Kunyange no Kunyararisa Kangu asi Ndakava Misiyonariyo

Ndakabahwa muna 1951 ku Vhiena, Austriya, ku mbhuri yainamata Katorika. Inini ndainga mundhu wakanyararisa, asi ndaitenda muna Mwari uye ndaiita mukumbiro kakawanda. Pondainga nomakore mapfumbamwe, baba vangu vakatanga kujija no Zvapupu zva Jehovha, ngo kuhamba ko nguva amangu vakazojijawo.

Ngo kudaro, takazova ndivi ro ungano ku Döbling, Vhienna. Inga mbhuri, takaita zvakawanda tese. Taiverenga no kujija Bhaibheri, taipinda musangano jo ungano, uye taishanda inga vabeseri pa magungano. Pa makore ese aya, babangu vakandibesa maningi kuti ndide Jehovha. Kubhuya cokwadi, mukumbiro wa baba vangu wainga wokuti inini no munukuna wangu tive mapiyona. Asi pa nguva yonayo, ici andicopi cainga cinangwa cangu.

KUTANGA BASA RO NGUVA YAKAZARA

Ndakabhabhatijwa muna 1965, ndino makore 14. Ngo kudaro, ndakawona zvesindinesera maningi kubhuya no vandhu mu basa ro kuparijira. Ndairangarira kuti majaha amweni ainga ari nane kudarika inini, uye ndaida maningi kuti vandidakarire. Ngo kudaro, andito kutora nguva yakareba ndabhabhatijwa, ndakatanga kutamba na vaya vainga vasinganamati Jehovha. Kunyange kuti ndaidakarira kushamwarijana navo, asi hana yangu yaindinesa ngokuti ndaipeja nguva yakawanda ndino vandhu vasiripi Zvapupu. Asi, ndainga ndisina simba rokuzvicinja. Icinyi cakandibesa?

Munguva iyi, musikane umweni wainga no makore 16 waizwi Dorothée wakaviyawo kuungano kedu. Kuvangisira kaaita pa kuparijira muzi ngo muzi kaindidakaja. Ndainga ndiri musharuka kumupinda, asi ndainga ndisingavangisiri mubasa ro kuparijira. Ndakarangarira kuti ‘vabereki vangu Zvapupu zva Jehovha, asi Dorothée aana hama jiri mucokwadi. Iyena waigara na mamaa vake vaihwaja, ngo kudaro, iyena nguva yese waiyenda kooparijira!’ Muezaniso wake wakandibesa kuti ndiite zvakawanda mubasa ra Jehovha. Ngo kukasika inini na Dorothée takava mapiyona. Pakutanga, tainga mapiyona obesero, panguva yonayo aidanijwa kuti mapiyona ozororo, ngo kuhamba ko nguva, takazoshanda pamwepo inga mapiyona o nguva jese. Dorothée waidakarira maningi basa ro kuparijira, na ininiwo ndakatanga kudakarirawo kuparijira. Iyena wakandibesa kutangisa jijo yangu yo kutanga yo Bhaibheri. Ngo kuhamba ko nguva, zvakava zvakareruka kandiri kutanga kubhuya no vandhu muzi ngo muzi, mugwanja uye mundau jimweniwo.

Pagore rangu ro kutanga kushanda inga piyona wo nguva jese, hama imweni yo kuAustriya yaizwi Heinz, yakaviya mu ungano yedu. Iyena wakajija cokwadi ku Kanadhaa kaaiyenda koowona mukoma wake, vainga vari Capupu. Heinz wakagajwa kuti ashandire kuungano yedu inga piyona anokosha. Inini ndaimudakarira kuvhira pakutanga. Asi iyena waida kushanda inga misiyonariyo, asi inini ndainga disina cinangwa co kushanda inga misiyonariyo. Ngo kudaro, pakutanga ndakaviga mazwiro angu kaari. Asi ngo kuhamba ko nguva, Heinz na inini takatanga kudanana, uye tocadha, takazotanga kushanda pamwepo inga mapiyona anokosha mu Austriya.

KUTANGA KUVA NO CIDO CO KUVA MAMISIYONARIYO

Heinz wainga akajaera kubhuya nainini ngo pamusoro po cinangwa cake cokuda kushanda inga misiyonariyo. Kunyange hazvo kuti wainga asito kumbondimanikija, asi waindiita muvhunjo inovangisa yakadai inga iyi: “Ngo kuti atina vana zvingaita here kuti tiite zvakawanda mubasa ra Jehovha?” Ngo ndava yo kuti ndainga mundhu wakanyararisa ndaitya kuva misiyonariyo. Icokwadi kuti ndainga ndiri piyona, asi ndairangarira kuti, kuita misiyonariyo zvaizondinesa maningi. Ngo kudaro, Heinz wakandibesa kurangarira ngo pamusoro po kuva misiyonariyo. Iyena waindivangisazve, kuti ndibatikane maningi ngo vandhu vandaiparijira, kusiripi kubatikana ngo pamusoro pangu basi. Zvaakandivhunjaro zvakandibesa maningi.

Padoko ngo padoko, ndakatanga kuda kupinda mubasa ro umisiyonariyo, ngo kudaro, takakumbira kuenda ku Cikora co Giriyedhi. Ngo kudaro, komisau yo filiari yakakumbira kuti nditange ndaengejera Ingleshi. Pakazopera makore matatu ndesivangisira kuti ndiengejere kuziva kangu Ingleshi, ndakazoshamisika ngo kukokwa kuyenda kuungano yo Yugolavian ku Austriya. Takashanda kundharaundha iyi ko makore ano kwana kuita 7, kubatanijawo no gore rimwe ratakashanda inga muwonereri wo ndharaundha. Ndumi yo Sebho Krowata yainesa maningi, asi kunyange zvakadaro, tainga no zvijijo zvo Bhaibheri zvakawanda.

Asi muna 1979 takakumbirwa kuti “tiyende” ku Bhurgariya. Asi basa ro kuparijira konayo rairambijwa. Ngo kudaro, atizivi kuparijira pa maferiya aya. Asi, takayendesa mabhuku mashoma kuitira hanzvaji 5 jaigara ku Sofia, kapitari yo Bulgaria. Inini ndaitya, asi Jehovha wakandibesa pa basa iri randakagajwa rinodakaja. Kuwona kucunga no kudakara kaaita hanzvaji iji, pasinenyi no zvovaisangana nazvo, kakandipa gonda rokuitisa nane pa zviro zvese zvandaikumbihwa ngo sangano ra Jehovha kuti ndiite.

Panguva iyi, takanyorazve petisao yo kuenda ku Giriyedhi, apa takazodavihwa. Tairangarira kuti taizopinda ku Cikora ici, co Ingleshi ku Estadho unidhu. Asi muna Novembro wo 1981, sangano rakatangawo kuva no Cikora co Giriyedhi ku Alemanya. Asi, takapinda Cikora ici, ngo ndumi yo ci Alemanya, izvi zvainga zvakareruka kuzwisisa. Nga kupi kotaizogajwa?

KUSHANDIRA MUNYIKA YAKAPARAJWA NGO HONDO

Basa redu rainga rokooshandira Khenia! Ngo kudaro, Dare ro Khenia rakativhujisa kuti takanasiririka here kuti tooshandira ku nyika yaigarisana no Uganda. Pa makore anodarika 10, hurumende yo Uganda yainga yanyiswa mukupandukira komasoja aitungamirihwa ngo General Idi Amin. Mu makore akatevera, kuhwisana uku kakaviisa rufu ro zviuru zvo vandhu uye kutama kuzwana. Asi muna 1979 hurumende yo Uganda yakanyiswazve. Ngo zviitiko izvi, ndakajizwa ndisito kungwaririka ngo kucinjwa kondakaizwa kuti ndiyende ku nyika ino hondo. Asi Cikora co Giriyedhi cakatijijisa kuti tithembe Jehovha. Ngo kudaro, isusu takatendera.

Upenyu wo ku Uganda wainga wesinesa maningi. Heinz wakazvitsanangura ngo njira imweni mu bhuku ro gore ra 2010: “Mabasa akawanda, . . . akadai inga mucini jokuviisa kumwa uye mafoni zvaparajwa. . . . kaifuhwana no kubirana maningi-ningi no usiku. . . . mundhu wese waigara pamuzi esingwarira uye vamweni vaiita mukumbiro kuitira kuti usikuwo udarike pasina wagumihwa ngo mbavha kana kuti kuuraiwa.” Kunyange kuti upenyu wainga weinesa mu Uganda, asi hama no hanzvaji vainga no kutenda kakavanga vesishandira Jehovha vakadakara!

Muna 1982, Heinz na inini takaguma ku Kampala, kapitari yo Uganda. Pamweji mushanu jo kutanga, takagara pa muzi pa Sam na Kristina Waiswa pamwepo no vana vake vashanu uye no hama jake murongomuna. Varovorani ava no mbhuri yavo vaiha kamwe basi pa zuva, izvi zvaikhombija kukova ko cokwadi. Nguva yotakapeja na Waiswa, Heinz na inini takajija zviro zvakawanda zvokuita, izvo zvakatibesa mu upenyu wedu wo umisiyonariyo. Inga muezaniso, takajijira kucunurira kumwa kubatanijawo kugeza ngo marituru mashoma basi uye kushandisa kumwa yo kugeza kuitira kukanda mu ratrina. Muna 1983, Heinz na inini takawana nyumba yedu mundharaundha yakangwaririka ku Kampala.

Isusu takadakarira maningi basa ro kuparijira ku Kampala. Ndinoyeujira kuti pa mweji umwe basi takapa mabhuku anodarika 4.000! Asi ciro cakanaka, cainga cokuwona kuti vandhu vanowonesa kudini cokwadi. Ivona vaireremeja Mwari uye vaida kubhuyawo ngo pamusoro po Bhaibheri. Inini no mwamuna wangu Heinz, tainga tino zvijijo zvo Bhaibheri zvaikwana kuita 10 kana kuti 15. Uye takajija zvakawanda kuvha ku vajiji vedu vo Bhaibheri. Inga muezaniso, kunyange vaidikana kuhamba kenda kumusangano ma vhiki ese, asi avato kumbogunu-nuna nguva yese vainga vakadakara.

Muna 1985 na 1986, Kakaitika hondo mbiri ku Uganda. Kakawanda taiwona vana vadoko vakatwara pfuti jakakura, vairwa hondo uye vaishandiswa pa kungwarira mucitaka kuti ndiyani wadarika. Panguva iyi yese, taiita mukumbiro tesikumbira kuzwisisa uye tino mwoyo wakagajana ngo kuti taipsaka vaidakarira pataiita basa ro kuparijira. Uye Jehovha wakadavira mukumbiro jedu. Kakawanda kakona, taikanganwa kutya kedu pataiwona vandhu veidakarira masoko o Umambo.

Uyezve taidakarira kuparijira vandhu vaivha kunyika jokunja. Inga muezaniso, takazivana na Murati na Dilbar Ibatullin varovorani vaivha ku Tataristau ku Rusiya Sentrari, uye takajija navo Bhaibheri. Murati waiziva maningi ngozvo utano. Varovorani ava vakatenda cokwadi uye kuvhira ponapo vari kundovangisira mbhera zvino. Ngo kuhamba ko nguva, ndakazivana na Tatjana Vileyska, mwanakaji umweni woku Ukrania wainga esirangarira kujiuuraya. Tatjana paakabhabhatijwa, iyena wakahwirira ku Ukrania asi ngo kuhamba ko nguva, wakazoshanda inga musanduji wo mabhuku edu.a

MATAMBUJIKO MAPSA

Muna 1991 inini no mwamuna wangu, patainga pa feriya ku Austriya, takafonehwa ngo hama jo ku Bheteri ro mundharaundhemo jotivhunja ngo pamusoro po basa inzva ratainga tagajwa ku Bhulgaria. Pasure po kupera ko utongi wo ci Komunismo ku Europa Orietari, Zvapupu zva Jehovha zvakatenderwa kuparijira zviri pamutemo munyika yo Bhulgaria. Inga zvatabhuyaya pa kutanga, inini no mwamuna wangu Heinz, takamboendesa mabhuku munyikemo basa ro kuparijira porairambijwa. Asi zvino, takatumwa konayo kooparijira.

Takavhunjwa kuti tisapetukazve ku Uganda koorongeja no kueneka shamwari jedu, takamukira kuenda ku Bheteri ro ku Alemanya, tapeja totobata karu toenda ku Bhulgaria. Takagajwa kuti tooshanda kucikwata cainga no vapariji vanokhwedeja 20 ku Sofia.

Takasongana no zvineso zvakawanda maningi ku Bhulgaria. Cokutanga, tainga tisingakoni ndumi yaibhuiwemo. Kunja ka izvi, mabhuku aiwanika ngo ciBhulgaria ainga: Cokwadi Cinotitungamirira ku Upenyu Usingaperi uye no Bhuku Rangu ro Ndhorovondho jo Bhaibheri. Uye takawona zvesitinesera kutangisa zvijijo zvo Bhaibheri. Pasinenyi no matambhujiko aya, cikwata cedu co Zvapupu cainga cidoko asi caivangisira. Asi vatungamiriri vo ceci yo Orthodox, vainga vasingadi kuti tiparijire uye ivona vakatanga kutiteverera.

Muna 1994, hurumende yainga isingasazivi Zvapupu zva Jehovha inga vanamanati, uye vaBhurigaria vakawanda vairangarira kuti tainga tapinda mu cikwata cino ngozi. Hama jimweni jakasungwa. Vesishandisa redhi sosiyari, vakabhuya manyepo anotyisa ngo pamusoro pedu, vesibhuya kuti Zvapupu zva Jehovha azvito kuuraya vana basi asi vakauraya Zvapupu zvimweni. Inini no mwamunangu Heinz zvakava zvinotinesera kuti tiparijire. Taisangana no vandhu vainga no hasha, pavaitiwona vaidanija maphorisa uye vaitotifura ngo mapuwe. Zvainga zvesinesa kuviisa mabhuku munyikemo, uye ku arugari nyumba yo kupindira musangano raitonga dambujiko. Maphorisa akapwanya nyumba yedu yotaipindira gungano. Heinz na inini tainga tisito kujaera kuzondwa kakadai. Konayo kainga kakasiyana maningi no vandhu vo mu Uganda vaida Kujija Bhaibheri! Zvicinyi zvakatibesa kuti tive no cinjo iyi?

Takava no mudakaro ngo kusangana no hama no hazvaji jo mundharaundhemo. Vakadakara ngo kuwana cokwadi uye vakabonga maningi ngo kuvabesa kotakaita. Vese vakagara pamwepo vesibesana umwe no umweni. Zviro izvi zvakatijijisa kuti, tingadakara pa basa rese ratinogajwa kudai tikaramba tesibatikana pa vandhu vatinoparijira.

Pamakore akazotevera, zviro zvakatanga kuita nane. Sangano redu rakazoterwazve ngo mutemo munyikemo muna 1998, uye mabhuku akazowanika ngo kukasika mu Bhulgaria. Muna 2004 kakapirwa peredhiyo inzva yo Bheteri. Nyamasi uno, kuBhulgaria kuno ungano jinokwana kuita 57 no vapariji vanokwana kuita 2.953. Mu gore ro basa rakadarika, mutengo wo vandhu vakapinda cirangarijo vanokwana kuita 6.475. Kunyange hazvo kuti tainga no hanzvaji shanu mu Sofiya, asi zvino maanoungano 9! Kubhuya cokwadi Inini no mwamunangu Heiz, takawona uphorofita wesizajika wokuti: ‘Mudoko . . . usava cuuru’. Isa. 60:22.

KURWISANA NO MUEJO JO MUNDHU EGA

Mu upenyu wangu wese, ndainga nozvineso zvakawanda zvo utano. Ngo kuhamba ko nguva, mamedhiko akandivhunja kuti ndainga no ndhendha yo zibundu rainga mumusoro. Ndakava no marapihwe akavanga maningi, ndakaenda ku Indiya pondakaguma medhiko waikonayo wakandiita operensau inopeja 12 hora kuti avhise bundu rainga mumusoro mangu. Pondainga ndatamba ndiri ku Indiya ndakazohwirira ku basa rangu rondainga ndagajwa ku Bhulgaria.

Asi Heinz wakatanga kuneseka ngo ndhendha inonesa kuibata inozwi Huntigton. Iyena waihwisana nokuti ahambe, kuvereketa uye kuti apungure mahambire aiita. Asi ngo kuti ndhendha yakona yakaramba yesikura, apana caaikwanisa kuita, nguva yese zvaida kuti ndimubese. Nguva jimweni, ndajizwa ndakaremba uye ndaineseka kuti ndainga ndisingazokoni kumungwarira. Ngo kudaro, hama imweni yo cidoko yaigara yesikoka Heinz kuti vabude vese kooparijira. Hama iyi, yainga isinganeseki ngo vandhu kuti vaizorangarirenyi, ngokuti Heinz wainga asingasakoni kuvereketa zvakanaka no kushandisa muhoko jake zvakanaka. Inini ndainga ndotothemba hama iyi pandainga ndisingasakoni kubesa Heinz. Kunyange kuti inini no mwamunangu Heinz, tainga takapangana kutama kuita vana munyika ino inonesa, takajizwa kuti Jehovha wainga atipa hama iyi inga mwana wedu!—Mako 10:29, 30.

Heinz wakanesekazve ngo kanseri. Zvinosuruvarisa ngozvokuti mwamunangu wandaida maningi wakazofa, mugore ra 2015. Inini ndakajizwa ndisito kungwaririka Heinz paakafa, andito kuva no cokwadi nazvo kuti wainga afa. Asi mumurangariro mangu, iyena asiri kupona! (Ruka 20:38) Zuva rese ndinotakatira ndesirangarira masoko ounyasha aakandivhunja uye mazano akanaka aaindipa. Ndinobonga maningi pamakore edu ese atakapeja tesishanda pamwepo takagondeka.

NDINOBONGA MANINGI NGO BESERO RA JEHOVHA

Jehovha wakandibesa kuti ndishingirire mu zvineso zvese zvatakasangana nazvo. Iyena wakandibesa kuti ndinyise kunyararisa kangu, uye kuti ndive misiyonariyo unonasa kuda vandhu. (2 Tim. 1:7) Ndinobonga maningi Jehovha, inini no munukuna wangu tiri kushanda mu basa ro nguva yakazara. Nyamasi uno, iyena no mwamunake vari kushanda inga muwonereri wo ndharaundha ku Europa. Mukumbiro ja baba vangu jovaiita makore ese akadarika jakadavirwa!

Jijo yangu yo Bhaibheri inondipa runyararo ro mu mwoyo. Munguva yo kunesa ndakajijira kuita mukumbiro “ngo mwoyo wese,” inga zvaiizwa ndi Jesu. (Ruka 22:44) Njira imweni yaidavihwa ndiyona mukumbiro jangu, kainga kukhombijihwa rudo no unyasha ngo shamwari jo muungano yangu yo Nadezhda, ku Sofia. Ivona vaindikoka kuti ndipeje nguva navo, uye kakawanda kakona vaiita kuti ndizive kuti ivona vanondida. Zvese izvi zvaiita kuti ndive no mudakaro.

Kakawanda kakona, ndinorangarira maningi ngo pamusoro po rumuko. Ndinorangarira pandinonga ndesiwona vabereki vangu mberi ko nyumba yedu, vesiitirana zvakanaka inga zvavaita po vakarovorana. Kuwona munukuna wangu esinasirira zvokuha. Ndinorangarira Heinz akayema phedo no haci yake. Pa zviro zvese izvi zvinoita kuti ndivhise mazwiro angu akashata, ndozaja mwoyo wangu ngo kubonga Jehovha.

Ndinorangarira ngo upenyu wangu uye ndesisota ramangwana, ndinotenderana no mwoyo wangu no masoko a Dhavhidhi ari pana Pisarema 27:13, 14 anoti: ‘Ndaizodai ndiri kupi kudai ndisito kutenda kuti ndaizowona kunaka ka jehovha munyika yovapenyu? Emeranyi Jehovha, ivanyi makacunga, muvange mwoyo. Eya, emeranyi Jehovha’.