अध्याय पाँच
यहोवाका उपासकहरूले आनन्द उठाइरहेको स्वतन्त्रता
१, २. (क) परमेश्वरले प्रथम मानव दम्पतीलाई कस्तो स्वतन्त्रता दिनुभयो? (ख) आदम र हव्वाको गतिविधिलाई नियन्त्रण गर्ने केही नियमहरू बताउनुहोस्।
यहोवाले प्रथम पुरुष र स्त्री सृष्टि गर्नुहुँदा तिनीहरूले जति स्वतन्त्रता पाएका थिए, आज त्यति स्वतन्त्रता कुनै पनि मानिसले पाएको छैन। तिनीहरूको घर, अदनको सुन्दर बगैंचा अर्थात् प्रमोदवन थियो। तिनीहरूको मन अनि शरीर सिद्ध भएकोले कुनै प्रकारको रोगबिमारले अवरोध खडा गर्दैनथ्यो। अहिले मानिसहरूलाई मृत्युले ढुकेजस्तो त्यतिबेला तिनीहरूलाई ढुकेर बसेको थिएन। साथै, तिनीहरू यन्त्रमानव थिएनन् तर तिनीहरूसित स्वतन्त्र इच्छा थियो र आफ्नो लागि आफै निर्णय गर्न सक्थे। तथापि, त्यस्तो अद्भुत स्वतन्त्रताको आनन्द उठाउन तिनीहरूले परमेश्वरको नियम पालन गर्नुपर्थ्यो।
२ उदाहरणका लागि, परमेश्वरले बनाउनुभएका प्राकृतिक नियमहरू विचार गर्नुहोस्। हो, यी नियमहरू लिखित रूपमा छैनन् तर आदम र हव्वा ती नियमहरू पालन गर्न आफै अग्रसर हुने किसिमले सृजिएका थिए। भोजनको चाहनाले तिनीहरूलाई खानुपर्ने; प्यासले पिउनुपर्ने अनि सूर्यास्तले सुत्नुपर्ने आवश्यकताको बोध गराउँथ्यो। यहोवाले तिनीहरूलाई काम पनि दिनुभएको थियो। त्यो काम वास्तवमा एउटा नियम थियो किनभने त्यसले तिनीहरूको कार्यपद्धतिलाई असर गर्नेथियो। तिनीहरूले सन्तान जन्माउनुपर्थ्यो, पृथ्वीका विभिन्न जीवजीवात्माथि अधिकार जमाउनुपर्थ्यो र सारा पृथ्वी प्रमोदवनमा परिणत गर्न यसलाई विस्तार गर्दै लैजानुपर्थ्यो। (उत्पत्ति १:२८; २:१५) यो कस्तो मनमोहक, लाभदायी नियम थियो! यसले तिनीहरूलाई सन्तोषजनक काम गर्दै लाभदायी काममा तिनीहरूको शक्ति प्रयोग गर्ने मौका प्रदान गऱ्यो। साथै, आफ्नो काम कसरी पूरा गर्ने भनी निर्णय गर्न तिनीहरूले प्रशस्त स्वतन्त्रता पाएका थिए। यति भएपछि तिनीहरूलाई अरू के कुरा नै चाहिन्थ्यो र?
३. आदम र हव्वाले बुद्धिमानी भई निर्णय गर्ने आफ्नो स्वतन्त्रता कसरी प्रयोग गर्न सिक्न सक्थे?
३ निस्सन्देह, आदम र हव्वालाई निर्णय गर्ने स्वतन्त्रता दिइँदा तिनीहरूले गर्ने सबै निर्णयले असल परिणाम नै ल्याउनेछ भन्ने कुरा पक्का थिएन। तिनीहरूले परमेश्वरको व्यवस्था तथा सिद्धान्तहरूको परिधिभित्र रहेर निर्णय गर्ने स्वतन्त्रताको सदुपयोग गर्नुपर्थ्यो। यी नियम तथा सिद्धान्तहरू तिनीहरूले कसरी सिक्न सक्थे? आफ्ना सृष्टिकर्ताको कुरा सुनेर अनि उहाँका कामहरू नियालेर। परमेश्वरले आदम र हव्वालाई आफूले सिकेको कुरा व्यवहारमा उतार्न सक्ने बौद्धिक क्षमता दिनुभएको थियो। तिनीहरूलाई सिद्ध सृष्टि गरिएकोले निर्णय गर्दा पनि यहोवाका गुणहरू झल्काउने स्वाभाविक झुकाव तिनीहरूमा हुनेथियो। निस्सन्देह, परमेश्वरले तिनीहरूको खातिर गर्नुभएका कुराहरूप्रति कृतज्ञ भएर साँच्चै उहाँलाई प्रसन्न तुल्याउन चाहने हो भने तिनीहरू यसो गर्न होसियार हुनुपर्थ्यो।—उत्पत्ति १:२६, २७; यूहन्ना ८:२९.
४. (क) एउटा रूखको फल नखानू भनी आदम र हव्वालाई दिइएको नियमले के तिनीहरूको स्वतन्त्रता हनन हुन्थ्यो? (ख) यो किन एउटा जायज माग थियो?
४ त्यसकारण, मानिसहरू परमेश्वरलाई आफ्नो जीवनदाताको रूपमा भक्ति चढाउन अनि उहाँले निर्धारण गर्नुभएको सीमाभित्र रहन इच्छुक छन् कि छैनन् भनी परमेश्वरले जाँच्न चाहनु न्यायोचित थियो। यहोवाले आदमलाई यस्तो आज्ञा दिनुभयो: “बगैंचाका सबै रूखका फल तैंले संकोच नमानी खाए हुन्छ, तर असल र खराबको ज्ञान दिने रूखको फल चाहिं नखानू, किनभने जुन दिन तैंले त्यो खान्छस् त्यसै दिन तँ मर्नेछस्।” (उत्पत्ति २:१६, १७) हव्वा सृजिएपछि तिनलाई पनि यो नियमबारे बताइएको थियो। (उत्पत्ति ३:२, ३) के यो निषेधाज्ञाले तिनीहरूको स्वतन्त्रता हनन गऱ्यो? अवश्य गरेन। तिनीहरूले त्यो निषेधित रूखबाहेक अरू थुप्रै रूखबाट मीठा-मीठा आहारहरू खान सक्थे। (उत्पत्ति २:८, ९) परमेश्वरले पृथ्वी सृष्टि गर्नुभएको हुँदा यो उहाँको सम्पत्ति हो भनेर तिनीहरूले मानिलिनु जायज कुरा थियो। त्यसैकारण, आफ्नो उद्देश्यअनुरूप अनि मानिसजातिको भलो हुने नियमहरू बनाउनु उहाँको अधिकार हो।—भजन २४:१, १०.
५. (क) आदम र हव्वाले आफ्नो उत्कृष्ट स्वतन्त्रता कसरी गुमाए? (ख) आदम र हव्वाले आनन्द उठाइरहेको स्वतन्त्रताको बदलामा के पाए अनि यसले हामीलाई कस्तो असर गरेको छ?
५ तर के भयो? स्वार्थी लक्ष्य प्राप्तिको लागि एउटा स्वर्गदूत आफ्नो स्वेच्छाको दुरुपयोग गरेर शैतान भयो जसको अर्थ हो, “विरोधी।” त्यसले परमेश्वरको इच्छा विपरीतको कुरा दिने लोभ देखाएर हव्वालाई छक्यायो। (उत्पत्ति ३:४, ५) परमेश्वरको नियम तोड्न आदमले हव्वालाई साथ दिए। आफूलाई नदिइएको कुराको लालसा गरेर तिनीहरूले आफ्नो उत्कृष्ट स्वतन्त्रता गुमाए। तिनीहरू पापका दास अनि परमेश्वरले चेताउनी दिनुभएझैं मृत्युको सिकार भए। तिनीहरूले आफ्नो सन्तानलाई दिएको सम्पदा पाप थियो र यो मानिसको गलत काम गर्ने भित्री झुकावमा प्रस्ट देखियो। पापले गर्दा तिनीहरूमा रोगबिमार, वृद्धावस्था र मृत्युजस्ता त्रुटिहरू देखा पर्न थाल्यो। शैतानी प्रभावले गर्दा गलत काम गर्ने तीव्र झुकाव झनै बढ्यो। फलस्वरूप लाखौंको ज्यान लिने घृणा, अपराध, दमन र युद्धजस्ता कुराहरूले मानव समाज रंगियो। परमेश्वरले मानिसजातिलाई सुरुमा दिनुभएको स्वतन्त्रताभन्दा कति भिन्न!—व्यवस्था ३२:४, ५; अय्यूब १४:१, २; रोमी ५:१२; प्रकाश १२:९.
स्वतन्त्रता कहाँ पाउन सकिन्छ
६. (क) साँचो स्वतन्त्रता कहाँ पाउन सकिन्छ? (ख) येशूले कस्तो प्रकारको स्वतन्त्रताबारे कुरा गर्दै हुनुहुन्थ्यो?
६ आज जताततै व्याप्त खराब अवस्थालाई विचार गर्दा मानिसहरूले अझ बढी स्वतन्त्रताको चाहना गर्नु कुनै अनौठो कुरा होइन। तर साँचो स्वतन्त्रता कहाँ पाउन सकिन्छ? येशूले यसो भन्नुभयो: “तिमीहरू मेरो वचनमा रह्यौ भने साँच्चै मेरा चेला हौ। औ तिमीहरूले सत्य के हो, सो जान्नेछौ, र सत्यले तिमीहरूलाई स्वतन्त्र तुल्याउनेछ।” (यूहन्ना ८:३१, ३२) यो स्वतन्त्रता मानिसहरूले एउटा शासक वा एक प्रकारको सरकार त्यागेर अर्को रोज्दा प्राप्त गर्ने स्वतन्त्रता होइन। त्यसो नभई, यो स्वतन्त्रता मानव समस्याको मूल जडसम्म पुग्छ। येशूले यहाँ पापको दासत्वबाट पाइने स्वतन्त्रताबारे भन्दै हुनुहुन्थ्यो। (यूहन्ना ८:२४, ३४-३६) तसर्थ, येशू ख्रीष्टको साँचो चेला बनेपछि मानिसले आफ्नो जीवनमा आमूल परिवर्तन गरेर स्वतन्त्र महसुस गर्छ।
७. (क) हामी अहिले कुन अर्थमा पापबाट स्वतन्त्र हुन सक्छौं? (ख) त्यस्तो स्वतन्त्रता पाउन हामीले के गर्नुपर्छ?
७ यसको मतलब, अहिलेका साँचो मसीहीहरूले पापी आचरणप्रति जन्मजात झुकावका असरहरू पटक्कै महसुस गर्दैनन् भन्न खोजेको होइन। तिनीहरू पनि जन्मजात पापी भएको हुँदा अझै संघर्ष गरिरहनुपर्छ। (रोमी ७:२१-२५) यदि कुनै मानिसले साँच्चै येशूको शिक्षाअनुरूप जीवन बिताउँछन् भने तिनी पापको दास हुँदैनन्। एक जना तानाशाहले जस्तो अधीनमा राखेर पापले तिनलाई अन्धाधुन्ध कार्यहरू गर्न लगाउनेछैन। तिनी उद्देश्यहीन जीवन बिताउँदै दोषी अन्तस्करण लिएर भौंतारिने छैनन्। तिनले परमेश्वरसामु सफा अन्तस्करण राख्न सक्नेछन् किनभने ख्रीष्टको बलिदानको आधारमा विगतका पापहरू सबै क्षमा भइसकेका छन्। बेला बेलामा पापी झुकावहरू देखा पर्न सक्छन् तर अब उप्रान्त पापले राज्य गर्नेछैन भन्ने ख्रीष्टको शिक्षाबारे थाह पाएको हुँदा तिनी पापअनुसारको व्यवहार गर्न इन्कार गर्छन्।—रोमी ६:१२-१७.
८. (क) साँचो मसीहीधर्मले हामीलाई कस्तो स्वतन्त्रता दिन्छ? (ख) संसारका शासकहरूप्रति हाम्रो मनोवृत्ति कस्तो हुनुपर्छ?
८ मसीहीहरूको हैसियतमा हामीले अनुभव गर्ने स्वतन्त्रताबारे विचार गर्नुहोस्। हामी झूटा शिक्षाको असर, अन्धविश्वासको बन्धन र पापको दासत्वबाट मुक्त भएका छौं। मृत्यु र पुनरुत्थानबारे अद्भुत सच्चाइले हामीलाई मृत्युको बेमनासिब डरबाट स्वतन्त्र तुल्याएको छ। असिद्ध मानव सरकारको बदलामा परमेश्वरको धार्मिक राज्य स्थापना हुनेछ भन्ने ज्ञानले हामीलाई आशाविहीन अवस्थाबाट स्वतन्त्र बनाउँछ। (दानियल २:४४; मत्ती ६:१०) तथापि, त्यस्तो स्वतन्त्रता पाएका छौं भन्दैमा सरकारी अधिकृत तथा तिनीहरूका नियमहरू बेवास्ता गर्ने कुनै छुट पाउँदैनौं।—तीतस ३:१, २; १ पत्रुस २:१६, १७.
९. (क) अहिले मानिसहरूले पाउन सक्ने अत्यधिक स्वतन्त्रताको आनन्द उठाउन यहोवाले हामीलाई मायालु ढंगमा कसरी मदत गर्नुहुन्छ? (ख) हामी कसरी बुद्धिमानी निर्णयहरू गर्न सक्छौं?
९ हामीले अनेकन् परीक्षा भोगेर गल्ती गरेपछि जीवन बिताउने सर्वोत्तम मार्ग आफैले पत्ता लगाओस् भनेर यहोवाले त्यत्तिकै छोड्नुहुन्न। उहाँलाई हाम्रो संरचना कस्तो छ, हामीलाई साँचो सन्तुष्टि कुन कुराले दिन्छ अनि हामीलाई अनन्त लाभ दिने कुरा के हो भनेर थाह छ। परमेश्वर र सँगी मानवहरूसितको सम्बन्ध बिगारेर नयाँ संसारमा प्रवेश गर्नदेखि समेत रोक लगाउन सक्ने सोचाइ र आचरणबारे उहाँलाई थाह छ। यहोवाले बाइबल र उहाँको दृश्य संगठनद्वारा यी सबै कुराहरूबारे हामीलाई मायालु ढंगमा जानकारी दिनुहुन्छ। (मर्कूस १३:१०; गलाती ५:१९-२३; १ तिमोथी १:१२, १३) अनि परमेश्वरले हामीलाई दिनुभएको स्वतन्त्र इच्छा प्रयोग गरेर कस्ता निर्णयहरू गर्छौं, त्यो हामीमै निर्भर हुने कुरा हो। आदमजस्तो नभएर हामीले बाइबलका कुराहरू पालन गरेका छौं भने बुद्धिमानी निर्णयहरू गर्नेछौं। हामीले यहोवासितको राम्रो सम्बन्ध नै आफ्नो जीवनको प्रमुख चासोको विषय हो भनेर देखाउनेछौं।
अर्कै प्रकारको स्वतन्त्रताको चाहना
१०. कोही-कोही यहोवाका साक्षीहरूले कस्तो प्रकारको स्वतन्त्रता खोजिरहेका छन्?
१० कहिलेकाहीं केही जवान यहोवाका साक्षीहरूलगायत वयस्कहरूले समेत बेग्लै प्रकारको स्वतन्त्रता चाहेको जस्तो महसुस गर्न सक्छन्। संसार एकदमै आकर्षक देखिन सक्छ अनि त्यसबारे जति धेरै सोच्यो, संसारमा लोकप्रिय गैरमसीही कार्यहरू गर्ने चाहना त्यति नै तीव्र हुँदै जान्छ। त्यस्ता व्यक्तिहरूले आफू लागूपदार्थको दुर्व्यसनी हुन्छु, धेरै रक्सी पिउँछु वा अनैतिकतामा फस्छु होला भनेर सोचेकै हुँदैनन्। तर तिनीहरू साँचो मसीहीबाहेक अन्य व्यक्तिहरूसित संगत गर्न थाल्छन् र तिनीहरूले स्वीकारोस् भन्ने चाहन्छन्। अनि तिनीहरूको जस्तै बोली र आचरण नक्कल गर्न थाल्छन्।—३ यूहन्ना ११.
११. कहिलेकाहीं खराब कार्यहरू गर्ने प्रलोभन कहाँबाट आउँछ?
११ गैरमसीही आचरणमा संलग्न हुने प्रलोभन कहिलेकाहीं यहोवाको सेवा गरेको दाबी गर्ने मानिसहरूबाटै आउन सक्छ। केही प्रारम्भिक मसीहीहरूलाई त्यस्तो भएको थियो र हाम्रो समयमा पनि हुन सक्छ। त्यस्ता मानिसहरू प्रायजसो आफूलाई आनन्द दिने कुराहरू गर्न चाहन्छन् तर ती परमेश्वरको नियम विपरीत हुन्छन्। तिनीहरू अरूलाई “रमाइलो” गरौं भन्ने आग्रह गरिरहेका हुन्छन्। तिनीहरू ‘आफै विनाशका दास भईकन स्वतन्त्रताको प्रतिज्ञा गर्छन्।’—२ पत्रुस २:१९.
१२. परमेश्वरको नियम र सिद्धान्त विपरीतको आचरणका केही दुःखद परिणामहरू के-के हुन्?
१२ त्यस्तो कथित स्वतन्त्रताको परिणाम सधैं खराब हुन्छ किनभने त्यसो गर्नुको मतलब परमेश्वरको नियमप्रति अनाज्ञाकारी हुनु हो। उदाहरणका लागि, अवैध यौनसम्बन्धले गर्दा भावनात्मक पीडा, रोगबिमार, मृत्यु, नचाहँदा नचाहँदै गर्भवती हुने र विवाहसमेत टुक्रिन सक्छ। (१ कोरिन्थी ६:१८; १ थिस्सलोनिकी ४:३-८) लागूपदार्थको दुर्व्यसनले झिजोपन, अस्पष्ट बोली, धमिलो दृष्टि, झुम्म पार्ने, सास फेर्न गाह्रो बनाउने, मतिभ्रम र मृत्युसमेत गराउन सक्छ। यसले दुर्व्यसनी बनाउन सक्छ अनि कुलतले गर्दा अपराधमा समेत फस्न सक्छ। मादक पदार्थको दुर्व्यसनबाट पनि यस्तै परिणामहरू हुन्छन्। (हितोपदेश २३:२९-३५) त्यस्तो कुलतमा फसेका व्यक्तिहरूले आफू स्वतन्त्र भएको महसुस गर्लान् तर तिनीहरू पापको दास भएका रहेछन् भनेर होस फर्कंदा निकै ढिलो भइसकेको हुन्छ। साँच्चै, पापले कस्तो क्रूर दासत्वमा राख्छ! यस विषयमा अहिल्यै सोचविचार गर्दा हामी त्यस्तो अवस्थामा पर्नदेखि जोगिन सक्छौं।—गलाती ६:७, ८.
समस्या कसरी सुरु हुन्छ
१३. (क) समस्याहरूतर्फ लैजाने तृष्णाहरू कहाँबाट आउँछन्? (ख) “खराब संगत” के हो भनी बुझ्न हामीले कसको दृष्टिकोण थाह पाउनुपर्छ? (ग) अनुच्छेद १३ मा दिइएका प्रश्नहरूको जवाफ दिनुहुँदा यहोवाको दृष्टिकोणलाई जोड दिनुहोस्।
१३ समस्याहरू अक्सर कसरी सुरु हुन्छ, विचार गर्नुहोस्। बाइबल यस्तो वर्णन गर्छ: “हरेक मानिस आफ्नै तृष्णाबाट खिंचिई लोभिएर परीक्षामा पर्दछ। तब तृष्णा गर्भवती भएर पापलाई जन्माउँछ, र पाप पूरा बढेपछि मृत्यु उत्पन्न गराउँछ।” (याकूब १:१४, १५) तृष्णा कहाँबाट आउँछ? मनमा आउने कुराहरूबाट। प्रायजसो, यो बाइबलका सिद्धान्तहरू लागू नगर्ने मानिसहरूसित सरसंगत गर्दाको नतिजा हो। निस्सन्देह, “खराब संगत[बाट]” टाढै बस्नुपर्छ भनेर हामी सबैलाई थाह छ। (१ कोरिन्थी १५:३३) तर कस्ता संगतहरू खराब हुन्? यहोवाले कस्तो दृष्टिकोण राख्नुहुन्छ? निम्न प्रश्नहरूमा विचार गर्दै उल्लिखित शास्त्रपदहरू पल्टाएर हेर्दा हामी सही निष्कर्षमा पुग्न सक्नेछौं।
कोही मानिसहरू आदरणीय देखिंदैमा के तिनीहरू असल संगत हुन्छन्? (उत्पत्ति ३४:१, २, १८, १९)
के तिनीहरूको कुराकानी, ठट्यौलीले हामी तिनीहरूसित घनिष्ठ छौं भनेर देखाउँछ? (एफिसी ५:३, ४)
यहोवालाई प्रेम नगर्ने मानिसहरूसित हामी घनिष्ठ हुन थाल्यौं भने उहाँलाई कस्तो लाग्नेछ? (२ इतिहास १९:१, २)
हाम्रोभन्दा बेग्लै विश्वास भएका मानिसहरूसित हामी सँगै काम गरौंला वा स्कूलमा पढौंला, तैपनि हामी किन होसियार हुनुपर्छ? (१ पत्रुस ४:३, ४)
टेलिभिजन र चलचित्र हेर्ने, इन्टरनेट प्रयोग गर्ने अनि किताब, पत्रिका, अखबार पढ्ने भनेको अरूसित संगत गर्ने माध्यमहरू हुन्। त्यस्ता स्रोतहरूबाट आउने कस्ता सामग्रीबाट हामी सतर्क रहनुपर्छ? (हितोपदेश ३:३१; यशैया ८:१९; एफिसी ४:१७-१९)
हाम्रो सरसंगतबाट यहोवाले हामी कस्ता मानिसहरू हौं भनेर थाह पाउनुहुन्छ? (भजन २६:१, ४, ५; ९७:१०)
१४. अहिले परमेश्वरको वचन लागू गर्न होसियार भयौं भने कस्तो महान् स्वतन्त्रता पाउनेछौं?
१४ परमेश्वरको नयाँ संसार एकदमै नजिक छ। स्वर्गमा स्थापित परमेश्वरको सरकारमार्फत शैतान र त्यसको सारा दुष्ट रीतिरिवाजको प्रभावबाट मानिसजाति मुक्त हुनेछन्। आज्ञाकारी मानिसजातिबाट बिस्तारै पापका सबै असरहरू हटाइनेछन्। त्यसको फलस्वरूप सिद्ध शरीर र मन पाएर हामीले प्रमोदवनमा अनन्त जीवनको आनन्द उठाउन सक्नेछौं। “[यहोवाको] आत्मा[अनुरूपको]” स्वतन्त्रता सारा सृष्टिले पाउनेछ। (२ कोरिन्थी ३:१७) अहिले परमेश्वरको वचन अवहेलना गरेर ती सबै कुरा गुमाउनु के मनासिब होला? अहिले मसीही स्वतन्त्रतालाई बुद्धिमानीपूर्वक प्रयोग गरेर हामी सबै “परमेश्वरको सन्तानको महिमाको स्वतन्त्रता” चाहन्छौं भनेर देखाउन सकौं।—रोमी ८:२१.
पुनरावृत्ति छलफल
• प्रथम मानव दम्पतीले कस्तो स्वतन्त्रता पाएका थिए? त्यस स्वतन्त्रतालाई आज मानिसजातिले उपभोग गरिरहेको स्वतन्त्रतासित कसरी तुलना गर्न सकिन्छ?
• अहिले साँचो मसीहीहरूले कस्तो स्वतन्त्रता पाएका छन्? स्वतन्त्रताप्रति संसारको दृष्टिकोणभन्दा यो कसरी भिन्न छ?
• खराब संगतबाट जोगिनु किन महत्त्वपूर्ण छ? आदमजस्तो नभएर हामी खराब के हो भन्ने सन्दर्भमा कसको निर्णय स्वीकार्छौं?
[पृष्ठ ४६-मा भएको चित्र]
परमेश्वरको वचनले चेतावनी दिन्छ: “नठगियौ, खराब संगतले भला चाल-चलनलाई बिगार्दछ”