Tingaitenyi Kuti Mavereketere edu ave Anodakaja Jehovha?

Jehovha paakatisika wakatipa cipo cakanaka maningi, cipo ici ngo cokukona kuvereketa. Kubhuya kuti Jehovha unobasa here no mashandisire atinoita cipo ici? Eya unobasa nazvo! (Verenganyi Jakobho 1:26.) Hino tingashandisisa kudini cipo ici cokuvereketa ngo njira inodakaja Jehovha?

1. Tinodikana kushandisisa kudini cipo cokuvereketa?

Bhaibheri rinotivhunja kuti ‘garanyi mesikurujirana uye mesibesana.’ (1 VaTesaronike 5:11) Uripo here wamunolangarira kuti unoda kukurujirwa? Mungaitenyi kuti mumunyalaje? Itanyi kuti azive kuti munomuda maningi. Pamweni paya mungamusimba ngo zviro zvakanaka zvaanoita zvamunoemura. Madini kushandisa vhesi imwe iri mu Bhaibheri kuti mumuvangise? Kuno mavhesi akawanda amungashandisa. Langariranyiwo kuti, mabhuire amunozoita masoko akhona kuti muvangise mundhu, anokosha maningi. Ejanyi kuvereketa zvakanaka uye makathiva.—Zvirevo 15:1.

2. Mavereketero api amunodikana kusiyana nawo?

Bhaibheri rinoti: ‘Pamuromo penyu apadikani kubuda masoko akawola.’ (Verenganyi VaEfeso 4:29.) Izvi zvinoda kubhuya kuti atidikani kubhuya masoko anopseruja kana kuti masoko akashata uye no anowajisawo mweyo wo vandhu. Atidikaniwo kuita magumbu no kubhuya zviro zvinosvipisa vamweni.—Verenganyi Zvirevo 16:28.

3. Zvicinyi zvingatibesa kuti tibhuye zviro zvinovaka?

Kazinji zviro zvatinobhuya zvinowonesa zviri mu mweyo medu, no zvinonga zvesitiremera mu mulangariro medu. (Ruka 6:45) Ngo kudalo, tinodikana kukanda mulangariro wedu pa zviro zvakanaka, zvakacena, uye zvinodiwa no zvinokujwa. (VaFiripi 4:8) Kuti mulangariro wedu ulangarire zviro zvakanaka, tinodikana kukheta zvakanaka mabungaijo edu uye no shamwari jedu. (Zvirevo 13:20) Tinodikanawo kutanga talangarira tisati tavereketa. Langariranyiwo kuti masoko amuri kuda kubhuya asaita kuti vamweni vazvizwe kudini. Bhaibheri rinoti: ‘Masoko anobhuiwa asito kulangarirwa anobaya inga banga, asi masoko anobhuiwa zvakanaka anoporesa.’—Zvirevo 12:18.

JIJANYI ZVIZINJI

4. Ngwariranyi masoko amunobhuya

Tese hedu, tinombobhuya zviro zvatinozocumba. (Jakobho 3:2) Verenganyi VaGaratiya 5:22, 23, mapeja bhuisananyi ngo muvhunjo jinotevera:

• Pazvibereko zvo mweya mupsene zvabhuiwa pa mavhesi aya, nga cipi comaida kuitira mukumbiro kuti cimubese kungwarira zviro zvamunoda kubhuya? Zvibereko zvo mweya mupsene izvi, zvingamubesesa kudini?

Verenganyi 1 VaKorinde 15:33, mapeja bhuisananyi ngo muvhunjo unotevera:

• Shamwari jamunokheta uye no mabungaijo amunoita, zvinobatana papi no zvamunobhuya?

Verenganyi Muparidzi 3:1, 7, mapeja bhuisananyi ngo muvhunjo unotevera:

• Munolangarira kuti ngenyi zvakanaka kuti tilambe takanyarara kana kumboima kuvereketa ngo zvo shwiro imweni mbhera tawana nguva yakanaka kuti tivereketewo?

5. Bhuyanyi zvakanaka ngo zvo vandhu vamweni

VHIDHIYO: ‘Bhuyanyi Zviro Zvakanaka Zvinobesa Vamweni’ (4:07)

• Mu vhidhiyo iyi, ngenyi hama iyi yakawona kuti yaidikana kucinja mavereketero oyaiita ngo zvo vamweni?

• Yakaitenyi kuti icinje?

Verenganyi Muparidzi 7:16, mapeja bhuisananyi ngo muvhunjo unotevera:

• Zvicinyi zvamunodikana kulangarira kudai mukawona kuti maakuda kubhuya zvakashata ngo zvo mundhu umweni?

Verenganyi Muparidzi 7:21, 22, mapeja bhuisananyi ngo muvhunjo unotevera:

• Mavhesi aya, angamubesa kudini kudai mundhu akabhuya zvakashata ngo zvenyu?

6. Bhuyanyi no mbhuri yenyu zvakanaka

VHIDHIYO: Rudo no Nderemejo Zvinoita Kuti Mbhuri Ibatane (3:08)

• Zvicinyi zvingamubesa kuti muverekete zvakanaka novo mu mbhuri menyu?

Verenganyi VaEfeso 4:31, 32, mapeja bhuisananyi ngo muvhunjo unotevera:

• Tinodikana kuvereketa zviro zvinoita kuti vari mu mbhuri medu vazvizwe kuti vanodiwa, tingazviitisa kudini izvi?

Jehovha wakabhuya kuti waida maningi mwanake. Verenganyi Mateu 17:5, mapeja bhuisananyi ngo muvhunjo unotevera:

• Mungatevejeresa kudini Jehovha pa mabhuire amunoita novo mu mbhuri menyu?

TAJIJENYI

Tajija kuti masoko atinovereketa anosimba. Tajijazve kuti tinodikana kutanga tanasa kulangarira zvatinovereketa uye mavereketere atinozviita no kutizve tingazvivereketera papi.

Muvhunjo Jokuhwirijira

• Tingaitenyi kuti tishandise zvakanaka cipo cokuvereketa kuti tibese vamweni?

• Mavereketere api amunodikana kusiya kuita?

• Zvicinyi zvingatibesa kuti tive vandhu vakanaka mweyo nguva yese uye vanovangisawo vamweni ngo zvatinovereketa?

JIJANYI ZVIMWENI

Zvicinyi zvingatibesa kuti tiverekete zviro zvakanaka?

Ivanyi no Rirumi lo Vakangwala (8:04)

Jijanyi zvamungaita kuti musabhuya masoko akawola.

‘Zvakashata Here Kubhuya Masoko Akawola?’ (Mu saiti jw.org)

Wonanyi zvamungaita kuti musava mundhu anomagumbu.

Zvicinyi Zvandingaita Kuti Ndirege Kuita Magumbu? (2:36)

Wonanyi kuti Jehovha wakabesesa kudini mwanarume umweni wainga no dambujiko lokubhuya masoko anopseruja uye okutuka.

‘Ndakatanga Kulangarira Kuti Upenyu Wangu Wainga wakasota Kupi’ (Nharireyomurindi, 1 ya Agosto yo 2013)