MUSOLO WO KUJIJA 23
NGOMA 2 Munozwi Jehovha
Zina la Jehovha, Rinoda Kubhuyenyi Katiri
“‘Yemwi muri Zvapupu zvangu,’ Unobhuya kudalo Jehovha.”—ISAYA 43:10.
ZVATISAJIJA
Mu cijijo cino, tinoda kuwona kuti tingakhombijisa kudini mabasa edu pakucenesa uye kujivirira zina la Jehovha.
1-2. Tino zvizivisa kudini kuti zina la Jehovha rinokosha kuna Jesu?
ZINA la Jehovha rinokosha maningi kuna Jesu. Iyena ndiyena wokutanga kujivirira zina la Baba vake. Inga zvatakaona mu cijijo cadarika, Jesu wainga akanasiririka kufa kuitira zina la Jehovha uye na zvese zarinoemera. (Mako 14:36; VaH. 10:7-9) Pasure po kutonga kake ko Makore Ano Ciuru, Jesu unozova akanasirira kupa Umambo kuitira kucenesa zina la Jehovha. (1 VaK. 15:26-28) Rudo la Jesu kuno zina la Mwari rinokhombija zvakawanda ngo pamusolo po ukama wake na aBake. Pasina kukaya-kaya izvi zvinokhombija kuti Jesu unoda maningi mundhu unoemerera zina iri.
2 Jesu wakaviya ngo zina laaBake. (Johani 5:43; 12:13) Iyena waiita kuti vateveri vake vazive zina la Baba vake. (Johani 17:6, 26) Iyena wakajijisa ngo zina la Jehovha uye no kuita zvishamiso ngo zina iri. (Johani 10:25) Kubhuya cokwadi Jesu wakakumbira Jehovha kuti angwarire vajiji vake ‘ngo ndava yo zina lake.’ (Johani 17:11) Ngo kudalo, kudai Jesu waizvizwa kudalo ngo pamusolo po zina la Jehovha, zvingaitisa kudini kuti mundhu abhuye kuti muteveri wo cokwadi wa Jesu Kristu asingazivi no kushandisa zina la Jehovha?
3. Tinozowonenyi mu cijijo cino?
3 Inga vaKristu tinoeja kutevejera soka ja Jesu ngo kukoshesa zina la Baba vake. (1 Ped. 2:21) Mu cijijo cino, tinozowona kuti zina la Jehovha riri kushandisiswa kudini kuna vaya vari “kuparijira masoko akanaka oUmambo.” (Mateu 24:14) Uye tinozowonazve kuti zina la Jehovha rinobhuyenyi katiri pacedu kamare.
“VANDHU VO ZINA LAKE”
4. (a) Ibasa ripi lakapa Jesu vajiji vake asati ahwirira kudenga? (b) Muvhunjo upi ungavepo ngo ndava yo basa iri?
4 Asati ahwirira kudenga Jesu wakavhunja vajiji vake kuti: “Munozoashira simba pamwepo no mweya mupsene kamuri uye munozova Zvapupu zvangu mu Jerusarema, muJudheya mese no muSamariya mbhera ku ndau jiri ndhambo panyika pano.” (Mabasa 1:8) Ngo kudalo, masoko akanaka aizoparijirwa kupindirija mugano jese jo Iziraeri. Ngo kuhamba ko nguva vandhu vo majinja ese vaizowana mukana wokuva vateveri va Jesu. (Mateu 28:19, 20) Asi Jesu wakati: “Munozova Zvapupu zvangu.” Izvi zvaida kubhuya kuti vajiji vapsa ava vaizoziva zina la Jehovha kana kuti vaizova basi zvapupu zva Jesu? Zviitko zvakanyorwa pana Mabasa citsauko 15 zvinotibesa kudavira muvhunjo uwu.
5. Zvicinyi zvakaizwa ngo vapostori uye vakuru vo muJerusarema zvinokhombija kuti vandhu vese vanodikana kuziva zina la Jehovha? (Wonanyi foto.)
5 Muna 49 Kristu aviya, vapostori uye vakuru vomuJerusarema vakaungana kuti vabhuisane kuti zvicinyi zvaidikana kuizwa ngo vomajinja amweni asito kuceceujwa kuti vatenderwe inga vaKristu. Mukupera ko kubhuisana, Jakobho munukuna wa Jesu wakabhuya masoko aya: “Pedhru wakabhuya kamare inga Mwari kuti Mwari watendera kamare vandhu vo majinja zvokuti ungatokheta vandhu kuitira zina lake.” Jakobho waibhuya ani? Esibhuya uporofita wa Mosi, iyena wakati: “Kuitira kuti vamweni valambe vesipsaka Jehovha ngo mweyo wese pamwepo no vandhu vo majinja amweni, vandhu vanodanijwa ngo zina langu anodalo Jehovha.” (Mabasa 15:14-18) Vajiji vapsa ava vainga vasingazojiji basi ngo pamusolo pa Jehovha asi vaizodanijwawo ngo ‘zina lake kamare.’ Izvi zvinokhombija kuti ivona vaizova no zina la Mwari uye vaizodanijwa ngo zina iri.
Pamusangano wo Dare Rinotungamirira lo muzana lo kutanga lo makore vanarume ava vakagondeka, vakanasa kuzwisisa kuti Makristu anodikana kudanijwa ngo zina la Mwari (Wonanyi ndima 5)
6-7. (a) Ngenyi Jesu wakaviya panyika pano? (b) Ishwiro ipi inokosha yainga yakabatanijwa?
6 Zina la Jesu kamare rinobhuya kuti “Jehovha muponesi” uye wakakhombija kuti waiva njira ya Jehovha yo kuponesa vaya vanokutenda. (Mateu 20:28) Jesu wakaviya panyika kuzozvipira kuvandhu vese ngo kubhadhara muripo iyena wakavhura mukana kuti vandhu vese vaponeswe uye vawane upenyu usingaperi.—Johani 3:16.
7 Asi ngenyi zvaidikanwa kuti vandhu ava vaponeswe pakutanga? Ngo ndava yo zvakaitika mu munda wo Edheni. Inga zvatakawona mu cijijo cadarika vabereki vedu vokutanga Adhamu na Evha vakapandukira Jehovha, ngo ndava yazvo, vakaruza mukana wo kurarama no kusingaperi. (Gen. 3:6, 24) Ngo kudalo, paibatanijwa ciro caikosha maningi kudarika kuponeswa ko vandhu vashaisha. Zina la Jehovha lakasvipiswa. (Gen. 3:4, 5) Ngo kudalo, kuponeswa ko mubarihwana wa Adhamu na Evha kakabatana no shwiro huru yo kucenesa zina la Jehovha. Ngo ndava yokuti Jesu waiemerera zina la Jehovha uye waitora zina lake wakaita basa guru lo kucenesa zina la Jehovha.
Zvingaitisa kudini kuti mundhu abhuye kuti muteveri wo cokwadi wa Kristu asingazivi kana kushandisa zina la Baba vake?
8. Vese vanotenda muna Jesu vanodikana kutenda kuitenyi?
8 Vese vaizotenda muna Jesu vaJudha kana vo majinja amweni vaidikana kuziva kakavha ruponeso wavo kana kuti Baba va Jesu, Jehovha Mwari. (Johani 17:3) Kunja ka izvi, inga ndi Jesu ivona vaizozivikanwa ngo zina la Jehovha. Uye ivona vaidikana kuziva kukosha kokucenesa zina iri. Vaidikana kuita izvi kuti vaponeswe. (Mabasa 2:21, 22) Ngo kudalo, vateveri vese va Jesu vaidikana kujija ngo zva Jehovha uye no zva Jesu. Azvishamisi kuti Jesu wakapeja mukumbiro wake zvinowanika pana Johani citsauko 17 ngo masoko aya: ‘Ndakavazivisa zina renyu uye ndisarizivisazve, kuti rudo wamakandida ndiwona uve mukati mavo uye yeni ndakabatana navo.’—Johani 17:26.
“YEMWI MURI ZVAPUPU ZVANGU”
9. Tingakhombijisa kudini kuti zina la Jehovha rinokosha katiri?
9 Vateveri vese vo cokwadi va Jesu Kristu, vaidikana kuva no cido pakucenesa zina la Jehovha. (Mateu 6:9, 10) Vaidikana kureremeja zina la Jehovha kudarika amweni ese. Izvi zvinobatanija ciito kovari. Asi tingaitisa kudini kuti tive no divi pakucenesa zina la Jehovha kana kuti kuricenesa pamanyepo akakhandirwa ndi Sathana?
10. Ishwiro ipi yo dare lo kufananijira inobhuiwa pana Isaya 42-44? (Isaya 43:9; 44:7-9) (Wonanyi foto.)
10 Kukosha ko basa redu lo mukucenesa zina la Jehovha zvinowanika mu bhuku la Isaya citsauko 42-44. Zvitsauko izvi, zvinosanangura shwiro yo dare lo kufananijira umo masoko o uMwari ari kutonga. Jehovvha anokanda pa muejo vese vanozviti zvimwari kuti vakhombije kuti zvimwari kamare. Iyena unokumbira kuti pave no zvapupu kuti zviviye kookhombija zvinobhuiwa ngo zvimwari izvi. Asi apana anozvikona!—Verenganyi Isaya 43:9; 44:7-9.
Mu njira jakawanda, tinobatanijwa muswiro jo dare lo kufananijira (Wonanyi ndima 10-11)
11. Masoko api anobhuiwa ndi Jehovha ku vandhu vake maererano no zvinobhuiwa pana Isaya 43:10-12?
11 Verenganyi Isaya 43:10-12. Jehovha unoti ngo pamusolo po vandhu vake: ‘Yemwi muri Zvapupu zvangu, . . . uye yeni ndini Mwari wenyu.’ Jehovha unokumbira mudavire muvhunjho uwu: ‘Uriyo Mwari umweni unodarika yeni here?’ (Isa. 44:8) Ngo kudalo, tino mukana wo kudavira muvhunjo uwu. Ngozvatinobhuya uye zvatinoita tinokhombija kuti Jehovha ndi Mwari umwe basi wo cokwadi. Zina lake iguru kudarika amweni ese. Tinokhombija ngo maponero edu kuti tinoda Jehovha zvo cokwadi uye kuti takagondeka kaari kunyange no matambujiko anoviiswa ndi Sathana. Ngo kuita kudalo, tino mukana wo kucenesa zina lake.
12. Uporofita uri pana Isaya 40:3, 5 wakazajikisa kudini?
12 Kudai tikatsigira zina lake kana kuti nduma ya Jehovha tinonga tesitevejera Jesu Kristu. Isaya wabhuya kuti mutungamiriri umweni ‘waizojekesa (kana kuti ‘kunasirira’.) Gwanja la Jehovha.’ (Isa. 40:3) Izvi zvakazajikisa kudini? Johani mubhabhatiji wakanasirira gwanja la Jesu uwo wakaviya mu zina la Jehovha uye obhuya muzina la Jehovha. (Mateu 3:3; Mako 1:2-4; Ruka 3:3-6) Uporofita umwewo wakati: ‘Rukujo la Jehovha rinozowoneswa.’ (Isa. 40:5) Izvi zvakaitisa kudini? Jesu paakaviya panyika wakanasa kuemerera Jehovha zvakaita inga kuti Jehovha kamare ndiyena wakaviya panyika.—Johani 12:45.
13. Tingatevejeresa kudini Jesu?
13 Inga ndi Jesu, yesu tiri Zvapupu zva Jehovha. Tinotwara zina la Jehovha uye tinobhuira vese ngo pamusolo po mabasa ake anoshamisa. Ngo kudalo, kuti tikwanise kuita izvi tinodikana kuzivisa kukosha ko basa la Jesu no kucenesa zina la Jehovha. (Mabasa 1:8) Jesu Capupu co kutanga ca Jehovha uye yesu tinotevejera ndhungamiriro jake. (Zvak. 1:5) Asi zina la Jehovha rinoda kubhuyenyi kuna umwe nga umwe wedu?
ZINA LA JEHOVHA RINOBHUYENYI KATIRI
14. Inga zvakanyorwa pana Pisarema 105:3, tinolangarirenyi ngo zina la Jehovha?
14 Tinodada ngo zina la Jehovha. (Verenganyi Pisarema 105:3.) Jehovha unoda kuti tidade ngo zina lake. (Jer. 9:23, 24; 1 VaK. 1:31; 2 VaK. 10:17) “Kuzvikuja muna Jehovha”, kudada na Jehovha inga Mwari wedu. Tinozviwona inga makomorero kukuja zina lake uye kutsigira nduma yake. Atidikani kuva no nyowa kubhuira vatinoshanda navo, vatinojija navo, vocigarisano vedu uye na vese kuti tiri Zvapupu zva Jehovha! Dhiyabhu unoda kuti tieme kubhuya ngo pamusolo pa Jehovha kuno vamweni. (Jer. 11:21; Zvak. 12:17) Cokwadi, Sathana uye no vaporofita vake vo kunyepa vanoda kuti vandhu vakanganwe zina la Jehovha. (Jer. 23:26, 27) Asi rudo wedu ku zina la Jehovha unotiita kuti tilambe tesidakala “nguva yese.”—Ps. 5:11; 89:16.
15. Kudanija zina la Jehovha zvinobhuyenyi?
15 Tinolamba tesidanija zina la Jehovha. (Jow. 2:32; VaR. 10:13, 14) Kudanija zina la Jehovha azvibhuyi basi kuziva uye kushandisa zina la Mwari. Tinotanga kuziva Mwari inga mundhu, tinomuthemba, tinopsaka besero lake uye no ndhungamiriro. (Ps. 20:7; 99:6; 116:4; 145:18) Uye tinozivisawo zina lake no undhu wake ku vamweni tesivakurujira kukhauya uye kuita ciito kuti vatenderwe ndi Jehovha.—Isa. 12:4; Mabasa 2:21, 38.
16. Tingakhombijisa kudini kuti Sathana munyepi?
16 Takazvipira kutambujika ngo zina la Jehovha. (Jak. 5:10, 11) Patinolamba takagondeka kuna Jehovha kunyange tasibatana no matambujiko tinokhombija kuti Sathana munyepi. Mu mazuva a Jobho, Sathana wakapumbha vese vanonamata Jehovha esiti: ‘Mundhu unozopa zvese zvaanazvo kuitira kuponesa upenyu wake.’ (Job. 2:4) Sathana wakabhuya kuti vandhu vanozonamata Jehovha basi mu nguva jakanaka. Asi pavanozosangana no zvineso vanozosiya kunamata Jehovha. Jobho wakakhombija kuti kupumbwa uku ngo ko kunyepa. Mu kutojanawo, tino makomborero okukhombija kuti kunyange no matambujiko anoviiswa ndi Sathana atizosiyi kunamata Jehovha. Tingava no cokwadi cese kuti Jehovha unozotingwarira ngo ndava yo zina lake.—Johani 17:11.
17. Injira jipi jimweni jatingapa ndijona rukujo zina la Jehovha, inga zvinobhuiwa pana 1 Pedhru 2:12?
17 Tinoreremeja zina la Jehovha. (Zvi. 30:9; Jer. 7:8-11) Ngo ndava yokuti tinoemerera Jehovha uye zina lake, tingakwanisa kukuja zina lake kana kusvipisa. (Verenganyi 1 Pedhru 2:12.) Ngo kudalo, tinoda kuita zvese zvatinokona kuti tikuje Jehovha ngo zvatinobhuya no zvatinoita. Tikaita kudalo, tinozopa rukujo zina lake kunyange tino cishaishi.
18. Injira ipi imweni yatingakhombija ndiyona kuti zina la Jehovha rinokosha katiri? (Wonanyizve masoko opasi.)
18 Tinonasa kuneseka ngo zina la Jehovha kudarika undhu wedu kamare. (Ps. 138:2) Ngenyi izvi zvinokosha? Ngokuti kuda kedu zina la Jehovha, kungaremaja nduma yedu kuvaya vakatitendeneja.a Jesu wainga akazvipira kuva no rufu rinopseruja inga gandanga kuitira kukuja zina la Jehovha. Iyena wainga asina nyowa ngo kutama kuva anoneseka kana kunyanya kuneseka ngo zvailangarirwa ngo vamweni. (VaH. 12:2-4) Zvaaida kunyanya kuita, kainga kuda ka Mwari.—Mateu 26:39.
19. Munolangarirenyi ngozvo zina la Jehovha uye ngenyi?
19 Tinodada ngo zina la Jehovha tinozwa kuva no nduma kudanijwa kuti Zvapupu zva Jehovha. Ngo ndava yazvo, takazvipira kucungirira kunyange patinoshorwa, zina la Jehovha rinokosha kamare kudarika nduma yedu. Ngo kudalo, ngaticunge kuenderera mberi tesikuja zina la Jehovha. Kunyange zviro zvipi zvingaviiswa ndi Sathana katiri, tingaita izvi tinokhombija kuti zina la Jehovha rinokosha maningi katiri inga ndi Jesu Kristu.
NGOMA 10 Ngaakujwe Jehovha, Mwari Wedu!
a Kunyange mwanarume akagondeka Jobho, wakatendera kucengejwa apo paakaejwa ngo shamwari jake ndhatu. Pakutanga paakafirwa ngo vana vake uye kuruza zviro zvese, ‘Jobho aato kushaishira Mwari kana kupa ndava kuti ndiyena waitisa zvro zvakashata.’ (Job. 1:22; 2:10) Ngo kudalo, Jobho paakapumbwa kuita zviro zvakashata, iyena wakatangawo kuita mabhuyo asito ‘kulangarira.’ Iyena wakakoshesa kujivirira mbiri yake kusiripi kucenesa zina kana mbiri ya Mwari.—Job. 6:3; 13:4, 5; 32:2; 34:5.