व्यवस्था
२९ यहोवा परमेश्वरले मोआब देशमा इस्राएलीहरूसित करार गर्नुभयो। उहाँले इस्राएलीहरूसित करार गर्नुहुँदा मोसालाई आज्ञा गर्नुभएका कुराहरू यी नै हुन्। उहाँले यसअघि होरेब डाँडामा पनि इस्राएलीहरूसित करार गर्नुभएको थियो।+
२ मोसाले सबै इस्राएलीलाई बोलाएर भने: “यहोवा परमेश्वरले मिश्रमा फारोलाई, तिनका सेवकहरूलाई अनि तिनको सारा देशलाई के-के गर्नुभयो, त्यो तिमीहरूले आफ्नै आँखाले देख्यौ।+ ३ उहाँले तिनीहरूलाई कस्ता कडा सजायहरू दिनुभयो,* कस्ता चिन्हहरू देखाउनुभयो र कस्ता चमत्कारहरू गर्नुभयो, त्यो तिमीहरूले देख्यौ।+ ४ तर यहोवा परमेश्वरले तिमीहरूलाई आजसम्म पनि बुझ्ने हृदय, देख्ने आँखा र सुन्ने कान दिनुभएको छैन।+ ५ उहाँले यसो भन्नुभएको थियो, ‘मैले ४० वर्षसम्म तिमीहरूलाई निर्जनभूमिमा डोऱ्याएँ।+ त्यसबेला तिमीहरूका लुगा र जुत्ता फाटेनन्।+ ६ तिमीहरूले रोटी खान पाएनौ, दाखमद्य* वा अन्य कुनै किसिमको रक्सी पिउन पाएनौ। तैपनि मैले तिमीहरूको हेरविचार गरेँ ताकि तिमीहरूले म नै तिमीहरूका परमेश्वर यहोवा हुँ भनी बुझ्न सक।’ ७ जब हामी यात्रा गर्दै यस ठाउँमा आइपुग्यौँ, तब हेस्बोनका राजा सिहोन+ र बासानका राजा ओग+ हामीसित लडाइँ गर्न आए तर हामीले तिनीहरूलाई हरायौँ।+ ८ हामीले तिनीहरूको देश कब्जा गऱ्यौँ अनि रुबेन र गादको कुललाई अनि मनस्सेको आधा कुललाई त्यो देश पैतृक सम्पत्तिको रूपमा दियौँ।+ ९ त्यसैले तिमीहरू यस करारका एक-एक कुरामा ध्यान देओ र ती पालन गर। यसो गऱ्यौ भने तिमीहरू सबै काममा सफल हुनेछौ।+
१० “आज तिमीहरू सबै यहोवा परमेश्वरसामु उपस्थित भएका छौ। कुलका मुखियाहरू, नाइकेहरू, अफिसरहरू, इस्राएलका सबै पुरुष, ११ बालबच्चा, पत्नीहरू+ र तिमीहरूका छाउनीमा बस्ने विदेशीहरू+ अनि दाउरा बटुल्नेदेखि पानी बोकेर ल्याउनेहरूसम्म सबै उपस्थित भएका छौ। १२ तिमीहरू यहाँ यहोवा तिमीहरूका परमेश्वरसित एउटै करारमा बाँधिन उपस्थित भएका छौ। आज यहोवा तिमीहरूका परमेश्वरले शपथ खाएर तिमीहरूसित करार गर्दै हुनुहुन्छ।+ १३ तिमीहरूसँग प्रतिज्ञा गरेझैँ र तिमीहरूका पुर्खा अब्राहाम,+ इसहाक+ र याकुबसँग+ शपथ खाएझैँ तिमीहरूलाई आफ्नो जन बनाउन र तिमीहरूका परमेश्वर हुन+ उहाँले तिमीहरूसित यो करार गर्दै हुनुहुन्छ।+
१४ “मैले शपथ खाएर यो करार तिमीहरूसित मात्र गर्न लागेको होइनँ। १५ तर यहाँ यहोवा हाम्रा परमेश्वरसामु भएकाहरूसित र आज यहाँ नभएकाहरूसित पनि करार गर्दै छु। १६ (मिश्र देशमा हामीले कस्तो जीवन बितायौँ र विभिन्न जातिको इलाका हुँदै हामी कसरी यहाँसम्म आइपुग्यौँ, त्यो तिमीहरूलाई राम्ररी थाह छ।+ १७ तिनीहरूका घृणित कुराहरू अनि काठ, ढुङ्गा र सुनचाँदीका घिनलाग्दा मूर्तिहरू* तिमीहरूले देखेका थियौ।)+ १८ होसियार रहो! तिमीहरूमध्ये कोही पुरुष वा स्त्री, कुनै परिवार वा कुलले यहोवा परमेश्वरबाट टाढा भएर अरू राष्ट्रका देवताहरूलाई नपुजोस्।+ त्यस्तो व्यक्ति विषालु फल र तीतेपाती उमार्ने जराजस्तै हुन्छ।+
१९ “कसैले यस शपथका कुराहरू सुनेपछि ‘म आफूलाई जे मन लाग्छ त्यही गर्छु, मलाई केही हुँदैन’ भनी मनमनै घमन्ड गरेर आफूसँगसँगै अरू सबैलाई पनि विनाशतर्फ लैजान्छ भने २० यहोवा परमेश्वरले उसलाई क्षमा गर्नुहुनेछैन।+ बरु ऊमाथि यहोवाको भयानक क्रोध दन्कनेछ र यस पुस्तकमा लेखिएका सबै सराप ऊमाथि आइपर्नेछ।+ अनि यहोवाले उसको नाम पृथ्वीबाट मेटाइदिनुहुनेछ। २१ यहोवा परमेश्वरले उसलाई इस्राएलका सबै कुलबाट अलग्गै छुट्ट्याउनुहुनेछ र करार तोड्नेहरूमाथि जे-जस्तो सराप आइपर्नेछ भनी व्यवस्थाको यस पुस्तकमा बताइएको छ, ती सबै ऊमाथि आइपर्नेछ।
२२ “यहोवा परमेश्वरले तिमीहरूको देशमा ल्याउनुहुने विपत्तिहरू तिमीहरूका भावी सन्तान र टाढा-टाढाबाट आउने विदेशीहरूले देख्नेछन्। २३ उहाँले गन्धक, नुन र आगो बर्साएर पूरै देशलाई नाश गर्नुहुनेछ। त्यहाँको जमिन खनजोत गर्नै नमिल्ने हुनेछ र त्यहाँ घाँससमेत उम्रनेछैन। पूरै देश सदोम र गमोरा अनि अदमाह र जेबोयिमजस्तै हुनेछ,+ जसमाथि यहोवा परमेश्वरले आफ्नो क्रोध दन्काएर तिनीहरूलाई नाश गर्नुभएको थियो। २४ यो देखेपछि तिमीहरूका सन्तान, विदेशीहरू र सबै जातिले यस्तो प्रश्न सोध्नेछन्, ‘यहोवा परमेश्वरले यस देशको हालत किन यस्तो बनाउनुभयो?+ यस देशमाथि उहाँको यस्तो भयानक क्रोध किन दन्कियो?’ २५ तब मानिसहरूले भन्नेछन्, ‘तिनीहरूलाई मिश्रबाट छुटाएर ल्याउँदा तिनीहरूका पुर्खाका परमेश्वर यहोवाले गर्नुभएको करार तिनीहरूले तोडेकोले यस्तो भएको हो।+ २६ तिनीहरूले अरू देवताहरूलाई पुजे र ढोगे; ती देवताहरूलाई तिनीहरू चिन्दैनथे र परमेश्वरले ती देवताहरूलाई पुज्न निषेध गर्नुभएको थियो।+ २७ तब यस पुस्तकमा लेखिएका सबै सराप यस देशमाथि खनियो; यसरी यहोवा परमेश्वरको क्रोध दन्कियो।+ २८ त्यसैले डरलाग्दो रिस र ठूलो क्रोधका साथ यहोवा परमेश्वरले तिनीहरूलाई आफ्नो देशबाट उखेलेर अर्को देशमा हुर्ऱ्याइदिनुभयो,+ जहाँ तिनीहरू आजसम्म पनि बसोबास गर्दै छन्।’+
२९ “हाम्रा परमेश्वर यहोवालाई सबै गोप्य कुरा थाह छ+ तर प्रकट गरिएका कुराहरू उहाँले सदाको निम्ति हामीलाई र हाम्रा सन्तानलाई सुम्पनुभएको छ ताकि यस व्यवस्थामा भएका सबै कुरा हामीले पालन गर्न सकौँ।+