Tevejeranyi Kuzvidodokesa ka Jehovha

1. Ngenyi kuzvidodokesa ka Jehovha kunoshamisa?

PA MUNOWONA vatungamiriri vo nyika ino, imwimwi maizobhuya kuti ivona vanozvidodokesa here? Cokwadi munoti haiwa. Asi, Jehovha wo Masimba ese, iyena unozvidodokesa. (Ps. 113:5-8) Kuzvidodokesa kunokhombija undhu wa Jehovha uye apana cinokhombija kuti iyena unozvikuja. Mu cijijo cino, tinozowona zviro zvirongomuna zvinobatanija undhu wa Jehovha uye tinozowona kuti kuzvidodokesa kake kunokhombijika kudini mu zviro zvirongomuna izvi. Tinozowonazve kuti Jesu wakatevejeresa kudini kuzvidodokesa ka Jehovha. Patinopeja kuongorora zviro izvi, tinozobesereka kukhwedera phedo na Jehovha uye zvinozotibesazve kuti titevejere kuzvidodokesa kake.

JEHOVHA MUNDHU ANOKHWEDEREREKA

2. Pisarema 62:8 inotijijisenyi ngo pamusoro pa Jehovha? (Wonanyi yo pakhavha.)

² Kakawanda vandhu vanozvikuja. Kuzvikuja kavo kunoita kuti vamweni vatye kuvakhwederera. Asi Jehovha wakasiyana maningi no vamweni! Ngokuti Baba vedu vokudenga vanozvidodokesa, vanotikoka kuti tikhwedere phedo navo tovavhunja ngo pamusoro po zviro zvinotinesa mumurangariro kana mumwoyo medu. (Verenganyi Pisarema 62:8.) Mukutojana na aba vanonasa kuyaeya vana vavo pavanonga vesibhuya, Jehovha unoashira uye unoyaeya mukumbiro jo vanamati vake. Kunasa kubhuya, muBhaibheri makanyorwa mukumbiro jakawanda jo vanamati vake. Izvi zvinokhombija kuti iyena wakareruka kubhuya naye. (Jos. 10:12-14; 1 Sam. 1:10-18) Asi, nguva jimweni tikazvizwa tisingakoni kuita mukumbiro kuna Jehovha ngo ndava wo zvishaishi zvakawanda zvatinoita.

3. Mungaitisa kudini kuti muve no cokwadi cokuti Jehovha nguva jese unoda kuti imwimwi muite mukumbiro kaari?

³ Tingakhwedera phedo na Jehovha ngo kuita mukumbiro kaari, kunyange tesirangarira kuti atifanei rudo wake. Ngenyi tesibhuya kudaro? Mukufanana no muezaniso wa Jesu wo mwana wakarasika, Jesu wakaezanisa Jehovha na baba vano mwoyo wakanaka, avo vakaashira mwana vavo aizvizwa asikafanei kuashirwazve mumbhuri. Zvicinyi zvakaizwa ndi baba kuno mwana wavo paakahwirira kanyi? Jesu wakabhuya kuti baba pavakawona mwana wavo ivona ‘vogogoma kuenda komutandamija, vakamukumbatira, vomupsopsa kamare.’ (Ruka 15:17-20) Jehovha wakaitawo inga baba ava. Iyena unozwa mukumbiro jo vandhu vari kuneseka mu murangariro, uye vanozvipa ndava ngo pamusoro po zvishaishi zvavo, kuzvidodokesa kavo kunoita kuti Jehovha anase kuyaeya. (Mar. 3:19, 20) Jehovha uno unyasha na isusu, Inga baba vakagogoma vesienda kotandamija mwana wavo, Iyena unotida no kutinyaraja. (Isa. 57:15) Jehovha “unotibesesa” kudini mazuva ano? Kakawanda kakona, iyena unoshandisa vakuru uye hama no hanzvaji jatinonamata najo. (Jak. 5:14, 15) Jehovha unotipa besero iri, ngokuti unoda kuti tikhwedere phedo naye.

4. Jesu wakakhombijisa kudini kuti wainga mundhu anokhwederereka?

⁴ Jesu unotevejera baba vake. Mukutojana na baba vake, Jesu unozvidodokesa. Ngo ndava yazvo, paiinga pasi pano vandhu vaizvizwa vakasujunuka kukhwedera phedo naye. Vandhu vaisujunuka kumuita muvhunjo. (Mako 4:10, 11) Ngo kudaro, pavaikumbirwa kuti vapewo mawonero avo pa shwiro iri yese, ivona vainasa kumuvhunja kamare mazwiro avo. (Mateu 16:13-16) Kunyange pavainga vaita zvakashata avasaipseruka, ngokuti vaiziva kuti Jesu wainga akapfava uye wainga akanaka mwoyo. (Mateu 17:24-27) Zvinokosha kuziva kuti vateveri va Jesu vakaguma pa kunasa kuziva Jehovha ngokuti Jesu waitevejera babake, ngo kudaro, vateveri vake vakaguma pa kunasa kuziva Jehovha. (Johani 14:9) Ivona vakajija kuti Jehovha wainga asito kufanana no vatungamiriri vo maceci vaizvikuja uye vainga no utsinye. Kusiyapo izvi, Jesu waizvidodokesa uye waireruka kubhuya naye.

5. Kuitisa kudini kuzvidodokesa kungatibesa kuti tive vandhu vanokhwederereka?

⁵ Tingatevejeresa kudini Jehovha? Kudai tiri vandhu vanozvidodokesa, tinozova vanokhwederereka. Kuzvidodokesa kunotiita kuti tisava no undhu unoita kuti vandhu vasatikhwederera wakadai inga shanje, kuzvikuja uye kutama kuregerera vamweni. Kuzvidodokesa kunozotibesa kuti tive vandhu vakanaka, vanosengerera no kuregerera vamweni, zviro zvinotiita kuti tikhwedererwe ngo vandhu. (VaK. 3:12-14) Uye cinonyanyazve kukosha ngo cokuti vakuru vanodikana kuva vanokhwederereka. Asi kuti vakwanise undhu uwu, vanodikana kupeja nguva no hama no hanzvaji. Ngo kudaro, vakuru vanodikana kupinda musangano nguva jese, pano kupinda ngo vhidhiyo koferensiya pasina dikano. Nguva jese, vanoshanda pamwepo no hama no hanzvaji mu basa ro kuparijira muzi ngo muzi. Hama no hanzvaji pajinoita ushamwari no vakuru, zvinozova zvakavarerukira kubhuya navo nguva jese pavanonga vesida besero.

JEHOVHA UNOZWISISA

6-7. Ipanyi muezaniso unokhombija kuti Jehovha unozwisisa uye wakanasiririka kuyaeya mukumbiro jo vashandiri vake.

⁶ Vandhu vanozvikuja vanorangarira kuti vanoziva zvese uye avacinji murangariro wavo. Asi Jehovha aato kudaro kunyange esiziva zvakanakisisa. Ngokuti unozvidodokesa, iyena unozwisisa uye wakanasiririka kuti azwe zvinobhuya vamweni. Inga muezaniso, wonanyi mabatire aakaita Miriyemu hanzvaji ya Mosi. Miriyemu na Aroni vakabhuya zvakashata ngo pamusoro pa Mosi, uwo ainga muemereri wa Jehovha. Icokwadi kuti, Miriyemu wakakhombija kutama kureremeja Jehovha kamare. Ngo ndava yazvo, Jehovha wakanyangajirwa maningi Miriyemu, oita kuti ave no mapere. Asi, Aroni wakakumbira Mosi kuti abese Miriyemu uye Mosi wakadeketerera Jehovha kuti amurape. Jehovha wakaitenyi? Mundhu anozvikuja ungadai asito kuyaeya kana kucinja murangariro wake. Asi Jehovha wakaita zvakasiyana. Ngokuti Jehovha unozvidodokesa, wakava unozwisisisa orapa Miriyemu.—Num. 12:1-15.

⁷ Jehovha wakakhombijazve kuzvidodokesa ngo mabatire aakaita Mambo Ezekiya. Esishandisa muphorofita Isaya, Jehovha wakavhunja Mambo kuti waizofa. Ngo kudaro, Ezekiya wakacema uye wakadeketerera Jehovha kuti amurape. Jehovha wakadavira mukumbiro wa Ezekiya uye ngo kunaka mwoyo, wakamuengejera makore 15 okupona. (2 Maj. 20:1, 5, 6) Jehovha unozwira usizi vandhu. Ngo ndava yo kuzvidodokesa, iyena wakanasiririka kuti avayaeye.

8. Muezaniso jipi jinokhombija kuti Jesu unozwisisa? (Mako 3:1-6)

⁸ Jesu unotevejeresa kudini Baba vake? Jesu waikasika kuita zviro uye mukuvo wese wainga akanasiririka kuti aitire vamweni zvakanaka. Inga muezaniso, Jesu wakarapa vandhu ngo muguvela, zviro zvokuti vatungamiriri vomaceci vainga vasingazwisisi, vairangarira kuti azvisaidikana kuizwa. (Verenganyi Mako 3:1-6.) Mazuva ano, Jesu inga musoro wo ungano, unoramba esizwisisa. Inga muezaniso, kudai mundhu akaita cishaishi cakakura, Jesu unova anosengerera uye unovapa mukana wokuti vacinje zviito zvavo.—Zvak. 2:2-5.

9. Tingakhombijisa kudini kuti tinozwisisa? (Wonanyi mafoto.)

⁹ Tingatevejeresa kudini Jehovha? Inga ndi Jehovha, tinodikana kuva vandhu vanozvidodokesa uye tovangisira kuti tive vanozwisisa pamarangarire edu no pakuita zviro. (Jak. 3:17) Inga muezaniso, vabereki vanozwisisa, kunyange vasingatenderi murangariro wakashata wo vana vavo, avangaemeri kuti vana vavo vaite zvavasingakoni. Jakobe wakava muezaniso wazvo wakanaka pa shwiro iyi, inga zvatinowona pa ndhorovondho iri pana Genesisi 33:12-14. Kunja ka izvi, vabereki vanozvidodokesa no kuzwisisa, avayezanisi mwana wavo no umweni. Vakuru vanodikanawo kuva vanozwisisa. Inga muezaniso, mukuru aazovangiriri pa murangariro wake, asi unotsigira zvinonga zvakhetwa ngo vakuru vakawanda kudai zvesizwirana no ndhungamiriro jo muBhaibheri. (1 Tim. 3:2, 3) Uye tese, tingavangisira kuzwisisa mawonere ovamweni kunyange tinomawonere akasiyana. (VaR. 14:1) Cokwadi, vandhu vese muungano, vanodikana kuvangisira kuti “kuzwisisa kavo kuzivikanwe ngo vandhu vese.”—VaF. 4:5.

JEHOVHA UNOSENGERERA

10. Jehovha wakakhombijisa kudini kusengerera?

¹⁰ Nguva jimweni, imwimwi makamborangarira kuti vandhu vanozvikuja avadakariri kuemera. Kuzvikuja kunoita kuti ivona vasasengerera. Jehovha wakasiyana no vandhu ava uye unosengerera kupinda ari wese hake! Inga muezaniso, mu mazuva aNowa, Jehovha wakati waizoemera makore 120 asati aparaja vakashata. (Gen. 6:3) Ngo kudaro, Nowa wakawana nguva yokurera vana vake uye ngo besero ro mbhuri yake, wakavaka Areka. Panguva imweni, Jehovha wakayaeya ngo kusengerera, Abhirahama paakaita muvhunjo ngo pamusoro pokuparajwa ko Sodhoma no Gomora. Mundhu anozvikuja, nguva jimweni waizovhunjisa kuti: ‘Ndiwe ani kuti undivhunjise muvhunjo iji?’ Asi ngo kuva anozvidodokesa, Jehovha wakava anosengerera na Abhirahama.—Gen. 18:20-33.

11. Mukuzwirana na 2 Pedhru 3:9, ngenyi Jehovha uri kukhombija kusengerera mazuva ano?

¹¹ Mazuva ano, Jehovha uri kuenderera mberi esizvidodokesa uye esisengerera. Iyena uri kuemera mukuvo waakagaja wo kuti aviise mugumo. Asi ngenyi iyena esisengerera? “Ngo kudaro aadi kuti mundhu afe, asi anoda kuti vese vakhauye.” (Verenganyi 2 Pedhru 3:9.) Kubhuya kuti kusengerera ka Jehovha ngo ka mahara here? Haiwa! Ma Miliyawe ovandhu vari kukhwedera kaari no kuva shamwari jake. Isusuwo tiri kuemera kuti mamiliyawe amweni ovandhu, aitewo zvonazvo. Kusengerera ka Jehovha kuno papanogumira. Jehovha unoda vandhu, asi aavhari majiso pano zvakashata. Iyena aazosiyi zvakashata kuti zvirambe zviripo no kusingaperi.—Abha. 2:3.

12. Jesu uri kutevejeresa kudini kusengerera ka Jehovha?

¹² Jesu unotevejeresa kudini Baba vake? Jesu uri kutevejera kusengerera ka Jehovha ko ma miliyawe omakore. Jesu uri kuwona Sathana esibhuya manyepo ngo pamusoro pa Jehovha no vashandiri vake vakagondeka. (Gen. 3:4, 5; Job. 1:11; Zvak. 12:10) Jesu uri kuwonazve kutambujika kakashatisisa pasi pano. Amborangariranyi madire aanoita ‘kuparaja mabasa a Dhiyabhorosi’! (1 Joh. 3:8) Zvicinyi zvinobesa Jesu kuemera no kusengerera kese, kuti Jehovha amutendere kuparaja zvacose ma basa a Dhiyabhorosi? Cimwe co zvikonzero zvakona, kuzvidodokesa kake. Ngo ndava yo kuzvidodokesa ka Jesu, iyena unozvisiya munyara ja Jehovha, ngokuti unoziva kuti Jehovha ndiyena ega anocitenderwa cokukheta kuti izvi zvinodikana kuizwa rini.—Mabasa 1:7.

13. Jesu wakakhombijisa kudini kusengerera kuva positori uye ngenyi akaita izvi?

¹³ Paiinga pasi pano, Jesu wakasengererazve no vapositori vake. Inga muezaniso, ivona povainesana kuti ndiyani waizova mukuru, Jesu aato kunyangajwa no kuruza soterero. Kunyange zvakadaro, iyena wakaramba esisengerera. (Ruka 9:46; 22:24-27) Jesu wainga no cokwadi cokuti, ngo kuhamba ko nguva, vapositori vaizocinja. Zvakamboitikawo na imwimwi, kuita cishaishi cimweco kuphinda no kuphinda? Nguva jimweni imwimwi muri kubonga maningi ngo kuva na Mambo anozvidodokesa nokusengerera.

14. Zvicinyi zvinozotibesa kuti tive vanosengerera?

¹⁴ Tingatevejeresa kudini Jehovha? Kuti tirangarire no kuita zviro inga ndi Jehovha, tinodikana “kurangarira inga ndi Kristu”. (1 VaK. 2:16) Tingaitisa kudini kuti tinase kuzwisisa murangariro wa kristu? Apanazve gwanja rimweni, isusu tinodikana kuverenga Mavhangeri. Zvadaro, tinodikana kuwana nguva yokurangarijisisa zvatinojija mu ndhorovondho jonajo, ngo pamusoro po marangarire aJesu. Icokwadi kuti, tinodikana kuita mukumbiro kuna Jehovha, tesikumbira kuti atibese kutevejera kuzvidodokesa, kusengerera no kurangarira ka Jesu. Patinoramba tesijija kuti tirangarire inga ndi Kristu, tinozotevejera Jehovha no kukhombijira kusengerera pacedu kamare nokuno hama no hanzvaji jedu.—Mateu 18:26-30, 35.

JEHOVHA UNOKOSHESA VANDHU VANOZVIDODOKESA

15. Ipanyi muezaniso jimweni jinokhombija kuti Jehovha unokoshesa vandhu vanozvidodokesa. (Pisarema 138:6)

¹⁵ Verenganyi Pisarema 138:6. Amborangariranyi basi: Jehovha mukurukuru wonyika, unoreremeja maningi vandhu vanozvidodokesa! Komakore akawanda, Jehovha wakawona vandhu vakawanda vangadai vaisoterwa pasi ngo vandhu vamweni. Vamweni vakona vangadai vasingazivikanwi maningi tisu, asi Jehovha wakaita kuti vanyorwe mu Bhaibheri. Wonanyi muezaniso jimweni. Jehovha wakafemera Mosi kuti anyore zina ro mwanakaji umweni waidainjwa Dhebhora. Iyena wakashanda akagondeka inga makayaya pa mbhuri ya Izaki na Jakobe ko makore 125! Isusu atizivi zvakawanda ngo pamusoro po mwanakaji uwu aingari akagondeka, asi Jehovha wakaita kuti Mosi anyore ngo zvake inga mundhu aidiwa. (Gen. 24:59; 35:8, Masoko okujija.) Pasure pomazana omakore, Jehovha wakakheta mujaha ainga muhavisi aidainjwa kuti Dhavidhi kuti ave Mambo ovaIziraeri. (2 Sam. 22:1, 36) Nguva doko, naapera kubarwa Jesu, Mwari wakatuma ngirosi kucikwata covahavisi vaizvidodokesa uye wakaita kuti vakujwe ngo ndava yokuva vokutanga kuziva kuti Mesiya wainga abarwa ku Bheterehema. (Ruka 2:8-11) Josefa na Mariya povakaenda na Jesu kuthembheri, Jehovha wakapa rukujo Simoni na Ana vainga vavasharuka, rokuwona Mwana wake. (Ruka 2:25-30, 36-38) Zvinodakajisa kuziva kuti, ‘Kunyange Jehovha ari kudenga, iyena anowona mundhu anozvidodokesa’!

16. Jesu unotevejeresa kudini Baba vake pakubata vandhu?

¹⁶ Jesu unotevejeresa kudini Baba vake? Inga ndi Jehovha, Jesu unoda vandhu vanozvidodokesa. Iyena wakajijisa cokwadi ngo pamusoro po Umambo wa Mwari, ‘vandhu vasito kujija no vasina nduma’. (Mabasa 4:13; Mateu 11:25) Jesu, wakarapazve vaiwaja uye wakaita izvi ngo gwanja rakaita kuti vaite nane nokuitazve kuti vawane ndheremejo yovainga nayo kare. (Ruka 5:13) Pausiku Jesu asati afa, iyena wakasuka soka jovapositori, zviro zvaiizwa maningi-ningi ngovashandi vopamuzi. (Johani 13:5) Asati akhwira mugore, Jesu wakapa vateveri vake kubatanijawo na isusu, rukujo rokuita basa rinokosha maningi rokubesera vandhu kuti vawane upenyu usingaperi.—Mateu 28:19, 20.

17. Tingakujisa kudini vandhu vese? (Wonanyi foto.)

¹⁷ Tingatevejeresa kudini Jehovha? Isusu tinoreremejawo vandhu, ngo kukovana navo masoko akanaka, azvinenyi no kovanogara, ganda ravo kana kujija kavo. Tinopazve nderemejo hama no hanzvaji jedu, ngo kuvawona inga vakuru kupinda isusu, kunyange tesikwanisa kuita zviro zvavasingakoni kana tinomakomborero okuti nguva jimweni ivona avana. (VaF. 2:3) Jehovha unodakara maningi patinova vanozvidodokesa uye patinotanga kupa nderemejo umwe no umweni ngo maitiro aya kana ngo maitire amweni.—VaR. 12:10; Zaf. 3:12.

18. Ngenyi imwimwi munoda kutevejera kuzvidodokesa ka Jehovha?

¹⁸ Patinoita zvese zvatinokwanisa kuti titevejere kuzvidodokesa ka Baba vedu vano rudo vokudenga, tinova vandhu vanokwederereka, vanozwisisa no vanosengerera. Inga ndi Jehovha, tinokoshesa vandhu vasingareremejwi no vasina nduma. Narini musakanganwa izvi: kudai tikavangisira kutevejera kuzvidodokesa ka Jehovha, tinova vanokosha maningi pamawonere ake!—Isa. 43:4.