Ncedisa Abanye Ukuthi Bafunde NgoJehova

1. Kuyini okwenziwa ngabantu abatshiyeneyo nxa besizwa izindaba ezinhle? (ImiSebenzi 13:​47, 48; 16:​14, 15)

NGEZIKHATHI zasendulo, abanye abantu bathi beqalisa ukuzwa ngoNkulunkulu langezindaba ezinhle bahle baba ngamakholwa. (Bala imiSebenzi 13:​47, 48; 16:​14, 15.) Lakulezinsuku bakhona abantu abathi bangavele bezwe izindaba ezinhle zoMbuso bahle bazamukele. Ngitsho labanye abaqala bengafuni ukufunda ngoJehova bangatshintsha bacine sebefunda ngaye. Manje kumele senzeni nxa singathola umuntu ofuna ukufunda ngoJehova?

2. Umsebenzi wokutshumayela ufanana njani lowomlimi?

² Umsebenzi wethu wokutshumayela singawufanisa lomsebenzi womlimi ohlanyele izilimo ezitshiyeneyo. Ezinye ziyaphangisa ukuvuthwa ikanti ezinye zingathatha isikhathi. Umlimi uyavuna lezo esezivuthiwe kodwa kaphumi aphele emasimini, uyaqhubeka ehlakulela futhi ethelela lezo ezingakavuthwa. Yikho kanye esikwenzayo nxa singathola umuntu ofuna ukufunda ngoJehova. Sihle simncedise masinyane ukuthi afunde iqiniso futhi abe ngumlandeli kaJesu. Kodwa kasikhalali ukuncedisa labo abangakazimiseli kangako ukufunda ngoJehova. Kancane kancane siqhubeka sibancedisa babone ukuthi kungani kuqakathekile ukufunda iqiniso. (Joh. 4:​35, 36) Nxa silelihlo elibukhali sizabona indlela esingancedisa ngayo umuntu ngamunye ngoba abantu bayatshiyana. Esihlokweni lesi sizaxoxa ngokuthi singabancedisa njani labo abafuna ukufunda ngoJehova siqala nje ukubabona. Sizabona lokuthi singabancedisa njani ukuthi baqhubeke bethuthuka.

UNGABANCEDISA NJANI LABO ABAFUNA UKUFUNDA NGOJEHOVA?

3. Kumele senzeni nxa singahlangana lomuntu ofuna ukufunda iBhayibhili? (U-1 Khorinte 9:26)

³ Nxa singathola abantu abafuna ukufunda ngoJehova, kumele sibancedise masinyane ukuthi bangene endleleni eya ekuphileni. Kumele sihle sicele ukufunda labo iBhayibhili njalo sibanxuse emihlanganweni yebandla zisuka nje.—Bala u-1 Khorinte 9:26.

4. Landisa okwenzakala komunye owesifazana oseCanada.

⁴ Cela ukufunda laye iBhayibhili. Abanye abantu esixoxa labo bahle bavume ukufunda lathi iBhayibhili. Ngelinye ilanga kungoLwesine omunye owesifazana eCanada wathatha ibhukwana elithi Ungathokoza Kuze Kube Nini Lanini! enqoleni yethu yokutshumayela. Udadewethu owayekhonapho wamtshela ukuthi ibhukwana lelo silisebenzisa ukuxoxa labantu ngeBhayibhili. Owesifazana lo wathi uyafuna ukufunda iBhayibhili udadewethu wasemnika inamba zakhe zefoni. Mhlalokho nje owesifazana lowo wathumela udadewethu imeseji ebuza ukuthi bangafunda nini. Udadewethu wathi uzambona ngempelaviki kodwa owesifazana lo wathi: ‘Ngicela ubuye kusasa, ngiyabe ngikhona.’ Owesifazana lo waqalisa ukufunda iBhayibhili ngoLwesihlanu njalo wahle wangena lomhlangano webandla ngeSonto yonaleyo. Kusukela lapho wahle waqalisa ukumthanda uJehova.

5. Kuyini okumele sikunanzelele nxa siqala ukufunda lomuntu iBhayibhili? (Khangela lemifanekiso.)

⁵ Ayisibo bonke esixoxa labo ngeBhayibhili abazahle basukumele phezulu njengowesifazana lo esixoxe ngaye. Abanye esixoxa labo bangafisa ukuthi siphendule imibuzo engabe ibakhathaza kumbe sixoxe ngendaba abayithandayo. Kuyabe kumele sibabekezelele abantu abanjalo futhi sitshengise ukuthi siyabathanda ngoba ngelinye ilanga bangacina bevuma ukuthi sifunde labo iBhayibhili. Abanye abafowethu labodadewethu abazingcitshi ekuqaliseni izingxoxo labantu ekutshumayeleni babuzwa ukuthi kanti bona bakwenza njani. Asizweni amacebo angasinceda.

6. Singacela njani ukufunda lomuntu iBhayibhili?

⁶ Nanka amacebo esiwaphiwa ngabafowethu labodadewethu abazingcitshi ekuqaliseni izingxoxo labantu abafuna ukufunda iBhayibhili. Kabasebenzisi imitsho enjengokuthi “sicela ukukufundisa iBhayibhili” kumbe ethi “sizofunda lawe iBhayibhili” kodwa bajayele ukuthi “siyakukholisa ukuxoxa labantu ngeBhayibhili” kumbe bathi “sicela ukuxoxa lawe ngamanye amacebo esiwathole eBhayibhilini.” Nxa sebehlela ukuthi bazaphinda baphenduke bajayele ukuthi, “ubukwazi yini ukuthi iBhayibhili liphendula imibuzo eminengi etshiyeneyo?” kumbe bathi, “lanxa iBhayibhili labhalwa kudala lilamacebo alokhe esebenza lalamuhla.” Abanye bona bathi “ngicela ukudlula ngikutshengisa okunye okufundiswa liBhayibhili nxa uzabe ukhona.” Bayazama ukubalekela ukuthi “sizabe sifunda lawe iBhayibhili iviki ngayinye.” Phela lokhu kungenza abantu bacabange ukuthi yinto enzima abangeke benelise ukuyenza.

7. Kungani kumele sinxuse esifunda labo emihlanganweni yebandla? (U-1 Khorinte 14:​23-25)

⁷ Banxuse emihlanganweni yebandla. Kukhanya angani abanye abaqalisa ukungena imihlangano yebandla ngesikhathi sikamphostoli uPhawuli bahle baqalisa ukukhonza uJehova. Yikho okujayele ukwenzakala lamuhla. (Bala u-1 Khorinte 14:​23-25.) Abanengi abacina bengabangane bakaJehova bancedwa yikungena imihlangano yethu. Manje kumele umnxuse nini umuntu ofunda laye iBhayibhili emihlanganweni yethu? Kusifundo 10 sebhuku elithi Ungathokoza Kuze Kube Nini Lanini! kukhulunywa ngokungena imihlangano yaboFakazi bakaJehova. Kodwa akumelanga silinde size siyefika esifundweni leso singakamnxusi emihlanganweni yethu. Uqalisa nje ukufunda laye iBhayibhili wohle umnxuse ukuthi azolalela intshumayelo kazulu wonke ubusumtshela lokuthi izabe ikhuluma ngani. Ungamtshela lokuthi kuzaxoxwa ngani esifundweni seNqabayokulinda.

8. Kuyini esingakwenza nxa sinxusa umuntu emihlanganweni yethu? (U-Isaya 54:13)

⁸ Nxa sinxusa umuntu esifunda laye iBhayibhili emihlanganweni yethu kumele simchasisele ukuthi kuyabe kusenziwani. Omunye umama ofunda iBhayibhili wamangala ebona umqhubi weNqabayokulinda eqamba bonke abantu ngamabizo. Wabuza udadewethu ayefunda laye wathi: “Ungitshela ukuthi umuntu lo uyawazi amabizo abantu bonke laba?” Udadewethu wamtshela ukuthi siyazama ukukhumbula amabizo abo bonke abafowethu labodadewethu njengoba nje sikhumbula amabizo ezihlobo zethu. Umama lo wamangala ngoba lokhu ayisikho okwenzakala esontweni yakhe. Kunjalo langabantu abanengi abaqalisa ukungena imihlangano yethu bayabe bengakwazi ukuthi thina senza njani. (Bala u-Isaya 54:13.) Kumele sibachasisele ukuthi siyabe sibuthene ukuze sikhonze uJehova, sifunde okunengi ngaye futhi sikhuthazane. (Heb. 2:12; 10:​24, 25) Lokho yikho okwenza ukuthi zonke izinto zihambe kuhle emihlanganweni yethu futhi akulamikhutshana esiyenzayo. (1 Khor. 14:40) Indawo esikhonzela kuzo zihlanzekile njalo zenziwe ngendlela yokuthi kubalula ukuthi silalele nxa sifundiswa. Asilaqembu lezombusazwe esilisekelayo, yikho asiphikisani ngezombusazwe. Nxa kusenza, sicela ubukelise umuntu ofunda laye iBhayibhili ividiyo ethi Kuyini Okwenzakala EWolu YoMbuso? engakasivakatsheli ukuze abekwazi ukuthi thina senza njani.

9-10. Singamncedisa njani umuntu esifunda laye iBhayibhili ukuthi angesabi ukungena imihlangano yebandla? (Khangela lomfanekiso.)

⁹ Abanye abantu esifunda labo iBhayibhili bayathikaza ukungena imhlangano yethu besesaba ukuthi sizababamba ngamandla ukuthi babe ngoFakazi. Zama ukuchasisela umuntu ofunda laye ukuthi ukhululekile ukubuya emihlanganweni yethu. Mtshele lokuthi kabanjwa ngamandla ukuthi aphendule. Wonke umuntu ukhululekile ukusivakatshela, ngitsho labantwana. Emihlanganweni yethu, abantwana kabehlukaniswa labazali besebefundiswa bodwa kodwa sifundiswa ndawonye. Lokho kuyanceda ukuthi abazali babekwazi ukuthi abantwababo balobani lokuthi bafundiswani. (Dute. 31:12) Kawusoze ubone kubhodiswa ingcebethu sekuthiwa abantu kabatshaye izimali. Senza khona kanye esakutshelwa nguJesu. Wathi: “Liphiwe mahala, phanini mahala.” (Mat. 10:8) Okunye ongamtshela khona yikuthi ukhululekile ukugqoka impahla alazo kulokutshona ekhathazeka ngokuyadinga impahla ezidulayo, ngoba uNkulunkulu ukhangela inhliziyo yomuntu hatshi ukubukeka kwangaphandle.—1 Sam. 16:7.

¹⁰ Nxa umuntu ofunda laye iBhayibhili angasivakatshela emihlanganweni yebandla, zama ukumncedisa ukuthi azizwe ekhululekile. Lokhu ungakwenza ngokumethula kubamemezeli abatshiyeneyo okugoqela labadala bebandla ukuze bamazi. Nxa abantu bangamamukela ngazo zombili emhlanganweni wokuqala kasoze abe lenhloni zokuphenduka. Nxa engelaBhayibhili mtshengise amavesi kwelakho. Lokho kuzamnceda abone ukuthi esikufundayo kuvela ngaphi.

NXA USUFUNDA LOMUNTU IBHAYIBHILI

11. Ungatshengisa njani ukuthi uyamhlonipha umuntu ofunda laye?

¹¹ Kuyini okumele ukwenze nxa ufunda lomuntu iBhayibhili? Hamba uyefunda laye ngesikhathi eliyabe lisivumelene, kungelani lokuthi abantu emphakathini bayibona njani indaba yokubamba isikhathi. Nxa kungumuntu osanda kumthola, kungaba kuhle ukuthi lingadonsi. Abanye abafowethu labodadewethu asebefunde iBhayibhili labantu abanengi bathi kungaba ngcono ukuthi litshiyele indaba endleleni lanxa lowomuntu eyabe elokhu efuna ukufunda. Ungalandisi kodwa yekela umuntu oxoxa laye kube nguye okhuluma okunengi.—Zaga. 10:19.

12. Kuyini esiyabe sikuhlosile nxa sifunda labantu iBhayibhili?

¹² Inhloso yethu yokufunda labantu iBhayibhili ngeyokubancedisa ukuthi bathande uJehova loJesu. Ukuze sikwenze lokho kumele sigxile kulokho okufundiswa liBhayibhili kulokubatshela lokho esizicabangela khona. (Imiseb. 10:​25, 26) Izikhathi ezinengi umphostoli uPhawuli wayefundisa abantu ngoJesu. Phela nguye owathunywa ukuzofundisa abantu iqiniso ngoJehova. (1 Khor. 2:​1, 2) Umphostoli uPhawuli waphinda wacacisa ukuthi kwakuqakatheke kakhulu ukuncedisa labo ababesanda kwamukela iqiniso ukuthi babe lobuntu obuthokozisa uJehova. (1 Khor. 3:​11-15) Lokhu kugoqela ukuba lokholo, ukuhlakanipha, ukuzwisisa kanye lokwesaba uJehova. (Hubo. 19:​9, 10; Zaga. 3:​13-15; 1 Phet. 1:7) Lawe lingisela uPhawuli ngokuncedisa abantu ofunda labo iBhayibhili ukuthi babe lokholo oluqinileyo njalo babe ngabangane bakaJehova uBaba wethu osezulwini.—2 Khor. 1:24.

13. Singatshengisa njani ukuthi siyababekezelela lokuthi siyabazwisisa abantu esifunda labo? (U-2 Khorinte 10:​4, 5) (Khangela lomfanekiso.)

¹³ Kumele silingisele uJesu ngokubabekezelela lokubazwisisa abantu esifunda labo. Akumelanga sibabuze imibuzo ezabenza babe lenhloni kumbe bayangeke. Nxa kulendaba elixoxa ngayo kodwa kukhanya engayizwisisi dlulelani phambili, lizaphinda lixoxe ngayo ngelinye ilanga. Akumelanga simbambe ngamandla ukuthi amukele iqiniso ayabe esanda kulifunda. Okumele sikukhumbule yikuthi kuthatha isikhathi ukuthi iqiniso lingene lijule enhliziyweni yomuntu. (Joh. 16:12; Kol. 2:​6, 7) IBhayibhili lifanisa izimfundiso ezingamanga umuntu ayabe ezikholwa lenqaba eqinileyo. (Bala u-2 Khorinte 10:​4, 5). Thina kuyabe sekumele simncedise athembele kuJehova, ambone eyinqaba yakhe. Nxa esemthemba ngenhliziyo yonke uJehova, kuzabalula ukuthi alahle izinto abeseleminyaka leminyaka ezikholwa.—Hubo. 91:9.

SINGABANCEDISA NJANI ABASIVAKATSHELAYO EMIHLANGANWENI YETHU?

14. Kumele sibaphathe njani abasivakatshelayo emihlanganweni yethu?

¹⁴ UJehova ufuna sibathande bonke abantu futhi singababandlululi, kungelani lamasiko abo, ukuthi bakhulele ngaphi lokuthi banothile yini kumbe bangabayanga. (Jak. 2:​1-4, 9) Manje singatshengisa njani ukuthi siyabathanda labo abasivakatshelayo emihlanganweni yethu?

15-16. Singenzani ukuze abantu abasivakatsheleyo emihlanganweni yethu bazizwe bekhululekile?

¹⁵ Abanye abantu abasivakatshelayo emihlanganweni yethu bengabe bebuye ukuzobona nje ukuthi sikhonza njani kumbe bengabe belayelwe ngumuntu ongangeni lebandla lethu. Yikho singavele sibone umuntu esingamaziyo emihlanganweni yethu akumelanga sithikaze ukumbingelela lokuxoxa laye. Kodwa kumele simamukele ngomusa futhi nxa kuvuma sicele ukuhlala laye. Nxa engelaBhayibhili lingabala lonke kwelakho. Kumele umnike lezinye izinto esizisebenzisayo nxa sifunda kungaba yiNqabayokulinda kumbe ugwalo lomhlangano futhi uzame ukumenza akhululeke. Eyinye indoda eyavakatsha emhlanganweni wethu yatshela umfowethu owayamukelayo ukuthi yayingakhululekanga ngenxa yempahla eyayizigqokile. Kodwa umfowethu wayitshela ukuthi ingazikhathazi kakhulu ngempahla ezigqokileyo. Ngokuhamba kwesikhathi indoda le yabhabhathizwa futhi ayizange iyikhohlwe indlela umfowethu ayiphatha ngayo. Lanxa sibamukela ngomusa abantu abasivakatsheleyo kasifuni kubahlohla ngemibuzo kumbe sibabuze izinto ezingelani lathi.—1 Phet. 4:15.

¹⁶ Kumele sinanzelele lezinto esizikhulumayo nxa sisemihlanganweni yethu. Ngokwesibonelo, nxa siphendula kumbe sifundisa akumelanga sichothoze abantu abangayisibo oFakazi kumbe lokho abakukholwayo. Asifuni ukuthi esikukhulumayo kubacaphule kumbe kubenze bangasalugxobi futhi emihlanganweni yethu. (Tit. 2:8; 3:2; 2 Khor. 6:3) Abafowethu abenza intshumayelo zikazulu wonke kumele bananzelele bangabakhubi abantu laba. Okunye okumele bakukhumbule yikusebenzisa amabala azwisiseka lula kumbe bachasise amabala angabe esaziwa ngoFakazi kuphela.

17. Kungani sifunda labantu iBhayibhili?

¹⁷ Kumele sikhuthale kakhulu emsebenzini wokutshumayela kulezinsuku zokucina ngoba kusaselabantu abanengi kakhulu abafuna ukufundiswa iqiniso. (Imiseb. 13:48) Yikho ungavele uthole umuntu ofuna ukufunda iBhayibhili, ungathikazi ukumncedisa lokuhle umnxuse emihlanganweni yethu. Ungenza njalo uyabe umnceda ukuthi ‘angene endleleni eya ekuphileni.’—Mat. 7:14.