Jehovha ‘Ungatibesa Kuti Tive no Mudakaro wo Cokwadi’

1-2. (a) Vandhu vakawanda vari kusangana no mugariro upi mazuva ano? (b) Zvicinyi zvatinozowona mu cijijo cino?

VANDHU vakawanda mazuva ano vanobatikana pakupsaka mudakaro. Kunyange zvakadaro, avaripi kuuwana mudakaro wo cokwadi. Vandhu vakawanda vakasuruvara maningi, vanorangarira kuti mugariro wavo auzocinji. Vanamati vamweni va Jehovha nguva jimweni vanozvizwawo kudaro. Ngokuti tiri kurarama ‘mumazuva okupejisira,’ tinoemera kusangana no mugariro wo zviro unonesa ‘kucungirira.’—2 Tim. 3:1.

² Mucijijo cino, tinozowona kuti zvicinyi zvingatitorera mudakaro wedu uye kuti tingaitisa kudini kuti tivezve no mudakaro watinonga taruza. Asi tinodikana kutanga kuziva kuti mudakaro wo cokwadi unovha kupi.

KUNOVHA MUDAKARO WO COKWADI

3. Zvisikwa zvinotijijisenyi ngo pamusoro pa Jehovha? (Wonanyi foto.)

³ Jehovha nguva jese wakadakara. Uye iyena unoda kuti tigare takadakarawo. Ngo kudaro, azvitishamisi kuti tinowana mudakaro kuvha pa zviro zvaakasika, nyika yedu yakanaka, zviro zvakasiyana-siyana zvakaseja zvakatitendeneja, kutamba kunoita zvinyama uye zvokurhya zvakawanda zvinonaka. Mwari unotida maningi uye unoda kuti tidakare mu upenyu!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Zvicinyi zvinoita kuti Jehovha arambe akadakara kunyange no matambujiko ari munyika? (b) Cipo cipi citakapuwa ndi Jehovha? (Pisarema 16:11)

⁴ Kunyange kuti Jehovha ndi “Mwari wakadakara,” unonasa kuziva kuwajiwa no kutambujika kuri mu nyika ino. (1 Tim. 1:11) Asi iyena aato kusiya kuti mudakaro wake upunguke. Jehovha unozviziva kuti kutambujika ngo konguva doko, iyena unoriziva zuva raanoda kuzokupeja. Uye uri kusengerera mbhera zuva rokuzopeja kusuruvara no kutambujika zvacose. Kunyange zvakadaro, Jehovha uri kuwona zvatiri kusangana nazvo uye unoda kutibesa. Asi iyena ungatibesesa kudini? Ngo njira imweni iyena unotipa mudakaro. (Verenganyi Pisarema 16:11.) Wonanyi kuti kuziva Jehovha kakaitisa kudini kuti Jesu adakare.

5-6. Ngenyi Jesu wakadakara?

⁵ Pa zvisikwa zvese zva Jehovha, Jesu ndiyena wakadakara maningi. Ngenyi? Ngatimbowona zvikonzero zviviri. (1) ‘Iyena mufanananijo waMwari asingaoneki’ uye anokhombija undhu wakakwana wa baba vake muzviro zvese. (VaK. 1:15; wonanyi masoko okujija “mudakaro” pana 1 Tim. 6:15.) (2) Jesu wakapeja nguva yakareba na baba vake, cinyuke co mudakaro wo cokwadi.

⁶ Jesu waigara akadakara ngo kuti waaita zvese zvaidiwa ndi baba vake nguva jese. (Zvi. 8:30, 31; Johani 8:29) Ngo muviyo wokugondeka kake, iyena wakaguma pa kudakarirwa ndi Jehovha.—Mateu 3:17.

7. Tingawanisa kudini mudakaro wo cokwadi?

⁷ Isusuwo tingawana mudakaro wo cokwadi kudai tikavangisa ushamwari wedu na Jehovha cinyuke co mudakaro. Kudai tikapeja nguva yedu tesijija ngo pamusoro pa Jehovha uye nokutevejera zvaanoda tinova no mudakaro. Tinozowanawo mudakaro ngo kuita kuda ka Mwari uye nokuziva kuti tinodakarirwa ndiyena.a (Ps. 33:12) Asi, tingaitenyi kudai tikazvizwa tisina mudakaro ko nguva doko kana kuti ko nguva yakareba? Izvi zvinobhuya kuti Mwari aatidi Here? Haiwa! Tiri vandhu vano cishaishi uye nguva jimweni tinotambujika ngo kuwaja, kusuruvara uye kuneseka mu mwoyo. Jehovha unozwisisa izvi. (Ps. 103:14) Ngatiwone kuti zvicinyi zvingatora mudakaro wedu uye kuti tingauwanisazve kudini.

MUSATENDERA KUTI ZVIRI ZVESE ZVIMUTORERE MUDAKARO WENYU

8. Kuitisa kudini zvineso zvo upenyu zvingatipsasa?

⁸ Ciro co kutanga: Zvineso zvo muupenyu. Imwimwi muri kubatana no zvineso zvo kutevererwa, ngozi jinoitika jega, urombo, ndhendha, kana kucembera here? Zvakareruka kuruza mudakaro patinobatana no zvineso izvi, maningi-ningi zvatisingakoni kujivirira kuti zvisaitika. Bhaibheri rinotsanangura zvakajeka kuti ‘mundhu anogara akanyangajwa, zvonazvo zvinomurembesa.’ (Zvi. 15:13) Babis, mukuru wakafirwa ngo hama yake no vabereki vake mukati mo makore marongomuna ivona vakati: “Inini ndaizvizwa ndiri ndega uye ndisiripi ciro. Nguva jimweni, ndaineseka maningi ngokuti ndainga no zviro zvakawanda zvokuita, ngo kudaro ndainga ndisingakwanisi kupeja nguva yakareba no vabereki uye no munukuna wangu vasati vatamika.” Zvineso zvo upenyu zvinokwanisa kutirembesa muwiri uye mu murangariro.

9. Zvicinyi zvingatibesa kuti tivezve no mudakaro wedu? (Jeremiya 29:4-7, 10)

⁹ Cicinyi cingatibesa kuti tivezve no mudakaro? Tingavazve no mudakaro wedu ngo kuva no kutenda uye kubonga. Nyika inokurujira murangariro wokuti upenyu wedu unodikana kuva wakakwana kuti tidakare. Asi izvi asipi zvo cokwadi. Inga muezaniso, Jehovha wakavhunja vaJudha vainga vatorwa kuuranda kuBhabhironi kuti vaashire upenyu upsa inga varanda kunyika jimweni uye kuti vaite zvese zvavaikona mumugariro wese wainesa. (Verenganyi Jeremiya 29:4-7, 10.) Ngazvipi zvatinojijawo? Ejanyi kutendera mugariro wo zviro wamunawo uye bonganyi ngo zviro zvamunazvo zvakanaka mu upenyu wenyu. Rangariranyi kuti Jehovha aazomusiyi muri mega iyena unozomubesa. (Ps. 63:7; 146:5) Inga muezaniso, Effie, wakaremara pa asidheti unobonga Jehovha ngo besero rake, iyena nazvino aakoni kuhamba asi iyena wakati: “Jehovha no mbhuri yangu uye no hama no hanzvaji jo mu ungano vakandibesa uye no kundivangisa. Ndinoda kukhombijira kuti ndinobonga Jehovha uye no shamwari ngo kundibesa kovakandiita. Ngo kudaro, ndiri kuita zvese zvandinokona kuti ndive ndakadakara.”

10. Ngenyi tingava no mudakaro kunyange teisongana no zvineso?

¹⁰ Kunyange tesisangana no matambujiko kana kuti zviro zvakashata zvikaitika katiri kana kumbhuri yedu, tingakwanisa kuramba tino mudakaro.b (Ps. 126:5) Ngenyi? Ngo kuti mudakaro wedu aufiri basi pa mugariro wedu wo zviro. Maria uri kushanda inga piyona, wakati: “Pamunosangana no zvineso moramba muno mudakaro azvibhuyi kuti amuripi kuwajiwa. Kunja ka izvi, zvinobhuya kuti imwimwi amuto kukanganwa zvigondiso zva Jehovha. Baba vedu vanotibesa kungwarira mudakaro wedu.” Rangariranyi kuti kunyange mugariro wenyu wo zviro wesimunesa zvino, azvizogari zvakadaro no kusingaperi. Ngo kukasika Jehovha unozovhisa zvese zvinoviisa matambujiko uye kusuruvara.

11. Kuitisa kudini muezaniso wo mupostori Pauro ungativangisa?

¹¹ Taizoitenyi kudai tesineseka kuti tiri kutambujika ngo ndava yo kurangarira kuti Jehovha aatikomboreri kana kuti aatidi? Zvingatibesa maningi, ngozvo kurangarira ngo vashandiri va Jehovha vainga vakagondeka vakasangana no mugariro wo zviro wainesa. Ngatimbowona muezaniso wo mupostori Pauro. Iyena wakakhetwa ndi Jesu kuti atore cokwadi kuti “aenda naco ku majinja, majimambo no ku vana vo vaIziraeri.” (Mabasa 9:15) Makomborero akadini! Ngo kudaro upenyu wa Pauro wainga usiri no matambujiko akawanda. (2 VaK. 11:23-27) Kubhuya kuti zvineso zvaiita inga zvisingaperi zvaisangana na Pauro, zvinobhuya kuti iyena wainga asingadiwi ndi Jehovha here? Zvakajeka kuti haiwa! Pano kudaro, kushingirira kake kaikhombija kuti waikomborerwa ndi Jehovha. (VaR. 5:3-5) Zvino rangariranyi mugariro wenyu wo zviro. Imwimwi muri kucungirira makagondeka pasinenyi no muejo jese jamuri kusangana najo. Ngo kudaro, imwimwiwo mungava no cokwadi cokuti munodiwa ndi Jehovha.

12. Cicinyi cingaitika kudai zvatinoda kuita pakushandira Jehovha zvingatama kukwanirisika ngo njira yataida?

¹² Ciro co cipiri: Zviro zvatiri kuemera zvikanonoka. (Zvi. 13:12) Rudo redu no kubonga Jehovha kunotindundira kuti tive no zvinangwa mubasa rake. Ngo kudaro, cinangwa cedu cikatama kubudirira ngo mugariro wedu wo zviro zvingatiita kuti tisuruvare. (Zvi. 17:22) Piyona umweni unozwi Holly wakati: “Inini ndaida kuenda kucikora co vapariji voUmambo, kooshandira kunyika imweni kana kuti kooshanda pakuvaka kuRamapo. Asi mugariro wangu wo zviro wakacinja, uye ndainga ndisingakwanisi kuzajisa cinangwa cangu. Zvaindiwaja mu mwoyo. Zvinosuruvarisa kudai mesida kuita zvakawanda asi amuripi kuzvikwanisa.” Vashandiri va Jehovha vakawanda, vanovawo no mazwire onawo pavanokorera kuita zvavaida mubasa ra Jehovha.

13. Kudai mugariro wedu wo zviro usingatitenderi kuti tiite zvatinonga tesida, ngazvipi zvatinodikana kuita?

¹³ Zvicinyi zvingatibesa kuti tivezve no mudakaro wedu? Rangariranyi kuti Jehovha aatikumbiri kuti tiite zvatisingakoni. Iyena aaemeri zvakawanda katiri uye aatikoshesi ngo zviro zvatinokwanisa kuita mubasa rake. Jehovha unoda kuti tive vandhu vakarongeka no vakagondeka. (Mika 6:8; 1 VaK. 4:2) Iyena unoneseka maningi ngo zvatiri ngo mukati haiwa ngo zviro zvatinoita. Zvingaita here kuti tiemere kukwanisa kuita zvakawanda kudarika zvinosotererwa ndi Jehovha?c Icokwadi kuti haiwa! Ngo kudaro, kudai mugariro wenyu wo zviro usingamutenderi kuita zvakawanda mubasa ra Jehovha, ejanyi kukanda murangariro wenyu pa zviro zvamunokona. Inga muezaniso, imwimwi mungakwanisa kujijisa majaha kana hama no hanzvaji vaavasharuka here? Munokwanisa here kukurujirira mundhu umweni pacenyu, ngo kuita zvo kufona kana kuita zvo kutumira mesajhi? Jehovha unozomukomborera ngo mudakaro pamunonga mesivangisira kuzajisa zvinangwa zvenyu! Uye rangariranyi kuti ngo kukasika maningi, tinozova no mukana munyika ipsa ya Jehovha kuti timushandire ngo njira yatainga tisingarangariri! Inga ndi Holly, wambobhuyiwa pa ndima yapera wakapejisa esiti: “Ndinogara pasi ndo rangarira mumwoyo mangu kuti, ‘ndino upenyu usingaperi.’ Ngo besero ra Jehovha ndingazozajisa zvinangwa zvangu mu nyika ipsa.”

14. Zvicinyizve zvingatitorera mudakaro wedu?

¹⁴ Ciro co citatu: Kudai isusu tinothemba mare kana zviro zvimweni zvatinazvo kuti tidakare. Vamweni vanoshandisa redhi social kuti vamusijire murangariro wo kuti mudakaro wo cokwadi unovha pakudakajirwa isusu kamare. Tingatanga kutendera kuti kudai tikaita zviro zvatinoda, kutenga zvatinoda kana kuvhakacira ndau jakasiya-siyana zvinoita kuti tive no mudakaro wo cokwadi. Azvito kushata kuita zviro zvatinoda. Jehovha unoda kuti tidakajwe ngo zviro zvakanaka zvaakasika. Ngo kudaro, vakawanda vakaeja kuita zviro zvavaifunga kuti zvaizoviisa mudakaro, ngo kuhamba konguva vakazowona kuti zvainga zvisingaviisi mudakaro. Piyona umweni anozwi Eva, wakati: “Kudai upenyu wenyu usiita kuti mudakare pacenyu, apana camunonga mesiita.” Kudai tikaeja kuzvidakaja nguva jese pa cedu, izvi zvinozoita kuti tisuruvare uye tizvizwe tisina simba.

15. Zvijijo zvipi zvatingawana kuvha kuna Mambo Soromoni?

¹⁵ Tingajija ngo muezaniso wa Mambo Soromoni ngo muviyo waakava nawo ngo kuthemba kaakaita mare. Iyena wakaeja zviro zvakawanda zvakasiyana-siyana kuti aone zvaizomudakaja, inga muezaniso, wakaeja zvokurhya zvakanaka uye kuyaeya ngoma jinodakaja, kutenga zviro zvinodhura. Asi zviro izvi azvito kumuita kuti adakare. Iyena wakati: “Jiso ariguti ngo zvarinowona; nee njeve aiguti ngo zvainozwa.” (Mup. 1:8; 2:1-11) Vandhu vamweni vanorangarira kuti kudai tino mare uye teiita zvese zvatinoda tingava no mudakaro. Asi izvi ngo zvokunyepa; zviro izvi azvitiiti kuti tive no mudakaro wo cokwadi.

16. Kupa kungatibesesa kudini kuti tiwanezve mudakaro wedu? (Wonanyi foto.)

¹⁶ Zvicinyi zvingatibesa kuti tivezve no mudakaro wedu? Jesu wakatijijisa kuti ‘kupa kunoviisa mudakaro mukuru kudarika kuashira.’ (Mabasa 20:35) Mukuru umweni unozwi Alekos wakati: “Inini ndinoeja kuita zviro zvidoko kuti ndibese vamweni. Pandinobesa vamweni, andigari ndeirangarira zvandinoda basi uye ndinova ndakadakara.” Zvicinyi zvamungaitira vamweni? Kudai imwimwi mukawona umweni esirwisana no zvineso, ejanyi kumuvangisa. Nguva jimweni amuripi kukwanisa kupeja zvineso zvake, asi mungamunyaraja ngo kunasa kumuyaeya, uye kuzwa mazwire ake uye momueujira kuti akande mutwaro wake kuna Jehovha. (Ps. 55:22; 68:19) Imwimwiwo mungamubesa kuziva kuti Jehovha aazombomusiyi. (Ps. 37:28; Isa. 59:1) Imwimwi mungamuitirawo zviro zvinokosha, inga muezaniso mungamubikira zvokurhya kana kuenda mese koopasiyari. Imwimwi mungaronga kuenda naye kooparijira. Kuvhunjawo vamweni masoko akanaka nguva jese zvinomusiya ano mudakaro. Tenderanyi kushandiswa ndi Jehovha kuti muvangise vamweni. Kudai tikapeja nguva yedu tesibesa vamweni, tinozova no mudakaro wo cokwadi!—Zvi. 11:25.

17. Kuitisa kudini mudakaro wedu wakabatana na Jehovha? (Pisarema 43:4)

¹⁷ Tingava no mudakaro kudai tikaenderera mberi tesivangisa ushamwari wedu na Baba vedu vo kudenga, Jehovha. Bhaibheri rinotithembesa kuti Jehovha ndiyena ‘unotiita kuti tidakare.’ (Verenganyi Pisarema 43:4.) Ngo kudaro, azvinenyi no zvatiri kusangana nazvo mu upenyu, tingazvizwa takangwaririka. Kudai Jehovha ari shamwari yedu yo phedo, ngo kudaro iyena unozotibesa kuti tive no mudakaro usingaperi!—Ps. 144:15.