यसैया
१३ आमोजका छोरा यसैयाले+ एउटा दर्शन* देखे। तिनले दर्शनमा बेबिलोनविरुद्ध यस्तो घोषणा+ गरेको सुने:
२ “नाङ्गो डाँडामा एउटा झन्डा ठड्याओ।+
आफ्नो हात हल्लाउँदै तिनीहरूलाई बोलाओ
र तिनीहरू ठूलाबडाका ढोकाहरूबाट छिरेर भित्र आऊन्।
३ ज-जसलाई मैले नियुक्त गरेँ, तिनीहरूलाई मैले आदेश दिएको छु।+
मेरो रिस पोखाउन मैले आफ्ना योद्धाहरूलाई भेला गरेको छु।
तिनीहरू घमन्डले फुल्छन् र खुसी मनाउँछन्।
४ सुन! डाँडाहरूबाट भीडको आवाज आइरहेको छ,
असङ्ख्य मानिसहरू जम्मा भएजस्तो सुनिन्छ।
सुन! राष्ट्रहरू जम्मा भएको कोलाहल सुनिँदै छ,
जातिजातिका मानिसहरू भेला भएका छन्।+
सेनाहरूका यहोवाले युद्धको निम्ति सेना तयार पार्दै हुनुहुन्छ।+
५ पूरै पृथ्वीको विनाश गर्न+
यहोवा आफ्नो क्रोधका हातहतियारसहित
टाढाको देशबाट आउँदै हुनुहुन्छ,
आकाशको पल्लो छेउबाट आउँदै हुनुहुन्छ।+
६ डाँको छोडेर रोओ किनकि यहोवाको दिन नजिकै छ!
त्यो दिन सर्वशक्तिमान् परमेश्वरले विनाश गर्ने दिन हो।+
७ त्यसैले सबैका हात लल्याकलुलुक हुनेछन्
र हरेकको मुटु डरले काँप्नेछ।+
८ मानिसहरू भयभीत भएका छन्।+
सुत्केरी बेथा लागेकी स्त्रीलाई झैँ
तिनीहरूलाई पीडाले छोपेको छ; तिनीहरू छटपटाइरहेका छन्।
तिनीहरू अक्क न बक्क भएर एकअर्कालाई हेर्छन्।
तिनीहरूको अनुहारमा त्रास छाएको छ।
९ हेर! यहोवाको दिन क्रोध र बल्दो रिससहित आउँदै छ,
त्यस दिन कसैमाथि दया देखाइनेछैन।
त्यस दिन देशका पापीहरूको नामोनिसान मेटाइनेछ+
र मानिसहरू देशको हालत देखेर डरले थरथर काँप्नेछन्।
१० किनकि आकाशका तारा र तारामण्डलहरूले*+
आफ्नो चमक दिनेछैनन्।
उदाउँदै गरेको सूर्यसमेत अँध्यारो हुनेछ
र चन्द्रमाले आफ्नो ज्योति छर्नेछैन।
११ म पृथ्वीका बासिन्दाहरूसँग तिनीहरूको खराबीको लेखा लिनेछु+
र दुष्टहरूलाई तिनीहरूको गल्तीको सजाय दिनेछु।
म अहङ्कारीहरूको सेखी झारिदिनेछु
र तानासाहहरूको घमन्डलाई चूरचूर पारिदिनेछु।+
१२ अनि म मानिसको यस्तो हालत बनाउनेछु कि
निखुर सुन र ओपिरको सुन फेला पार्न सकिनेछ तर मानिसलाई भने फेला पार्न सकिनेछैन।+
१३ त्यसैले म आकाशलाई थरथर काँप्न लगाउनेछु
र पृथ्वीलाई हल्लाएर त्यसको ठाउँबाट उखेलिदिनेछु।+
सेनाहरूका यहोवाले आफ्नो बल्दो रिस पोख्ने दिनमा त्यसो गर्नुहुनेछ।
१४ सिकारीले खेदेको हरिणझैँ अनि गोठालो नभएर तितरबितर भएको बगालझैँ
तिनीहरू सबै आ-आफ्नै मानिसहरूकहाँ
र आ-आफ्नो भूमिमा फर्कनेछन्।+
१५ जो-जो फेला पर्छन्, ती सबै वारपार हुनेगरि छेडिनेछन्
अनि जो-जो पक्राउ पर्छन्, ती सबै तरबारले काटिनेछन्।+
१६ तिनीहरूका छोराछोरीलाई तिनीहरूकै आँखाअगाडि पछारी-पछारी मारिनेछ।+
तिनीहरूको घर लुटिनेछ।
तिनीहरूका स्वास्नीहरूको इज्जत लुटिनेछ।
१७ म मादीहरूलाई तिनीहरूविरुद्ध उठ्न सुऱ्याउनेछु।+
उनीहरूका लागि चाँदी त केही पनि होइन।
अनि सुन देखेर पनि उनीहरू लोभिँदैनन्।
१८ उनीहरूका धनुले युवकहरूलाई धुजाधुजा पार्नेछ।+
गर्भको शिशुलाई अनि केटाकेटीलाई
उनीहरूले रतीभर दयामाया देखाउनेछैनन्।
१९ अनि सबैभन्दा महिमित राज्य बेबिलोन,+
जुन कल्दियालीहरूको शान हो र जसमा तिनीहरू गर्व गर्छन्,+
त्यसलाई परमेश्वरले नाश गर्नुहुनेछ र त्यसको हालत सदोम र गमोराको जस्तै हुनेछ।+
कुनै अरबीले त्यहाँ आफ्नो पाल टाँग्नेछैन।
अनि कुनै गोठालोले आफ्नो बगाललाई त्यहाँ विश्राम गराउनेछैन।
२१ मरुभूमिका जीवहरू त्यहाँ बस्नेछन्।
तिनीहरूका घर लाटोकोसेरोले भरिनेछन्।
त्यो सुतुरमुर्गहरूको* घर हुनेछ+
र जङ्गली बाख्राहरू त्यहाँ बुर्लुक-बुर्लुक उफ्रनेछन्।
२२ त्यसका किल्लाहरूमा जनावरहरू स्वर उचाली-उचाली कराउनेछन्
अनि त्यसका भव्य महलहरूमा स्यालहरू कराउनेछन्।
त्यसको समय सिद्धिनै लागेको छ; त्यसको दिन धेरै बाँकी छैन।”+