यर्मिया
२३ यहोवा परमेश्वर यस्तो घोषणा गर्नुहुन्छ, “मेरो खर्कका भेडाहरूलाई नाश गरिरहेका र तितरबितर पारिरहेका गोठालाहरूलाई धिक्कार छ!”+
२ त्यसैले इस्राएलका परमेश्वर यहोवा आफ्ना मानिसहरूलाई डोऱ्याइरहेका गोठालाहरूलाई यसो भन्नुहुन्छ: “तिमीहरूले मेरा भेडाहरूलाई तितरबितर पारेका छौ; तिनीहरूलाई छरपस्ट पारेका छौ। अनि तिनीहरूको पटक्कै वास्ता गरेका छैनौ।”+
“त्यसैले तिमीहरूका दुष्ट कामहरूको लागि म तिमीहरूलाई सजाय दिनेछु,” यहोवा घोषणा गर्नुहुन्छ।
३ “त्यसपछि म बाँकी रहेका आफ्ना भेडाहरूलाई फर्काएर ल्याउनेछु। तिनीहरूलाई जहाँ-जहाँ तितरबितर पारेको थिएँ, ती सबै ठाउँबाट फर्काएर ल्याउनेछु।+ म तिनीहरूलाई तिनीहरूको खर्कमा फर्काउनेछु।+ त्यसपछि तिनीहरू फल्नेछन्-फुल्नेछन् र सङ्ख्यामा बढ्दै जानेछन्।+ ४ अनि तिनीहरूको साँच्चै ख्याल राख्ने गोठालाहरू म तिनीहरूमाथि नियुक्त गर्नेछु।+ त्यसपछि तिनीहरू कुनै कुरादेखि डराउनुपर्ने वा त्रसित हुनुपर्नेछैन। तिनीहरूमध्ये एउटै हराउनेछैन,” यहोवा घोषणा गर्नुहुन्छ।
५ यहोवा यस्तो घोषणा गर्नुहुन्छ, “हेर! यस्ता दिनहरू आउँदै छन्, जब म दाउदको घरानाबाट एक जना धर्मी उत्तराधिकारी* खडा गर्नेछु।+ तिनले राजाको रूपमा शासन गर्नेछन्।+ तिनले समझ चलाउँदै राज्य गर्नेछन्, देशमा न्याय कायम गर्नेछन् र धार्मिकतालाई* प्रोत्साहन दिनेछन्।+ ६ तिनको शासनकालमा यहुदालाई जोगाइनेछ+ र इस्राएल सुरक्षित रहनेछ।+ अनि तिनलाई यस नामले पुकारिनेछ: हाम्रो धार्मिकताको स्रोत यहोवा हुनुहुन्छ।”+
७ यहोवा यस्तो घोषणा गर्नुहुन्छ, “यस्तो समय आउँदै छ, जब तिनीहरूले ‘इस्राएलीहरूलाई मिश्रबाट छुटाएर ल्याउनुहुने यहोवाको कसम’ भन्नेछैनन्।+ ८ बरु तिनीहरूले ‘इस्राएलीहरूलाई उत्तरबाट अनि तिनीहरूलाई तितरबितर पारेका अरू सबै देशबाट फर्काइ ल्याएर जम्मा गर्नुहुने यहोवाको कसम’ भन्नेछन्। अनि तिनीहरू आफ्नै देशमा बसोबास गर्नेछन्।”+
९ भविष्यवक्ताहरूका लागि सन्देश:
मेरो हृदय छियाछिया भएको छ।
मेरा हड्डीहरू थरथर काँपिरहेका छन्।
यहोवाको पवित्र वचन सुनेर
म मात लागेको मानिसजस्तै भएको छु,
मद्यले टिल्ल परेको मानिसजस्तै।
१० किनकि व्यभिचार* गर्नेहरूले देश भरिएको छ।+
श्राप आइपरेकोले देश बिलौना गर्दै छ।+
निर्जनभूमिका खर्कहरू सुकेका छन्।+
तिनीहरूको चाल दुष्ट छ र तिनीहरू आफ्नो शक्तिको दुरुपयोग गर्छन्।
११ यहोवा यस्तो घोषणा गर्नुहुन्छ, “भविष्यवक्ताहरू र पुजारीहरू सबै भ्रष्ट भएका छन्।*+
तिनीहरूले मेरै भवनमा दुष्ट काम गरेको मैले देखेको छु।+
१२ त्यसैले तिनीहरूको बाटो चिप्लो र अँध्यारो हुनेछ।+
तिनीहरू धकेलिनेछन् र लड्नेछन्
किनकि तिनीहरूको लेखा लिने बेलामा
म तिनीहरूमाथि विपत्ति ल्याउनेछु,” यहोवा घोषणा गर्नुहुन्छ।
१३ “मैले सामरियाका+ भविष्यवक्ताहरूमा एउटा घिनलाग्दो कुरा देखेको छु।
तिनीहरू बाआलको नाममा भविष्यवाणी गर्छन्
र इस्राएलका मेरा मानिसहरूलाई बराल्छन्।
१४ अनि यरुसलेमका भविष्यवक्ताहरूमा मैले साह्रै खराब कुरा देखेको छु।
तिनीहरू व्यभिचार गर्छन्+ र सधैँ झूट बोल्छन्;+
कुकर्मीहरूलाई हौसला दिन्छन्
अनि दुष्ट काम गर्न कहिल्यै छोड्दैनन्।
मेरो नजरमा तिनीहरू सबै सदोमका मानिसहरूजस्तै+
र यरुसलेमका बासिन्दाहरूचाहिँ गमोराका मानिसहरूजस्तै छन्।”+
१५ त्यसैले ती भविष्यवक्ताहरूबारे सेनाहरूका यहोवा यसो भन्नुहुन्छ:
“तिनीहरूलाई म तीतेपाती चपाउन लगाउनेछु
र विषालु पानी पिउन लगाउनेछु+
किनकि यरुसलेमका भविष्यवक्ताहरूले गर्दा देशका सबै मानिसले मलाई त्यागेका छन्।”
१६ सेनाहरूका यहोवा यसो भन्नुहुन्छ:
“तिमीहरूलाई भविष्यवाणी सुनाउने भविष्यवक्ताहरूको कुरा नसुन।+
तिनीहरूले तिमीहरूलाई छक्याइरहेका छन्।*
तिनीहरूले सुनाउने दर्शन* यहोवाको तर्फबाट आएको होइन;+
त्यो त तिनीहरूको आफ्नै मनगढन्ते कुरा हो।+
१७ मेरो अनादर गर्नेहरूलाई तिनीहरू बारम्बार यसो भन्छन्,
‘यहोवा यसो भन्नुहुन्छ: “तिमीहरू सधैँ शान्तिमा रहनेछौ।”’+
अनि आफ्नै हठी हृदयको कुरा सुन्ने सबैलाई तिनीहरू यसो भन्छन्,
‘तिमीहरूमाथि कुनै विपत्ति आइपर्नेछैन।’+
१८ किनकि यहोवाको वचन सुन्न र बुझ्न
उहाँका घनिष्ठ साथीहरूमाझ को खडा भएको छ?
उहाँको वचन सुन्नलाई कसले आफ्नो कान थापेको छ?
१९ हेर! यहोवाको आँधी चल्नेछ, उहाँको क्रोध भयानक आँधीबेहरीझैँ चल्नेछ;
भयङ्कर तुफानझैँ त्यो शत्रुहरूको टाउकोमा बजारिनेछ!+
२० आफूले मनमा ठानेको कुरा पूरा नगरेसम्म
यहोवाको रिस मर्नेछैन।
आखिरी समयमा तिमीहरूले यो कुरा छर्लङ्गै बुझ्नेछौ।
२१ मैले ती भविष्यवक्ताहरूलाई पठाएकै थिइनँ तैपनि तिनीहरू दगुरेर गए।
म तिनीहरूसित बोलेकै थिइनँ तैपनि तिनीहरूले भविष्यवाणी गरे।+
२२ तर तिनीहरू मेरा घनिष्ठ साथीहरूमाझ खडा भएका भए
तिनीहरूले मेरा मानिसहरूलाई मेरो वचन सुनाउने थिए;
उनीहरूलाई गलत बाटो त्यागेर आउन र दुष्ट काम छोड्न मदत गर्ने थिए।”+
२३ यहोवा यस्तो घोषणा गर्नुहुन्छ, “के म नजिकको कुरा मात्रै देख्न सक्ने परमेश्वर हुँ र? के म टाढाको कुराचाहिँ देख्न सक्दिनँ?”
२४ यहोवा यस्तो घोषणा गर्नुहुन्छ, “के कुनै यस्तो ठाउँ छ, जहाँ मानिसले आफूलाई मेरो नजरबाट लुकाउन सक्छ?”+
“के आकाश र पृथ्वीमा भएका सबै कुरा म देख्न सक्दिनँ?”+ यहोवा घोषणा गर्नुहुन्छ।
२५ “भविष्यवक्ताहरूले मेरो नाममा यस्तो झूटो भविष्यवाणी गरेको मैले सुनेको छु, ‘मैले सपना देखेँ! मैले सपना देखेँ!’+ २६ तिनीहरू कहिलेसम्म यसरी झूट बोलिरहन्छन्? तिनीहरू आफ्नै हृदयका छली कुराहरू बताउँछन्।+ २७ यसरी एकअर्कालाई झूटा सपनाहरू सुनाएर तिनीहरू मेरा मानिसहरूलाई मेरो नाम बिर्सन लगाउँछन्, जसरी तिनीहरूका पितापुर्खाले पनि बाआलको पछि लागेर मेरो नाम बिर्सेका थिए।+ २८ जुन भविष्यवक्ताले सपना देख्छ, उसले आफूले देखेको सपनाबारे बताओस्। तर जसले मेरो वचन पाएको छ, उसले मेरो वचन जस्ताको तस्तै सुनाओस्।”
यहोवा यस्तो घोषणा गर्नुहुन्छ, “के अन्नको दाँजोमा परालको कुनै मोल हुन्छ?”
२९ यहोवा यस्तो घोषणा गर्नुहुन्छ, “के मेरो वचन आगोजस्तै छैन र?+ चट्टानलाई समेत धुलोपिठो पार्न सक्ने घनजस्तै छैन र?”+
३० “त्यसैले मेरो वचनलाई बङ्ग्याएर आफूलाई जे मन लाग्छ, त्यही भन्ने भविष्यवक्ताहरूलाई म सजाय दिनेछु,” यहोवा घोषणा गर्नुहुन्छ।+
३१ यहोवा यस्तो घोषणा गर्नुहुन्छ, “म ती भविष्यवक्ताहरूलाई सजाय दिनेछु, जो यसो भन्न आफ्नो जिब्रो चलाउँछन्, ‘परमेश्वर यस्तो घोषणा गर्नुहुन्छ!’”+
३२ “म ती भविष्यवक्ताहरूलाई सजाय दिनेछु, जो झूटा सपना सुनाएर धाक लगाउँछन् अनि झूट बोलेर मेरा मानिसहरूलाई बराल्छन्,” यहोवा घोषणा गर्नुहुन्छ।+
“तर मैले तिनीहरूलाई पठाएको होइनँ; मैले तिनीहरूलाई आज्ञा दिएको पनि छैनँ। त्यसैले तिनीहरूको सन्देशले यी मानिसहरूको पटक्कै भलो गर्नेछैन,”+ यहोवा घोषणा गर्नुहुन्छ।
३३ “अनि मानिसहरूले अथवा कुनै भविष्यवक्ताले वा पुजारीले ‘यहोवाको बोझ* के हो’ भनेर सोधे भने तिमीले यस्तो जवाफ दिनू, ‘यहोवा यस्तो घोषणा गर्नुहुन्छ, “तिमीहरू नै त्यो बोझ हौ! त्यसैले म तिमीहरूलाई फ्याँकिदिनेछु!”’+ ३४ जुन मानिसले वा पुजारीले वा भविष्यवक्ताले ‘यहोवाको बोझ* यो हो’ भन्छ, म त्यसलाई र त्यसको घरानालाई सजाय दिनेछु। ३५ तिमीहरू हरेकले आफ्नो साथीसँगी र दाजुभाइलाई यसो भनेर सोध्दै छौ, ‘यहोवाले के जवाफ दिनुभयो? यहोवाले के बोल्नुभयो?’ ३६ तर अबदेखि तिमीहरूले यहोवाको बोझबारे* केही नबोल्नू किनकि तिमीहरू प्रत्येकको बोली नै त्यो बोझ* हो। तिमीहरूले जीवित परमेश्वर, हाम्रा परमेश्वर, सेनाहरूका यहोवाको वचनलाई बङ्ग्याएका छौ।
३७ “तिमीले भविष्यवक्ताहरूलाई यसो भन्नू, ‘यहोवाले तिमीहरूलाई के जवाफ दिनुभएको छ? यहोवाले तिमीहरूसित के कुरा गर्नुभएको छ? ३८ यदि तिमीहरू “यहोवाको बोझ* यो हो!” भनेर सुनाउन छोड्दैनौ भने यहोवा परमेश्वर तिमीहरूलाई यसो भन्नुहुन्छ: “मैले तिमीहरूलाई ‘यहोवाको बोझ* यो हो’ भन्न छोड भनेर चेतावनी दिँदादिँदै पनि तिमीहरूले ‘यो सन्देश यहोवाको बोझ* हो’ भन्न नछोडेको हुनाले ३९ हेर, म तिमीहरूलाई उचालेर मेरो नजरबाट टाढा फालिदिनेछु; तिमीहरूका पितापुर्खा र तिमीहरूलाई दिएको यो सहरलाई पनि त्याग्नेछु। ४० म सधैँका लागि तिमीहरूको बेइज्जत गरिदिनेछु र तिमीहरू अपमानित हुनेछौ अनि त्यो अपमान कहिल्यै बिर्सिइनेछैन।”’”+