व्यवस्था

२७ त्यसपछि मोसाले इस्राएलका नाइकेहरूसित मिलेर मानिसहरूलाई यसो भने: “आज मैले तिमीहरूलाई दिएका सबै आज्ञा पालन गर। २ यर्दन नदी पार गरेर यहोवा तिमीहरूका परमेश्‍वरले दिनुहुने देशमा पुगेको दिन तिमीहरूले त्यहाँ ठूलठूला ढुङ्‌गा ठड्‌याउनू र त्यसमा चुन पोत्नू।+ ३ अनि ती ढुङ्‌गाहरूमा यस व्यवस्थाका सबै कुरा एक-एक गरी लेख्नू। त्यसैले जब तिमीहरू यहोवा परमेश्‍वरले दिन लाग्नुभएको देश, हो, यहोवा तिमीहरूका पितापुर्खाका परमेश्‍वरले प्रतिज्ञा गर्नुभएझैँ दूध र मह बग्ने देशमा पुग्नेछौ, तब तिमीहरूले ती ठूलठूला ढुङ्‌गाहरूमा व्यवस्थाका सबै कुरा लेख्न नबिर्सनू।+ ४ यर्दन नदी पार गरेपछि मैले आज तिमीहरूलाई भनेझैँ तिमीहरूले ती ढुङ्‌गाहरू एबाल डाँडामा ठड्‌याउनू+ र त्यसमा चून पोत्नू। ५ त्यहाँ तिमीहरूले यहोवा परमेश्‍वरको लागि ढुङ्‌गाको एउटा वेदी पनि बनाउनू। त्यो वेदी बनाउँदा फलामको कुनै औजार नचलाउनू।+ ६ तिमीहरूले नफुटाइएको वा नकाटिएको सग्ला ढुङ्‌गाहरू प्रयोग गरेर यहोवा परमेश्‍वरको लागि वेदी बनाउनू। त्यहाँ यहोवा तिमीहरूका परमेश्‍वरको लागि अग्निभेटी चढाउनू। ७ तिमीहरूले मेलबलि* चढाउनू+ र त्यसलाई त्यहीँ खानू।+ अनि यहोवा तिमीहरूका परमेश्‍वरसामु खुसीयाली मनाउनू।+ ८ तिमीहरूले ठड्‌याएका ती ढुङ्‌गाहरूमा यस व्यवस्थाका सबै कुरा प्रस्टसँग लेख्नू।”+

९ तब मोसा र सबै लेवी पुजारीले सबै इस्राएलीलाई यसो भने: “हे इस्राएली हो, शान्त होओ र सुन। आजको दिन तिमीहरू आफ्ना परमेश्‍वर यहोवाका जन भयौ।+ १० तिमीहरूले यहोवा तिमीहरूका परमेश्‍वरको कुरा सुन्‍नुपर्छ र मैले आज तिमीहरूलाई दिएको उहाँका आज्ञा अनि नीतिनियम पालन गर्नुपर्छ।”+

११ त्यो दिन मोसाले मानिसहरूलाई यस्तो आदेश दिए: १२ “जब तिमीहरू यर्दन नदी पार गर्छौ, तब मानिसहरूलाई आशिष्‌ दिन सिमियोन, लेवि, यहुदा, इस्साकार, युसुफ र बिन्यामिनको कुलका मानिसहरू गिरिज्जिम डाँडामा उभिऊन्‌।+ १३ अनि सरापको घोषणा गर्न चाहिँ रुबेन, गाद, असेर, जबुलुन, दान र नप्तालिको कुलका मानिसहरू एबाल डाँडामा उभिऊन्‌।+ १४ त्यसपछि लेवीहरूले सबै इस्राएलीलाई ठूलो स्वरमा यसो भनून्‌:+

१५ “‘कुँदेर वा धातु पगालेर मूर्ति बनाउने र त्यसलाई लुकाएर राख्ने मानिस श्रापित होस्‌।+ किनभने कालिगडले* बनाएका यस्ता कुरालाई यहोवा परमेश्‍वर घृणा गर्नुहुन्छ।’+ (तब सबैले ‘आमिन!’* भनून्‌।)

१६ “‘आफ्नो बुबा वा आमालाई तुच्छ व्यवहार गर्ने मानिस श्रापित होस्‌।’+ (तब सबैले ‘आमिन!’ भनून्‌।)

१७ “‘आफ्नो छिमेकीको साँध-सिमाना मिच्ने मानिस श्रापित होस्‌।’+ (तब सबैले ‘आमिन!’ भनून्‌।)

१८ “‘अन्धालाई उल्टो बाटोतिर पठाइदिने मानिस श्रापित होस्‌।’+ (तब सबैले ‘आमिन!’ भनून्‌।)

१९ “‘नियम बङ्‌ग्याएर विदेशी, अनाथ* वा विधवालाई अन्याय गर्ने मानिस श्रापित होस्‌।’+ (तब सबैले ‘आमिन!’ भनून्‌।)

२० “‘आफ्नो बुबाकी पत्नीसित यौनसम्बन्ध राख्ने मानिस श्रापित होस्‌। किनभने यसो गर्नु बुबाको घोर अपमान गर्नु हो।’+ (तब सबैले ‘आमिन!’ भनून्‌।)

२१ “‘पशुसित सम्भोग गर्ने मानिस श्रापित होस्‌।’+ (तब सबैले ‘आमिन!’ भनून्‌।)

२२ “‘आफ्नो साक्खै दिदी वा बहिनीसित अथवा झड्‌केली दिदी वा बहिनीसित यौनसम्बन्ध राख्ने मानिस श्रापित होस्‌।’+ (तब सबैले ‘आमिन!’ भनून्‌।)

२३ “‘आफ्नी सासूसित यौनसम्बन्ध राख्ने मानिस श्रापित होस्‌।’+ (तब सबैले ‘आमिन!’ भनून्‌।)

२४ “‘ढुकिबसेर आफ्नो छिमेकीलाई मार्ने मानिस श्रापित होस्‌।’+ (तब सबैले ‘आमिन!’ भनून्‌।)

२५ “‘पैसा लिएर निर्दोष व्यक्‍तिको हत्या गर्ने मानिस श्रापित होस्‌।’+ (तब सबैले ‘आमिन!’ भनून्‌।)

२६ “‘यस व्यवस्थामा भएका कुराहरू पालन नगर्ने मानिस श्रापित होस्‌।’+ (तब सबैले ‘आमिन!’ भनून्‌।)