Septiembre

Moneki timochikauaskej tiksentokaskej kuali titaixejekoskej. Yejua ika amo moneki tiknemiliskej ke kuali titaixejekouajya uan ke amo moneki tiksentokaskej timochikauaskej kuali timouikaskej iuan Jehová (1 Cor. 10:12). Yejua ika, moneki tiksentokaskej tikitaskej ox tiksentokaj titakuaujtamatij. Itech amatajkuilol tein kinijkuilouilij tatitanil Pablo tokniuan akin yetoyaj Colosas no kijtoj ke monekia maj kisentokakan takuaujtamatikan. Maski tokniuan kuali taixejekouayajya, kiniluij ke monekia moyekpiaskej para maj amo kinkajkayauanij ika inintamachtilis tamatinij (Col. 2:​6-10). Uan Epafras, akin kuali kinixmatiaya nochipa ininka motataujtiaya ‘para maj kisentokanij semi takuaujtamatinij’ oso maj kuali taixejekouanij (Col. 4:12). ¿Toni techmachtia nejin? Ke Pablo uan Epafras kimatiaj ke moneki timochikauaskej para tiksentokaskej kuali titaixejekoskej uan moneki maj Jehová techpaleui. Yejuan kinekiaj maj akin nemiaj Colosas kuali taixejekouanij maski kipanotoyaj ouijkayomej. w24.04 6, 7 § 16, 17

Tikmojkatokaj Jehová keman tiknextiaj ke tiktasojtaj uan amo tikchiuaj tein amo kiuelita. Para tikyolpaktiskej Jehová moneki tikmatiskej toni kuali yetok uan toni amo, toni tein melauak uan toni amo (Prov. 2:​3-6; Heb. 5:14). Komo okachi tikinmouiliaj oksekin uan amo tikmojkatokaj Dios, peuas tikneltokaskej seki taman tein kiixnamiki tein tamachtia Jehová. Maj ininka titanemilikan 12 tapijpianij akin yajkej tachiatoj itech tal tein Jehová motenkaujka kinmakas israelitas. Majtakti tapijpianij okachi kinmouilijkej cananeos uan amo kitasojtakej Jehová, yejua ika kijtojkej: “Amo uelis tipankisaskej uan tikinteuiskej, porin yejuan okachi chikaujkej ke tejuan” (Núm. 13:​27-31). Maski moitaya ke cananeos katkaj okachi chikaujkej ke israelitas, kielkaujtoyaj Jehová keman kijtojkej ke amo ueliskiaj kintaniskej. w24.07 9 § 5, 6

¿Uelis titakuaujtamatiskej ke Jehová nochipa kichiua tein kuali yetok keman kiixtalia tein kiselis aksa? ¡Kemaj! Ijkon kemej Abrahán, no tikmatij ke ‘Juez akin okachi ueyichiujkej’ nochipa kichiua tein kuali, teiknelia uan tamatkej. Jehová kikauilij iKonetsin maj kiixtali tein kinamiki kiselis aksa uan kinextilij keniuj moneki kichiuas (Juan 5:22). Jehová uan Jesús kimatij tein tiknemiliaj uan tein tikmachiliaj (Mat. 9:4). Yejua ika nochipa kichiuaskej “tein kuali yetok”. Maj nochipa titakuaujtamatikan iuan Jehová uan tein kiixtalia kichiuas. Yejua amo kemej tejuan porin yejua kuali kiita toni kinamiki kiselis aksa (Is. 55:​8, 9). Tikmatij ke Jehová uan iKonetsin nochipa kichiuaj tein kuali, yejua ika tikneltokaj ke kuali kiixtaliskej tein tikseliskej. Uan tikmatij ke Jesús kichiuas kemej iTajtsin uan kinextis ke teiknelia uan kichiuas tein kuali yetok (Is. 11:​3, 4). w24.05 7 § 18, 19

Semi moneki maj amo titakajkayauakan, tikmatij nejin keman tikitaj tein panok keman Felipe kiyoleuak itasojikniuj Natanael maj kiixmatiti Jesús. Maski Jesús amo keman kiitstoya Natanael, kijtoj: “Xikitakan, nejin se takat israelita akin amo takajkayaua” (Juan 1:47). Jesús kiitak ke Natanael okachi amo takajkayauaya. Maski Natanael no katka tajtakolej kemej tejuan, amo keman takajkayauaya, ta nochipa kijtouaya tein melauak. Jesús kimojkaitaya tein kichiuaya Natanael uan kiluij ke kuali tein kichiuaya. Miak taman tein kijtoua Salmo capítulo 15 kinextia keniuj moneki timouikaskej iniuan oksekin uan tikyolpaktiskej Jehová. Salmo 15:3 kijtoua ke akin nemi ichan Jehová “amo tetakajkayauilia, amo teyi kinchiuilia oksekin uan amo kinpinaujtia akin kintasojta”. Komo tikintakajkayauiliaj oksekin uelis semi tikinyolkokoskej (Sant. 1:26). w24.06 10 § 7, 9; 11 § 10

Komo kuali tionmomachtia achto ke tionyas tiontanojnotsatiuj, amo semi tionmouis keman tiontajtos iniuan oksekin. Jesús kinmachtij imomachtijkauan keniuj tanojnotsaskej achto ke kintitaniskia (Luc. 10:​1-11). Uan kemej yejuan kichiujkej tein Jesús kiniluij, semi yolpakkej porin kichiujkej miak taman. ¿Keniuj uelis timomachtiskej achto ke tiaskej titanojnotsatiuij? Moneki tiknemiliskej toni tiknekij tikijtoskej. Uan ijkon uelis kuali tikinmelauiliskej akin tikinnojnotsaskej. No uelis tiknemiliskej keniuj technankiliskej uan toni uelis tikijtoskej. Nejon techpaleuis maj kuali timomachilikan uan maj kuali tikinnojnotsakan. w24.04 16 § 6, 7

Tikteixmatiltiaj kuali tanauatilmej porin tiktasojtaj Jehová uan itokay. Keman titanojnotsaj no ika tikueyitaliaj Dios. No tiknemiliaj ke Jehová kinamiki ‘maj tikueyitalikan uan maj tikueyichiuakan’. ¿Keniuj tikueyitaliaj uan tikueyichiuaj? Keman tikinnextiliaj oksekin ke Jehová yejua akin kichijchiuak nochi uan kichiua maj tinemikan. ¿Uan keniuj tikmakaj tochikaualis? Keman titanojnotsaj nochi tein tiuelij uan tikuij totiempo, tochikaualis uan tein tikpiaj (Mat. 6:33; Luc. 13:24; Col. 3:23). Semi tikuelitaj ika titajtoskej Dios akin tiktasojtaj. Sayoj ke no tiknekij ika titajtoskej itokay uan tein kijtosneki. w24.05 17 § 11

Jehová axkan kichiua maj tiyolseujtokan uan maj tiyolpakikan, uan satepan kichiuas maj tinemikan nochipaya. Tikmatij ke yejuatsin kineki uan uelis techtatiochiuis. Uan kemej tikneltokaj nejin techpaleuia maj tiknekikan tiktekitilikan, ijkon kemej kichiujkej itekitikauan ne uejkauj. Maj tikitakan tein kipanok Timoteo (Heb. 6:​10-12). Timoteo takuaujtamatia iuan Dios akin nochipa yoltok (1 Tim. 4:10). Kiyekmatia ke yejuatsin kitatiochiuiskia. Yejua ika semi kitekitilij Jehová uan kinpaleuij oksekin. ¿Toni kichiuak? Tatitanil Pablo kiyolchikauak maj kuali tanojnotsa uan maj kuali tamachti itech nechikol. Ijkon telpochmej uan akin xiuejkejya kiitaskiaj tein Timoteo kichiuaya uan no ijkon kichiuaskiaj. No kimakakej seki tekimej tein ouijkej katkaj kemej tayolmajxitis, sayoj ke no kinextis ke tetasojtaya (1 Tim. 4:​11-16; 2 Tim. 4:​1-5). Timoteo kimatia ke Jehová kitatiochiuiskia (Rom. 2:​6, 7). w24.06 22, 23 § 10, 11

Jehová miakpa kintitania itanauatijkauan maj kinnejmachtitij israelitas uan maj kinmelauanij. Yejuatsin kinauatij Jeremías maj kiniluiani nejin: “Ximokepa Israel akin taixnamiki […]. Amo namechtauelitstos porin amo nitekaua […]. Amo nochipa nikelnamiktos tein nankichiujkej. Sayoj xikijto ke timopoloj porin tikixnamikik Jehová moDios” (Jer. 3:​12, 13). Jehová kiluij Joel maj kiniluiani israelitas: “Senkis xikixtalikan nouan namokepaskej” (Joel 2:​12, 13). Kiluij Isaías maj kitematilti: “Ximochipauakan; amo xiksentokakan xikchiujtokan tein amo kuali; amo xitajtakolchiuakanok” (Is. 1:​16-19). Uan no kinauatij Ezequiel maj kinilui: “Amo nechyolpaktia maj miki aksa akin amo yolkuali. […] Ta nikneki maj amo kichiuaok tein amo kuali, uan maj kisentoka yolto”. “Amo nechyolpaktia maj miki aksa […]. Yejua ika ximoyolpatakan uan xinemikan” (Ezeq. 18:​23, 32). Jehová semi yolpaki keman aksa moyolpata porin kineki maj nemi nochipaya. w24.08 9 § 5, 6

Jehová kinmaka nochin itekitikauan tein moneki para maj kuali iuan mouikakan, uan kuali kinixyekana uan kinyekpia. Jehová no kinextia ke kuali techselia ichan keman kiita maj itech nochi taltikpak ueli kipiakan ininBiblia. ITajtol Dios moijkuiloj itech eyi tajtolmej: hebreo, arameo uan griego. ¿Okachi kuali mouikaj iuan Jehová akin ueli kiixtajtoltiaj Biblia itech semej nejon tajtolmej? Amo (Mat. 11:25). Jehová amo kineki maj kuali iuan timouikakan porin tel kuali timomachtijkej oso porin tikajsikamatij tajtolmej tein ika moijkuiloj Biblia. Yejuatsin kineki maj nochin kimatikan keniuj tamati uan toni kinemilia, amo sayoj akin kuali momachtijkej. Biblia motajtolkepani itech miak tataman tajtolmej. Yejua ika, itech nochi altepemej ueli kimatij toni tamachtia uan uelis kimatiskej keniuj kuali mouikaskej iuan Dios (2 Tim. 3:​16, 17). w24.06 6, 7 § 13-15

Amo uejkaua kiixpoloskiaj Jerusalén, ijkon kemej Jesús kijtojka. Tokniuan monekia mochikauaskej okachi takuaujtamatiskej uan okachi taxikoskej, porin nejon kinpaleuiskia satepan (Heb. 10:25; 12:​1, 2). Amo uejkaua tejuan no techixnamikiskej, okachiok ke tokniuan hebreos (Mat. 24:21; Apoc. 16:​14, 16). Tikitaskej seki taman tein Jehová kinyolmajxitijka nejon tokniuan, uan tein no uelis techpaleuis axkan. Keman Tatitanil Pablo kintajkuilouilij tokniuan hebreos, kinyolchikauak maj okachi kuali momachtianij iTajtol Dios (Heb. 5:​14–6:1). Yejua kinmelauilij ika iTajtol Dios tein moijkuiloj itech hebreo keyej kemej kiueyichiujtoyaj Jehová, okachi kuali katka ke kemej kiueyichiuayaj judíos. Yejua kimatia ke komo okachi kiixmatiaj uan kiajsikamatiaj, kinpaleuiskia maj kiixtopeuakan tamachtilis tein amo melauak uan maj amo kikauakan tamachtilis tein melauak. w24.09 8, 9 § 2, 3; 10 § 6

Imomachtijkauan Jesús monekia maj kinyolchikauakan. ¿Keyej? Porin sekin kikaujkaj ininchan, ininchankauan uan tekit tein kipiayaj para kitojtokaskej Jesús uan nochipa iuan yetoskej (Mat. 19:27). Oksekin kinchiuiliayaj tein amo kuali porin mochiujkaj imomachtijkauan Jesús (Juan 9:22). Yejuan kinekkej kikauaskej seki taman uan tajyouiskej porin kineltokayaj ke Jesús katka Mesías akin moijtojka ke ualaskia (Mat. 16:16). Sayoj ke keman kimiktijkej Jesús, semi motayokoltijkej uan kinekiaj mosenkauaskej porin kinemiliayaj ke amo mochiuaskiaok tein kichiayaj. Jesús kiitak ke imomachtijkauan motayokoltijtoyaj, sayoj ke amo porin amo takuaujtamatiaj, ta kiajsikamatik ke motayokoltijtoyaj porin kimiktijkaj. Yejua ika niman peuak kinyolchikaua itasojikniuan satepan ke oksepa nemik. Monextij iixpan María Magdalena keman chokatoya kampa kitokkaj (Juan 20:​11, 16). No monextij ininixpan ome imomachtijkauan akin yajtoyaj Emaús. Uan no iixpan tatitanil Pedro. w24.10 13 § 5, 6

Tetatmej, xikonpaleui mokonetsin maj ueli kinmelauili oksekin keyej kineltoka ke aksa tachijchiuak. Uelis namechpaleuis komo namosenmachtiaj tamachtilismej tein moajsij itech jw.org kampa kijtoua “Tein Biblia tamachtia”, satepan kampa kijtoua “Tein kiajsinij tamatinij uan Biblia”, uan ompa “¿Keniuj peuak nemilis?”. Satepan mokonetsin uelis kiixpejpenas katiyejua kinpaleuis oksekin maj kiajsikamatikan ke aksa tachijchiuak, uan ximomamachtikan keniuj kimelauaskia. Xikonilui maj kimelauili kemej uelis kiajsikamatis. Aksa xa uelis kiluis: “Nejua nikneltoka sayoj tein ueli nikita, uan amo keman nikitani Dios”. Toknitsin ueliskia kinankilis: “Xiknemili ke tietok koujtaj uan tikita se atekoch de tet. ¿Melauj ke ipa tiknemiliskia ke aksa kichijchiuak? No ijkon keman tikitaj taltikpak uan nochi tein yoltok, ipa tiknemiliaj ke aksa akin tel tamatkej tachijchiuak”. w24.12 18 § 16

Tinochin moneki maj techpaleuikan para maj kuali titaixpejpenakan. Tayekananij uan okseki tokniuan akin kuali kitekitiliaj Jehová uelis techpaleuiskej. Maski sekin xiuejkejya, moneki tikinkakiskej uan amo tiknemiliskej ke tein techyolmajxitiaj amo techpaleuiaok. Jehová kineki maj tikitakan tein kichiuaj akin xiuejkejya para maj techmachtikan. Yejuan miak xiujmejya momachtianij, kiajsikamatij miak taman uan tel tamattokej. Ne uejkauj, Jehová kichiuak maj seki takamej akin xiuejkejya kinixyekananij uan kinyolchikauanij itekitikauan. Maj inintech titanemilikan Moisés, David uan tatitanil Juan. Yejuan nenkej itech tataman xiujmej uan tataman tein kinpanok. Keman yaya momikilitijya, kinyolmajxitijkej akin okachi telpochmej katkaj. Nejin eyi takamej akin xiuejkejya katkaj uan amo keman kikaujkej Jehová kijtojkej ke semi moneki maj tiktakamatikan Dios. Maski tixiuejkejya oso titelpochmejok tinochin uelis techpaleuis tein tayolmajxitijkej (Rom. 15:4; 2 Tim. 3:16). w24.11 8 § 1, 2

Keman Noé nemia, Dios kinnauatijka maj amo kikuanij esti (Gén. 9:​3, 4). Uan satepan no kinnauatij israelitas maj amo kikuanij, uan akin kikuaskia ‘monekia mikis’ (Lev. 7:27). Uan Jesús kiniluij judíos ke monekia kitakamatiskej nochi tein Dios kinnauatijka (Mat. 5:​17-19). Yejua ika amo keman kintajtaniskia maj kikuakan inakayo uan maj tayikan iesyo. Jesús ika tajtoj nejin sayoj para kinmachtis akin ompa kikaktoyaj. Uan no ijkon kichiujka keman kinojnotska siuatsin de Samaria, yejua kiluij: “At tein nejua nikmakas, [...] kichiuas maj nemi nochipaya” (Juan 4:​7, 14). Jesús amo kijtosnekia ke nejin siuatsin nemiskia nochipaya komo sayoj tayiskia at de nejon atekoch. Uan amo no kijtosnekia ke akin kinnojnotsak ompa Capernaúm nemiskiaj nochipaya komo yekmelauj kikuaskiaj inakayo uan tayiskiaj iesyo. w24.12 9 § 4-6

Tokniuan takamej moneki kipiaskej cuidado uan amo kinitaskej siuamej kemej kichiuaj akin amo kitekitiliaj Jehová. ¿Keyej? Porin miakpa tein aksa kinemilia yejua tein kichiua. Maj tiknemilikan tein Pablo monekik kinnejmachtis tokniuan taijitalmej akin mosentiliayaj Roma. Tepitsin satepan ke mochiuak nejon nechikol, yejua kiniluij: “Amo xiksentokakan xikchiujtokan kemej kichiuaj akin axkan nemij” (Rom. 12:​1, 2). Nejin kinextia ke sekin kisentokayaj tanemiliayaj uan kichiuayaj kemej momattoyaj akin amo kitekitiliayaj Dios. Yejua ika, Pablo kiniluij ke monekia kipataskej kemej tanemiliayaj uan tein kichiuayaj. Axkan, nejon tajtolmej no moneki kitakamatiskej tokniuan takamej. Sayoj ke seki tokniuan takamej no peua tanemiliaj kemej akin amo kitekitiliaj Dios, uan hasta no kintajyouiltianij ininsiuatsin. w25.01 9 § 4

Axkan tokniuan tayekananij no semi tekitij. Yejuan no kiteixmatiltiaj kuali tanauatilmej (2 Tim. 4:5). Technextiliaj ke moneki titanojnotsaskej, techmachtiaj keniuj moneki tikchiuaskej uan keniuj titamachtiskej. No kiixtaliaj kani uan keniuj motanojnotsas. Keman kinmelauaj oksekin kinikneliaj uan amo kinchichikouiaj. Keman aksa tajtakolchiua, kiyolmajxitiaj uan kipaleuiaj maj oksepa kuali mouika iuan Jehová, uan no kiitaj maj itech nechikol mochiua tein chipauak (1 Cor. 5:​12, 13; Gál. 6:1). Tokniuan tayekananij tekitij kemej ichkatajpianij (1 Ped. 5:​1-3). Tel kuali momachtiaj keman kitemakaj se tanojnots, mochikauaj kinixmatiskej nochin tokniuan itech nechikol uan kinkalpanouaj para kinyolchikauaskej. Uan no, sekin tayekananij tapaleuiaj keman mochijchiuaj uan moyektaliaj Kalmej kampa tiMosentiliaj, no tapaleuiaj keman mochiua se ueyi nechikol. Sekin tekitij iniuan Tayekananij akin Tetajtouiaj itech Tapajtiloyamej, iniuan Oloch Tokniuan tein Kinkalpanouaj akin Mokokouaj uan kichiuaj okseki taman. ¡Kichiuaj miak taman para techpaleuiskej! w24.10 20 § 9

Biblia kijtoua ke kemej motaxtauakya ueli techtapojpoluiaj oso techmakixtiaj. Tatitanil Pedro kijtoj ijkon: “Namejuan nankimatij ke namechmakixtijkej para amo nankisentokaskej nanenkajnemiskej ijkon kemej namechnextilijkej namouejkaujtatuan. Keman namechmakixtijkej amo taxtaujkej ika plata uan oro tein uejueliui, ta ika iesyo Cristo, tein semi kipia ipatiuj, kemej iesyo se ichkatsin tein amo teyi kipoloua uan amo pitsotik” (1 Ped. 1:​18, 19). Kemej Jesús taxtauakya, Dios ueli techmakixtia den tajtakol uan mikilis tein axkan kichiua maj semi titajyouikan (Rom. 5:21). Semi tikintasojkamatiliaj Jehová uan iKonetsin porin techmakixtijkej ika inemilis oso iesyo Jesús tein semi kipia ipatiuj. w25.02 5 § 15, 16

¿Keniuj uelis timoyekpiaskej para amo titajtakolchiuaskej? Maj tikitakan toni techmachtia Proverbios capítulo 7. Ompa ika motajtoua se telpoch akin auilnemik iuan se siuaauilnenkej. Versículo 22 kijtoua ke nejon telpoch “ijsiujka” kiajsito nejon siuat. Sayoj ke seki versículos achto kinextiaj ke yejua achto kichiujka seki taman tein yolik kichiuak maj tajtako. ¿Toni kichiujka? Yekinika, youak panouaya kampa nemia nejon siuat. Satepan, kikuik ojti tein kiajxitiskia ichan (Prov. 7:​8, 9). Uan keman kiitak nejon siuat, amo kitemoj oksekopa yas, ta mokauak maj kipitso uan maj kilui ke kitemakakaya netetayokolilmej para kuali mouikas iuan Dios. Xa kiluij nejin para maj telpoch kinemiliani ke tein kichiujtoya kuali yetoya (Prov. 7:​13, 14, 21). Komo telpoch amo kichiuaskia nochi nejon, ueliskia motsakuilis uan amo kichiuaskia se tajtakol. w24.07 16 § 8, 9; 19 § 19

Jehová amo kinkaua maj kisentokakan itech nechikol akin tajtakolchiuaj uan amo moyolpataj. Sekin kinemiliaj ke kemej yejuatsin teiknelia kikauas maj kisentoka itech nechikol aksa akin amo moyolpata. Sayoj ke nejon amo melauj. Jehová kemaj teiknelia, sayoj ke amo kipata tein kijtoua ke kuali yetok uan tein kijtoua ke amo kuali yetok (Jud. 4). Komo Jehová kikauaskia maj se tajtakolchiujkej akin amo moyolpata kisentoka poui itech nechikol, amo kinextiskia ke teiknelia porin xa nejon kichiuaskia maj oksekin no peua amo kuali monejnemiltikan (Prov. 13:20; 1 Cor. 15:33). Nejin tein panok no techmachtia ke Jehová amo kineki maj nion akin ixpoliui. Yejuatsin kineki maj miakej momakixtikan, kiniknelia akin mopataj uan mochikauaj oksepa kuali iuan mouikaskej (Ezeq. 33:11; 2 Ped. 3:9). Yejua ika, keman takat de Corinto moyolpatak uan amo kichiuakok tein amo kuali, Jehová kichiuak maj tatitanil Pablo kiniluiani tokniuan ke monekia kitapojpoluiskej uan oksepa kuali kiseliskej. w24.08 17 § 7; 18, 19 § 14, 15

Jesús tamachtij ke keman kiixtalis tein sejse kinamiki kiselis kiitas ox kinextij ke kinpaleuiaya tokniuan taijitalmej (Mat. 25:​31-46). ¿Kemanian Jesús kiixtalis akonimej ichkamej uan akonimej chivos? Keman mochiujtos “tetsaujkatajyouilis”, tepitsin achto ke ejkos Armagedón (Mat. 24:21). Ijkon kemej se ichkatajpixkej kinxeloua ichkamej uan chivos, Jesús no kinxelos akin kinpaleuiaj tokniuan taijitalmej uan akin amo kinpaleuiaj. Jehová kiixtalij Jesús maj tamelaua uan Biblia kijtoua ke yejua kuali kiixtalis tein kichiuas (Is. 11:​3, 4). Jesús kiita tein aksa kinemilia, tein kijtoua uan tein kichiua, uan no keniuj kinpaleuia tokniuan taijitalmej (Mat. 12:​36, 37). Yejua kielnamikis akonimej kinpaleuijkej tokniuan taijitalmej uan keniuj kinpaleuijkej. Keman titanojnotsaj tiknextiaj ke tikinpaleuiaj iikniuan Cristo. w24.09 20, 21 § 3, 4

Komo amo tikyekmatij teisa, maj tikitakan tein Biblia kijtoua. Se telpoch xa amo kiyekmati ox Jehová kiita tein kichiujtok, ¿kipaleuis komo nochipa ijkon tanemilijtok? Amo, yejua ika moneki kiyekitas nochi tein kijtoua Biblia para kimatis toni kinemilia Jehová. Keman tikixtajtoltiaj Biblia kemej yeskia Jehová technojnotstoskia. Sayoj ke para “tikakiskej” tein techiluia keman teisa amo tikyekmatij, moneki tikchiuaskej okse taman. Moneki tiktemoskej uan timomachtiskej textos tein ika tajtoua tein techtekipachoua uan uelis tikajsiskej komo tiktemouaj tamachtilismej itech toamaixuan (Prov. 2:​3-6). Moneki tiktajtaniskej Jehová maj techpaleui maj tikajsikan tamachtilis tein tiktemojtokej. Maj tiktemokan textos uan tamachtilis tein uelis techpaleuis. w24.10 25 § 4, 5

Jehová amo keman kinpaleuis akin sayoj kinekij maj kinueyitalikan (1 Cor. 10:​24, 33; 13:4). Kemansa, hasta akin tel kuali iuan mouikayaj Jesús kinekiaj kichiuaskej seki tekimej, sayoj ke amo porin yekmelauj kinekiaj tapaleuiskej. Yejua nejon tein kinpanok Santiago uan Juan. Yejuan kitajtanijkej Jesús maj kinmakani se ueyi tekit keman taixyekantoskiaya. Jesús amo kiniluij ke kuali yetoya tein tajtantoyaj, ta nochin 12 kiniluij: “Akin kinekis yeski ueyichiujkej moneki kintekitilis oksekin, uan akin kinekis namechyekanas moneki yeski inintakeual nochin” (Mar. 10:​35-37, 43, 44). Tokniuan akin mochikauaj tekitiskej porin yekmelauj kinekij tapaleuiskej, kichiuaskej miak taman tein kuali itech nechikol (1 Tes. 2:8). w24.11 15, 16 § 7, 8

Keman titaixpejpena, uan komo titetasojtaj, tiktemoskej “tein kinpaleuis oksekin” uan amo tein tejuan tikuelitaj (1 Cor. 10:​23, 24, 32; 1 Tim. 2:​9, 10). Ijkon tikixpejpenaskej se taman tein kinextis ke titetasojtaj uan tikinpoujkaitaj oksekin. Komo moneki tikonixpejpenas teisa tein achto moneki kuali tikonnemilis, kuali xikonita nochi tein moneki tikonchiuas. Jesús tamachtij ke moneki kuali ‘titaixejekoskej’ (Luc. 14:28). Yejua ika kuali xikonnemili nochi tiempo, tomin uan chikaualis tein monekis para tikonchiuas tein tikonixtalijtok. Kemansa monekis tikonnojnotsas mochankauan para nankiitaskej toni uelis kichiuaskej sejsemej uan ijkon mitsonpaleuiskej. ¿Keyej moneki tikonchiuas nochi nejin? Porin xa tikonitas ke monekis tikonpatas teisa oso ke uelis tikonchiuas okse taman. Uan no, komo tikontajtania mochankauan tein kinemiliaj uan tikonkaki, okachi kinekiskej mitsonpaleuiskej uan nochi kuali kisas. w25.01 18, 19 § 14, 15

Isaías kimelaua keyej tiitekitikauan Dios tiyolpakij. Yejua Jehová akin kichiua maj ueli tiksenueyichiuakan (Is. 65:19). Yejua ika Jehová kichiua maj tikinpaleuikan oksekin maj amo kisentokakan kineltokakanok tein takajkayauaj uan maj tikinpaleuikan maj no touan kiueyichiuakan Jehová. ¡Semi tiyolpakij porin tikixmatij tein melauak! Yejua ika, tiknekij ika tikinnojnotsaskej oksekin (Jer. 31:12). Akin tiksenueyichiuaj Jehová semi timotasojkamatij uan tiyolpakij ika tein Jehová kichiuati. Tejuan “kinchijchiuaskej kalmej uan ompa nemiskej; kitokaskej uvajmekat uan kikuaskej itakilo”. Uan no, “amo nenkaj motekitiltiskej” porin Jehová kintiochiuas. Dios motenkaua ke kuali nemiskej, amo teyi kinpolos uan kuali momachiliskej. Yejuatsin kimatis tein kinpoloua ‘maski yejuan ayamo kinotsaskej’, uan ‘kimakas tein kineki nochi tein yoltok’ (Is. 65:​20-24; Sal. 145:16). w24.04 22, 23 § 11, 12

No uelis tikitaskej Jehová kemej se ueyi tet komo senkis iuan titakuaujtamatij. Tikmatij ke komo tiktakamatij Dios, nejon techpaleuis hasta keman tikpiaskej ouijkayomej (Is. 48:​17, 18). Uan keman tikitaskej keniuj techpaleuia, kichiuas maj okachi iuan titakuaujtamatikan. Okachi tikneltokaskej ke sayoj Jehová techpaleuis maj tikxikokan tein yeski ouijkayot tein tikpiaskej. Jehová kemej se ueyi tet oso se ueyi tepet porin amo keman mopata. Amo kipapata kemej tamati nion tein kiixtalia kichiuas (Mal. 3:6). Keman Adán uan Eva kiixnamikkej, yejua amo kipatak tein kiixtalijka kichiuas. Tatitanil Pablo kijtoj ke Jehová “amo keman motajtolpata” (2 Tim. 2:13). Nejin kijtosneki ke tein yeski panos oso tein kichiuaskej oksekin, Jehová amo keman kipatas kemej tamati, tein kiixtalia kichiuas oso tein tanauatia. Yejua ika titakuaujtamatij ke Jehová nochipa techpaleuis keman tikpanoskej ouijkayomej uan ke kichiuas nochi tein motenkauani (Sal. 62:​6, 7). w24.06 27, 28 § 7, 8

¿Toni mitspaleuis xikita ox timonamiktis oso amo iuan monovio oso monovia? Moneki kuali tikixmatis. Achto ke namochiuaskej novios xa ipa tikmatik seki taman tein kichiuaya. Sayoj ke axkan moneki kuali tikmatis tein kipia ‘iyolijtik’ akin iuan timonamiktiti. Nejin no kijtosneki ke moneki kuali tikitas keniuj kitekitilijtok Jehová, keniuj tamati uan keniuj tanemilia. Satepan moneki timotajtanijtias nejin: “¿Yeski se kuali tetakauj oso se kuali tesiuatsin? ¿Kuali timouikaskej?” (Prov. 31:​26, 27, 30; Efes. 5:33; 1 Tim. 5:8). “¿Uelis timotasojtaskej uan kuali timonojnotsaskej? ¿Uelis niktapojpoluis keman mopolos?” (Rom. 3:23). Uan no, xikelnamiki ke maski amo nankiuelitaskej sayoj se taman, okachi moneki kuali ximouikakan maski nantatamamej. w24.05 27 § 5

Tekiuaj David semi tajtakolchiuak. Sayoj ke keman Natán kinojnotsato, David moyolyemanij uan moyolpatak (Sal. 51:​3, 4, 17, encabezamiento). Tekiuaj Ezequías no tajtakoj iixpan Jehová (2 Crón. 32:25). Ijkon kemej David, Ezequías moyolyemanij uan moyolpatak (2 Crón. 32:26). ¿Uan keniuj Jehová kiitak Ezequías? Kiitak kemej se tekiuaj akin yolmelauak. Biblia kijtoua: “Kichiuak tein Jehová kiyolpaktia” (2 Rey. 18:3). ¿Toni techmachtia? Keman titajtakolchiuaskej moneki timoyolpataskej uan timochikauaskej amo oksepa tikchiuaskej. ¿Uan komo tayekananij techyolmajxitiaj maski tikitaskej ke amo semi moneki? Amo moneki tiknemiliskej ke amo tikyolpaktiajok Jehová oso ke tayekananij amo kuali techitaj. Maj tikelnamikikan ke tekiuanij de Israel akin katkaj yolkualmej, no monekik maj kinyolmajxitikan (Heb. 12:6). Yejua ika, ¿toni moneki tikchiuaskej komo techyolmajxitiaj? 1) Moneki maj tiyolyemankej, 2) maj tikpatakan tein moneki uan 3) maj senkis tiktemokan tiktekitiliskej Jehová. Komo timoyolpataj Jehová techtapojpoluis (2 Cor. 7:​9, 11). w24.07 21 § 8; 22 § 9, 11

Akin tajtakolchiuak kimati ke kikalankixtiskej komo amo moyolpata, maski tayekananij miakpa kitemojkej kipaleuiskej (2 Rey. 17:​12-15). Yejua kinextij ke amo kinekik kitakamatis itanauatiluan Jehová (Deut. 30:​19, 20). Moneki kitematiltiskej ke yejua amo itaixpantijkaujok Jehová. Sayoj ke yejuan amo kichiuaj para kipinaujtiskej, ta para maj nochin tokniuan kichiuakan tein kijtoua Biblia uan maj amo iuan mouikakanok nion maj iuan takuakanok (1 Cor. 5:​9-11). Jehová kijtoj maj mochiua nejin porin kinpaleuiskia tokniuan. Tatitanil Pablo kijkuiloj: “Tepitsin levadura kixokoltia nochi in tixti” (1 Cor. 5:6). Komo amo kikalankixtiskiaj akin amo moyolpata, tokniuan kinemiliskiaj ke amo moneki kitakamatiskej tein Jehová tanauatia (Prov. 13:20; 1 Cor. 15:33). w24.08 27 § 3, 4

Maski ijkon, uelis tikchiuaskej kemej yejuatsin komo tikuij tochikaualis para tikinpaleuiskej oksekin. Komo se tokniuj xiuejya oso semi mokokoua uelis tiktakouitiuij oso titachipauaskej ichan. Maj titapaleuikan keman motachipauas uan motayektalis itech Kali kampa tiMosentiliaj. Maj tikelnamikikan ke uelis tikinyolchikauaskej oksekin ika tein tikijtoskej. ¿Tikonixmati aksa akin uelis tikonyolchikauas komo tikoniluia ke tikonpatiuita tein kichiua? Komo kemaj, xikonilui ke ika tionmotekipachoua. Xa uelis tikonkalpanos, tikonnotsas, tikonmakas se amatsin oso tikontajkuilouilis. Amo moneki tikonijtos miak taman, ta okachi kuali xikonilui tein yekmelauj tikonmachilia. Tein tikoniluis xa yejua tein kiyolchikauas tokniuj maj kisentoka kitekitili Jehová (Prov. 12:25; Efes. 4:29). w24.09 28 § 8-10

Komo tiontekititokya kemej tapaleuijkej, xa tionmochikaujtok tikonchiuas okseki taman tein mitsonpaleuis xionmochiua tayekankej. ¿Tikonuelitaskia tikonchiuas nejon “kuali tekit” tein kichiuaj tayekananij? ¿Toni tekit kichiua se tayekankej? Semi tanojnotsa iniuan tokniuan itech nechikol, kinyekpia uan kinmachtia tokniuan. Uan ika tein kijtoua uan kichiua, kinpaleuia maj okachi iuan takuaujtamatikan Jehová. Yejua ika Biblia kijtoua ke nejin takamej akin tel tekitij kemej yeskia “tatiochiualismej” (Efes. 4:8). ¿Toni moneki kichiuas se tokniuj takat para mochiuas tayekankej? Keman tejuatsin tikontemoua se tekit xa sayoj moneki tionuelis seki taman. Sayoj ke para maj se tokniuj takat mochiua tayekankej amo sayoj moneki maj ueli kichiua seki taman, maski kuali tamachtis oso kuali tanojnotsas amo sayoj ika nejon mochiuas tayekankej, ta no moneki kichiuas seki taman tein moijtoua itech 1 Timoteo 3:​1-7 uan Tito 1:​5-9. w24.11 20 § 1-3