यर्मिया

१२ हे यहोवा, जब म आफ्नो मुद्दा तपाईँसामु पेस गर्छु

अनि तपाईँसित न्यायका कुरा गर्छु, तब तपाईँ सधैँ सही ठहरिनुहुन्छ।+

तर पनि दुष्टहरूको चाल किन सफल हुन्छ?+

अनि छल गर्नेहरू किन बेफिक्री भएर हिँड्‌छन्‌?

 २ तपाईँले तिनीहरूलाई रोप्नुभयो र तिनीहरूले जरा हाले।

तिनीहरू हुर्के र फल फलाए।

तिनीहरू आफ्नो मुखले त तपाईँको नजिक छु भन्छन्‌ तर तिनीहरूको भित्री विचारचाहिँ* तपाईँदेखि टाढा छ।+

 ३ तर हे यहोवा, तपाईँले मलाई राम्ररी चिन्‍नुभएको छ;+ मलाई देख्नुभएको छ;

मेरो हृदय जाँच्नुभएको छ र म तपाईँप्रति भक्‍त भएको पाउनुभएको छ।+

काट्‌नलाई लगिने भेडालाई जस्तै तिनीहरूलाई छुट्ट्याउनुहोस्‌

र मारिने दिनको लागि तिनीहरूलाई अलग्गै राख्नुहोस्‌।

 ४ यो भूमिमा कहिलेसम्म खडेरी परिरहन्छ?

कहिलेसम्म यो भूमि बन्जर रहिरहन्छ?+

यहाँ बस्ने दुष्ट मानिसहरूले गर्दा

यहाँका पशुपन्छी सबै सोतर भइसके।

तिनीहरूले यसो भनेका छन्‌: “हामीलाई के हुनेछ, उहाँ देख्नुहुन्‍न।”

 ५ यदि तिमी मानिसहरूसित दौडँदा नै थाक्छौ भने

घोडाहरूसित कसरी दौडन सक्छौ?+

शान्ति छाएको देशमा तिमी ढुक्कले बसे तापनि

यर्दनको घना जङ्‌गलमा तिम्रो हालत के होला?

 ६ तिम्रा आफ्नै दाजुभाइले, तिम्रो आफ्नै बुबाका सन्तानले

तिमीलाई छल गरेका छन्‌।+

तिनीहरूले तिमीविरुद्ध चर्को आवाज उठाएका छन्‌।

तिनीहरूले मीठामीठा कुरा गरे पनि

तिनीहरूमाथि भरोसा नगर।

 ७ “मैले आफ्नो घर छोडिसकेको छु;+ आफ्नो निज धनलाई लत्याइसकेको छु।+

मेरी प्रियलाई शत्रुहरूको हातमा सुम्पिसकेको छु।+

 ८ मेरो निज धन मेरो लागि जङ्‌गली सिंहझैँ भएको छ।

त्यो मविरुद्ध गर्जन्छ।

त्यसैले म अहिले त्यसलाई घृणा गर्छु।

 ९ मेरो निज धन मेरो लागि छिरबिरे रङ्‌गको सिकारी चराझैँ भएको छ;

अरू सिकारी चराहरूले त्यसलाई घेर्छन्‌ र त्यसमाथि जाइलाग्छन्‌।+

आओ, जमिनमा बस्ने सबै जङ्‌गली पशु हो,

खान आओ।+

१० थुप्रै गोठालाले मेरो अङ्‌गुर बगान नष्ट पारेका छन्‌;+

तिनीहरूले मेरो खेतबारी कुल्चीमिल्ची गरेका छन्‌।+

मलाई मन पर्ने जमिनलाई मरुभूमि बनाइदिएका छन्‌।

११ यो अब कामै नलाग्ने भूमि भएको छ;

यो सुक्खा भएको छ;*

मेरै सामुन्‍ने यो उजाड भएको छ।+

हो, पूरै भूमि उजाड पारिएको छ,

तैपनि कसैले ध्यानै दिँदैन।+

१२ मरुभूमिको सुक्खा बाटोहरूमा शत्रुहरूको ओइरो लागेको छ

किनकि यहोवाको तरबारले देशको एक छेउदेखि अर्को छेउसम्मका मानिसहरूलाई नाश गर्दै छ।+

त्यहाँ कसैलाई शान्ति छैन।

१३ तिनीहरूले गहुँ छरे तर काँडा पो कटनी गरे।+

तिनीहरूले घोटिएर काम गरे तर केही फाइदा भएन।

यहोवा तिनीहरूसित असाध्यै रिसाउनुभएकोले

तिनीहरूको उब्जनी राम्रो हुनेछैन र तिनीहरू लाजमा पर्नेछन्‌।”

१४ यहोवा यसो भन्‍नुहुन्छ: “मेरो प्रजा इस्राएललाई मैले अधिकार गर्न दिएको देशमाथि हात लगाउने सबै दुष्ट छिमेकीहरूलाई+ म तिनीहरूको भूमिबाट उखेल्नेछु+ र यहुदाको घरानालाई तिनीहरूको बीचबाट उखेल्नेछु। १५ तर तिनीहरूलाई उखेलेपछि म फेरि तिनीहरूमाथि कृपा देखाउनेछु र तिनीहरूलाई आ-आफ्नै भूमिमा फर्काउनेछु अनि तिनीहरूको उत्तराधिकार तिनीहरूलाई नै फिर्ता दिनेछु।”

१६ “तिनीहरूले मेरा मानिसहरूलाई बाआल देवताको नाममा शपथ खान सिकाएझैँ यदि तिनीहरूले ‘जीवित परमेश्‍वर यहोवाको कसम’ भन्दै मेरो नाममा शपथ खान सिके र मेरा मानिसहरूको चालमा हिँडे भने मेरा मानिसहरूसँगसँगै तिनीहरूको पनि उन्‍नति हुनेछ। १७ तर तिनीहरूले मेरो कुरा सुनेनन्‌ भने म तिनीहरूलाई उखेल्नेछु र सर्वनाश पार्नेछु,” यहोवा घोषणा गर्नुहुन्छ।+