परमेश्वरको संगठनको भाग हुनुहोस् र सुरक्षा पाउनुहोस्
“परमप्रभुको नाउँ एक बलियो धरहराजस्तै हो, त्यहाँ धर्मीहरू शरणको निम्ति कुदेर जान्छन्।”—हितोपदेश १८:१०.
१. येशूको प्रार्थनाअनुसार मसीहीहरू कुन कठिन परिस्थितिमा छन्?
आफ्नो मृत्यु हुनुभन्दा केही समयअघि येशूले आफ्ना अनुयायीहरूका लागि स्वर्गमा हुनुहुने पितासित प्रार्थना गर्नुभयो। उनीहरूको मायालु चिन्ता लिंदै उहाँले यसो भन्नुभयो: “मैले तिनीहरूलाई तपाईंको वचन दिएँ, तर संसारले तिनीहरूलाई घृणा गऱ्यो, किनकि तिनीहरू संसारका होइनन्, जस्तो म संसारको होइनँ। तपाईंले तिनीहरूलाई संसारबाट लैजानुहोस् भनी म बिन्ती गर्दिनँ, तर तिनीहरूलाई दुष्टबाट जोगाइराख्नुहोस्।” (यूहन्ना १७:१४, १५) यो संसार मसीहीहरूका लागि सुरक्षित हुनेछैन भनेर येशूलाई थाह थियो। किनकि संसारले तिनीहरूलाई झूटो आरोप लगाएर घृणा गर्नेथियो, सताउनेथियो। (मत्ती ५:११, १२; १०:१६, १७) यो संसार भ्रष्टताको स्रोत पनि हुनेथियो।—२ तिमोथी ४:१०; १ यूहन्ना २:१५, १६.
२. मसीहीहरूले आध्यात्मिक सुरक्षा कहाँ पाउनसक्छन्?
२ मसीहीहरूलाई घृणा गर्ने यो संसार परमेश्वरबाट टाढिएर शैतानको अधीनमा परेका मानिसहरूले बनेको छ। (१ यूहन्ना ५:१९) यो संसार मसीही मण्डलीभन्दा विशाल छ र शैतान कुनै पनि मानिसभन्दा धेरै शक्तिशाली छ। तसर्थ, संसारको घृणा साँच्चै खतरनाक छ। त्यसोभए, येशूका अनुयायीहरूले आध्यात्मिक सुरक्षा कहाँ पाउनसक्छन्? डिसेम्बर १, १९२२ प्रहरीधरहरा (अंग्रेजी) अंकले यस्तो जवाफ दियो: “अहिले हामी खराब समयमा छौं। शैतानको संगठन र परमेश्वरको संगठनबीच धमाधम लडाइँ चलिरहेको छ। यो अति गम्भीर लडाइँ हो।” यस भिडन्तमा परमेश्वरको संगठन आध्यात्मिक सुरक्षा स्थल हो। बाइबलमा “संगठन” शब्द देखिंदैन अनि १९२० को दशकतिर “परमेश्वरको संगठन” नयाँ अभिव्यक्ति थियो। त्यसोभए, यो संगठन के हो? अनि यसमा हामी कसरी सुरक्षा पाउनसक्छौं?
यहोवाको संगठन
३, ४. (क) एउटा शब्दकोश र प्रहरीधरहरा-अनुसार संगठन भनेको के हो? (ख) कुन अर्थमा यहोवाका साक्षीहरूको अन्तरराष्ट्रिय संगतिलाई संगठन भन्न सकिन्छ?
३ कन्साइस अक्सफोर्ड डिक्शनरी-अनुसार संगठन भनेको “संगठित निकाय” हो। यस कुरालाई मनमा राख्दै हामी के बुझ्छौं भने प्रेरितहरूले प्रथम शताब्दीका मसीहीहरूलाई यरूशलेमका परिचालक निकायको रेखदेखमा स्थानीय मण्डलीहरूमा संगठित गरेका हुनाले त्यस “भाइ-बन्धुहरूलाई” संगठन भन्नु उचित छ। (१ पत्रुस २:१७) आज पनि यहोवाका साक्षीहरूको त्यस्तै संगठनात्मक संरचना छ। प्रथम शताब्दीको निकायको एकतालाई “गोठालो र शिक्षक” जस्ता “मानिसहरू[मा] वरदान[ले]” बलियो बनाएको थियो। यिनीहरूमध्ये कतिपय एक मण्डलीदेखि अर्को मण्डलीमा भ्रमण गर्दै हिंड्थे भने अरू चाहिं स्थानीय मण्डलीहरूका प्राचीन थिए। (एफिसी ४:८, ११, १२; प्रेरित २०:२८) त्यस्तै “वरदानहरूले” यहोवाका साक्षीहरूको एकतालाई मजबुत बनाउँछन्।
४ नोभेम्बर १, १९२२ प्रहरीधरहरा (अंग्रेजी) अंकले “संगठन” शब्दबारे यसो भन्यो: “संगठन भनेको कुनै योजना पूरा गर्न गठित व्यक्तिहरूको संघ हो।” त्यो प्रहरीधरहरा-ले अझ के बतायो भने यहोवाका साक्षीहरूमा संगठन शब्द जुन अर्थमा प्रयोग गरिएको छ त्यसलाई बुझ्दा भने तिनीहरूलाई संगठन कहलाउँदैमा तिनीहरू कुनै पन्थ बनेनन्। तर तिनीहरूमा यस शब्द प्रयोगको अर्थ हो, बाइबल स्टुडेन्ट्हरूले [यहोवाका साक्षीहरू] परमेश्वरको इच्छा पूरा गर्न प्रयत्न गरिरहेका छन् र प्रभुले प्रत्येक कुरा व्यवस्थित ढंगमा गर्नुभए जस्तै तिनीहरूले यो काम गर्दैछन्।” (१ कोरिन्थी १४:३३) प्रेरित पावलले आफ्नो समयमा मसीहीहरू त्यसरी नै व्यवस्थित ढंगमा चले भनेर देखाए। तिनले अभिषिक्त मसीही संगतिलाई मानव शरीरसित तुलना गरे। मानव शरीरका थुप्रै अंगहरू हुन्छन् जसले आ-आफ्नो भूमिका निभाउँछन् र शरीरले ठीकसित कार्य गर्नसक्छ। (१ कोरिन्थी १२:१२-२६) यो, संगठनको एउटा उत्कृष्ट उदाहरण हो! मसीहीहरू किन संगठित भए? “परमेश्वरको उद्देश्य” पूरा गर्न अनि यहोवाको इच्छा गर्न।
५. परमेश्वरको दृश्य संगठन के हो?
५ आज, साँचो मसीहीहरू एकताबद्ध हुनेछन्, एक “जातिको” हैसियतमा एक “देश” बनाइनेछ जहाँ तिनीहरू “संसारमा ज्योतिहरूझैं” चम्कनेछन् भनेर बाइबलमा अगमवाणी गरिएको थियो। (यशैया ६६:८; फिलिप्पी २:१५) अहिले यो संगठित “जातिको” संख्या साढे पचपन्न लाखभन्दा बढी छ। (यशैया ६०:८-१०, २२) तथापि, यही नै परमेश्वरको संगठनको सिंगो रूप होइन। स्वर्गदूतहरू पनि सम्मिलित छन्।
६. विस्तृत अर्थमा हेर्ने हो भने परमेश्वरको संगठन को को मिलेर बनेको छ?
६ स्वर्गदूतहरूले परमेश्वरको मानव सेवकहरूसित मिलेर काम गरेका थुप्रै घटनाहरू छन्। (उत्पत्ति २८:१२; दानियल १०:१२-१४; १२:१; हिब्रू १:१३, १४; प्रकाश १४:१४-१६) त्यसैकारण त, मे १५, १९२५ प्रहरीधरहरा (अंग्रेजी) अंकले यसरी ठीकै भन्यो: “सबै पवित्र स्वर्गदूतहरू परमेश्वरको संगठनका भाग हुन्।” त्यसले अझ यसो भन्यो: “परमेश्वरको संगठनको शिरको हैसियतमा सम्पूर्ण शक्ति र अख्तियार पाउनुहुने प्रभु येशू ख्रीष्ट [हुनुहुन्छ]।” (मत्ती २८:१८) तसर्थ, विस्तृत अर्थमा हेर्ने हो भने परमेश्वरको संगठन परमेश्वरको इच्छा पूरा गर्न होस्टेमा हैंसे गर्ने स्वर्ग र पृथ्वीमा भएका सबै मिलेर बनिएको छ। (पेटी हेर्नुहोस्।) यसको भाग हुन पाउनु कस्तो अद्भुत विशेषाधिकार हो! अनि एकताको सूत्रमा बाँधिएर परमेश्वर यहोवाको प्रशंसा गाउन स्वर्ग र पृथ्वीका सम्पूर्ण जीवित प्राणीहरू संगठित हुने समयको प्रतीक्षा साँच्नु कत्ति आनन्द! (प्रकाश ५:१३, १४) यद्यपि, परमेश्वरको संगठनले आज कस्तो सुरक्षा दिन्छ?
परमेश्वरको संगठनमा सुरक्षित—कसरी?
७. कुन तरिकामा परमेश्वरको संगठनले हामीलाई सुरक्षा दिन्छ?
७ परमेश्वरको संगठनले हामीलाई शैतान र त्यसका छक्कापन्जाबाट जोगिन मदत दिनसक्छ। (एफिसी ६:११) शैतानले यहोवाका साक्षीहरूलाई दबाब दिनु, सताउनु र प्रलोभनमा पार्नुको एउटै उद्देश्य छ, त्यो हो तिनीहरूलाई ‘तिनीहरू हिंड्नुपर्ने बाटो[बाट]’ तर्काउनु। (यशैया ४८:१७; तुलना गर्नुहोस् मत्ती ४:१-११) यस रीतिरिवाजमा हामी ती आक्रमणहरूबाट पूर्णतया बच्न कहिल्यै सक्दैनौं। तथापि, परमेश्वर र उहाँको संगठनसितको घनिष्ठ सम्बन्धले हामीलाई बलियो बनाउँछ र सुरक्षा दिन्छ अनि “त्यो बाटो[मा]” हिंडिरहन मदत गर्छ। परिणामस्वरूप, हामी आफ्नो आशा गुमाउँदैनौं।
८. यहोवाको अदृश्य संगठनले उहाँका पार्थिव सेवकहरूलाई कसरी सहयोग गर्छ?
८ परमेश्वरको संगठनले यो सुरक्षा कसरी दिन्छ? प्रथमतः यहोवाका आत्मिक सेवकहरूले हामीलाई सधैं साथ दिन्छन्। येशू असाध्यै दबाबमा पर्नुहुँदा स्वर्गदूतले उहाँको सेवा गरेका थिए। (लूका २२:४३) मृत्युको मुखमा पर्दा स्वर्गदूतले पत्रुसलाई चमत्कारी ढंगमा बचाए। (प्रेरित १२:६-११) आज त्यस्ता चमत्कारहरू नहुने भए तापनि यहोवाका जनहरू प्रचार क्रियाकलापमा लाग्दा तिनीहरूलाई स्वर्गदूतीय सहयोग दिने प्रतिज्ञा गरिएको छ। (प्रकाश १४:६, ७) कठिन परिस्थितिहरू भोग्नुपर्दा तिनीहरूले बारम्बार असामान्य शक्ति पाएको महसुस गर्छन्। (२ कोरिन्थी ४:७) त्यसबाहेक, “उहाँसित डराउनेको चारैतिर परमप्रभुका दूतले छाउनी बनाउँछन्, र तिनीहरूलाई छुटकारा दिन्छन्” भनेर तिनीहरूलाई थाह छ।—भजन ३४:७.
९, १०. “परमप्रभुको नाउँ एक बलियो धरहराजस्तै” हो भनेर कसरी भन्न सकिन्छ र यो सिद्धान्त परमेश्वरको सिंगो संगठनमा कसरी लागू हुन्छ?
९ यहोवाको दृश्य संगठन पनि सुरक्षा हो। कसरी? हितोपदेश १८:१० मा हामी पढ्छौं: “परमप्रभुको नाउँ एक बलियो धरहराजस्तै हो, त्यहाँ धर्मीहरू शरणको निम्ति कुदेर जान्छन्।” तर यसको अर्थ, सुरक्षा पाउन परमेश्वरको नाउँ जपेर मात्र पुग्छ भन्ने होइन। बरु, परमेश्वरको नाउँमा शरण लिनु भन्नाले यहोवामा भरोसा गर्नु भन्ने बुझिन्छ। (भजन २०:१; १२२:४) यसको अर्थ, उहाँको सार्वभौमिकता, व्यवस्था तथा सिद्धान्तहरूको समर्थन गर्नु र उहाँका प्रतिज्ञाहरूमा विश्वास गर्नु हो। (भजन ८:१-९; यशैया ५०:१०; हिब्रू ११:६) यसमा यहोवालाई ऐकान्तिक भक्ति चढाउनु पनि समावेश छ। यसरी यहोवालाई उपासना चढाउनेहरूले मात्र भजनरचयितासँगै यसो भन्नसक्छन्: “[यहोवामै] हाम्रो हृदय रमाउनेछ, किनभने उहाँको पवित्र नाउँमा हामीले भरोसा राखेका छौं।”—भजन ३३:२१; १२४:८.
१० अहिले, परमेश्वरको दृश्य संगठनका सबै सदस्यहरू सबैले मीकासँगसँगै यसो भन्छन्: “हामी चाहिं सदा सर्वदै परमप्रभु आफ्ना परमेश्वरको नाउँमा हिंड़नेछौं।” (मीका ४:५) वर्तमान संगठन बाइबलमा “उहाँको नाउँको निम्ति . . . एक जाति” भनिएको परमेश्वरका इस्राएल” सँगसँगै भेला गरिएको छ। (प्रेरित १५:१४; गलाती ६:१६; यशैया ४३:६, ७; १ पत्रुस २:१७) यसर्थ, यहोवाको संगठनको भाग हुनु भनेको परमेश्वरको नाउँमा सुरक्षा खोज्ने र सुरक्षा पाउने मानिसहरूको भाग हुनु हो।
११. यहोवाको संगठनले कुन निर्दिष्ट तरिकामा यसका सदस्यहरूलाई सुरक्षा प्रदान गर्छ?
११ यसबाहेक, परमेश्वरको दृश्य संगठन विश्वासको समुदाय अर्थात् एकअर्कालाई प्रोत्साहन दिने सँगी विश्वासीहरूको संघ हो। (हितोपदेश १३:२०; रोमी १:१२) यो, मसीही गोठालाहरूले भेडाको हेरचाह गर्ने, बिरामी र निराशलाई प्रोत्साहन दिने र पतितहरूको उत्थान गर्ने ठाउँ हो। (यशैया ३२:१, २; १ पत्रुस ५:२-४) “विश्वासी र बुद्धिमान दास[ले]” यस संगठन मार्फत “ठीक ठीक समयमा” भोजन दिन्छन्। (मत्ती २४:४५) अभिषिक्त मसीहीहरूले बनेको यस “दासले” उत्कृष्ट आध्यात्मिक कुराहरू अर्थात् अनन्त जीवनतर्फ डोऱ्याउनसक्ने सही अनि बाइबल आधारित ज्ञान प्रदान गर्छन्। (यूहन्ना १७:३) यो “दास”-बाट निर्देशन पाएकोमा हामी कृतज्ञ छौं। किनकि त्यसले गर्दा मसीहीहरूले आफ्ना वरपरका खतरनाक परिवेशमा उच्च नैतिक स्तर कायम राख्न र “सर्पझैं चनाखो र ढुकुरझैं सोझो” हुन मदत पाएका छन्। (मत्ती १०:१६) अनि तिनीहरूलाई “प्रभुको काममा प्रशस्त” हुन हर बखत मदत दिइएको छ र त्यो पनि शक्तिशाली सुरक्षा नै हो।—१ कोरिन्थी १५:५८.
परमेश्वरको संगठनमा को को छन्?
१२. परमेश्वरको स्वर्गीय संगठनको भाग भनेर कसलाई चिनाइयो?
१२ परमेश्वरको संगठनका सदस्यहरूका लागि यो सुरक्षा उपलब्ध भएकोले यसमा को को पर्छन्? यस सन्दर्भमा, स्वर्गीय संगठन यसको भाग हो भन्नुमा शंकै छैन। शैतान र त्यसका दूतहरू अब स्वर्गमा छैनन्। अर्कोतर्फ, विश्वासी स्वर्गदूतहरू भने अझ स्वर्गमै “सर्वसाधारण समाजमा” छन्। प्रेरित यूहन्नाले आखिरी दिनको दौडान “थुमा,” करूब (“चार जीवित जीवातहरू”) र “धेरै स्वर्गदूतहरू” परमेश्वरको सिंहासनको वरपरै भएको देखे। तिनीहरूसित महिमित स्वर्गीय उत्तराधिकार पाइसकेका अभिषिक्त मसीहीहरूको प्रतिनिधित्व गर्ने २४ प्राचीनहरू पनि हुनेथिए। (हिब्रू १२:२२, २३; प्रकाश ५:६, ११; १२:७-१२) स्पष्टतया, यिनीहरू सबै परमेश्वरको संगठनको भाग हुन्। यद्यपि, मानवहरूको सन्दर्भमा भने यो कुरा त्यति स्पष्ट छैन।
१३. परमेश्वरको संगठनको भाग को हुन् र को होइनन् भनेर येशूले कसरी चिनाउनुभयो?
१३ येशूले उहाँलाई पछ्याएको दाबा गर्नेहरूबारे यसो भन्नुभयो: “त्यो दिन धेरैले मलाई भन्नेछन्, ‘हे प्रभु, हे प्रभु के हामीले तपाईंको नाउँमा अगमवाणी बोलेनौं, र तपाईंको नाउँमा सामर्थ्यका काम गरेनौं र? अनि म तिनीहरूलाई खुल्लमखुल्ला भन्नेछु, मैले तिमीहरूलाई कहिले चिनेकै छैनँ। ए अधम काम गर्ने हो, मबाट दूर होओ।” (मत्ती ७:२२, २३) यदि कसैले अधम काम गर्छ भने जे दाबा गरे पनि र उपासना गर्न जहाँ गए तापनि ऊ परमेश्वरको संगठनको भाग पटक्कै हुनसक्दैन। परमेश्वरको संगठनको भाग को हो भनी कसरी चिन्ने भनेर पनि येशूले देखाउनुभयो। उहाँले भन्नुभयो: “मलाई प्रभु, प्रभु, भन्ने सबै स्वर्गको राज्यमा पस्न पाउनेछैन। तर त्यो, जसले स्वर्गमा हुनुहुने मेरा पिताको इच्छा पालन गर्दछ।”—मत्ती ७:२१.
१४. परमेश्वरको संगठनको भाग हुनेहरूले परमेश्वरका कुन कुन इच्छाहरू पूरा गर्नैपर्छ भनेर प्रस्ट पारियो?
१४ तसर्थ, मुख्य भाग नै “स्वर्गको राज्य” भएको परमेश्वरको संगठनको भाग हुने हो भने परमेश्वरको इच्छा गरिरहेको हुनुपर्छ। उहाँको इच्छा के हो त? पावलले यसो भन्दै यसको महत्त्वपूर्ण पक्ष चिनाए: “सबै मानिसहरूले उद्धार पाऊन् र तिनीहरू सत्यको ज्ञानमा आऊन् भन्ने इच्छा [परमेश्वर] गर्नुहुन्छ।” (१ तिमोथी २:४) यदि कुनै व्यक्तिले बाइबलबाट सही ज्ञान पाउन, त्यसलाई जीवनमा उतार्न र “सबै प्रकारका मानिसलाई” बताउन साँच्चै कोसिस गर्छ भने तिनले परमेश्वरको इच्छा गरिरहेका हुन्छन्। (मत्ती २८:१९, २०; रोमी १०:१३-१५) यहोवाको यो पनि इच्छा छ कि उहाँको भेडालाई खुवाइयोस् र हेरचाह गरियोस्। (यूहन्ना २१:१५-१७) यस सन्दर्भमा मसीही सभाहरूले महत्त्वपूर्ण भूमिका खेल्छन्। कुनै बाधाबिना यस्ता सभाहरू धाउनसक्ने भएर पनि हेलचेक्य्राइँ गर्नेहरूले यहोवाको संगठनमा आफ्नो स्थानको मूल्यांकन गुमाउँछन्।—हिब्रू १०:२३-२५.
संसारसित मित्रता
१५. याकूबले आफ्ना समयका मण्डलीहरूलाई के चेताउनी दिए?
१५ येशूको मृत्यु भएको लगभग ३० वर्षपछि उहाँका सौतेनी भाइ याकूबले परमेश्वरको संगठनमा व्यक्तिविशेषको स्थानलाई जोखिममा पार्नसक्ने केही तत्त्वहरू चिनाए। तिनले लेखे: “हे व्यभिचारी हो, संसारसँगको मित्रता परमेश्वरसँगको दुश्मनी हो भन्ने कुरा के तिमीहरूलाई थाह छैन? यसकारण जो संसारसँग मित्र हुन चाहन्छ त्यसले आफैलाई परमेश्वरको शत्रु बनाउँछ।” (याकूब ४:४) परमेश्वरको शत्रु उहाँको संगठनको भाग पक्कै होइन। उसोभए, संसारसँगको मित्रता के हो? यसको विभिन्न रूप छ भनेर बताइएको छ। जस्तै, खराब संगत बढाउने वा लाग्ने। यस्ता जम्मै स्पष्टीकरणहरू सैद्धान्तिक तवरमा सही छन्। यसबाहेक, तोकेरै केही कुराप्रति अर्थात् खराब आचरणतिर धकेल्ने मानसिक झुकाउहरूतर्फ याकूब ध्यानकेन्द्रित गराउँछन्।
१६. याकूबले कुन प्रसंगमा संसारसँगको मित्रता परमेश्वरसँगको दुश्मनी हो भनेर चेताउनी दिएका थिए?
१६ याकूब ४:१-३ मा यस्तो लेखिएको पाउँछौं: “तिमीहरूमा लड़ाइँ कहाँबाट आउँछ? औ झगडा कहाँबाट आउँछ? तिमीहरूको अंगमा संग्राम गर्ने तिमीहरूका सुख-विलासबाटै होइन र? तिमीहरू इच्छा गर्दछौ र तिमीहरूले पाउँदैनौ। तिमीहरू हत्या गर्दछौ, र लोभ गर्दछौ, र पाउनसक्तैनौ। तिमीहरू झगड़ा र लड़ाइँ गर्दछौ, तर तिमीहरूलाई केही मिल्दैन, किनकि तिमीहरू माग्दैनौ। तिमीहरू माग्दछौ, तर पाउँदैनौ, किनभने आफ्नो सुख-विलासमा खर्च गर्नालाई बेठीकसँग माग्दछौ।” यी कुरा लेखिसकेपछि याकूबले संसारसँगको मित्रता विरुद्ध चेताउनी दिएका थिए।
१७. प्रथम शताब्दीको मसीही मण्डलीभित्र कुन तरिकामा “युद्ध” र “लडाइँ” थिए?
१७ याकूबको मृत्युको शताब्दीयौंपछि झूटा मसीहीहरूले साँच्चै युद्ध गरे अनि एकअर्काको हत्या गरे। तथापि, याकूबले “परमेश्वरको इस्राएलका” प्रारम्भिक सदस्यहरूलाई अर्थात् स्वर्गीय ‘पूजाहारीहरू र राजाहरू’ हुने प्रत्याशा भएकाहरूलाई लेख्दैथिए। (प्रकाश २०:६) तिनीहरूले साँच्चैको युद्ध गरेर एकअर्काको हत्या गरेनन् वा मारेनन्। त्यसोभए, याकूबले मसीहीहरूबीच यस्ता कुरा भइरहेको किन बताए? कुरा के हो भने आफ्नो भाइलाई घृणा गर्ने हत्यारा हो भनी प्रेरित यूहन्नाले भने। अनि पावलले मण्डलीभित्र व्यक्तित्व बाझिनु र नमिल्नुलाई “झगडा” र “कलह” भने। (तीतस ३:९; २ तिमोथी २:१४; १ यूहन्ना ३:१५-१७) यसका साथै याकूबको मनमा स्पष्टतया मसीहीहरू एकाअर्कालाई प्रेम गर्न चुक्ने कुरा भएको हुनुपर्छ। संसारले अक्सर एकअर्काप्रति जसरी व्यवहार गर्छ त्यसरी नै मसीहीहरूले एकअर्कालाई व्यवहार गरिरहेका थिए।
१८. मसीहीहरूबीच निर्दयी काम र भावनाहरू उब्जाउने तत्त्व के हो?
१८ यस्ता कुरा मसीही मण्डलीहरूमा किन भए? लोभ र “सुख-विलास” जस्ता गलत झुकाउहरूले गर्दा। घमण्ड, ईर्ष्या र महत्त्वाकांक्षाले पनि मण्डलीको मायालु मसीही संगतिमा फाटो ल्याउनसक्छ। (याकूब ३:६, १४) यस्ता झुकाउहरूले व्यक्तिविशेषलाई संसारको मित्र र परमेश्वरको शत्रु बनाउँछन्। मनमा यस्ता झुकाउ राख्नेहरूले परमेश्वरको संगठनको भाग भइरहने प्रत्याशा राख्नसक्दैनन्।
१९. (क) कुनै मसीहीले आफ्नो हृदयमा गलत सोचाइ बास गर्न थालेको थाह पायो भने मुख्यतः कसलाई दोष लगाउने? (ख) कुनै मसीहीले कसरी गलत सोचाइलाई हटाउनसक्छ?
१९ गलत सोचाइले हाम्रो हृदयमा बास गऱ्यो भने कसलाई दोष लगाउनसक्ने? शैतानलाई? हो, केही हदसम्म। किनकि त्यो, यस्ता झुकाउहरू व्याप्त यस संसारको ‘रीतिरिवाजको शासक’ हो। (एफिसी २:१, २; तीतस २:१२) तथापि, गलत सोचाइले सामान्यतया हाम्रो असिद्ध शरीरमा जरा गाडेको हुन्छ। याकूबले संसारसँगको मित्रता विरुद्ध चेताउनी दिएपछि यस्तो लेखे: “के तिमीहरू यो सम्झन्छौ, कि धर्मशास्त्रले व्यर्थमा भन्दछ, ‘जुन आत्मा उहाँले हामीमा राख्नुभयो, त्यसले डाह गर्ने इच्छा गर्दछ?’ ” (याकूब ४:५) गलत काम गर्ने जन्मजात झुकाउ हामी सबैसित छ। (उत्पत्ति ८:२१; रोमी ७:१८-२०) यद्यपि, हामीले आफ्ना कमजोरीहरू स्वीकाऱ्यौं र तीमाथि काबू पाउन यहोवामा भरोसा गऱ्यौं भने हामी त्यस्तो झुकाउसित प्रतिकार गर्नसक्छौं। याकूब भन्छन्: “[परमेश्वरले] [हाम्रो जन्मजात ईर्ष्यालु झुकाउभन्दा] अझ बढ़ी अनुग्रह दिनुहुन्छ।” (याकूब ४:६) हामी कृतज्ञ छौं किनकि परमेश्वरको पवित्र आत्माको मदत र विश्वासी मसीही भाइहरूको सहयोग अनि येशूको छुडौतीको बलिदानले गर्दा विश्वासी मसीहीहरू आफ्ना शरीरको कमजोरीहरूको वशमा पर्दैनन्। (रोमी ७:२४, २५) तिनीहरू परमेश्वरको संगठनमा सुरक्षित छन्। तिनीहरू संसारका होइनन् तर परमेश्वरका मित्र हुन्।
२०. परमेश्वरको संगठनको भाग हुनेहरूले कस्ता भरपूर आशिष्हरू पाउँछन्?
२० बाइबलको प्रतिज्ञा छ: “परमप्रभुले आफ्ना मानिसलाई शक्ति दिनुहुनेछ। परमप्रभुले आफ्ना मानिसलाई शान्तिको आशिष दिनुहुनेछ।” (भजन २९:११) यदि साँच्चै हामी यहोवाको वर्तमान “जाति” अर्थात् उहाँको दृश्य संगठनको भाग भयौं भने उहाँले दिनुहुने शक्ति पाउनेछौं र आफ्ना जनहरूलाई आशिष् दिनुहुने शान्तिमा रमाउनेछौं। हो, शैतानको संसार यहोवाको दृश्य संगठनभन्दा निकै विशाल छ अनि हामीभन्दा शैतान धेरै शक्तिशाली छ। तर यहोवा सर्वशक्तिमान् हुनुहुन्छ। उहाँको सक्रिय शक्ति अजेय छ। उहाँका शक्तिशाली स्वर्गदूतहरूसमेत परमेश्वरको सेवामा हामीसित एकताबद्ध छन्। तसर्थ, हामी घृणाको बावजूद दृढ रहनसक्छौं। येशूले जस्तै हामी यस संसारलाई जित्नसक्छौं।—यूहन्ना १६:३३; १ यूहन्ना ४:४.
के तपाईं बताउन सक्नुहुन्छ?
◻ यहोवाको दृश्य संगठन भनेको के हो?
◻ परमेश्वरको संगठनले कुन कुन तरिकामा सुरक्षा प्रदान गर्छ?
◻ परमेश्वरको संगठनको भाग को हुन्?
◻ हामी कसरी संसारका मित्र हुनदेखि बच्नसक्छौं?
[पृष्ठ ९-मा भएको पेटी]
परमेश्वरको संगठन भनेको के हो?
यहोवाका साक्षीहरूको साहित्यमा “परमेश्वरको संगठन” भन्ने अभिव्यक्तिलाई तीन प्रकारले प्रयोग गरिएको छ।
१ विश्वासी आत्मिक प्राणीहरूले बनिएको यहोवाको अदृश्य स्वर्गीय संगठन। यसलाई बाइबलमा “माथिको यरूशलेम” भनिएको छ।—गलाती ४:२६.
२ यहोवाको दृश्य मानव संगठन। आज यो संगठन अभिषिक्त जन र ठूलो भीड मिलेर बनेको छ।
३ यहोवाको ब्रह्माण्डीय संगठन। आज यहोवाको यो संगठन स्वर्गीय र आत्मिक आशा भएका पृथ्वीबाट लिइएका अभिषिक्त धर्मपुत्रहरू मिलेर बनेको छ। समयको दौडान यसमा पृथ्वीका सिद्ध पारिएका मानिसहरू पनि सम्मिलित हुनेछन्।
[पृष्ठ १०-मा भएको चित्र]
यहोवाको संगठनले उत्कृष्ट आध्यात्मिक भोजन दिन्छ