Tevejeranyi Mulangariro wa Jehovha na Jesu

1-2. Kuda Jehovha kunobatanijenyi, uye Jesu wakakhombijisa kudini rudo uwu?

‘IDA Jehovha Mwari wako ngo mweyo wenyu wese, upenyu wako wese, simba rako rese uye mulangariro wako wese.’ (Ruka 10:27) Jesu wakajekesa kuti ngaupi mutemo waikosha maningi pa mutemo wa Mosi. Zivanyi kuti kuda Jehovha kunobatanija mweyo wedu wese, zvido zvedu uye mazwiro edu omukati. Uye zvinobatajijawo kuti timunamate ngo mweyo wedu wese uye ngo simba redu rese. Kuda Jehovha, kuno cokuita no mulangariro wedu, kunobatanijawo malangarire atinoita. Icokwadi kuti, atizonasi kuzwisisa mulangariro jese ja Jehovha. Tingazwisisa malangarire a Jehovha ngo kujija ngo pamusolo po “malangarire a Kristu” ngokuti Jesu wakanasa kutevejera malangarire aBake.—1 VaK. 2:16 uye masoko okujija “yesu tino mulangariro wa Kristu” Muciputukezi.

² Jesu waida Jehovha ngo mulangariro wake wese. Jesu waizviziva zvaida Jehovha kuti aite, kunyange paaizotambujika wainga akasunga kuzviita. Jesu wainga akabatikana pakuita kuda ka aBake, ngo kudalo yena aato kutendera kuti ciro cimweni cive pakutanga kupinda kuita izvi.

3. Mupostori Pedhru wakajijenyi ngo pamusolo pa Jesu uye iyena wakavangisa maKristu kuti aitenyi? (1 Pedhru 4:1)

³ Pedhru no vapostori vamweni, vakawana makomborero okuva na Jesu uye kuwona ngo phedo kuti Jesu wailangarijisisa kudini. Pedhru paakanyora tsamba yake yokutanga yakafemerwa, Iyena wakakurujira vaKristu kuti vasimire malangarire aKristu kana kuti kulangarira inga ndiyena.a (Verenganyi 1 Pedhru 4:1.) Gama rakashandisa Pedhru lokuti: “Kusimira,” raishandiswa maningi ngo masoca. Ngo kudalo, tingabhuya kuti kulangarira inga ndi Jesu kakatojana no zviro zvatinoshandisa zvino simba pakurwisana no zvido zvedu zvokuda kuita zvakashata kana no nyika ino ya Sathana.—2 VaK. 10:3-5; VaE. 6:12.

4. Cijijo cino cingatibesesa kudini kuti titevere zano la Pedhru?

⁴ Mucijijo cino tinozowona Jesu wailangarira ngo njira ipi uye kuti tingamutevejeresa kudini. Tinozonasa kuwona kuti tingazviitisa kudini (1) kutevejera mulangariro wa Jehovha, (2) kuva vandhu vanozvidodokesa, uye (3) kuva vandhu vakangwara, kuthemba Jehovha uye no kuita mukumbiro.

TEVEJERANYI JEHOVHA NGO KULANGARIRA INGA NDIYENA

5. Pamugariro upi Pedhru paasito kulangarira inga ndi Jehovha?

⁵ Wonanyi nguva imweni Pedhru paasito kuva no mawonero akaezana no aJehovha. Jesu wakavhunja vapostori kuti waizoenda ku Jerusarema, konayo waizosungwa ngo vatungamiriri vomaceci, uye waizotambujwa no kuuraiwa. (Mateu 16:21) Pedhru waizviziva kuti Jesu ndiyena Mesiya wakagondeswa kuti waizoponesa vandhu va Mwari ngo kudalo zvakava zvinonesa maningi kuti Pedhru atendere kuti Jehovha waizosiya mwana wake esitambujwa mbhera koofa. (Mateu 16:16) Ngo kudalo Pedhru wakadanija Jesu omuvhunja kuti: ‘Zvizwirenyi pena Mambo, izvi azvivhiri kuitika kamuri.’ (Mateu 16:22) Asi Jesu aato kutenderana nazvo ngokuti Pedhru wainga asingalangariri inga ndi Jesu.

6. Mu njira ipi Jesu wakakhombija kuti waitevejera mulangariro wa Jehovha?

⁶ Mulangariro wa Jesu wainga wakaezana no waaBake vo kudenga. Ngo kudalo wakati kuna Pedhru: ‘Siyana neni, Sathana! Yewe uri ciro cinonyangajisa kandiri, ngokuti auna mulangariro wa Mwari, asi uno mulangariro jo vandhu.’ (Mateu 16:23) Zvido zva Pedhru zvaiita inga zvakanaka maningi, asi Jesu wakalamba zano lake. Ici cijijowo cakanaka maningi katiri. Kutungamirira njira yo kujingwarira kainga kusiripi kuda ka Jehovha kuna Jesu. Panguva iyi, Pedhru wakajija kukosha kokulangarira inga ndi Jehovha.

7. Pedhru wakazonasiririsa kudini malangarire ake kuti aenderane no a Jehovha? (Wonanyi pakhavha.)

⁷ Ngo kuhamba ko nguva, Pedhru wakakhombija kuti waida kuva no mulangariro wakatojana no wa Jehovha. Yainga yaguma nguva yokuti vo majinja amweni kana kuti vaya vainga vasiripi vaJudha, vaite divi lo mbhuri ya Mwari. Jehovha wakagaja Peduru kuti aparijire Korneriyo, mundhu wokutanga wo majinja amweni, kuti ave muKristu. VaJudha vainga vasingashamwarijani no vomajinja amweni, ngo kudalo zvainga zvisingashamisi kuti Pedhru waida besero kuti aende kubasa laakagajwa. Pasure pokuti Jehovha wabesa Pedhru kuzwisisa kuda kake, iyena wakacinja mawonere ake. Inga muviyo pakupejisira wakaenda asikakani-kani “paakatumwa.” (Mabasa 10:28, 29) Muviyo wakona ngo wokuti Pedhru wakaparijira Korneriyo na vese vo pambhuri pake, uye vese vakabhabhatijwa.—Mabasa 10:21-23, 34, 35, 44-48.

8. Tingakhombijisa kudini kuti tinolangarira inga ndi Jehovha? (1 Pedhru 3:8 uye masoko opasi)

⁸ Pa makore akatevera, Pedhru wakavangisa va Kristu vaainamata navo kuti vave vakabatana mumulangariro kana kuti vave no “mulangariro wakaezanana.” (Verenganyi 1 Pedhru 3:8 uye no masoko opasi.) Inga vandhu va Jehovha, tinokona kulangarira mukuzwirana nokukhombijira kulangarira ka Jehovha inga zvinokhombijwa ngo soko lake. Inga muezaniso, Jesu wakavangisa vateveri vake kuti vakande Umambo pakutanga mu upenyu wavo. (Mateu 6:33) Tesilangarira nga izvi, hama imweni yo mu ungano medu ingakheta kuva piyona kana kukheta basa rimweni lo munguva yakazala. Atidikani kubhuya zviro zvingaoja mweyo wo hameyo, kana kuti zvingaita kuti alangarire zvakamunakira basi, kunja ka izvi tinodikana kubhuya zvakanaka basi ngo pamusolo po zvido zvayo zvokunamata uye kuitsigira.

IVANYI VANOZVIDODOKESA

9-10. Jesu wakakhombijisa kudini muezaniso wo kuva anozvidodokesa?

⁹ Pa usiku asati afa, Jesu wakajijisa Pedhru no vapostori vamweni cijijo cinokosha cokuzvidodokesa. Pasara nguva doko, Jesu wakakumbira Pedhru na Johani kuti vaite nasiriro yo zvokurhya zvake zvokupejisira inga mundhu pasi pano. Imwe yo nasiriro yovakaita yainga yokuti pawanike basiya no thaura kuti pagezwe makumbo o vandhu vainga vakokwa vasati varhya. Asi ndiyani waizozvidodokesa maningi waizoita basa iri?

¹⁰ Asito kumbokana-kana, Jesu wakakhombija muezaniso mukuru wokuzvidodokesa. Iyena wakaita zviro zvaiizwa ngo muranda, izvi zvakaita kuti vapostori vashamisike maningi. Bhaibheri rinobhuya kuti Jesu wakavhisa nguwo yake yo kunja, otora thaura orisunga mucihunu, okanda kumwa mu basiya, uye otanga kugeza soka jo vajiji vake. (Johani 13:4, 5) Zvakatora nguva kuti Jesu ageze soka jo vapostori vake 12 kubatanijawo no ja Judha, uwo waizomutengesa. Ngo kudalo, Jesu ngo kuzvidodokesa wakapeja kuita basa iri. Apeja wakavasanangurira ngo kusengerera kese kuti: “Yemwi munozwisisa zvondakamuitira? Yemwi munondidanija kuti ‘mujijisi,’ uye ‘Ishe’, ngaizvona kamare ngokuti ndizvona zvandiri. Ngo kudalo, yeni Ishe kana mujijisi, ndasuka soka jenyu, na yemwiwo munodikana kusuka soka ja umwe nga umwe wenyu.”—Johani 13:12-14.

11. Pedhru wakakhombijisa kudini kuti wakajija kuva mundhu anozvidodokesa? (1 Pedhru 5:5) (Wonanyi foto.)

¹¹ Pedhru wakajija ngo kuzvidodokesa ka Jesu. Pasure pokuti Jesu wahwirira kudenga, Pedhru wakaita mushamaiso iyena wakalapa mwanarume umweni wakabarwa akaremara. (Mabasa 1:8, 9; 3:2, 6-8) Vandhu vakawanda maningi vakawona cishamaiso ici, uye zvakakwevera vandhu. (Mabasa 3:11) Kubhuya kuti Pedhru waida kushandisa mukana uwu kuti akujwe pacake, ngokuti mutsika yavo kuva no mbiri cainga ciri ciro cinokosha maningi? Haiwa, Pedhru wakava anozvidodokesa iyena aato kutendera kuzvishamaisira pacake asi wakapa rukujo wese kuna Jehovha na Jesu paakati: ‘Mwanarume wamuri kuonari no kumuziva wavanga ngo zina la Jesu, pamwe nokutenda kenyu zina lake.’ (Mabasa 3:12-16) Pa tsamba yake imweni kuva Kristu, Pedhru wakavavangisa kuti vapfeke undhu wokuzvidodokesa, masoko aya anotilangarija apo Jesu paakasungira thaura mucihunu kuti ageze soka jo vapostori.—Verenganyi 1 Pedhru 5:5.

12. Tingaitenyi kuti tilambe tesisakurira undhu wo kuzvidodokesa inga ndi Pedhru?

¹² Tingatevejera muezaniso wa Pedhru ngo kulamba tesisakurira undhu wo kuzvidodokesa. Asi langariranyi kuti kuzvidodokesa ko cokwadi akucamiri basi pa kuvereketa inga munozvidodokesa. Pedhru wakashandisa gama lokuti “kuzvidodokesa ko mulangariro” rinokhombija kuti kuzvidodokesa kocokwadi kunobatanija mulangariro jedu jomukati-kati. Tinoitira vamweni mabasa ngokuti tinoda Jehovha no vandhu, haiwa kuti tinoda kushamisira. Kudai tikadakajisa Jehovha no hama jedu ngo mudakalo wese, kunyange kuvangisira kedu kusikawoniwi, tinokhombija kuti tinozvidodokesa.—Mateu 6:1-4.

“IVANYI NO “MULANGARIRO WAKANAKA”

13. Sananguranyi zvinobatanija kuva no “mulangariro wakanaka.”

¹³ Kuva no ‘mulangariro wakanaka’ zvinobatanijenyi? (1 Ped. 4:7) MuKristu anomulangariro wakanaka unoita zvese zvanokona kuti aite zvikhetwa zvinoederana no mulangariro wa Jehovha. MuKristu wakadalo, iyena anozwisisa kuti apana cinokosha maningi mu upenyu kudarika ushamwari wake na Jehovha. Kunja ka izvi iyena mundhu ari pakati no pakati, uye unozwisisa kuti aazivi zvese. Mundhu unomulangariro wakanaka unokhombija kuti unothemba Jehovha ngo kuita mukumbiro nguva yese esikumbira ndhungamiriro jake.b

14. Pamugariro upi Pedhru paasito kuthemba Jehovha?

¹⁴ Pausiku asati afa, Jesu wakangwaja vajiji vake kuti: ‘Usiku uno mese munozondisiya ngo ndava yo zvinozoitika kandiri.’ Esizvigonda maningi pacake Pedhru wakadavira kuti: ‘Kunyange vese vakamusiya ngo ndava yo zvinozoitika kamuri, yeni narini andizomusiyi!’ Mu usiku wonawo Jesu wakapa zano vajiji vake vamweni kuti: ‘Garanyi makarinda uye lambanyi mesiita mukumbiro.’ (Mateu 26:31, 33, 41) Kudai Pedhru akatevera zano iri pasina kukana-kana iyena waizova akacunga, uye obhuya kuti mujiji wa Jesu. Pasure pazvo, Pedhru wakalamba Jesu.—Mateu 26:69-75.

15. Jesu wakaitenyi kuti alambe anomulangariro wakanaka pa usiku wake wokupejisira asati afa?

¹⁵ Jesu waithemba maningi Jehovha. Kunyange Jesu wainga mundhu wakakwana, iyena wakaita mukumbiro kakawanda. Izvi zvakamupa cicunge cokuita zvaidiwa ndi Jehovha. (Mateu 26:39, 42, 44; Johani 18:4, 5) Pedhru wakawona kuti Jesu waiita zvakadini mukumbiro paainga ari pa mugariro unonesa uye izvi zvakapsasa maningi upenyu wake.

16. Pedhru wakakhombijisa kudini kuti wainga akasakurira kuva no mulangariro wakanaka? (1 Pedhru 4:7)

¹⁶ Ngo kuhamba ko nguva, Pedhru wakazothemba maningi Jehovha uye waigara esiita mukumbiro. Pasure pokunge Jesu amuswa iyena wakathembesa Pedhru no vapostori vamweni kuti ivona vaizoashira mweya mupsene kuti vakwanise kuparijira masoko akanaka. Ngo kudalo, Jesu wakavakumbira kuti vaemere ku Jerusarema mbhera izvi zviitike. (Ruka 24:49; Mabasa 1:4, 5) Pedhru waiitenyi paiyemera? Pedhru no vamweni vake vailamba “vesiita mukumbiro.” (Mabasa 1:13, 14) Ngo kuhamba ko nguva, mu tsamba yake yokutanga, Pedhru wakavangisa vaKristu kuti vave no mulangariro wakanaka uye valambe vesiita mukumbiro. (Verenganyi 1 Pedhru 4:7.) Pedhru wakajija kuthemba Jehovha uye wakava akavanga muno zvokunata mu ungano.—VaG. 2:9.

17. Zvicinyi zvatinodika kulamba tesiita, pasinenyi no zvatinokwanisa kuita? (Wonanyi foto.)

¹⁷ Kuti tive vandhu vanomulangariro wakanaka, tinodikana kulamba tesiita mukumbiro kuna Jehovha. Tinozviziva kuti tinodikana kulamba tesiita mukumbiro kuna Jehovha pasinenyi no mabasa atinokwanisa kuita. Ngo kudalo, maningi-ningi paya patinoda kuita zvikhetwa zvinokosha tinoita mukumbiro kuna Jehovha tisikumbira ndhungamiriro jake uye tesithemba kuti yena unoziva zvakatinakira.

18. Tingaitenyi kuti titevejere malangarire a Jehovha?

¹⁸ Zvinodakajisa maningi kuziva kuti Jehovha wakatisika tesikwanisa kutevejera undhu wake. (Gen. 1:26) Zvakajeka kamare, kuti atikwanisi kunasa kutevejera undhu wa Jehovha wakakwana. (Isa. 55:9) Asi, inga ndi Pedhru, tinoda kulamba tesilangarira inga ndi Jehovha. Tingaita izvi ngo kulamba tesitevejera mulangariro wa Mwari wo kuva anozvidodokesa uye kuva no mulangariro wakanaka.