दोस्रो इतिहास
२ सुलेमानले यहोवा परमेश्वरको नामको निम्ति एउटा भवन+ अनि आफ्नो निम्ति एउटा राजमहल बनाउने आदेश दिए।+ २ तिनले ७० हजार मजदुरलाई भारी बोक्ने काममा र ८० हजार मानिसलाई पहाडमा ढुङ्गा काट्ने काममा लगाए।+ उनीहरूको कामको निगरानी गर्न तिनले ३ हजार ६ सय जना निरीक्षक पनि नियुक्त गरे।+ ३ साथै तिनले टायरका राजा हिरामलाई+ यस्तो खबर पठाए: “मेरा बुबा दाउदले राजमहल बनाउनुहुँदा तपाईँले उहाँलाई देवदारका काठहरू पठाइदिनुभएको थियो। त्यसैगरि मलाई पनि देवदारका काठहरू पठाइदिनुहोस्।+ ४ म मेरा परमेश्वर यहोवाको नामको निम्ति एउटा भवन बनाउँदै छु। त्यो भवन परमेश्वरको निम्ति पवित्र पारिनेछ। त्यहाँ उहाँसामु सुगन्धित धूप चढाइनेछ,+ नियमित रूपमा भेटीको रोटी* राखिनेछ+ अनि हरेक बिहान र बेलुकी,+ विश्रामदिनमा,*+ औँसीमा+ र यहोवा परमेश्वरको निम्ति चाडहरू+ मनाइँदा अग्निभेटी चढाइनेछ। यो इस्राएलीहरूले सधैँ पूरा गर्नुपर्ने कर्तव्य हो। ५ मैले बनाउन लागेको त्यो भवन भव्य हुनेछ। किनकि हाम्रा परमेश्वर अरू सबै देवताभन्दा महान् हुनुहुन्छ। ६ तर भन्ने नै हो भने, कसले पो उहाँको निम्ति भवन बनाउन सक्छ र? किनकि आकाश, हो, विशाल आकाश पनि उहाँको लागि सानो छ।+ त्यसैले उहाँको निम्ति भवन बनाउने म को हुँ र? म त यस्तो एउटा ठाउँ मात्र बनाउँदै छु, जहाँ परमेश्वरसामु माथिसम्म धुवाँ उठ्नेगरि बलि चढाउन सकियोस्। ७ त्यसैले सुन, चाँदी, तामा,+ फलाम, बैजनी ऊन, गाढा रातो र निलो धागोको काम गर्न अनि बुट्टा कुँद्न निपुण एक जना शिल्पकार मकहाँ पठाइदिनुहोस्। तिनले यहुदा र यरुसलेममा मेरा निपुण शिल्पकारहरूसँगै काम गर्नेछन्, जुन शिल्पकारहरूको प्रबन्ध मेरा बुबा दाउदले मिलाउनुभएको थियो।+ ८ अनि लेबनानबाट देवदार, धुपी+ र चन्दनका काठहरू+ पनि पठाइदिनुहोस्। किनकि मलाई थाह छ, तपाईँका सेवकहरू लेबनानका रूखहरू+ काट्न अनुभवी छन्। मेरा सेवकहरूले पनि तपाईँका सेवकहरूसँगै काम गर्नेछन्+ ९ र मेरो लागि प्रशस्त मात्रामा काठ ल्याउनेछन् किनकि म जुन भवन बनाउँदै छु, त्यो निकै भव्य हुनेछ। १० म तपाईँका सेवकहरू—रूख काट्ने कामदारहरूको लागि खानेकुराको प्रबन्ध गरिदिनेछु।+ म तिनीहरूको निम्ति २० हजार कोर* गहुँ, २० हजार कोर जौ, २० हजार बाथ* मद्य र २० हजार बाथ तेल दिनेछु।”
११ तब टायरका राजा हिरामले सुलेमानलाई यस्तो पत्र लेखेर पठाए: “यहोवा परमेश्वर आफ्नो प्रजालाई प्रेम गर्नुहुन्छ, त्यसैले उहाँले तपाईँलाई उनीहरूको राजा बनाउनुभएको छ।” १२ हिरामले पत्रमा यस्तो पनि लेखेका थिए: “स्वर्ग र पृथ्वी बनाउनुहुने इस्राएलका परमेश्वर यहोवाको प्रशंसा होस्। किनकि उहाँले राजा दाउदलाई एक जना बुद्धिमान्, विवेकी र समझदार छोरा दिनुभएको छ,+ जसले यहोवा परमेश्वरको निम्ति एउटा भवन र आफ्नो निम्ति एउटा राजमहल बनाउन लागेका छन्। १३ म तपाईँकहाँ शिल्पकार हिराम-अबिलाई+ पठाउँदै छु। तिनी समझदार र निपुण छन्। १४ तिनकी आमा दानको कुलकी हुन् तर तिनका बुबाचाहिँ टायरका हुन्। तिनी सुन, चाँदी, तामा, फलाम, ढुङ्गा, काठ, बैजनी ऊन, निलो धागो, उच्च कोटीको मलमल र गाढा रातो धागोको काम गर्न अनुभवी छन्।+ तिनी जुनसुकै किसिमको बुट्टा कुँद्न सक्छन्।+ तिनले तपाईँका निपुण शिल्पकारहरूसित र तपाईँका बुबा, मेरा प्रभु दाउदका निपुण शिल्पकारहरूसित मिलेर काम गर्नेछन्। १५ अब हे मेरा प्रभु! तपाईँले वाचा गर्नुभएअनुसारै तपाईँका सेवकहरूको लागि गहुँ, जौ, तेल र मद्य पठाइदिनुहोस्।+ १६ तपाईँलाई चाहिएजति रूख हामी लेबनानमा+ काट्नेछौँ अनि ती काठहरू बाँधेर समुद्रमा तैराउँदै त्यसलाई जोप्पासम्म+ ल्याउनेछौँ। अनि तपाईँले ती काठहरू त्यहाँबाट यरुसलेम लैजानुहोला।”+
१७ त्यसपछि सुलेमानले आफ्ना बुबा दाउदले जस्तै+ इस्राएलका इलाकाहरूमा बसोबास गरिरहेका विदेशीहरूको गन्ती गरे।+ उनीहरू जम्मा १ लाख ५३ हजार ६ सय जना थिए। १८ तिनले उनीहरूमध्ये ७० हजारलाई भारी बोक्न र ८० हजारलाई पहाडमा ढुङ्गा काट्न लगाए।+ अनि उनीहरूलाई काममा लगाउन ३ हजार ६ सय जना निरीक्षक खटाए।+