixpolos nochi tein techtajyouiltia uan tein kichiua maj amo tiyolseujtokan (Ezeq. 34:​25, 26). Tiknextiaj ke tiktemouaj maj Jehová techpaleui komo tiktataujtiaj. Keman ijkon tikchiuaj “Dios techyolseuis”, uan nejon kiyekpias toyolo uan totanemilil (Filip. 4:​6, 7). Jehová amo keman techsenkauas. Jehová tamati kemej se ueyi tet oso se ueyi tepet tein amo keman moolinia, yejua ika tikmatij ke nochipa techpaleuis. Uelis titakuaujtamatiskej iuan porin yejua kemej yeskia se “ueyi tet tein nochipa yetos” (Is. 26:​3, 4). Kemej yejua nochipa yoltos kichiuas tein motenkaua, techkakis keman timotataujtiskej uan nochipa techpaleuis. No titakuaujtamatij iuan Jehová porin yejua amo keman kinkaua akin kitekitiliaj (2 Sam. 22:26). Amo keman kielkauas keniuj tiktekitilianij uan nochipa techtatiochiuis (Heb. 6:10; 11:6). w24.06 27 § 4-6

Amo moneki tikchiuaskej nion teyi tein uelis kichiuas maj amo tiktasojtakanok, yejua ika moneki maj kuali tikitakan toni ika timoixpetaniaj, uan kuali tikixpejpenaskej akonimej iniuan timouikaskej para maj amo peua tiknemilikan ke moneki timotomintiskej. Komo tikitaj ke amo semi tiktasojtajok Jehová, maj niman tikpatakan kemej titanemiliaj uan maj tikchiuakan tein techpaleuis maj amo tikauakan (Mat. 5:​29, 30). Maj tikixtopeuakan tein ueliskia kichiuas maj amo tiktasojtakanok Jehová. Komo tiknemiliaj ke amo keman tikauaskej Jehová porin kuali tiktekitilijtokej, ueliskia timokajkayaujtoskej. Maj tiknemilikan ke aksa kichipaua ichan, satepan kitapoua ventanas uan kikaua maj kalaki ejekat uan talnex. Nejin techmachtia ke amo sayoj moneki tikchiuaskej tein techpaleuis maj kuali timouikakan iuan Jehová, ta ijkon kemej amo tikauaskiaj maj talnex kalaki tokalijtik, no moneki tikixtopeuaskej nochi tein uelis kichiuas maj amo tiktasojtakanok (Efes. 2:2). w24.07 21 § 6, 7

Sayoj ke amo ueli senkis tikajsikamatij keniuj tel tajyouij. ¡Tel amo kuali tein kichiuilijkej! Jesús kisentokak kitasojtak iTajtsin uan amo kikauak maski semi tajyouij. Yejua amo kitajtanij Jehová maj kintatsakuilti nejon soldados akin kikoujpampilojkaj, ta kiluij: “NoTajtsin, xikintapojpolui, porin amo kimatij tein kichiuaj” (Luc. 23:34). Komo tiktataujtiaj Jehová maj kinpaleui akin techtajyouiltiaj, techpaleuis maj tiyolseujtokan uan maj amo tikualantokanok nion maj tikintauelitstokanok. Amo tikmatij toni no techchiuiliskej achto ke Dios kiixpolos nochi tein amo kuali. Sayoj ke maski tein yeski techpanos maj tiksentokakan tiktataujtikan Jehová maj techpaleui. Maj timochikauakan tikchiuaskej kemej Jesús keman kitajyouiltijkej uan maj tiksentokakan tikchiuakan tein Biblia tayolmajxitia. Komo ijkon tikchiuaj Jehová techtatiochiuis (1 Ped. 3:​8, 9). w24.11 6 § 16; 7 § 17, 19

Jehová kitauelita tein amo kuali tein kichiuaj sekin uan no semi kitauelita tajtakol (Sal. 5:​3-6). Dios kineki maj tiktakamatikan tein technauatia itech Biblia. Sayoj ke amo kichia maj amo keman timopolokan porin kimati ke titajtakolejkej (Sal. 130:​3, 4). Maski ijkon, amo no kiuelita tein kichiuaj ‘takamej akin amo yolkualmej, akin kikuij itatiochiualis Dios tein amo technamiki para ika motenpaleuiskej keman kichiuaj tein tetajyaltia uan amo ixpinauaj’ (Jud. 4). Uan Biblia kijtoua ke Dios kinixpolos “akin amo yolkualmej” itech Armagedón (2 Ped. 3:7; Apoc. 16:16). Sayoj ke Jehová amo kineki maj nion akin ixpoliui. Biblia kiyekijtoua ke yejuatsin kineki maj “nochin moyolpatakan” (2 Ped. 3:9). Ijkon kemej Jehová, tayekananij amo yolijsiuij keman kipaleuiaj akin tel tajtakolchiuak maj moyolpata uan maj oksepa kuali mouika iuan Dios. w24.08 26 § 1, 2

Tejuan no tikintasojtaj oksekin ijkon kemej Jehová kichiua, yejua ika tikinmakaj tein tiuelij keman kinpoloua. ¿Tikonixmati se tokniuj akin amo kipia toni kikuas oso toni motalilis? Jehová uelis kichiuas xikonmaka nejon tokniuj tein kipoloua. Tiitekitikauan Jehová techixmatij porin titapaleuiaj keman panoua teisa tein amo kuali. Kemej tein panok keman mochiujtoya ueyi kokolis COVID-19. Miakej tokniuan kinpaleuijkej uan kinmakakej okseki tokniuan toni kikuaskej, toni motaliliskej uan okseki taman. Uan no, miakej tapaleuijkej uan kitemakakej inintomin para kinpaleuiskej tokniuan akin nemij kampa mochiuak se tetsauit. Nochin yejuan kichiujkej tein kijtoua Hebreos 13:16: “Amo xikelkauakan nankichiuaskej tein kuali uan nankinpaleuiskej oksekin ika tein nankipiaj, porin nejin semi kiyolpaktia Dios”. w24.09 27 § 6, 7

Xikonnemili nejin, tikontemojtok se tekit para tikonixpanoltis mochankauan. Uan tikonajsi ojkan kampa uelis tiontekitis. Tikonita toni tekit tikonchiuas, toni hora tionkalakis uan tionkisas, ox uejka oso amo uan okseki taman. Nochin ojkan kuali yetok porin amo tikonchiuas tein Biblia kijtoua ke amo kuali yetok. Xa tikonixpejpena semej porin okachi tikonuelita tekit uan okachi mitsontaxtauiaj. Sayoj ke onkak okseki taman tein no moneki tikonitas achto ke tiontaixpejpenas. Xikonnemili, ¿uelisok tionyas nochi nechikolmej komo tikonixpejpena semej de nejon tekimej? ¿Tikonpiasok tiempo para tikonpaleuis mochankauan maj yolpakikan uan maj motokikan okachi iuan Jehová? Komo tionmotajtania nejin mitsonpaleuis xikonita ke tikonueyichiuas Jehová uan tikonpaleuis mochankauan, okachi tayekantok ke tikontanis okachi tomin. Ijkon uelis tikonixpejpenas tein kiyolpaktis Jehová. w25.01 17 § 11-13

Maski sekin mitschiuilijkej tein amo kuali, uelis tikmatis ke Jehová mitstasojta uan mitspatiuita. Komo tejua no ‘semi titayokoxtok’, xikelnamiki ke Jehová kiitak ke tiyolkuali uan kinekik xiktekitili (Juan 6:44). Uan nochipa mitspaleuis porin semi mitstasojta. Tein Jesús kichiuak keman yetoya nikan taltikpak, techpaleuia maj tikajsikamatikan keniuj momachilia Jehová. Jesús kuali kinselij uan kiniknelij akin kinixtopeuayaj (Mat. 9:​9-12). Keman se siuatsin akin semi mokokouaya kimatokilij itasal porin kimatia ke ijkon pajtiskia, Jesús kiyolseuij uan kiluij ke kuali tein kichiuak porin kinextij ke takuaujtamatia (Mar. 5:​25-34). Jesús senkis kichiua kemej iTajtsin (Juan 14:9). Yejua ika senkis xikmati ke Jehová mitspatiuita uan kiita tein kuali tein tikchiua, kimati ke iuan titakuaujtamati uan ke tiktasojta. w24.10 7 § 4, 5

David miakpa mochoktij porin kipanok miak taman tein amo kuali. Miakej kitauelitakej uan hasta seki ichankauan uan itasojikniuan kikajkayaujkej uan kinekiaj kichiuiliskej tein amo kuali (1 Sam. 19:​10, 11; 2 Sam. 15:​10-14, 30). Se tonal kijkuiloj: “Nisiouikya porin semi nichoka, nochi youal nikapaloua nocama ika noixayo, uan kemej semi nichoka hasta kemej yeskia taapexoni kampa nikochi” (Sal. 6:​6, 7). Maski tein David kipanotoya semi ouij katka, kimatia ke Jehová kitasojtaya. Yejua kijkuiloj: “Jehová nechkakis keman nichokas” (Sal. 6:8). Tajkuilol tein axkan timomachtiaj kinextia ke Jehová semi techtasojta uan ke toka motekipachoua. Yejua kijtoj ke Jehová kemej yeskia kisentilijtiaya nochi iixayo David itech se kuetaxbolsa oso kemej yeskia kijkuiloskia itech se amaix. Senkis kineltokaya ke iTajtsin kiitaya tein kipanotoya uan kielnamikia. Uan yejua amo sayoj kimatia nejon, ta no keniuj momachiliaya. w24.12 22 § 11, 12