Muvhunjo Jinoizwa ngo Vaverengi

Tinozoema riini kuparijira masoko akanaka?

Jesu wakabhuya kuti: ‘Masoko akanaka o Umambo aya, anozoparijirwa pasi pese kuti vandhu vese vamazwe zvapera mugumo wozoviya.’ (Mateu 24:14) Gama ro ciGiriki rokuti “mugumo” pa vhesi iyi kana mavhesi amweni a 6 na 13, rinobhuira kupejwa ko nyika ino ya Sathana pa hondo yo Armagedhoni. (Zvak. 16:14, 16) Ngo kudaro, tinozoramba tesiparijira masoko akanaka mbhera phedo no kutanga po Armagedhoni. Izvi zvinocinja mazwisisire ataita kare.

Kare taizwisisa kuti taizoema kuparijira masoko akanaka paizotanga kutambujika kukuru no kuparajwa ko Bhabhironi guru. (Zvak. 17:3, 5, 15, 16) Kare taitenda kuti kutambujika kukuru kukatanga “Jehovha aasaizopazve mukana kuti vandhu vazwezve masoko akanaka.” (Isa. 61:2) Tairangarirazve kuti vandhu vazopona padambujiko guru vaidika kutanga vakhombija kugondeka kavo kuna Jehovha dambujiko guru risati ratanga. Isusu tinovaezanisa no vaJudha vakapona pakuparajwa ko Jerusarema mu gore ra 607 Kristu asati aviya. Vandhu ava zvaikosha kuti vatange kupona ngokuti vainamata Jehovha uye vainyenya zvakashata. (Ezek. 5:11; 9:4) Kuezanisa uku akuenderani no masoko a Jesu ari pana Mateu 24:14, anokhombija kuti vandhu vangava no mukana wo kutendera masoko akanaka phedo no Armagedhoni.

Ngo ndava yo kuzwisisa kedu kakanasa kujeka ko bhuku ra Mateu 24:14 tinodawo kunasirisa kuzwisisa kedu pa bhuku ra Zvakazarurwa 16:21 inobhuya ngo pamusoro po mapuwe makuru onvhura. Kunasa kupsakisisa kakawonesa kuti mavhesi maviri aya anoenderana. Kuitisa kudini? Mupinguro wakona uri pamaashirire anoita vandhu masoko o Umambo. Inga zvakabhuya mupostori Pauro kuti: “Kuvandhu vanozoponeswa,” anonga ari masoko akanaka, “anopa upenyu.” Asi kuvavengi va Mwari aya masoko akashata “orufu.” (2 VaK. 2:15, 16) Ivona vanonyenya masokowo ngokuti anobudisa pambhene nyika yavo yakashata ya Sathana iri kuemera kuparajwa.—Johani 7:7; 1 Joh. 2:17; 5:19.

Wonanyiwo kuti mapuwe o nvhura okuezanisira “anonga akakura maningi.” Izvi zvinoda kubhuya kuti panonga pesiitika dambujiko guru basa ro kuparijira rinozoizwa maningi kana kuti zina ra Jehovha rinozozivika maningi zvisati zvamboitika. (Ezek. 39:7) Pa nguva iyi, pasure pokuparajwa ko Bhabhironi guru vandhu vanozoashira masoko o Umambo inga akanaka maningi here? Izvi zvingaitika kamare. Nguva jimweni vanozoejurira kana kuti vanozoziva kuti ko makore akawanda Zvapupu zva Jehovha zvaizivisa ngo pamusoro po kuparajwa ko maceci okunyepa.

Musoro wo kuezanoisira, wonanyi zvakaitika ku Ejipita yo kare pasure po matambujiko 10. Pasure pokuti Jehovha “waita rutongeso pa zvimwari zvese zvo kuEjipita,” wakabatanija vandhu vake “no vamweni” vainga vasiripi vaIziraeri. (Eki. 12:12, 37, 38) Vandhu ava vangadai vakakhetwa kuti vaende no vandhu va Jehovha povakawona kuti zvese zvaibhuiwa ndi Mosi zvaiitika pa matambujiko 10.

Mundhu wese unozoenda kuna Jehovha pasure po kuparajwa ko Bhabhironi guru, unozowana makomborero okuita zvakanaka kuhama ja Kristu jinonga jisiri panyika pano. (Mateu 25:34-36, 40) Kakawanda kakona mukana uwu wokutongwa inga gundata unozopera taaphedo no Armagedhoni vokuzojwa vanonga vasiri pasi pano, vanonga vaashira mubairo wavo wo kuenda kudenga.

Mazwisisire mapsa aya, anokhombija rudo rakakura no simba rakakura ra Jehovha. Eya, iyena ‘apana waanoda kuti aparajwe asi unoda kuti vandhu vese vakhauye.’—2 Ped. 3:9.