Ngenyi Zvinokosha Kuti Tilangarire ngo zvo Masimirire edu?

Umwe nga umwe wedu unomasimirire aanodakarira. Mu Bhaibheri muno mazano angatibesa kuti tisimire zvatinoda uye zvinodakajisawo Jehovha. Ngatiwone mazano amweni akona.

1. Nga zvipi zvingatibesa kuti tikhete zvokusimira zvakanaka no kuva takarongeka?

Tinodikana ‘kusimira nguwo jakareremera, jiri pakati no pakati uye kugala tino mulangariro wakanaka,’ izvi zvinokhombija kuti tiri vandhu ‘vakazvipira kuna Mwari.’ (1 Timoti 2:9, 10) Ngatiwone zviro 4 zvinobhuiwa ngo Bhaibheri: (1) Zvokusimira zvedu zvinodikana kuva ‘zvakareremera.’ Nguva imweni makatombozviwonawo pa musangano yo Zvapupu zva Jehovha, vanamati va Jehovha vanosimira nguvo jakasiyana-siyana asi nguvo jedu no manasirire atinoita vhuji zvinokhombija kuti tinoreremeja Mwari wedu Jehovha. (2) Kusimira ‘zviri pakati no pakati’, izvi zvinoda kubhuya kuti atidikani kusimira nguvo jinoita kuti vandhu valangarire ngo zvo uhure, zvokuti majiso o vandhu vese anogala akandosota yesu. (3) Tinokhombija kuti ‘tino mulangariro wakanaka’ kudai tingatama kutevejera masimirire ese anonga ari mufashoni. (4) Masimirire edu anodikana kukhombija kuti tiri vandhu ‘vakazvipira kuna Mwari’ uye kuti tinonamata Mwari wo cokwadi.—1 VaKorinde 10:31.

2. Ngenyi tinodikana kulangarira mazwiro o vamweni patinokheta zvokusimira?

Icokwadi kuti tinodikana kukheta nguvo jatinoda kuti tisimire, asi tinodikanawo kulangarira kuti, vamweni vakatiwona vanolangarirenyi ngo zvedu. Tinoita zvese zvatinokona kuti tiregere kukhugunya vamweni, kunja ka izvi tinodawo ‘kudakajisa vamweni vedu uye no kuvavangisa.’—Verenganyi VaRoma 15:1, 2.

3. Masimirire edu angaitisa kudini kuti vamweni vade kujija ngo zva Jehovha?

Tinoda kusimira nguvo jakareremera nguva yese, maningi ningi paya patinoenda kumusangano no kooparijira. Atidi kuti nguvo jedu jipe ucapupu wakashata zvoita kuti vandhu vasazwa masoko atinonga tesienda kooparijira. Kunja ka izvi tinoda kuti masimirire edu aite kuti cokwadi cidakarirwe ngo vandhu vese, zvoita kuti ‘jijiso yo muponesi wedu’ Mwari ikujwe no kuita kuti vandhu vajije zvakawanda ngo zva Jehovha. —Tito 2:10.

JIJANYI ZVIZINJI

4. Kusimira zvakanaka zvinokhombija kuti tinoreremeja Jehovha

Ciro cipi cinokosha cinotiita kuti tineseke ngo masimirire edu? Verenganyi Mapisarema 47:2, mapeja bhuisananyi ngo muvhunjo jinotevera:

• Yesu tinoemerera Jehovha. Kuziva kuti tinoemerera Jehovha kunotiita kuti tisimirise kudini?

• Munolangarira kuti zvino basa here kuti tineseke ngo masimirire edu patinoenda kumusangano no kooparijira? Ngenyi madalo?

5. Makhetere atingaita zvokusimira zvakanaka

Wonanyi VHIDHIYO.

VHIDHIYO: “Itanyi Zvese Kuti Mwari Akujwe” (10:18)

Nguvo jedu ajidikani hajo kuva jinodhura maningi asi jinodikana kugala jakacena zvinoenderana no ndau yatiri uye no zvatiri kuita. Verenganyi 1 VaKorinde 10:24 na 1 Timoti 2:9, 10. Mapeja bhuisananyi kuti ngenyi amudikani kusimira nguvo . . .

• jisito kucena kana kuti nguvowo hajo.

• jinobata maningi, jinowonekera kana kuti jinoita kuti vandhu valangarire zvo uhure.

Munguva yokare, Jehovha wakashandisa Mosi kuti ape mutemo yakawanda kuvandhu vake, asi Vakristu avasiripizve pasi po mutemo iyi, asi inotibesa kuti tizive mulangariro ya Jehovha. Verenganyi Dheteronomi 22:5, mapeja bhuisananyi ngo muvhunjo unotevera:

• Ngenyi atidikani kusimira nguvo jinoita kuti vanarume vawoniwe inga vanakaji uye vanakaji vawoniwe inga vanarume?

Verenganyi 1 VaKorinde 10:32, 33 na 1 Johani 2:15, 16, mapeja bhuisananyi ngo muvhunjo jinotevera:

• Ngenyi zvakanaka kuti tizvivhunjise kuti: Kubhuya kuti masimirire angu angaita kuti akhugunye mundhu mu ungano no mu ndharaundha mandinogala?

• Mundharaundha mamunogalari, vandhu vanosimirisa kudini?

• Munolangarira kuti masimirire amweni ari mufashoni, anoita kusimirwa ngo Vakristu here? Ngenyi madalo?

TAJIJENYI

Tajija kuti, kudai tingakheta kusimira nguvo jakanaka tinonga tesikhombija kuti tinoreremeja Jehovha no vamweni vedu.

Muvhunjo Jokuhwirijira

• Ngenyi masimirire edu esikosha kuna Jehovha?

• Mazano api ari mu Bhaibheri angatibesa kukheta zvokusimira?

• Masimirire edu angaita kuti vandhu vawonese kudini kunamata kedu?

JIJANYI ZVIMWENI

Wonanyi kuti masimirire enyu anoda kurevenyi ngo pamusoro penyu.

“Masimirire Enyu Anoda kurevenyi ngo Pamusoro Penyu?” (Mu saiti jw.org)

Wonanyi kuti ngenyi munodikana kutanga malangarira musati maizwa pika.

“Bhaibheri Rinoti Kudini ngo Pamusoro po Pika?” (Mu saiti jw.org)

Wonanyi ndhungamiriro jimweni jingamubesa kukheta zvokusimira.

“Masimirire Enyu Anokhombija Kuti Munonamata Mwari Here?” (Nharireyomurindi, ya Setembro yo 2016)

Wonanyi kuti mwanakaji umweni wakaitenyi kuti atende kujijira masimirire anoizwa ngo vamweni?

“Ndainyangajwa ngo Masimirire Ovamweni” (Mukai!, 22 wa Dezembro wo 2003)