यर्मिया
५० कल्दियालीहरूको देश बेबिलोनबारे भविष्यवक्ता यर्मियामार्फत आएको यहोवाको वचन:+
२ “राष्ट्रहरूमाझ यसको घोषणा गर र यो सन्देश सुनाऊ।
झन्डा ठड्याएर यसको घोषणा गर।
केही नलुकाई सबै सुनाऊ।
यसो भन, ‘बेबिलोनलाई कब्जा गरिएको छ।+
मरोदक त्रसित भएको छ।
बेबिलोनका मूर्तिहरू लाजमा पारिएका छन्।
त्यसका घिनलाग्दा मूर्तिहरू* डरले थरथर काँपेका छन्।’
३ किनकि उत्तरको एउटा देश त्यसविरुद्ध आएको छ।+
देख्नेहरूसमेत डरले थरथर काँप्नेगरि त्यसले बेबिलोनलाई नाश गरिदिएको छ।
त्यहाँ कोही पनि बस्दैन।
मानिस र पशुपक्षी सबै त्यहाँबाट भागेका छन्।
तिनीहरू त्यो ठाउँ छोडेर गए।”
४ यहोवा यस्तो घोषणा गर्नुहुन्छ, “ती दिनहरूमा इस्राएल र यहुदाका मानिसहरू सँगसँगै आउनेछन्।+ तिनीहरू रुँदै हिँड्नेछन्+ र एकसाथ यहोवा आफ्ना परमेश्वरको खोजी गर्नेछन्।+ ५ तिनीहरूले आफ्नो अनुहार सियोनतिर फर्काउँदै त्यहाँ जाने बाटो खोज्नेछन्+ र यसो भन्नेछन्, ‘आऊ, हामी यहोवासित कहिल्यै नटुट्ने एउटा करार बाँधौँ, जुन कहिल्यै बिर्सिइनेछैन।’+ ६ मेरा मानिसहरू हराएका भेडाहरूझैँ भएका छन्।+ तिनीहरूकै गोठालाहरूले गर्दा तिनीहरू हराएका हुन्।+ ती गोठालाहरूले तिनीहरूलाई डाँडाकाँडामा लगे र तिनीहरू ती डाँडाहरूमा भौँतारिए। तिनीहरूले आफ्नो बस्ने ठाउँलाई बिर्से। ७ तिनीहरूलाई भेट्नेहरूजति सबैले तिनीहरूलाई निलेका छन्।+ तिनीहरूका शत्रुहरूले यसो भनेका छन्: ‘यसमा हाम्रो केही दोष छैन किनकि तिनीहरूले यहोवाविरुद्ध पाप गरे। तिनीहरूका पितापुर्खाले भरोसा गरेका परमेश्वर यहोवा, जो धार्मिकताको स्रोत* हुनुहुन्छ, उहाँविरुद्ध तिनीहरूले पाप गरे।’”
८ “बेबिलोनबाट भाग,
कल्दियालीहरूको देशबाट निस्किहाल।+
अनि बगालका अघिअघि हिँड्ने बोका र थुमाझैँ बन।
९ किनकि म उत्तरका ठूलठूला देशहरूलाई
बेबिलोनविरुद्ध सुऱ्याएर ल्याउनेछु।+
तिनीहरू बेबिलोनसित युद्ध गर्न दल बाँधेर आउनेछन्
अनि त्यसलाई कब्जा गर्नेछन्।
तिनीहरूका काँड योद्धाका काँडहरू हुन्।
ती काँडहरूले गर्दा आमाबुबाले छोराछोरीको वियोग सहनुपर्नेछ।+
तिनीहरूका काँडहरू कहिल्यै चुक्दैनन्।
१० कल्दियालीहरूको देश लुटिनेछ।+
त्यसलाई लुट्नेहरू सन्तुष्ट हुनेछन्,”+ यहोवा घोषणा गर्नुहुन्छ।
११ “किनकि तिमीहरूले मेरो उत्तराधिकार खोस्यौ+
अनि तिमीहरू अत्यन्तै रमायौ,+ अत्यन्तै खुसी भयौ।
कोरलीझैँ* तिमीहरू घाँसमाथि बुर्लुक-बुर्लुक उफ्रियौ
र घोडाझैँ हिनहिनायौ।
१२ तिमीहरूकी आमा लाजमा पारिएकी छे,+
तिमीहरूलाई जन्माउने त्यो स्त्री निराश भएकी छे।
राष्ट्रहरूमध्ये त्यो सबैभन्दा तुच्छ भएकी छे,
निर्जल र बन्जर भएकी छे।+
१३ यहोवा त्यससित क्रोधित हुनुभएकोले त्यसको कहिल्यै आबादी हुनेछैन।+
त्यो उजाड हुनेछे।+
बेबिलोन भएर जानेजति सबै त्यसमाथि आइपरेका विपत्तिहरू देखेर
डरले खङ्ग्रङ्ग हुनेछन् र तिनीहरूले खिसी गर्दै सिटी बजाउनेछन्।+
१४ ए धनुर्धारीहरू हो,
दल बाँधेर आओ र बेबिलोनलाई चारैतिरबाट घेर,
एउटै काँड बाँकी नरहनेगरि त्यसलाई आक्रमण गर।+
किनकि त्यसले यहोवाविरुद्ध पाप गरेकी छे।+
१५ त्यसविरुद्ध चारैतिरबाट युद्धको घोषणा गर।
त्यसले आत्मसमर्पण गरेकी छे।
त्यसका किल्लाहरू ढलेका छन्, त्यसका पर्खालहरू भत्केका छन्।+
किनकि यहोवा स्वयम्ले त्यससित बदला लिनुभएको छ।+
तिमीहरू त्यससित बदला लेओ।
त्यसले जसो गरेकी थिई, त्यसलाई पनि त्यसै गर।+
१६ बिउ छर्नेलाई र बाली काट्ने बेला हँसिया चलाउनेलाई
बेबिलोनबाट नामेट पारिदेऊ।+
भयानक तरबारले गर्दा प्रत्येक व्यक्ति आफ्ना मानिसहरूकहाँ फर्कनेछ,
आ-आफ्नो ठाउँमा भागेर जानेछ।+
१७ “इस्राएलका मानिसहरू तितरबितर भएका भेडाहरूजस्तै छन्।+ सिंहहरूले तिनीहरूलाई यत्रतत्र पारिदिएका छन्।+ सुरुमा अस्सेरियाका राजाले तिनीहरूलाई कप्लक्कै निले;+ त्यसपछि बेबिलोनका राजा नबुकद्नेजरले* तिनीहरूको हाडखोर चपाए।+ १८ त्यसैले सेनाहरूका यहोवा, इस्राएलका परमेश्वर यसो भन्नुहुन्छ: ‘मैले अस्सेरियाका राजासित जस्तो व्यवहार गरेको थिएँ,+ बेबिलोनका राजा र तिनको देशसित पनि त्यस्तै व्यवहार गर्नेछु। १९ म इस्राएललाई उसको खर्कमा फर्काएर ल्याउनेछु।+ ऊ कर्मेल र बासानमा+ चर्नेछ अनि एप्रैमका+ र गिलादका पहाडहरूमा+ चरेर तृप्त हुनेछ।’”
२० यहोवा घोषणा गर्नुहुन्छ, “ती दिनहरूमा
इस्राएलको दोष के छ भनेर खोजिनेछ
तर एउटै फेला पर्नेछैन।
यहुदाको पाप पनि फेला पर्नेछैन।
किनकि मैले बाँकी राखेकाहरू सबैलाई म क्षमा दिनेछु।”+
२१ “मेराथैमविरुद्ध र पेकोदका बासिन्दाहरूविरुद्ध जाइलाग।+
तिनीहरू सबैलाई मार, तिनीहरूको सर्वनाश गरिदेऊ,” यहोवा घोषणा गर्नुहुन्छ।
“मैले तिमीहरूलाई जे-जे आज्ञा दिएँ, ती सबै गर।
२२ त्यहाँ युद्धको कोलाहल सुनिएको छ;
विध्वंस मच्चिएको छ।
२३ सारा पृथ्वीलाई धुलोपिठो पार्ने त्यो घनलाई टुक्राटुक्रा पारिएको छ।+
बेबिलोनको हालत देखेर त्यसवरपरका देशहरू डरले थरथर काँपेका छन्।+
२४ ए बेबिलोन, मैले तेरो अगाडि पासो थापेँ र तँ त्यसमा परिस्।
आफू पासोमा परेको तैँले चालै पाइनस्।
तँ फेला परिस्, तँ पक्राउ परिस्।+
किनकि तैँले यहोवालाई हाँक दिइस्।
२५ यहोवाले आफ्नो सिलखाना* खोल्नुभएको छ
र आफ्नो रिस पोख्ने हतियारहरू निकाल्नुभएको छ।+
किनकि ब्रह्माण्डका मालिक, सेनाहरूका यहोवाले
कल्दियालीहरूको देशमा आफ्नो काम फत्ते गर्नुपर्ने भएको छ।
२६ टाढा-टाढादेखि त्यसको विरुद्धमा आओ।+
त्यसका भकारीहरू फोर।+
अन्नको थुप्रो लगाएझैँ त्यसलाई थुप्रो लगाऊ।
कोही पनि बाँकी नरहनेगरि
त्यसको सर्वनाश गरिदेऊ।+
२७ त्यसका सबै बहरलाई काट!+
तिनीहरू सबै मारिऊन्!
धिक्कार छ तिनीहरूलाई! किनकि तिनीहरू नाश हुने दिन आएको छ।
तिनीहरूको लेखा लिने दिन आएको छ।
२८ बेबिलोनबाट उम्केकाहरूको आवाज सुनिएको छ,
त्यहाँबाट भागेकाहरूको आवाज सुनिएको छ।
यहोवा परमेश्वरले आफ्नो मन्दिरको लागि बदला लिनुभयो+
भन्ने सन्देश घोषणा गर्न तिनीहरू सियोनमा जाँदै छन्।
२९ बेबिलोनलाई आक्रमण गर्न धनुर्धारीहरूलाई बोलाओ,
धनुमा ताँदो चढाउने सबैलाई बोलाओ।+
बेबिलोनको वरिपरि छाउनी हाल र एक जनालाई पनि उम्कन नदेओ।
त्यसको कुकर्मको सजाय त्यसलाई देओ।+
त्यसले जसो गरेको थियो, त्यसलाई त्यसै गर+
किनकि त्यो अहङ्कारी हुँदै यहोवाविरुद्ध,
इस्राएलका पवित्र परमेश्वरविरुद्ध खडा भयो।+
३० किनकि त्यो दिन त्यसका चोकहरूमा नौजवानहरू मारिनेछन्+
र त्यसका सबै योद्धा नाश हुनेछन्,”* यहोवा घोषणा गर्नुहुन्छ।
३१ ब्रह्माण्डका मालिक, सेनाहरूका यहोवा यस्तो घोषणा गर्नुहुन्छ, “ए हठी बेबिलोन,+ म तँविरुद्ध खडा भएको छु,+
तेरो लेखा लिने समय अनि मैले तेरो लागि तोकेको दिन निश्चय नै आउनेछ।
३२ ए हठी बेबिलोन, तँ ठेस खाएर लड्नेछस्।
तँलाई उठाउने कोही हुनेछैन।+
म तेरा सहरहरूमा आगो लगाइदिनेछु।
त्यसले तेरो वरिपरि भएका सबै कुरालाई खरानी बनाइदिनेछ।”
३३ सेनाहरूका यहोवा यसो भन्नुहुन्छ:
“इस्राएल र यहुदाका मानिसहरू थिचोमिचोमा परेका छन्।
तिनीहरूलाई बन्दी बनाउनेहरूले तिनीहरूलाई जानै दिएनन्,+
तिनीहरूलाई फुकाउन पटक्कै मानेनन्।+
३४ तर तिनीहरूलाई मोल तिरेर छुटाउनुहुने शक्तिशाली हुनुहुन्छ।+
उहाँको नाम सेनाहरूका यहोवा हो।+
उहाँले अवश्यै तिनीहरूको पक्षमा मुद्दा लड्नुहुनेछ+
र तिनीहरूको देशले विश्राम पाउनेछ।+
तर बेबिलोनका बासिन्दाहरू भने बेचैन हुनेछन्।”+
३५ यहोवा घोषणा गर्नुहुन्छ, “कल्दियालीहरूलाई काट्न तरबार आउँदै छ।
बेबिलोनका बासिन्दाहरू, त्यसका शासकहरू र त्यसका बुद्धिमान् मानिसहरूलाई काट्न तरबार आउँदै छ।+
३६ फोस्रा कुरा गर्नेहरूलाई* काट्न तरबार आउँदै छ, त्यो देखेर तिनीहरू बौलाहा हुनेछन्।
बेबिलोनका योद्धाहरूलाई काट्न तरबार आउँदै छ, त्यो देखेर तिनीहरू त्रसित हुनेछन्।+
३७ तिनीहरूका घोडाहरू र रथहरूलाई
र बेबिलोनमा बस्ने विभिन्न देशका मानिसहरूलाई नाश गर्न तरबार आउँदै छ।
तिनीहरू स्त्रीहरूजस्तै हुनेछन्।+
त्यो तरबारले गर्दा बेबिलोनको धनसम्पत्ति सबै लुटिनेछ।+
३८ त्यसका खोलानालामाथि विपत्ति आइपर्नेछ, ती सबै सुक्नेछन्+
किनकि त्यो कुँदिएका मूर्तिहरूले भरिएको देश हो।+
अनि डरलाग्दा दर्शनहरू* देखेकोले त्यसका बासिन्दाहरू बौलाहाझैँ व्यवहार गरिरहन्छन्।
३९ त्यहाँ मरुभूमिका जन्तुहरू हु-हु गर्दै कराउने जन्तुहरूसित बास गर्नेछन्।
त्यो फेरि कहिल्यै आबाद हुनेछैन।
पुस्तौँपुस्तासम्म त्यहाँ कोही बस्नेछैन।”+
४० “परमेश्वरले सदोम र गमोरा+ अनि त्यसवरपरका सहरहरूलाई नाश गर्नुहुँदा+ तिनीहरूको हालत जस्तो भएको थियो, त्यसको हालत पनि त्यस्तै हुनेछ,” यहोवा घोषणा गर्नुहुन्छ, “त्यो निर्जन हुनेछ; कोही पनि त्यहाँ बसोबास गर्नेछैन।+
४१ हेर! उत्तरबाट एउटा जाति आउँदै छ।
पृथ्वीको सबैभन्दा पल्लो छेउबाट+
एउटा ठूलो देश र महान् शासकहरू खडा हुनेछन्।+
४२ तिनीहरू धनु र भाला बोक्छन्।+
तिनीहरू क्रूर छन्, तिनीहरूले पटक्कै दया देखाउनेछैनन्।+
तिनीहरू आफ्नो घोडामा सवार हुँदा
समुद्र उर्लिएर आएझैँ सुनिन्छ।+
ए बेबिलोनकी छोरी, तिनीहरू दल बाँधेर एउटै मानिसजस्तै गरी तँमाथि आइलाग्नेछन्।+
४३ तिनीहरू आउँदै गरेको खबर सुनेर+
बेबिलोनका राजाको हात लल्याकलुलुक भएको छ।+
उसलाई चिन्ता-फिक्रीले छोपेको छ।
बेथा लागेकी स्त्रीलाई जस्तै उसलाई छटपटी भएको छ।
४४ “हेर! जसरी यर्दनको बाक्लो झाडीबाट सिंह निस्कन्छ, त्यसरी नै कोही आउनेछ र बेबिलोनका सुरक्षित चरनहरूलाई आक्रमण गर्नेछ। एक पलमै म तिनीहरूलाई* त्यहाँबाट खेद्नेछु। अनि म त्यसमाथि आफूले चुनेको जनलाई खटाउनेछु।+ किनकि मजस्तो को छ र? मलाई कसले हाँक दिन सक्छ? कुनचाहिँ गोठालो मसामु खडा हुन सक्छ?+ ४५ त्यसैले ए मानिसहरू हो! यहोवाले बेबिलोनलाई र कल्दियालीहरूको देशलाई के गर्ने निर्णय गर्नुभएको छ, सुन:+
बगालका साना पाठाहरूलाई घिसारेर लगिनेछ।
यिनीहरूको वासस्थानलाई उहाँले तिनीहरूको कारण उजाड पारिदिनुहुनेछ।+
४६ बेबिलोनलाई कब्जा गरिएको आवाज सुनेर पृथ्वी काँप्नेछ।
त्यसको क्रन्दन राष्ट्रहरूमाझ गुञ्जनेछ।”+