Octubre

Tayekananij, takalpanouanij itech circuito, sucursal oso Oloch Taojtokaltianij miakpa technauatiaj maj tikchiuakan seki taman para techpaleuiskej maj tiktekitilikan Jehová. Sayoj ke kemansa amo senkis tikajsikamatij keyej tokniuan technauatiaj maj tikchiuakan teisa. Xa tiknemiliskej ke amo semi tapaleuia tein technauatiaj, uan hasta sayoj tikitaskej tein amo kuali tein kichiuaj tokniuan akin technauatiaj. Komo ijkon tikchiuaskiaj timoixyekantoskiaj sayoj ika tein tikitaj. Titakuaujtamatij ke Jehová kiixyekantok inechikol uan kimati tein techpanoua. Yejua ika niman titatakamatij uan kuali tikchiuaj tein technauatiaj (Heb. 13:17). Uan tikmatij ke komo titatakamatij titapaleuiskej maj tokniuan okachi kuali mouikakan (Efes. 4:​2, 3). No titakuaujtamatij iuan Jehová uan tikmatij ke maski tokniuan tajtakolejkej, Jehová techtatiochiuis komo titatakamatij (1 Sam. 15:22). Uan komo yejua kiita ke moneki mopatas teisa, kichiuas keman kiitas ke okachi kuali. w25.03 23, 24 § 13, 14

Itech nejin tonalmej tikitanij keniuj mochiujtok tein Biblia achtook kijtojka ke mochiuaskia. Tikitaj keniuj moixnamikij “tekiuaj akin taixyekana norte” uan “tekiuaj akin taixyekana sur” porin kinekij kiixyekanaskej nochi taltikpak (Dan. 11:​40, nota). Uan no, itech nochi taltikpak moteixmatiltijtok kuali tanauatilmej uan miakej kiixtalijtokej kitekitiliskej Jehová (Is. 60:22; Mat. 24:14). No tikselijtokej miak tamachtilis keman okachi moneki (Mat. 24:​45-47). Jehová techpaleuia maj okachi kuali tikajsikamatikan tein panos amo uejkaua (Prov. 4:18). Uelis tikneltokaskej ke keman peuas tetsaujkatajyouilis tikmatiskej tein techpaleuis maj amo tikauakan Jehová uan maj amo timoxexelokan keman okachi ouij yeski. Sayoj ke moneki tikelnamikiskej ke seki taman tein panos satepan amo tikmatij. w24.05 8 § 1, 2

Salmista okachi ika tajtoua keman aksa tetakajkayauilia. ¿Toni kijtosneki nejon? Keman kijtouiliaj aksa tein amo melauj uan kichiua maj amo kuali ika tajtokanok. Salmo 15:3 no techiluia ke akin mokaua ichan Jehová “amo teyi kinchiuilia oksekin uan amo kinpinaujtia akin kintasojta” (Sal. 15:1). ¿Keniuj ueliskia tikinpinaujtiskej totasojikniuan? Maski amo timomakaskej cuenta, ueliskia tikijijtojtoskej aksa. Maj tiknemilikan nejin: 1) se tokniuj siuat amo kitekitiliaok Jehová miak tonalmej, 2) se tokniuj takat uan isiuatsin kisaj de Betel, oso 3) tanauatiaj ke se tokniuj amo tayekankejok oso amo tapaleuijkejok itech nechikol. Amo kuali yeskia maj tikiniluikan oksekin ke nejon tokniuan kichiujkej tein amo kuali uan ke yejua ika kinpanok nejon. Xa amo tikmatij nochi tein panok. Uan maj tikelnamikikan ke akin mokaua ichan Jehová “amo teyi kinchiuilia oksekin uan amo kinpinaujtia akin kintasojta”. w24.06 11 § 11-13

Komo nochipa tiknemiliaj tein kiyolpaktia Jehová achto ke tikixtaliskej tikchiuaskej teisa, techpaleuis maj okachi tikmojkatokakan yejuatsin. Keman tikonixtajtoltis itech Biblia tein kipanok aksa, xionmotajtani: “Komo ompa nimoajsiskia, ¿toni nikixtaliskia nikchiuas?”. Xikonnemili ke tikonkaktok tein kijtojkej majtakti tapijpianij satepan ke yajkej tachiatoj itech tal tein Jehová motenkaujka kinmakas israelitas. ¿Tikonneltokaskia tein kijtouaj uan tikonmouiliskia cananeos? ¿Oso tikonnextiskia ke tikontasojta Jehová uan ke tikonneki tikonyolpaktis? Nochin israelitas akin ijkuak nemiaj amo kiitakej ke yekmelauj katka tein Josué uan Caleb kijtouayaj. ¿Toni kinpanok? Jehová amo kikauak maj kalakikan itech tal tein motenkaujka kinmakas (Núm. 14:​10, 22, 23). w24.07 10 § 7

Gómer auilnemik, satepan kikauak Oseas uan yajki iuan okse takat. ¿Kinemilij Jehová ke amo moyolpataskiaok? Yejuatsin akin kimati tein se kipia se iyolijtik, kiluij Oseas: “Oksepa xiouj uan xiktasojta mosiuatsin akin okse takat kitasojta uan auilnentok, ijkon kemej Jehová kintasojta israelitas maski yejuan kinueyichiuaj tatadiosmej” (Os. 3:1; Prov. 16:2). Gómer kisentokaya tel tajtakolchiujtoya. Sayoj ke, Jehová kiluij Oseas maj kitapojpoluiani uan maj oksepa iuan mokepani. Tein Oseas kipanok iuan Gómer, kinmachtij israelitas ke Jehová semi kintasojtaya. Yejuatsin kintasojtayaok maski kisentokayaj tajtakolchiuayaj, uan kisentokak kintitanilij itanauatijkauan para maj kinpaleuianij maj moyolpatakan uan maj kipatakan kemej nemiaj. Nejin techmachtia ke Jehová kuali kiixmati aksa, uan kitemoua kipaleuis maj moyolpata akin tel tajtakolchiujtok. w24.08 10 § 7

Yekinika tokniuan hebreos akin Pablo kintajkuilouilijka kikaujkaj inintaneltokalis judíos uan peuak kichiuaj kemej Cristo, yejua ika kipiakej miak ouijkayomej. Judíos katkaj ixolal Jehová porin yejuatsin kinixpejpenka. Miak xiujmej, miakej kikakiaj de Jerusalén porin ompa taixyekanaya tekiuaj akin Jehová kiixpejpenaya uan kampa moajsia templo. Nochin judíos akin amo kikauayaj Jehová kitakamatiaj iTanauatil Moisés ijkon kemej kinmelauiliayaj akin taixyekanayaj itech taneltokalis. Nejon tanauatilmej kijtouayaj toni ueliskia kikuaskej, keniuj kiitayaj maj se takat moteki uan keniuj mouikaskej iniuan akin amo katkaj judíos. Sayoj ke satepan, amo monekiaok kichiuaskej tein kijtouaya iTanauatil Moisés, nion kimaktiliskej Jehová tapialmej. Judíos akin peuak kichiuaj kemej Cristo xa semi kinouijmakak kipataskej kemej taueyichiuayaj, porin momattoyaj kitakamatiskej Tanauatil (Heb. 10:​1, 4, 10). Hasta akin okachi takuaujtamatiaj kemej tatitanil Pedro, kinouijmakak kichiuaskej nejin (Hech. 10:​9-14; Gál. 2:​11-14). Uan no, judíos akin taixyekanayaj itech taneltokalis peuak kintajyouiltiaj tokniuan porin kipatakej tein kineltokayaj. w24.09 9 § 4

Nochipa keman Jehová kinmaka tekit itekitikauan kineki maj moyekchiua (1 Cor. 14:33). Kemej kiteixmatiltiskej kuali tanauatilmej itech nochi taltikpak (Mat. 24:14). Jehová kiixtalij Jesús maj kiixyekana nejon tekit, uan yejua kiita maj nochi kuali moyekchiua. Itech yekinika siglo ompa Jerusalén tatitanilmej uan tayekananij akin ompa nemiaj kinixyekanayaj nechikolmej uan kiixtaliayaj toni monekia mochiuas (Hech. 15:2; 16:4). Itech nochi nechikolmej kinixtaliayaj tayekananij para maj kinixyekanakan uan para maj kinmatiltikan tokniuan tein kinnauatijkaj (Hech. 14:23). Kemej tokniuan tatakamatiaj, “kisentokakej okachi takuaujtamatkej uan mojmostaj momiakilijtiayaj” (Hech. 16:5). w24.04 8 § 1

Itech tonal 16 de nisán, kualkantsin seki siuamej yajkej kampa kitokkaj Jesús (Luc. 24:​1, 10). Semej de yejuan katka María Magdalena. Keman ajsik kampa kitokkaj Jesús kiitak ke amo ompa yetoyaok, yejua ika tsikuinik uan kiniluito Pedro uan Juan. Nochin omen motalojkej kampa kitokkaj uan María kintojtokak. Pedro uan Juan kiitakej ke inakayo Jesús amo ompa yetoyaok uan mokepkej ininchan. Sayoj ke María amo yajki, ta ompa peuak choka uan amo kimatia ke Jesús ompa kiitstoya. Yejua kiitak ke María kichokilijtoya uan kinekik kiyolseuis. Satepan, monextij iixpan uan tein kichiuak semi kiyolchikauak, kinojnotsak uan kinauatij teisa tein motelnekia: maj kinnauatiani iikniuan ke yejua oksepa nemia (Juan 20:17). w24.10 13 § 7

Moisés katka tanauatijkej, juez, tajkuilojkej uan taixyekankej. Kinixyekanak israelitas keman kiskej de Egipto uan kiitak miak milagros tein Jehová kichiujka. Dios kichiuak maj kijkuilo yekinika makuil amatajkuilolmej tein kipia Biblia, no kijkuiloj Salmo 90 uan xa Salmo 91. Uan xa no yejua kijkuiloj amatajkuilol Job. Keman kipiaya 120 xiujmej, tepitsin achto ke momikiliskia, Moisés kinsentilij israelitas para kinelnamiktis nochi tein kiitakaj uan tein kinpanoka. Seki israelitas kiitakaj milagros tein Jehová kichiujka uan keniuj kintatsakuiltijka egipcios (Éx. 7:4). Kiitakaj keniuj Jehová kitajkoxelojka mar Rojo uan keniuj nejnenkej ompa uan satepan kiitakej keniuj Jehová kiixpoloj faraón uan itateuijkauan (Éx. 14:​29-31). Keman yetoyajya taluakyan Jehová kinyekpiak uan kinmakak tein kinpolouaya (Deut. 8:​3, 4). Uan keman yaya kalakitijya itech tal tein motenkaujka kinmakas, Moisés no kinyolchikauak achto ke momikiliskia. w24.11 8, 9 § 3, 4

Nejin no kinextia ke tein kijtosnekia itech iTakualis toTekotsin uan tein mochiuak ompa Galilea semi taman katka. Tein Jesús kijtoj itech iTakualis amo katka para nochin, sayoj ke tein kijtoj ompa Galilea katka para okachi miakej. Miakej akin Jesús kinnojnotsak ompa Galilea itech xiuit 32 sayoj kinekiaj takuaskej. Sayoj ke Jesús kinpaleuij maj kiajsikamatikan ke amo okachi tayekantoya maj takuanij, ta tein ueliskia kichiuas maj nemikan nochipaya. Uan no kijtoj ke ueliskia oksepa nemiskej akin momikilijkejya uan nemiskej nochipaya. Itech Juan capítulo 6 Jesús amo ika tajtoj tein sayoj ueliskia kiseliskej sekin kemej tein kijtoj itech iTakualis, ta ika tajtojtoya tein tinochin ueliskia tikseliskej. w24.12 11 § 10, 11

Jehová kintauelita akin tateuiaj (Sal. 11:5). Uan okachi amo kiyolpaktia maj se takat kiteui isiuatsin (Mal. 2:16). Komo se takat kiteuia isiuatsin amo kuali mouikasok iuan Jehová. Uan xa Dios nion kikakis keman kitataujtis (1 Ped. 3:7). Seki takamej semi kinajuaj ininsiuatsin uan kiniluiaj tein semi kinyolkokoua. Jehová nion tepitsin kiyolpaktia maj aksa tel kualantinemi, maj tauelmiktinemi, maj tetsatsajtsili oso maj kijto tajtolmej tein teyolkokos (Efes. 4:​31, 32). Se takat akin kichikaujkanojnotsa isiuatsin amo kuali mouikaok iuan, uan nion no iuan Dios (Sant. 1:26). Komo se takat kiita pornografía, kichiua maj amo kuali mouikaok iuan Dios uan amo kitakachiua isiuatsin. Jehová kichia maj takat amo kikajkayaua isiuatsin iuan okse siuat, amo sayoj ika tein kichiua ta no ika tein kinemilia. Jesús kijtoj ke komo se takat kiita okse siuat porin kineki iuan motekas, “iyolijtik auilnemikya iuan” (Mat. 5:​28, 29). w25.01 9 § 6-8

Biblia kijtoua ke Jehová kinita yolmelaujkej akin kitekitiliaj. Nejin kijtosneki ke amo techixtaualtia tajtakolmej tein tikchiuaj. Maski ijkon, Jehová kisentoka kichiua tein yejua kiita ke kuali yetok. Uan keman yejua techita ke tiyolmelaujkej, amo kichiua porin timotaniliaj oso porin amo kichiua cuenta totajtakoluan. Ta Jehová techtapojpoluia porin itech titakuaujtamatij tein yejua uan Jesús kichiujkej para techmakixtiskej (Rom. 3:24). ¿Keniuj techpaleuia maj Jehová techita ke tiyolmelaujkej? Seki tokniuan kinixpejpenkej maj tekiuajtikan ne iluikak iuan Jesús uan mochiujkejya ikoneuan Dios (Tito 3:7; 1 Juan 3:1). Kintapojpoluilijkejya inintajtakoluan uan kemej yeskia amo keman tajtakolchiuaskiaj, yejua ika ueli pouij itech iTaixyekanalis Dios (Rom. 8:​1, 2, 30). Okseki tokniuan kichiaj nemiskej nochipaya nikan taltikpak, kuali mouikaj iuan Dios, uan no kintapojpoluilijkejya inintajtakoluan (Sant. 2:​21-23). w25.02 5 § 17; 7 § 18

Maj tikitakan tein panok se tonal keman tatitanil Pedro kinextij ke nion tepitsin tanemiliaya kemej Jehová. Jesús kiniluij itatitaniluan ke monekia yas Jerusalén, uan ompa akin taixyekanayaj itech taneltokalis kikitskiskiaj, kiteltajyouiltiskiaj uan satepan kimiktiskiaj (Mat. 16:21). Pedro kimatia ke Jesús katka Mesías akin moijtojka ke kimakixtiskia ixolal Dios, yejua ika amo kineltokaya maj Jehová kikauani maj kimiktianij Jesús (Mat. 16:16). Yejua ika Pedro kiuikak okseko uan kiluij: “¡NoTekotsin, amo ijkon xikijto! Nejon amo keman mitspanos” (Mat. 16:22). Ika nejin, kinextij ke amo tanemiliaya kemej Jehová, yejua ika Pedro uan Jesús tataman tanemiliayaj. Jesús kimatia ke para kichiuas tein Jehová kinekia, ouij yeskia porin tajyouiskia uan mikiskia. Yejua ika amo kikakik Pedro maski xa yejua sayoj kinekia kipaleuis. Ijkon tatitanil kiajsikamatik ke monekia peuas tanemilis kemej Jehová. ¡Nejon techmachtia ke no moneki ijkon tikchiuaskej! w25.03 9 § 5, 6

¿Timoyolkokojtok porin aksa akin tiktasojta mitschiuilij tein amo kuali? Maski mitschiuiliskej tein amo kuali, uelis tikneltokas ke Jehová mitstasojta. Komo aksa mitskauak oso mitschiuilij tein amo kuali, no uelis mitspaleuis tajkuilol tein axkan timomachtiaj. Se amaix kijtoua ke tajtolmej “akin semi tayokoxtokej”, xa no kijtosneki “akin amo kichiaj tein kuali”. ¿Keniuj Jehová kinpaleuia akin ijkon momachiliaj? Texto kijtoua ke yejuatsin “iniuan yetok” akin tajyouijtokej xa porin kinchiuilijkej tein amo kuali oso kinkaujkej. Jehová kemej yeskia se tepopaj akin kinapaloua ikonetsin uan kiyolseuia porin choka. Yejuatsin kimachilia tein tikmachiliaj uan niman techpaleuia. Kineki techyolseuis keman titajyouijtokej uan kijtoua ke uelis tikchiaskej miak taman tein kuali. Keman techiluia nejin techpaleuia maj tikxikokan ouijkayomej tein tikpiaj axkan (Is. 65:17). w24.12 23 § 13, 14

Ijkon kemej Timoteo, tayekananij no uelis kimatiskej ke Jehová kiita uan kipatiuita tein kichiuaj. Tayekananij kinixyekanaj tokniuan, tamachtiaj uan tanojnotsaj, uan miakej no tapaleuiaj keman mochijchiuaj kalmej kampa titaueyichiuaj uan keman mochiuaj tetsaujmej. Sekin kinpaleuiaj Oloch Tokniuan tein Kinkalpanouaj akin Mokokouaj oso Tayekananij akin Tetajtouiaj itech Tapajtiloyamej. Tayekananij kimatij ke yejua Jehová akin kinixyekana tokniuan. Yejua ika semi tekitij uan kiyekmatij ke Dios kintatiochiuis (Col. 3:​23, 24). Maski amo tinochin uelis tiyeskij titayekananij, tinochin uelis tikchiuaskej teisa para tiktekitiliskej Jehová. Yejuatsin semi kipatiuita nochi tein tikchiuaj para tiktekitiliskej. Kitasojkamati keman tikontemaka maski amo miak tomin para tekit tein mochiujtok itech nochi taltikpak. Uan yolpaki keman tikontapojpoluia akin mitsonyolkokoj. Yejuatsin semi kipatiuita nochi tein tikonchiua. Jehová mitsontasojta uan mitsontatiochiuis (Luc. 21:​1-4). w24.06 23 § 12, 13

Se akin kitekitilia Jehová xa no ueliskia ijkon kipanos. Xa tajtakolchiuas uan kinemilis ke nochi ijsiujka panok, uan ueliskia kijtos: “Amo nikmati keniuj panok”. Sayoj ke komo itech tanemilia seki taman tein achto kichiujka, kiitas ke nejon kichiuak maj tajtako. Xa kuali mouikaya iuan akin amo kitasojta Jehová, peuak moixpetania ika tein amo kuali, kiitaya tein amo kuali itech internet, oso yaya kampa amo monekia. Xa amo motataujtiayaok, amo kiixtajtoltiayaok Biblia, amo yayaok nechikolmej uan amo tanojnotsayaok. Uan ijkon kemej kipanok telpoch tein ika tajtoua Proverbios, xa achto kichiujka seki taman tein yolik kichiuak maj tajtako. ¿Toni techmachtia? Tikmatij ke amo moneki titajtakolchiuaskej, sayoj ke amo no moneki tikchiuaskej teisa tein kichiuas maj titajtakokan. Uan yejua nejon tein kijtoj Salomón (Mat. 5:​29, 30). w24.07 16 § 10, 11

Sayoj ke, ¿toni nejon tein tel patiyoj? Yejua keman tikteixmatiltiaj iTaixyekanalis Dios, porin nejon tapaleuia maj miakej momakixtikan (2 Cor. 4:1). ¿Uan akonimej kiixnextiaj sokikomit? Tejuan, tiitekitikauan Dios akin tikteixmatiltiaj kuali tanauatilmej. Keman Pablo nemia, kiuikayaj takual, vino oso tomin itech se sokikomit. Itech nejin tonalmej tejuan no tikuikaj teisa tein tel patiyoj, se kualtsin tekit tein Jehová techmakatok: maj tikteixmatiltikan kuali tanauatilmej. Jehová techpaleuis maj tichikaujkej para tiksentokaskej titanojnotsaskej. Kemansa xa timouiskej maj techixnamikikan oso maj amo kinekikan techkakiskej. ¿Toni techpaleuis maj amo ijkon timomachilikanok? Maj tiknemilikan itech tein kijtojkej tatitanilmej keman motataujtijkej satepan ke kinnauatijkej maj amo tanojnotsanijok. Yejuan amo mosenkaujkej, ta kitajtanijkej Jehová maj kinpaleuiani para “maj amo mouikan” uan maj ueli kisentokanij kiteixmatiltianij iTajtol. Uan yejua niman kinnankilij (Hech. 4:​18, 29, 31). Komo timouij maj techixnamikikan keman titanojnotsaj, maj tiktajtanikan Jehová maj techpaleui maj okachi tikintasojtakan oksekin, uan maj tiyolchikaujkej keman tikteixmatiltiskej kuali tanauatilmej. w24.04 16 § 8, 9

Kemej tiktasojtaj Jehová, tiknekij maj itokay yektik. Nejin kijtosneki ke tiknekij tikinmatiltiskej oksekin ke amo melauj tein Satanás kitakajkayauiliani Jehová (Gén. 3:​1-5; Job 2:4; Juan 8:44). Yejua ika keman tiouij titanojnotsatij, tiknekij tikiniluiskej akoni Jehová uan keniuj tamati yejuatsin. Tiknekij maj nochin kimatikan ke semi tetasojta, ke nochipa kichiua tein kuali yetok uan ke iTaixyekanalis kichiuas maj amo titajyouikanok, maj tiyolseujtokan uan maj tiyolpakikan (Sal. 37:​10, 11, 29; 1 Juan 4:8). Keman tikchiuaj nochi nejin, titapaleuiaj maj itokay Jehová yektik. Uan no tiyolpakij porin tikchiuaj tein moneki kichiuas se itaixpantijkauj Jehová. w24.05 18 § 12

Takat akin ‘kuali kinselia oksekinʼ amo sayoj kineki kinpaleuis itasojikniuan, ta no oksekin (1 Ped. 4:9). Se amatajkuilol kijtoua ke takat akin kuali teselia, yolkuali iniuan hasta akin amo kinixmati uan yolpaki keman kinyoleua ichan. Xionmotajtani: “¿Nechixmatij ke kuali nikinselia nochan tokniuan itech nechikol?” (Heb. 13:​2, 16). Takat akin kuali teselia yolkuali iniuan nochin akin kikalpanouaj, kemej akin pobres uan akin kitemakatij se tanojnots itech inechikol. No ijkon kichiuaj iniuan akin mochikauaj kinyolchikauaskej tokniuan kemej akin takalpanouaj itech circuito (Gén. 18:​2-8; Prov. 3:27; Hech. 16:15; Rom. 12:13). w24.11 21 § 6

Keman Jesús kitetapouij nejin ininka tajtoj majtakti ichpochmej akin kinamikitoj novio (Mat. 25:​1-4). Nochin yejuan kinekiaj kalakiskej iuan novio kampa yejua monamiktiskia. Jesús kijtoj ke makuil “yektanemiliayaj” uan makuil “amo yektanemiliaya”. Akin yektanemiliayaj kuali ijsatoyaj uan kichiaskiaj novio maski motayoualtiskia uan amo niman ajsiskia. Yejua ika kiuikakej inincandil para ika motauiliskej, uan kiuikakej okachi aceite komo novio semi uejkauaskia uan ijkon inincandil amo seuiskia (Mat. 25:​6-9). Keman ejkok novio, makuil ichpochmej akin yektanemiliayaj iuan kalakkej kampa yejua monamiktiskia. Xa no ijkon panos iniuan tokniuan taijitalmej. Akin kinextiskej ke amo keman kikauaj Jehová uan ijsatoskej hasta keman ejkos Jesús, akin novio, uelis iuan kalakiskej itech itaixyekanalis ne iluikak (Apoc. 7:​1-3). w24.09 21 § 6

Keman tikitaj keniuj itech nochi taltikpak miakej kinpaleuijtok keman titanojnotsaj, techyolchikaua maj tiksentokakan ijkon tikchiujtokan. Sejse xiuit tel miak millones touan mosentiliaj keman tikelnamikij imikilis Cristo uan miakej peua momachtiaj Biblia. Uan no, tel miakej peua touan tanojnotsaj uan moauiaj. Amo tikmatij kanachimejok kiseliskej kuali tanauatilmej, sayoj ke kemaj tikmatij ke Jehová kinsentilijtok tel miakej para maj makisakan keman mochiujtos tetsaujkatajyouilis (Apoc. 7:​9, 14). Jehová yejua iaxka tatok uan kimati ke miakej kisentokaskej kikakiskejok kuali tanauatilmej. Yejua ika moneki maj tiksentokakan titanojnotsakan (Luc. 10:2). Akin yekmelauj imomachtijkauan Jesús semi kiuelitaj kitematiltiskej kuali tanauatilmej. Itatitaniluan semi kiuelitayaj tanojnotsaskej uan katkaj yolchikaujkej, yejua ika akin kinitayaj ‘kimatiaj ke iuan yetoyaj Jesús’ (Hech. 4:13). Tejuan no tiknekij maj oksekin kiitakan ke tikuelitaj titanojnotsaskej uan ke tiyolchikaujkej, ijkon xa kiitaskej ke tikchiujtokej kemej Jesús. w25.03 18 § 15; 19 § 17, 18

Biblia kinextia ke Jehová kinpatiuita akin oksekin kinitaj ke amo ueyichiuanimej. Jehová kititanik tanauatijkej Samuel ichan Jesé para maj kiixtaliani kemej tekiuaj ompa Israel semej de ikoneuan. Keman Jesé kinuikilij Samuel chikome ikoneuan amo kiuikilij David akin katka xokoyot. Sayoj ke Jehová kiixpejpenka David (1 Sam. 16:​6, 7, 10-12). ¿Keyej? Porin kuali kiixmatia uan kimatia ke semi kitasojtaya. Xikonnemili tein Jehová kichiuani para mitsonnextilis ke moka motekipachoua. Yejuatsin mitsonyolmajxitia kemej okachi mitsonpaleuis (Sal. 32:8). Nejin kinextia ke Jehová kuali mitsonixmati (Sal. 139:1). Keman tikonchiuas tein Jehová mitsonyolmajxitis uan tikonitas ke mitsonpaleuia okachi tikonneltokas ke moka motekipachoua (1 Crón. 28:9; Hech. 17:​26, 27). Jehová kiita nochi tein tikonchiua para tikontekitilis uan tikontakamatis, uan no kiita tein kuali tein tikonchiua (Jer. 17:10). w24.10 25, 26 § 7-9

Tejuatsin tikontasojta Jehová uan tikonneki tikonpaleuis tokniuan. ¿Toni uelis mitsonpaleuis? Xikonnemili keniuj semi tionyolpakis keman tikonpaleuis tokniuan. Jesús kijtoj: “Okachi se yolpaki keman se kitemaka ke ijkuak temakaj” (Hech. 20:35). Jesús kichiuaya nejin, yejua ika semi yolpakia kinpaleuis oksekin (Mar. 6:​31-33). Se tonal, keman Jesús uan itatitaniluan tel sioujtoyajya, yajkej kampa taseltijkan para moseuiskej. Sayoj ke miakej ajsikej achto ke yejuan porin kinekiaj maj kinmachti. Jesús ueliskia kiniluis ke amo porin yejua uan itatitaniluan “nion ueliaj takuayaj”. Jesús no ueliskia kinmachtis sayoj se oso ome taman uan kiniluiskia maj yakan. Sayoj ke kemej yekmelauj kintasojtaya, “peuak kinmachtia” hasta keman “tel tiotakya katka” (Mar. 6:35). w24.11 16 § 9, 10

Tetatmej, xikonyolchikaua mokonetsin maj kitemo ika tajtos Biblia (Rom. 10:10). Keman peua tikinmachtiaj oksekin de Biblia, tamati kemej ijkuak se konetsin peua mochikaua nejnemis, yekinika, konetsin moketsa uan satepan yolik tajtaksatiuj. No ijkon keman se telpoch peua tanojnotsa, xa ika tajtos seki taman tein amo ouij. Xa ueliskia kitajtanis nejin akin iuan momachtia: “¿Tikmatia ke miakej taixmatinij kiitaj tein onkak uan no ijkon kichijchiuaj? Xikita nejin video tein kualtsin”. Satepan ueliskia kinextilis se video itech taxelol “¿Aksa kichijchiuak?” uan kitajtanis: “Komo se taixmatkej kiueyitaliaj porin kicopiaroj teisa tein ipa onkayaya nikan taltikpak, ¿akoni kinamiki maj tikueyitalikan porin kichijchiuak nochi tein onkak?”. Xa ijkon akin iuan momachtia kinekis okachi kiixmatis Jehová. w24.12 19 § 17, 18

Yejua ika Jehová kiualtitanik Jesús para techmakixtis. Sayoj ke, ¿keniuj ueliskia sayoj se takat akin amo tajtakolej kinmakixtis miakej? Tatitanil Pablo kijtoj keniuj mochiuak nejin: “Ijkon kemej miakej peujkej kipiaj tajtakol porin sayoj se takat [Adán] amo tatakamatik, no ijkon Dios kinitas miakej ke yolmelaujkej porin sayoj se takat [Jesús] tatakamatik” (Rom. 5:19; 1 Tim. 2:6). Nejin kijtosneki ke ijkon kemej tinochin titajtakolejkej uan timomikiliaj porin se takat akin amo tajtakolej katka amo kitakamatikok Dios, no monekia maj techmakixtiani aksa akin amo tajtakolej uan kitakamatiskia Dios. ¿Keyej Jehová amo kinkauak maj nemikan nochipaya ikoneuan Adán akin kitakamatiskiaj? Xa tejuan tiknemiliskiaj ke kuali yeskia maj Jehová kichiuani nejon, sayoj ke yejua amo kuali kiitaskia. Porin moitaskia ke Adán amo tajtakolchiujka uan ke ikoneuan amo no tajtakolejkej. w25.01 21 § 3, 4

Tatitanil Pablo kimatia ke yaya kimiktitijya. Sayoj ke yolpakia keman kielnamikia nochi tein kichiujka. ¿Keyej? Yejua kijtoj: “Nitamitsikuinikya uan niksentoka nitakuaujtamati” (2 Tim. 4:​6-8). Pablo kiixtalij kitekitilis Jehová uan yejua ika kiyolpaktij. Ijkon kemej Pablo kichiuak tejuan no tiknekij kuali titaixpejpenaskej uan tikyolpaktiskej Jehová. ¿Keniuj uelis ijkon tikchiuaskej? Pablo kijtoj tein kichiuak yejua uan okseki tokniuan: “Tejuan tikchiuaj nochi porin titakuaujtamatij uan amo porin techyekana tein tikitaj”. Aksa akin takuaujtamati iuan Jehová kinemilia tein yejua kineki maj kichiua keman taixpejpena. Ika tein kichiuas kinextis ke senkis takuaujtamati ke Jehová kitatiochiuis satepan uan ke komo kichiua tein kiyolmajxitia itech Biblia semi kipaleuis (Sal. 119:66; Heb. 11:6). w25.03 20 § 1, 2

Miakej akin achto tateuiayaj, takajkayauayaj uan kualaniaj mopatakej porin ichikaualis Dios kinpaleuij (Is. 65:25). Semi mochikauanij para amo kichiuaskejok nejon tein amo kuali (Efes. 4:​22-24). Sayoj ke tiitekitikauan Dios titajtakolejkej, yejua ika ipa timopoloskej. Maski ijkon, Jehová kichiuani maj miakej kuali mouikakan, maj motasojtakan uan maj yolseujtokan (Tito 2:11). ¡Sayoj Dios akin kipia nochi chikaualis ueliskia kichiuas nejon! Tein yejua motenkaua nochipa kichiua (Is. 55:​10, 11). Axkan tikueyichiuajya Jehová iniuan tokniuan, ijkon kemej yejua kijtojka ke mochiuaskia. Maski kampa tinemij mochiua miak taman tein amo kuali, tejuan kuali timouikaj, kuali timomachiliaj uan tiyolseuij (Sal. 72:7). Yejua ika, tiknekij tikinpaleuiskej oksekin maj no touan kiueyichiuakan Jehová. ¿Keniuj tikchiuaj? Keman timochikauaj tikinmachtiskej oksekin (Mat. 28:​19, 20). w24.04 23 § 13, 15

Jesús kinextiaya ke semi kitasojtaya Jehová ika nochi itanemilil. Yejua kimatia toni kinekia Dios maj kichiua uan kiixtalij ijkon kichiuas maski kimatia ke tajyouiskia. Kemej kinekia senkis kiyolpaktis iTajtsin, amo kikauak maj nion teyi kitsakuili maj kichiua nejon. Pedro uan okseki tatitanilmej uelik kimatkej keniuj tanemiliaya Jesús porin miak tiempo iuan nentinemiaj. Keman Pedro kijkuiloj yekinika iamatajkuilol kinyolchikauak tokniuan maj tanemilikan ijkon kemej Jesús tanemiliaya (1 Ped. 4:1). Keman Pedro kijkuiloj nejin versículo, kijtoj se tajtol tein kinextia toni kikuiaj soldados para ika mopaleuiskej keman tateuiayaj. Ijkon kiteajsikamatiltij ke komo titanemiliaj kemej Cristo kemej yeskia tikpiaskej toni ika titateuiskej para tikixnamikiskej tein amo kuali tein tejuan tiknejnekij uan tein kiixyekana Amokuali Satanás (2 Cor. 10:​3-5; Efes. 6:12). w25.03 8, 9 § 1-3

¿Toni moneki tiktemos tikmatis keman nanyeskij novios? Achto ke okachi tiktasojtas monovio oso monovia, uelis ika nantajtoskej seki taman tein motelneki, kemej tein nankiixtalijtokej nankichiuaskej. ¿Toni mitspaleuis okachi kuali xikixmati? Kuali xiknojnotsa, xiktatsintoki uan kuali xikaki tein mitsiluis (Sant. 1:19). Xa uelis nankichiuaskej seki taman para uelis namonojnotsaskej, kemej nansentakuaskej, nannemitiuij uan nansentanojnotsaskej. No uelis okachi kuali namoixmatiskej keman iniuan nanyetoskej namotasojikniuan uan namochankauan. No uelis tikixtalis tikchiuas teisa kampa uelis tikitas tein kichiua uan keniuj mouika iniuan oksekin. w24.05 27, 28 § 6, 7

Amo uejkaua tikpiaskej uejueyi ouijkayomej uan okachi monekis titakuaujtamatiskej iuan Jehová. Biblia techtapouia tein kinpanok oksekin uan no tein kinpanouani tokniuan itech nejin tonalmej, nejin techpaleuis maj titaxikokan. Itech xiontanemili tein tikonixtajtoltia uan xikonita keniuj Jehová nochipa kinpaleuiani itekitikauan kemej se ueyi tet. Nejin mitsonpaleuis no xikonita Jehová kemej se ueyi tet. Uan no komo timochikauaj okachi tikchiuaskej kemej Jehová, okachi uelis tikinpaleuiskej tokniuan. Ne uejkauj, Jesús kitokaytij Simón kemej Cefas (oso Pedro, tein kijtosneki “tet”) (Juan 1:42). Ijkon kinextij ke Pedro kinyolseuiskia uan kinyolchikauaskia tokniuan. Biblia no kijtoua ke tayekananij kemej yeskiaj “iyekauil se ueyi tet” tein kinpaleuia tokniuan itech nechikol (Is. 32:2). Sayoj ke tinochin uelis timosenyolchikauaskej komo tikchiuaj kemej Jehová. w24.06 28 § 10, 11

Tekiuanij akin taixyekanayaj Israel akin Jehová kinitaya ke yolmelaujkej katkaj, kiueyichiuayaj kemej yejuatsin kiyolpaktia uan kinyolchikauayaj oksekin maj no ijkon kichiuakan. Jehová kijtoj ke sekin tekiuanij amo katkaj yolmelaujkej porin amo kitakamatkejok itanauatiluan uan peujkej kinueyichiuaj tatadiosmej (2 Crón. 12:1). ¿Keyej Jehová kinekia maj kiueyichiuakan kemej yejuatsin kiyolpaktiaya? Yekinika, porin yejuan tekiuanij akin monekia kinpaleuiskej israelitas maj kiueyichiuakan Dios kemej yejuatsin kiyolpaktiaya. Ojpatika, porin keman kinueyichiuayaj tatadiosmej semi tajtakolchiuayaj uan kintajyouiltiayaj oksekin (Os. 4:​1, 2). Expatika, porin tekiuanij uan israelitas katkaj iaxkauan Jehová. Yejua ika keman kinueyichiuayaj tatadiosmej, Biblia kijtoua ke kemej yeskia auilnemiaj (Jer. 3:​8, 9). Keman aksa auilnemi semi kiyolkokoua itakatsin oso isiuatsin. No ijkon, akin motemaktia iuan Jehová sayoj ke satepan kikaua semi kiyolkokoua yejuatsin (Deut. 4:23). w24.07 22, 23 § 12-15