Ijkuak ayakmo tikneki tiyoltos

Adriana tlen chanti Brasil, okijto: “Sapanoa onimoyolkokoaya uan onimokuayejyekoaya nimomiktis”.

¿SE TONAL yotikijto ayakmo tikneki tiyoltos? Tla ijkon yotimomachili xamo tikajsikamati Adriana. Ye sapanoa omotekipachoaya, omoyolkokoaya uan omosotlauaya. Satepan okiluijkej omonekiaya mopajtis porque sapanoa omoyolkokoaya.

Ma tikitakan tlen okipanok se tlakatl itoka Kaoru uan chanti Japón. Ye okinmalui itatajuan ijkuak yokipiayaj miak xiuitl. Okijto: “Ijkuakon ayakmo onikmatiaya tlen nikchiuaskia porque onikpiaya ouijkayotl kanin onitekipanoaya. Satepan ayakmo itlaj oniknekiaya nikkuas uan ayakmo onikochiaya. Oniknekiaya ma nimiki porque ayakmo oniknekiaya nitlajyouis”.

Se tlakatl itoka Ojebode uan chanti Nigeria, okijto: “Nochipa onimoyolkokoaya uan san tlen tlamantli okichiuaya ma nichoka. Onimokuayejyekoaya nimomiktis”. Pero Adriana, Ojebode uan Kaoru amo omomiktijkej. Pero sejse xiuitl kanaj ochocientos mil momiktiaj.

¿TLEN TLAMANTLI OKINPALEUI?

Miakej tlakamej momiktiaj porque pinauaj kinmiluiskej oksekimej ma kinpaleuikan. Pero Jesús okijto akinmej mokokoaj moneki ma mopajtikan (Lucas 5:31). Tla ijkon timomachilia, amo xipinaua tikinmiluis oksekimej ma mitspaleuikan. Miakej ayakmo okachi moyolkokoaj porque kichiuaj tlen kinmiluiaj akinmej tlapajtiaj. Adriana, Ojebode uan Kaoru ijkon okichijkej uan axkan okachi kuali momachiliaj.

Akinmej moyolkokoaj kinmakaj pajtli uan noijki psicólogos inmiuan motlapouiaj. Noijki akinmej mokokoaj, moneki ma kinmajsikamatikan inkalchanejkauan uan inyolikniuan. Jehová ye akin okachi uelis iuan timouikaskej uan noijki techmaka iTlajtol.

¿AJSIS SE TONAL AYAKMO TIMOYOLKOKOSKEJ?

Akinmej moyolkokoaj amo san niman pajtij ijkuak kinmakaj pajtli uan moneki kipatlaskej seki tlamantli itech inemilis uan ijkon kixnamikiskej inkokolis. Ik non, tla timoyolkokoa kuali xikmato satepan kuali tiyetos. Ojebode okijto: “Nikneki ma mochiua tlen kijtoa Isaías 33:24, ompa kijtoa ajsis tonal amikaj kijtos ‘Nimokokoa’”. Noijki mitsyolchikauas tlen yokijto toTajtsin Dios kichiuas satepan (Apocalipsis 21:1, 4). Ayakmo keman tikilnamikis non kokolistli (Isaías 65:17).

Ninmej textos mitspaleuiskej

ToTajtsin Dios kajsikamati tlen tikmachilia

“Porque ne, Jehová nimoDios, nikkitskijtok moyekma, Akin mitsiluia: ‘Amo ximomojti. Ne nimitspaleuis’” (Isaías 41:13).

San Jehová kajsikamati tlen tikmachiliaj uan kineki techpaleuis.

Ximokuayejyeko itech iTlajtol toTajtsin Dios

Elías “opejki kijtoa okinekiaya mikis, okijto: ‘¡Ayakmo nikxikoa! Jehová axkan xikchiua ma nimiki’” (1 Reyes 19:4).

Ojebode okijto: “Onechpaleui nimokuayejyekos itech iTlajtol toTajtsin Dios. Onikitak profeta Elías noijki omoyolkokoaya”.

Xikita tlen okinpanok akinmej okitekichiuilijkej toTajtsin Dios

Jesús okilui Pedro: “Yonimotiotsajtsili para amo xikpolo motlaneltokalis. Iwa ijkuak timoyolpatlas, xikinyolchikawa mokniwah” (Lucas 22:32).

Ijkuak Pedro okijto amo okixmatiaya Jesús, sapanoa omoyolkoko uan ochokak. Kaoru okijto: “Sapanoa onechyolchika ijkuak onikmatki Jehová uan Jesús okajsikamatkej tlen okimachiliaya Pedro”.

Ayakmo keman tikilnamikis non kokolistli (Isaías 65:17)