प्रश्न पेटी
◼ बप्तिस्मा लिन लाग्दा कस्तो प्रकारको लुगालाई उपयुक्त मानिने छ?
लुगाका स्तरहरू संसारका विभिन्न भागहरूमा बेग्लाबेग्लै भए तापनि बाइबलले “लज्जालु र सरल भई” लुगा लगाउनु भनी दिएको सल्लाह सबै ठाउँका मसीहीहरूलाई लागू हुन्छ। (१ तिमो २:९) बप्तिस्माको निम्ति कस्तो लुगा सुहाउँदो हुन्छ भनेर विचार गर्दा यो सिद्धान्त प्रयोग गर्नुपर्छ।
बप्तिस्मा लिन लागेको एकजना मसीहीलाई जून १, १९८५ को वाचटावर पृष्ठ ३०-मा यो सल्लाह दिइएको छ: “पानीमा पस्दा लगाउने लुगा निश्चय नै भद्र किसिमको हुनुपर्छ। यो कुरा आज महत्त्वपूर्ण छ किनभने फेसन डिजाइनरहरू लैङ्गिकता प्रदर्शन गर्न र पूर्णतया नग्नता देखाउन चाहन्छन्। ध्यान दिनु पर्ने अर्को कुरा पानीमा नभिज्दा भद्र देखिने कुनै कुनै लुगा भिजेपछि अभद्र देखिन सक्छ। बप्तिस्मा जस्तो गम्भीर अवसरमा बप्तिस्मा लिने कोही पनि व्यक्ति अरूको ध्यान भङ्ग गर्न अथवा ठोकरको कारण बन्न चाहँदैन होला।—फिलिप्पी १:१०.”
यस सल्लाहअनुसार, अवसरको महत्त्वलाई ध्यानमा राखेर बप्तिस्मा लिन लागेका सबैजनाले भद्र लुगा नै लगाउन चाहने छन्। तसर्थ, ज्यादा अङ्ग प्रदर्शन हुने अथवा भिजेपछि शरीरमा चिपिक्क टाँसिने लुगाहरू मसीहीहरूलाई नसुहाउने अभद्र प्रकारका लुगाहरू हुन् र त्यस्ता लुगाहरू लगाउनु हुँदैन। त्यस्तैगरि आफ्नो पहिरन झुत्रेझाम्रे अथवा फोहरी देखिनु पनि अनुपयुक्त हुनेछ। यस बाहेक, सांसारिक भनाईहरू अथवा व्यापारिक नाराहरू भएको टी-शर्ट लगाउनु उपयुक्त हुँदैन।
नियुक्त प्राचीनले बप्तिस्मा लिन लागेको व्यक्तिसँग बप्तिस्मा सम्बन्धी प्रश्नहरू पुनरावलोकन गर्दा उचित पोशाक लगाउनु पर्ने आवश्यकताबारे छलफल गर्नु बेस हुनेछ। यसो गरेमा यस अवसरको मर्यादा कायम हुन्छ र हामी संसारबाट अलग्गै छौं भनेर चिनिन्छौं।—यूहन्ना १५:१९ तुलना गर्नुहोस्.