‘Zvikheterenyi Wamunoda. . . Kunamata’

1. Zvicinyi zvatinodikana kuita kuti tive no mudakalo wo cokwadi uye ngenyi? (Isaya 48:17, 18)

BABA vedu vokudenga vanotida maningi uye vanoda kuti tidakajwe ngo upenyu zvino uye no muno lamangwana. (Mup. 3:12, 13) Jehovha wakatisika no zvimweni zvatinokwanisa kuita zvinoshamaisa asi aato kutipa zvikwaniriso zvokuzvitonga tega no kuzvikhetera tega zvakanaka no zvakashata. (Mup. 8:9; Jer. 10:23) Iyena unozviziva kuti, kuti tidakare tinodikana kumunamata no kurarama maererano no ndhungamiriro jake.—Verenganyi Isaya 48:17, 18.

2. Zvicinyi zvinodiwa ndi Sathana kuti titende uye Jehovha ari kukuwonesa kudini kunyepa uku?

² Sathana unoda kuti titendere kuti tinodakala tisina besero la Jehovha uye vandhu vangazvitonga vega. (Gen. 3:4, 5) Jehovha wakabudisa pambhene manyepo aya ngo kutendera kuti vandhu vano cishaishi vazvitonge ko cinguva cidoko. Atidikani hedu kulangarira kuenda ndhambo kuti tiwone muviyo wo utongi wo vandhu. Ngo divi rimweni, mu Bhaibheri makazara ngo muezaniso jo vanarume no vanakaji vakararama upenyu wo kushandira Jehovha. Umwe wakhona ndi Jesu Kristu. Co kutanga ngatiwone ciro cakaita kuti Jesu akhete kushandira Jehovha. Pasure pazvo tinozowona kuti Baba vedu vo kudenga ngenyi vanofaneiwa ngo kunamatwa tisu. Uye pakupejisira tinozowona zvikonzero zvinotiita kuti tikhete kushandira Jehovha.

NGENYI JESU WAKAKHETA KUSHANDIRA JEHOVHA

3. Icinyi cakapuwa Jesu uye ngazvipi zvaakakheta?

³ Paainga ari panyika pano, Jesu waitodikana kukheta kuti onamata ani. Papera cinguva cidoko Jesu abhabhatijwa, sathana wakathembesa Jesu kumupa umammbo wese wo nyika kudai akamunamata kamwe basi. Jesu wakadavira kuti: “Ivha pano Sathana! Uye zvakanyorwa kuti: ‘Jehovha Mwari wako ndiyena waunodikana kunamata uye ndiyena basi unodikana kuizirwa mabasa mapsene.’” (Mateu 4:8-10) Ngenyi Jesu wakakheta kuita izvi? Ngatiwone zvikonzero zvakhona.

4-5. Ngazvipi zvikonzero zvakaita kuti Jesu akhete kunamata Jehovha?

⁴ Ciro cikuru cakaita kuti Jesu akhete kushandira Jehovha irudo. Jesu uno ushamwari wakakura uye rudo usingaperi na Baba vake. (Johani 14:31) Kunja kaizvonazvo, Jesu unoshandira Jehovha ngokuti ciro cakanaka cokuita. (Johani 8:28, 29; Zvak. 4:11) Iyena unozviziva kuti Jehovha cinyuke co upenyu uye iyena wakathembeka nokutizve iyena uno rupo. (Ps. 33:4; 36:9; Jak. 1:17) Jehovha nguva yese waibhuya cokwadi kuna Jesu uye waimupa zvese zvaaida. (Johani 1:14) Ngo divi rimweni sathana wakaita kuti kuve no kufa. Iyena munyepi uno makaro uye unozvida. (Johani 8:44) Kunyange esiziva izvi, Jesu aato kumbolangarira kutevejera sathana pakupandukira Jehovha.—VaF. 2:5-8.

⁵ Cikonzero cimweni cakaita kuti Jesu akhete kushandira Jehovha ngocokuti waiemera kuita basa lake akagondeka. (VaH. 12:2) Iyena waizviziva kuti kudai akalamba akagondeka waizocenesa zina la Baba vake uye kuti waizopeja matambujiko ese akakonzerwa ndi dhiyabhu.

NGENYI JEHOVHA WAKAFANEYA KUTI TIMUNAMATE

6-7. Ngenyi vakawanda mazuva ano avanamati Jehovha asi ngenyi unofaneiya kunamatwa tisu?

⁶ Vandhu vakawanda mazuva ano avanamati Jehovha ngokuti avasati vaziva undhu wake wakanaka uye avazivi zvese zvaakavaitira. Izvi zvakaitikawo no vaiparijirwa ngo mupostori Pauro ku Atena.—Mabasa 17:19, 20, 30, 34.

⁷ Pauro wakasanangurira vayaeyi vake kuti Mwari wo cokwadi “ndiyena unopa upenyu no mweya wo kufema uye no zviro zvese.” Iyena wakaengejera kuti: ‘Ngo ndava yake tino upenyu, tinohamba uye tiriyo.’ Mwari musiki ‘wakasika mundhu umwe basi nyika yese yakazala ngo vandhu,’ ngo kudalo iyena unocitenderwa cokunamatwa tisu.—Mabasa 17:25, 26, 28.

8. Ngazvipi zvisingazomboitwi ndi Jehovha? Sananguranyi.

⁸ Inga Musiki wo zviro zvese, Jehovha waitodikana kuvangirija vandhu vese kuti vamunamate. Ngo kudalo Jehovha aaiti izvi. Kunja kokudalo iyena unotipa zviro zvinokhombija kuti uriyo uye unoda umwe nga umwe wedu. Iyena unoda kuti vandhu vakawanda vave shamwari jake no kusingaperi. (1 Tim. 2:3, 4) Ngo kudalo, Jehovha wakatijijisa kuti tikwanisewo kujijisawo vamweni ngo pamusolo po zvinangwa zvake uye kuti tivhunjewo vamweni ngo pamusolo pozviro zvakanaka zvaanozoitira vandhu . (Mateu 10:11-13; 28:19, 20) Iyena wakatilonga inga ungano uye wakaita kuti kuve no vakuru vano rudo vanotingwarira.—Mabasa 20:28.

9. Rudo la Jehovha rinowonekesa kudini?

⁹ Rudo rinoshamisa la Jehovha rinowoneka ngo mabatire aanoita vaya vanokheta kutama kutendera kuti iyena uriyo. Ambowonanyi cokwadi ici: Mundholovondho jo upenyu mamiriyau o vandhu vakakheta kurarama vesizvikhetera vega cakanaka no cakashata. Kunyange zvakadalo, Jehovha wakavapa zvese zvavaida kuti vararame. (Mateu 5:44, 45; Mabasa 14:16, 17) Iyena wakavapa zvikwaniriso zvokuti vadanane no vamweni, kuita mbhuri uye kukheta muviyo wo kushanda kavo ngo simba. (Ps. 127:3; Mup. 2:24) Kuno zviro zvinokhombija kuti Baba vedu vo kudenga vanoda vandhu vese. (Eki. 34:6) Uye zvino taakulangarira zvikonzero zvinotiita kuti tikhete kushandira Jehovha uye madavirire aanotiita.

NGENYI TINOKHETA KUSHANDIRA JEHOVHA

10. (a) Ngacipi cikonzero cikuru cinotiita kuti tinamate Jehovha? (Mateu 22:37) (b) Iyemwi makabeseswa kudini ngo kusengerera ka Jehovha? (Pisarema 103:13, 14)

¹⁰ Inga ndi Jesu, ciro cikuru cinotiita kuti tishandire Jehovha irudo latinaro uye no ushamwari watinawo naye. (Verenganyi Mateu 22:37.) Tinozvizwa tesikweverwa ndi Jehovha paya patinojija ngozvo undhu wake. Inga muezaniso ambowonanyi kusengerera ka Jehovha katiri. Vaiziraeri povakatama kumuzwira iyena wakati kavari: ‘Hwiriranyi ndapota pa makwanja enyu akashata.’ (Jer. 18:11) Jehovha unozviziva kuti tino cishaishi uye tiri bukuta. (Verenganyi Pisarema 103:13, 14.) Pamunolangarira ngo kusengerera ka Jehovha uye no undhu wake wakanaka amuzvizwi mesida kumushandira nokusingaperi here?

11. Ngazvipi zvikonzero zvimweni zvinotiita kuti tikhete kunamata Baba vedu vo kudenga?

¹¹ Tinokurujirwa kuti tishandire Jehovha ngokuti ciro cakanaka catingaita. (Mateu 4:10) Uye tinoziva muviyo wo kushanda kedu takagondeka. Kushanda kedu takagondeka kunobesa pakucenesa zina la Jehovha tobudisa pambhene kuti dhiyabhu munyepi uye todakajisa mweyo wa Baba vedu. Kudai tikakheta kushandira Jehovha zvino tinozoda kumushandira no kusingaperi!—Johani 17:3.

12-13. Ngazvipi zvatajija pa muezaniso wa Jani na Pami?

¹² Patinonga tisiri vana vadoko tingakwanisa kukwijirija rudo wedu kuna Jehovha, rudo wedu unolamba wesikula patinonga tesikulawo. Wonanyi muezaniso wo hanzvaji mbiri jinozwi Jani na Pami.a Vakatanga kujija Bhaibheri umwe wainga no makore 11 umweni wainga na 10. Kunyange kuti vabereki vavo vainga vasikadakariri kujija vakavatendera kuti valambe vesijija no Zvapupu zva Jehovha kuvhira pavakatanga kupinda musangano wo kupera ko vhiki. Jani wakabhuya kuti: “Zvandakajijiswa mu Bhaibheri ngo Zvapupu zva Jehovha” “zvakandibesa kuti ndilambe ndakavanga pandaivangirijwa ngo vozera langu kuti ndimwe dolo no kuita uhure.”

¹³ Povainga vesikula vakazoguma pakuva vapariji. Ngo kuhamba ko nguva vakazova mapiyona ino vesingwarira vabereki vavo vainga vakula. Esilangarira zvakaitika pa ciitiko co upenyu wake Jani anoti: “Ndakajija kuti Jehovha unobesa shamwari jake jakagondeka inga zvinobhuiwa pana 2 Timoti 2:19, ‘Jehovha unoziva vandhu vake.’” Ngozvo cokwadi kuti Jehovha unongwarira vaya vanozvipira kumuda uye no kumushandira!

14. Kuitisa kudini zvatinobhuya no zvatinoita zvinobesa pakucenesa zina la Jehovha lakasvipiswa? (Wonanyi foto.)

¹⁴ Tinoda kubesa kucenesa zina la Jehovha pakusvipiswa kese karakaizwa. Ambolangariranyi izvi basi: Muno shamwari yenyu yo phedo ino unyasha inokova uye inoregerera. Zuva rimweni mozwa kuti mundhu umweni wanyepera shamwari yenyu kuti aito kugondeka uye ino utsinye. Maizoitenyi? Pasina kukana-kana maizoijivirira. Mu njira yakatojana, sathana unoeja kupalaja ukuru wa Jehovha ngo kundhandhanisa manyepo ngo pamusolo pake, isusu tinodavira ngo kubhuya cokwadi ngo pamusolo pake tesijivirira zina lake. (Ps. 34:1; Isa. 43:10) Tinokhombija kuti tinoda kushandira Jehovha ngo mweyo wedu wese ngo zvatinobhuya uye no zvatinoita.

15. Mu postori Pauro wakabesereka kudini ngo kucinja cinangwa cake? (VaFiripi 3:7, 8)

¹⁵ Takadakala, tinonasirisa zvinangwa zvedu mu upenyu kuti tishandire Jehovha ngo njira inoashirika uye yakanaka. Inga muezaniso, mupostori Pauro wakakheta kutama kureremejwa mu ndharaundha kuti atevere Jesu uye kuti ashandire Jehovha. (VaG. 1:14) Inga muviyo, iyena wakava no upenyu wakanaka uye wakawana mukana wokutonga na Kristu kudenga. Iyena aato kumbozvidemba ngo kukheta kaakaita kushandira Jehovha uye isusu atizombozvidembiwo.—Verenganyi VaFiripi 3:7, 8.

16. Zvicinyi zvatinojija ngo muezaniso wa Julia? (Wonanyi foto.)

¹⁶ Kudai tikaita kuti kushandira kedu Jehovha kuve ciro cinokosha katiri, tinova no upenyu wakanaka zvino uye muno lamangwana. Ambolangariranyi zvakaitika ku hanzvaji imweni inozwi Julia. Asati ajija Bhaibheri, Julia waiemba ngoma jo ceci kuvhira asiri mwana mudoko. Muembi umweni uno uzivi paakaziva kuemba kaiita wakamujijisa. Julia ngo kukasika wakava no mbiri uye wakashandira panyumba yo ngoma ino mbiri. Iyena paainga ari pacikora cino mbiri co ngoma, shamwari yo mucikoremo yakatanga kubhuisana naye ngo pamusolo pa Mwari uye wakatanga kumusanangurira kuti Mwari uno zina rimwe basi lokuti Jehovha. Ngo kukasika Julia wakatanga kujija Bhaibheri kaviri pavhiki. Pa kupejisira wakakheta kukanda upenyu wake pakushandira Jehovha pano kuita basa lo kuemba. Cikhetwa caakaitari cainga cisito kureruka. Iyena wakati: “Vandhu vakawanda vaindivhunja kuti ndiri kutambisa cipo cangu” “asi ndaida kushandisa upenyu wangu kuti ndishandire Jehovha.” Iyena uri kuzwa kudini pacikhetwa caakaita pamakore anopindirija 30? Iyena wakati: “Ndino runyararo mu mulangariro uye ndinothemba kuti Jehovha unozozajisa zvese zvinodiwa ngo mweyo wangu muno lamangwana.”—Ps. 145:16.

LAMBANYI MESISHANDIRA JEHOVHA!

17. Kuitisa kudini mazuva okupejisira anopsasa vaya vakakheta kunamata Mwari uye na vaya vasati vakheta kumunamata?

¹⁷ Tiri kurarama mu mazuva okupejisira. Mu postori Pauro wakanyora kuti: “Ngokuti ‘kasara nguva doko wiya anoda kuviya oda kuguma,’ uye ‘aazononoki.’” (VaH. 10:37) Izvi zvinotipsasisa kudini? Pakutanga nguva yasara kuti vandhu vashandire Jehovha ishoma. (1 VaK. 7:29) Uye, kudai takatokheta kunamata Mwari, tinozviziva kuti kunyange tesidikana kucungirira zvineso zvakawanda zvinozova zvo “cinguva cidoko.”

18. Jehovha na Jesu vanoda kuti tiitenyi?

¹⁸ Jesu wakakurujira vajiji vake kuti vasandogumira pakumutevera asi kuti valambe vesimutevera. (Mateu 16:24) Ngo kudalo, kudai tesinamata Jehovha ko makore akawanda, ngaticunge kutama kusiya kunamata Jehovha. Tinodikana kushanda ngo simba kuti tilambe tesirarama maererano no cikhetwa cedu co kumunamata. Kunyange zvikasava nyore asi tinova no makomborero no mudakalo kunyange zvino!—Ps. 35:27.

19. Zvicinyi zvatajija pa muezaniso wa Geni?

¹⁹ Vamweni vanolangarira kuti kunamata Jehovha kunobatanija kuzvipira kupindirija zvatinokwanisa. Kudai muri mwana mudoko munolangarira kuti muri kurasikirwa ngo zviro zvakawanda pamunonga mesishandira Jehovha here? Hama imweni yo cidoko inozwi Geni inoti: “Ndailangarira kuti kuva umwe wo Zvapupu zva Jehovha zvinonesa maningi. Zvaiita inga kuti vana vakawanda vandakabarwa navo vaidakarira zviro zvakadai inga festa, kudanana uye vhidhiyo gemu jinowonesa zvokutakana kuveni inini ndaidikana kupeja nguva yangu yakawanda ngo kuenda kumusangano no kooparijira.” Mulangariro uwu wakapsasisa kudini Geni? Iyena wakabhuya kuti: “Ndakatanga kurarama upenyu uviri” uye “ndakadakajwa ko cinguva cidoko”. Asi azvito kundivisira mudakalo unogara no kusingaperi. Ndakatanga kulangarira cokwadi co Bhaibheri condainga ndakheta kusiya uye ndakakheta kushandira Jehovha ngo mweyo wangu wese. Ngo kudalo, zviri kuita inga kuti Jehovha uri kudavira umwe wo mukumbiro jangu.”

20. Ngazvipi zvatinodikana kulamba tesiita?

²⁰ Muembi umweni wo mapisarema wakaemba esiti ngo pamusolo pa Jehovha: ‘Unodakala mundhu wamunokheta uye wamunokhwedeja phedo kuti agare mumba menyu.’ (Ps. 65:4) Ngatilambe tino cikhetwa cakatojana na caJoshuwa cokuti: ‘Yeni no mbhuri yangu tinozonamata Jehovha.’—Jos. 24:15.