Ijkuak timokokoaj

Linda akin kipia 71 xiuitl, okijto: “Ijkuak onechiluijkej onikpiaya cáncer, yetoskia ken onechiluijkej yinimikiskia. Pero ijkuak oniajsito nokalijtik, onimokuayejyeko omonekiaya nikixnamikis nin kokolistli”.

Elise akin kipia 49 xiuitl, okijto: “Nikpia se kokolistli noixko uan sapanoa nechkokoa. Ualeua sapanoa kualo uan non kichiua ma nimoyolkoko. Ik non, nimomachilia noselti uan ualeua onimokuayejyekoaya nimomiktis”.

Se tlakatl mokokoa kajki itech se silla uan kajki iuan ikalchanejkauan

TEJUATSIN tikmati sapanoa tetlajyouilti ijkuak techiluiaj se tokalchanejka mokokoa noso ijkuak techiluiaj tikpiaj se kokolistli. Sapanoa teyolkoko ijkuak ijkon techpanoa. Timomojtiaj uan timotekipachoaj porque moneki tiaskej timopajtitiuij, oui tikajsiskej kanin timopajtiskej noso amo tikpiaj tlen ika tiktlaxtlauaskej uan noijki titlajyouiaj ijkuak techpajtiaj. Sapanoa teyolkoko porque san timokuayejyekojtokej timokokoaj.

¿Tlen techpaleuis ijkuak ijkon techpanoa? Miakej sapanoa kinyolchikaua motlatlaujtiskej uan kintlajtoltiaj textos tlen teyolchikauaj. Noijki tlapaleuia ijkuak inkalchanejkauan kintlasojtlaj uan kinyolchikauaj akinmej mokokoaj.

¿TLEN YOKINPALEUI SEKIMEJ?

Robert akin kipia 58 xiuitl, okijto: “Ijkuak tikpias se kokolistli, xitlaneltoka itech toTajtsin Dios uan ye mitspaleuis. Xiktlatlaujti uan xiktlapoui ken timomachilia. Xikilui ma mitspaleui ika iespíritu santo uan ma mitsyolchikaua porque tikinpia mokalchanejkauan. Noijki ma mitspaleui xikixnamiki kokolistli”.

Robert noijki okijto: “Miak ipati tokalchanejkauan ma techpaleuikan. Nochipa nechnotsa se nokalchanejka uan nechtlajtlania kox kuali nika. Noijki oksekimej noyolikniuan nechyolchikauaj. Non nechpaleuia uan kuali nimomachilia”.

¿Tikpia se moyolikni tlen mokokoa uan tikneki tiktlajpaloti? Linda okijto: “Akin mokokoa kineki yetos ken amitlaj kipanoa uan ualeua amo kineki kijtos tlen kokolistli kipia. Ik non, ma tiktlapouikan itech okseki tlamantli”.

ToTajtsin Dios techmaka chikaualistli, techyolchikaua ika iTlajtol, techtlasojtlaj tokalchanejkauan uan toyolikniuan. Non kinpaleuia akinmej mokokoaj ma kinekikan ma yoltokan maski kixnamikij kokolistli.

Ninmej textos mitspaleuiskej

Xikkauili toTajtsin Dios ma mitspaleui

“Oniktlatlaujti Jehová uan ye onechnankili. Onechpaleui ijkuak onimomojtiaya. Onechpaleui ijkuak sapanoa onimotekipachoaya” (Salmo 34:4, 6).

Linda okijto: “Amo nikiluia toTajtsin Dios ma nechpajti. Pero nikiluia ma nechmaka chikaualistli uan ijkon nikixnamikis nokokolis”.

Xiktlajtolti Biblia uan mitsyolchikauas

“Amikaj kijtos: ‘Nimokokoa’” (Isaías 33:24).

Ximokuayejyeko tlen toTajtsin Dios kichiuas. Nin mitspaleuis tikneltokas tlen kichiuas uan titlaxikos.

Xikinkauili mokalchanejkauan uan moyolikniuan ma mitspaleuikan

“Se melauak toyolikni nochipa kiteititia techtlasojtla uan ye se tokni tlen kajki ijkuak timoyolkokoaj” (Proverbios 17:17).

Elise okijto: “Amo ximoxelo. Xikinkauili moyolikniuan ma mitspaleuikan. Amo ximoxelo maski ualeua moselti timomachilis uan timokuayejyekos toTajtsin Dios amo mitskaki”.