इजकिएल
२९ दसौँ वर्षको १० औँ महिनाको १२ औँ दिनमा यहोवाको वचन मकहाँ आयो। उहाँले मलाई भन्नुभयो: २ “हे मानिसको छोरा, मिश्रका फारोतिर फर्क अनि फारो र सम्पूर्ण मिश्रविरुद्ध भविष्यवाणी गर।+ ३ तिमीले यसो भन्नू: ‘ब्रह्माण्डका मालिक यहोवा भन्नुहुन्छ:
“हे मिश्रका फारो!+ नाइल नदीमा* पल्टिरहेको बडेमाको जलजन्तु!+
म तँविरुद्ध खडा भएको छु।
तैँले यसो भनिस्, ‘नाइल नदी मेरो हो।
मैले आफ्नै लागि यो बनाएको हुँ।’+
४ तर म तेरो बङ्गारामा बल्छी लगाउनेछु। तेरो नदीका माछालाई तेरो कत्लामा टाँसिदिनेछु।
म तँलाई र तेरो कत्लामा टाँसिएका सबै माछालाई नाइल नदीबाट निकाल्नेछु।
५ म तँलाई र तेरो नदीका सबै माछालाई मरुभूमिमा छोडिदिनेछु।
तँ खुला मैदानमा बजारिनेछस्; तेरो लास छिन्नभिन्न हुनेछ र कसैले त्यसलाई उठाउनेछैन।+
म तँलाई जङ्गली जनावर र आकाशका पन्छीको आहारा बनाइदिनेछु।+
६ तब मिश्रका सबै बासिन्दाले म नै यहोवा हुँ भनेर जान्नेछन्
किनकि इस्राएलको घरानाको लागि तँ नर्कटको सहाराभन्दा कमजोर भइस्।+
७ तिनीहरूले तेरो हात समात्न खोज्दा तँ पिट्टिकै भाँचिइस्
र तैँले गर्दा तिनीहरूका काँधमा चोट लाग्यो।
तिनीहरू तँमाथि भर पर्न खोज्दा तँ भाँचिइस्
र तैँले गर्दा तिनीहरूका गोडा* धरमराए।+
८ “‘त्यसैकारण ब्रह्माण्डका मालिक यहोवा यसो भन्नुहुन्छ: “म तँमाथि तरबार उठाउनेछु+ अनि तेरा मानिस र पशु सबैलाई सोत्तर पार्नेछु। ९ मिश्र उजाड र निर्जन हुनेछ+ अनि तिनीहरूले म नै यहोवा हुँ भनेर जान्नेछन्। किनकि तैँले भनिस्,* ‘नाइल नदी मेरो हो; त्यो बनाउने म नै हुँ।’+ १० त्यसैले म तँ अनि तेरो नाइल नदीविरुद्ध खडा हुनेछु र मिश्रलाई निर्जन र सुक्खा बनाउनेछु।+ मिग्दोलदेखि+ इथियोपियाको सिमानामा पर्ने सिनेसम्मै+ म सम्पूर्ण देशलाई उजाड पारिदिनेछु। ११ त्यहाँ न कुनै मानिस न कुनै पशुले खुट्टा हाल्नेछ।+ पूरै देश ४० वर्षसम्म निर्जन हुनेछ। १२ उजाड भएका देशहरूमध्ये म मिश्रलाई झनै उजाड पारिदिनेछु र त्यसका सहरहरू ४० वर्षसम्म सुनसान हुनेछन्।+ म मिश्रीहरूलाई जातिजातिका मानिसहरूबीच र देश-देशमा तितरबितर पारिदिनेछु।”+
१३ “‘ब्रह्माण्डका मालिक यहोवा यसो भन्नुहुन्छ: “तर ४० वर्षपछि म मिश्रीहरूलाई तिनीहरू तितरबितर पारिएका जातिहरूबाट फेरि जम्मा गर्नेछु;+ १४ कैदमा लगिएका मिश्रीहरूलाई म तिनीहरूको जन्मभूमि पाथ्रोसमा+ फिर्ता ल्याउनेछु। त्यसपछि तिनीहरूको देशको कुनै नाम रहनेछैन। १५ अन्य देशको तुलनामा मिश्र अत्यन्तै तुच्छ हुनेछ। त्यसले अरू देशलाई दमन गर्न सक्नेछैन।+ अरू देशलाई अधीनमा राख्नै नसक्नेगरि म मिश्रलाई नगण्य तुल्याइदिनेछु।+ १६ इस्राएलको घराना फेरि कहिल्यै मिश्रमा भर पर्नेछैन।+ मिश्रमा भर पर्नु गल्ती थियो भनेर तिनीहरूले सम्झनेछन्। तब तिनीहरूले म नै ब्रह्माण्डका मालिक यहोवा हुँ भनेर जान्नेछन्।”’”
१७ अनि २७ औँ वर्षको पहिलो महिनाको पहिलो दिन यहोवाको यो वचन मकहाँ आयो। उहाँले मलाई भन्नुभयो: १८ “हे मानिसको छोरा, बेबिलोनका राजा नबुकद्नेजरले*+ टायरसित लड्न आफ्नो सेनालाई घोटाउनसम्म घोटाए।+ त्यसैले तिनीहरू सबैको तालु खुइलियो र तिनीहरू सबैको काँध ताछियो। तर तिनीहरूले आफ्नो कठोर परिश्रमको कुनै फल पाएनन्।
१९ “त्यसैले ब्रह्माण्डका मालिक यहोवा यसो भन्नुहुन्छ, ‘म मिश्र बेबिलोनका राजा नबुकद्नेजरलाई दिनेछु+ र तिनले तिनीहरूको सरसम्पत्ति लैजानेछन् र देशलाई लुट्नेछन्। त्यो लुटको धन नै बेबिलोनी सेनाको ज्याला हुनेछ।’
२० “‘टायरसित लड्न गरेको परिश्रमको फलस्वरूप म तिनलाई मिश्र दिनेछु किनकि तिनले मेरो निम्ति काम गरेका थिए,’+ ब्रह्माण्डका मालिक यहोवा घोषणा गर्नुहुन्छ।
२१ “त्यस दिन म इस्राएलको घरानाको निम्ति एउटा सिङ उमार्नेछु*+ र तिमीलाई तिनीहरूसित बोल्ने मौका दिनेछु। तब तिनीहरूले म नै यहोवा हुँ भनेर जान्नेछन्।”