Rudo ra Mwari Rinogara no Kusingaperi

1-2. Zvineso zvipi zviri kusangana no maKristu akawanda?

AMBORANGARIRANYI ngarava iri pakati po dutu rino simba. Magandjazi eirasira ngarava mudenga uye yeiviyazve pasi. Ngarava iyi, yaizoenda kese kunoenda maganjazi kudai yainga isina nanga. Nanga inoteramisa ngarava kuti isatorwa ngo dutu.

² Kudai imwimwi muri kusangana no zvineso, mungazvizwa inga ngarava iya iri kuthwarwa ngo maganjazi. Mazwiro enyu angatojana noongarava iyi inokhwijwa mudenga yeiviyazve pasi. Zuva rimweni imwimwi mungathemba rudo no besero ra Jehovha, asi zuva rimweni, imwimwi mungazvivhunjisa kuti iyena uri kuwona zvandiri kusangana nazvo. (Ps. 10:1; 13:1) Nguva jimweni shamwari yenyu ingamupa masoko anonyaraja uye imwimwi mozvizwa zviri nane ko cinguva. (Zvi. 17:17; 25:11) Asi imwimwi motangazve kukaya-kaya kuti Jehovha uri kumubesa here. Imwimwi mungatojivhunjisa kuti kubhuya kuti Jehovha wandisiya here. Zvicinyi zvamungaita kuti murambe makavanga pamunonga meisangana no zvineso? Ngo magama amweni, zvicinyi zvingamuita kuti muve no cokwadi cokuti Jehovha unomuda uye unomubesa?

3. ‘Rudo risingacinji,’ rinobhuiwa pana Pisarema 31:7 uye 136:1, rinoda kubhuyenyi? Ngenyi tingabhuya kuti Jehovha ndiyena muezaniso mukuru wo rudo iri risingacinji? (Wonanyi foto.)

³ Gwanja rimweni ringatibesa patinonga tesiejwa ngoro kurangarira rudo risingacinji ra Jehovha. (Verenganyi Pisarema 31:7; 136:1.) Soko rokuti “rudo risingacinji” rinoviisa murangariro wo ukama wakakura uye unogara mbhera nariini watinawo no mundhu umweni. Jehovha ndiyena muezaniso mukuru wo rudo risingacinji. Kubhuya cokwadi, Bhaibheri rinotsanangura inga kuti“ wakazara ngo rudo risingacinji.” (Eki. 34:6, 7) Bhaibheri rinobhuyawo ngo pamusoro pa Jehovha resiti: “Haiwa Jehovha rudo renyu rusingacinji kuno vese vanodainja kamuri rakakura.” (Ps. 86:5) Rangariranyi kuti izvi zvinoda kubhuyenyi, Jehovha aazosiiyi vanamati vake vakagondeka! Uye kuti Jehovha wakagondeka unokwanisa kumuvangisa pamunosangana no zvineso.—Ps. 23:4

RANGARIRANYI RUDO RA JEHOVHA INGA JIJISO YO BHAIBHERI INOKOSHA

4. Ipanyi muezaniso wo jijiso jinokosha jo Bhaibheri uye tsananguranyi kuti ngenyi tejitenda zvakavanga.

⁴ Gwanja rimweni ramungaita kuti muvangise ndirona pamunonga mesiejwa ngoro kurangarira rudo ra Jehova inga jijiso yo Bhaibheri inokosha. Masoko okuti “jijiso yo Bhaibheri inokosha” anoda kubhuyenyi kamuri? Nguva jimweni mungatorangarira cokwadi co makajija mu Soko ra Mwari. Inga muezaniso, imwimwi makajija kuti zina ra Mwari ndi Jehovha, uye kuti Jesu mwana wa Mwari wakabarwa ari ega, uye kuti kunozova no paradhiso pasi pano munozoraramira vandhu kuenda no kuenda. (Ps. 83:18; Mup. 9:5; Johani 3:16; Zvak. 21:3, 4) Imwimwi pamakatanga kuashira jijiso iji, azvito kuva zvakareruka kamuri kuti muzvitende. Ngenyi? Ngo kuti imwimwi makaziva kuti jijiso iji jakacijikira mu cokwadi. Ngatimbowona kuti kuwona rudo ra Jehovha inga jijiso yo Bhaibheri inokosha, kungamubesesa kudini kuti muvhise murangariro wokuti Jehovha aana basa no zvamuri kusangana nazvo.

5. Tsananguranyi kuti mundhu ungarambisa kudini jijiso jo kunyepa.

⁵ Imwimwi pamakatanga kujija Bhaibheri, zvicinyi zvakamubesa kuti murambe jijiso jo kunyepa? Nguva jimweni makaezanisa zvamakajijiswa ngo ceci yenyu no zvinojijiswa ngo Bhaibheri. Ngatimbobhuisana ngo muezaniso uwu: Ngatiti maimbotenda kuti Jesu ndi Mwari wo masimba ese. Asi pamakajija Bhaibheri, makazvivhunjisa kuti ‘kubhuya kuti jijiso iyi ngoyo cokwadi?’ Pasure po kuti mapsakisisa mu Bhaibheri imwimwi mungadavira kuti haiwa. Pasure pazvo makazofakeya jijiso jo kunyepa ngo cokwadi co Bhaibheri cokuti: Jesu ndiyena “dangwe ro zvisikwa zvese,” “Mwana wa Mwari wakabarwa ari ega.” (VaK. 1:15; Johani 3:18) Zvakajeka kuti jijiso jo kunyepa jinokwanisa “kucira muji kamare” uye zvinonesa kuti mujicinje. (2 VaK. 10:4, 5) Asi imwimwi pamakajija cokwadi, makatangazve kutenda jijiso jo kunyepa here?—VaF. 3:13.

6. Ngenyi imwimwi mungava no cokwadi cokuti “rudo risingacinji ra Jehovha rinogara no kusingaperi”?

⁶ Mungakwanisa kuitawo zvakatojana no zvinojijiswa ngo Bhaibheri ngo pamusoro po rudo ra Jehovha. Kudai mukasangana no muejo motanga kukaya-kaya kuti Jehovha unomuda, zvivhunjisenyi Kudai: ‘kubhuya kuti murangariro wangu wakanaka here?’ Ezanisanyi kukaya-kaya kenyu ngo pamusoro po rudo ra Jehovha no masoko anowanika pana Pisarema 136:1, vhesi yakacijikira cijijo cino. Ngenyi Jehovha wakafemera munyori wo Pisarema kuti anyore ngo pamusoro po rudo rake “risikacinji”? Ngenyi murangariro wokuti “rudo rake risingacinji rinogara mbhera nariini” rakaphindeiswa kunokwana ka 26 mubhuku ra Pisarema? Inga zvatapera kuwona, rudo risingacinji ra Jehovha kuno vandhu vake ijijiso yakakura inovha muBhaibheri, yakatojana no zvimweni zvamakaashira zviri mu soko ra Mwari. Murangariro wokuti Jehovha unomuwona inga musingakoshi kana kuti aamudi ngookunyepa. Rambanyi jijiso iji, inga zvamunoramba jijiso jo kunyepa!

7. Ipanyi muezaniso jimweni jo mavhesi o Bhaibheri anothembesa kuti Jehovha unomuda.

⁷ Bhaibheri rino ucapupu unokhombija kuti Jehovha unotida. Inga muezaniso, Jesu wakavhunja vajiji vake kuti: “Musathya, imwimwi munokosha maningi kupinda zvishiri zvakawanda.” (Mateu 10:31) Jehovha pacake wakavhunja vandhu kuti: “Ndinozokuvangisa, cokwadi ndinozokubesa, Ndinozoenderera mberi ndakakubata ngo nyara yangu yo murhyo yo ururami.” (Isa. 41:10) Wonanyi kuti izvi zvakajekesa kudini. ‘Jesu aato kubhuya kuti mungakosha maningi.’ Uye Jehovha aato kubhuya kuti ndingazomubesa.’ Kunja kazvonazvo ivona vakati: “Imwimwi munokosha maningi” uye “kuti ndinozomubesa.” Kudai muri kukaya-kaya kuti Jehovha unomuda, pamunosangana no zvineso vhesi iji jingamubesa kuti muzwe zviri nane, ivona vangamubesa kuti munase kuzwisisa. Mavhesi aya anobhuya cokwadi. Kurangarijisisa ngo pamusoro pazvo no kuita mukumbiro zvinotiita kuti tiphindeese masoko ari pana 1 Joh. 4:16 inoti: “Isusu takaziva kare rudo ra Mwari katiri uye totenda kuti Mwari unotida.”a

8. Zvicinyi zvamungaita kudai nguva jimweni muno kaya-kaya kuti Jehovha unomuda?

⁸ Zvicinyi zvamungaita kudai nguva jimweni musina cokwadi cokuti Jehovha unomuda? Ezanisanyi mazwiro enyu no zvamunoziva. Mazwiro enyu asipi o cokwadi asi rudo ra Jehovha inga zvatinojijiswa mu Bhaibheri ngoro cokwadi. Kudai tisingatendi kuti Jehovha unotida, tinonga tesiramba undhu wake unokosha maningi wokuti Mwari rudo.—1 Joh. 4:8.

RANGARIJISISANYI NGO PAMUSORO PO “RUDO RA JEHOVHA”

9-10. Masoko a Jesu okuti: “Baba pacavo vanomuda,” ari pana Johani 16:26, 27 anobhuyenyi? (Wonanyi foto.)

⁹ Tingajija zvakawanda ngo pamusoro po rudo ra Jehovha ngo kurangarijisisa masoko a Jesu aakavhunja vajiji vake okut: ‘Baba pacavo vanomuda.’ (Verenganyi Johani 16:26, 27.) Jesu aato kubhuya masoko aya kuti vajiji vake vazvizwe zvakanaka. Patinoverenga mavhesi anoviya pa mberi apa, tinojija kuti Jesu wainga asingabhuyi ngo mazwiro ovajiji vake. Kunja kaizvi, iyena waibhuya ngo shwiro yakasiyana yo mukumbiro.

¹⁰ Jesu wainga avha kuvhunja vajiji vake kuti vaidikana kuita mukumbiro ngo zina rake haiwa kaari. (Johani 16:23, 24) Zvaikosha maningi kavari kuziva izvi. Paakamuswa, zvingaita kuti vateveri vake vaida kuita mukumbiro kuna Jesu. Ivona vakazoziva kuti Jesu wainga shamwari yavo. Zvingaita kuti ivona vakarangarira kuti ngo kumuda maningi, iyena waida kuzwa zvicemo zvavo okumbira kuna baba kuti vavabese. Ngo kudaro, Jesu wakavavhunja kuti avasaidikana kurangarira kudaro. Ngenyi? Ngo kuti, iyena wakavavhunja kuti: “Baba pacavo vano rudo na imwimwi.” Izvi zvinoita divi ro jijiso huru yo Bhaibheri ngo pamusoro po mukumbiro. Wonanyi kuti izvi zvinoda kubhuyenyi kamuri: Ngo pamusoro po jijo yo Bhaibheri imwimwi makaguma pakuziva Jesu no kumuda. (Johani 14:21) Asi mukutojana no vajiji vo muzana ro kutanga ro makore, imwimwi mungaita mukumbiro kuna Mwari no kuthemba uye mesiziva kuti iyena kamare “unomuda.” Imwimwi mungakhombija kutenda kenyu masoko aya pese pamunoita mukumbiro kuna Jehovha.—1 Joh. 5:14.

WONANYI KUTI ICINYI CINOITA KUTI MUKAYE-KAYE

11. Ngenyi Sathana ungadakara kudai tikatanga kukaya-kaya ngo rudo ra Jehovha?

¹¹ Kukaya-kaya ngo pamusoro po rudo ra Jehovha kunovha kupi? Imwimwi mungadavira kuti izvi zvinovha kuna Sathana uye tino cokwadi ngo pamusoro pazvo. Dhiyabhu ‘uri kupsaka kutivhanvura’ uye iyena unodakara kudai tikakaya-kaya ngo pamusoro po rudo ra Jehovha. (1 Ped. 5:8) Kunyange zvakadaro, rudo rina Jehovha rakamuita kuti atipe muripo, zviro zvokuti Sathana waida kuti tizvizwe tisito kufaneya. (VaH. 2:9) Asi ndiyani unodakara kudai tikakaya-kaya kuti Jehovha unotida? Ndi Sathana. Uye ndiani unodakara kudai tikasiya kushandira Jehovha? Ndi Sathanazve basi. Rangariranyi ngo kutieja kunoita Sathana kuti tikaye-kaye kuti Jehovha unotida zvakadini. Sathana ndiyena wakaruza rudo ra Jehovha. Ngo kudaro, Sathana ‘unoticengeja’ kuti tiwone inga kuti Jehovha aatidi uye unotiramba. (VaE. 6:11) Kudai tikawona zviri kuejwa kuitwa ngo muvengi wedu, tinokwanisa kuvangisa kucunga kedu pa ‘kurwisana na dhiyabhu’.—Jak. 4:7.

12-13. Kuitisa kudini cishaishi catakagara utaka cingatiita kuti tikaye-kaye ngo rudo ra Jehovha?

¹² Kukaya-kaya ngo pamusoro pokuti Jehovha unotida kungaviya ngo mativi akasiyana-siyana. Kuitisa kudini? Ngo kuti takagara utaka wo cishaishi. (Ps. 51:5; VaR. 5:12) Cishaishi cakaparajanisa vandhu no musiki wavo. Uye cakavaremaja murangariro, mazwire avo uye no muwiri wavo.

¹³ Cishaishi cakaita kuti tive no mazwiro okutama kugajana, zvesiita kuti tizvizwe teizvipa ndava, kuneseka mu mwoyo, kutama kungwaririka, uye kupseruka. Tinonasa kuva no mazwiro aya patinonga tashaisha. Asi mazwiro aya, angaviyazve ngo kuti tinozviziva kuti tiri vashaishi, ari mazwiro asingaenderani no masikirwe atakaizwa ndi Mwari. (VaR. 8:20, 21) Mukutojana no movha inovhiri rakabooka aikwanisi kushanda zvakanaka, isusuwo inga vandhu vano cishaishi atikwanisi kushanda ngo njira yatakasikwa ndiyona. Ngo kudaro, azvishamisi kuti nguva jimweni tingakaya-kaya ngo pamusoro po rudo ra Jehovha. Kudai izvi zvikaitika, tinodikana kurangarira kuti Jehovha ‘ndi Mwari mukuru uye unoshamaisa, esikhombijira rudo risingacinji kuvaya vanomuda uye vanocengeta mupango jake’.—Nee. 1:5.

14. Kuitisa kudini kurangarira ngo muripo, kungatibesa kuti titame kukaya-kaya ngo pamusoro po rudo ra Jehovha? (VaRoma 5:8) (Wonanyi bhokiso rakazwi “Ngwariranyi ‘Simba ro Zvishaishi Rinocengeja.’”)

¹⁴ Zvakajeka kuti, nguva jimweni tingarangarira kuti atifanei rudo ra Jehovha. Tisingakhoni-khoni pakubhuya, atito kufaneiwa ngo rudo ra Jehovha uye izvi ngo zvinoita kuti rikoshe katiri. Atiwani rudo ra Jehovha ngo kuda kedu. Kunyange zvakadaro, muripo wakafukija zvishaishi zvedu uye Jehovha wakaita nasiriro iyi ngokuti unotida. (1 Joh. 4:10) Rangariranyizve kuti Jesu wakaviya kuzoponesa vashaishi haiwa vasina cishaishi. (Verenganyi VaRoma 5:8.) Akuna na umwe wedu ungaita zviro ngo gwanja rakaperera uye Jehovha aaemeri kuti tiite izvi ngokuti unozviziva kuti tino cishaishi. Kudai tikazwisisa kuti cishaishi cingatiita kuti tikaye-kaye ngo pamusoro po rudo ra Jehovha, tinodikana kusunga kurwisana no murangariro wonawo.—VaR. 7:24, 25.

RAMBA WAKAGONDEKA

15-16. Kudai tikaramba takagodeka kuna Jehovha, tingava no cokwadi cenyi uye ngenyi? (2 Samueri 22:26)

¹⁵ Jehovha unoda kuti tiite cikhetwa cakanaka co ‘kumuzwira’. (Dhe. 30:19, 20) Kudai tikadaro, tinova no cokwadi cokuti iyena unozorambawo akagondeka katiri. (Verengenyi 2 Samueri 22:26.) Kudai tikaramba takagondeka kuna Jehovha, tingaemera kuti iyena ungatibesa pa zviri zvese zvinonga zvabuda mu upenyu wedu.

¹⁶ Inga zvatajija, tino cikonzero cakanaka co kuramba takagondeka patinosangana no muejo. Tinozviziva kuti Jehovha unotida uye unozotibesa. Izvi ngo zvinojijiswa ngo Bhaibheri. Kudai zuva rimweni tikakaya-kaya ngo pamusoro po rudo rake, tingarangarira zviya zvatinoziva kuti icokwadi haiwa zvatinofungijira kuti zvingaita cokwadi. Ngatirambe tesithemba cokwadi co Bhaibheri cokuti rudo risingacinji ra Jehovha, rinozogara nokusingaperi.