बप्तिस्मा गर्न चाहनेहरूका लागि प्रश्नहरू
बप्तिस्मा गर्न तयार भएका व्यक्तिसित गरिने अन्तिम छलफल
सामान्यतया यहोवाका साक्षीहरूको सम्मेलन तथा अधिवेशनहरूमा बप्तिस्मा गराइन्छ। बप्तिस्मा भाषणको अन्तमा वक्ताले बप्तिस्मा गर्न तयार भएकाहरूलाई उभिएर ठूलो आवाजमा यी दुई प्रश्नको जवाफ दिन आग्रह गर्नेछन्:
१. के तपाईँले पापको पश्चात्ताप गरेर आफ्नो जीवन यहोवालाई समर्पण गरिसक्नुभएको छ र उहाँले येसु ख्रिष्टमार्फत उद्धार गर्नुहुन्छ भनेर स्विकारिसक्नुभएको छ?
२. बप्तिस्मा गरिसकेपछि तपाईँ यहोवाको साक्षी भनेर चिनिनुहुनेछ र उहाँको सङ्गठनको भाग बन्नुहुनेछ भन्ने कुरा के तपाईँले बुझ्नुभएको छ?
यी दुई प्रश्नको सकारात्मक जवाफ दिएर बप्तिस्माको लागि तयार भएकाहरूले फिरौतीको बलिदानमा विश्वास गरेको र यहोवालाई आफ्नो जीवन पूर्णतया समर्पण गरेको कुरा “जनसमक्ष घोषणा” गर्छन्। (रोमी १०:९, १०) तिनीहरूले यी दुई प्रश्नबारे पहिल्यै प्रार्थनापूर्वक मनन गर्नु राम्रो हो। यसो गर्दा तिनीहरू आफ्नो विश्वासअनुसारै जवाफ दिन तयार हुनेछन्।
के तपाईँले प्रार्थनामा यहोवालाई आफ्नो जीवन समर्पण गरेर उहाँको मात्र उपासना गर्ने र उहाँको इच्छालाई आफ्नो जीवनमा प्रथम स्थान दिने वाचा गरिसक्नुभयो?
मौका पाउनासाथ बप्तिस्मा गर्नुपर्छ भन्ने कुरामा के तपाईँ पूर्णतया विश्वस्त हुनुहुन्छ?
बप्तिस्मा गर्दा कस्तो पहिरन लगाउनु उपयुक्त हुन्छ? (१ तिमो. २:९,१०; युह. १५:१९; फिलि. १:१०)
हामीले “शालीनतासाथ र सुझबुझ चलाउँदै” भद्र पहिरन लगाउनुपर्छ। यसो गर्दा हामीले “परमेश्वरको भक्ति” गरेको कुरा झल्काउन सक्छौँ। त्यसैले बप्तिस्मा गर्नेहरूले अङ्ग प्रदर्शन हुने स्वीमिङ कस्ट्युम अथवा नारा वा विज्ञापन छापिएको लुगा लगाउनु हुँदैन। बप्तिस्मा गर्नेहरूले सफा, भद्र र अवसर सुहाउँदो पहिरन लगाउनुपर्छ।
बप्तिस्माको बेला बप्तिस्मा गर्ने व्यक्तिको आचरण कस्तो हुनुपर्छ? (लुका ३:२१, २२)
यस सन्दर्भमा येसुले ख्रिष्टियनहरूको लागि राम्रो उदाहरण बसाल्नुभयो। बप्तिस्मा भनेको एउटा गम्भीर निर्णय हो भनेर उहाँले बुझ्नुभएको थियो। यो कुरा उहाँले आफ्नो मनोवृत्ति र व्यवहारबाट देखाउनुभयो। त्यसकारण बप्तिस्मा गर्ने ठाउँमा अनुचित तरिकामा जिस्किनु, खेल्नु, पौडी खेल्नु अथवा बप्तिस्माको क्षणलाई अनादर गर्ने खालको आचरण देखाउनु हुँदैन। न त ठूलै जित हासिल गरेको जस्तो हाउभाउ नै देखाउनु हुन्छ। हो, बप्तिस्मा एउटा खुसीको क्षण हो। तर आफ्नो खुसीलाई मर्यादित ढङ्गमा व्यक्त गर्नुपर्छ।
मण्डलीमा नियमित रूपमा भेला हुँदा र दाजुभाइ दिदीबहिनीसित सङ्गत गर्दा तपाईँलाई आफ्नो समर्पणअनुसार जीवन बिताउन कसरी मदत पुग्छ?
बप्तिस्मा गरेपछि पनि तपाईँले व्यक्तिगत अध्ययन गर्ने र नियमित रूपमा प्रचार जाने बानी बसाल्नु किन महत्त्वपूर्ण छ?
एल्डरहरूको लागि निर्देशन
बप्तिस्मा नगरेका प्रकाशकले बप्तिस्मा गर्ने इच्छा व्यक्त गरेपछि तिनलाई यस किताबको पृष्ठ १८५-२०७ मा भएको “बप्तिस्मा गर्न चाहनेहरूका लागि प्रश्नहरू” राम्रोसँग पढ्न प्रोत्साहन दिनुपर्छ। तिनलाई पृष्ठ १८२ मा पाइने “बप्तिस्मा नगरेका प्रकाशकलाई सन्देश” भन्ने भाग पढ्न आग्रह गर्नुपर्छ। त्यस लेखमा एल्डरहरूसित छलफल गर्नुअघि तिनले कसरी तयारी गर्न सक्छन् भनेर बताइएको छ। त्यहाँ बताइएझैँ बप्तिस्मा गर्न चाहने व्यक्तिले छलफलको बेला आफूले तयार पारेको नोट र यो किताब हेर्न सक्छन्। तर एल्डरहरूसित छलफल गर्नुअघि यी प्रश्नहरू कसैसित छलफल गर्नु आवश्यक छैन।
बप्तिस्मा गर्न चाहने व्यक्तिले एल्डरहरूको निकायको संयोजकलाई आफ्नो इच्छाबारे बताउनुपर्छ। तिनले “बप्तिस्मा गर्न चाहनेहरूका लागि प्रश्नहरू” भन्ने भाग तयारी गरेपछि एल्डरहरूको निकायको संयोजकले तिनलाई प्रार्थनामा यहोवाको इच्छाअनुसार गर्ने कुरा बताउँदै आफ्नो जीवन उहाँलाई समर्पण गरिसकेका छन् कि छैनन् भनेर सोध्नेछन्। तिनले समर्पण गरिसकेका छन् भने तिनीसित “बप्तिस्मा गर्न चाहनेहरूका लागि प्रश्नहरू” भन्ने भागबाट छलफल गर्न एल्डरहरूको निकायको संयोजकले दुई जना एल्डरलाई खटाउनेछन्। प्रत्येक भागको छलफल गर्न छुट्टाछुट्टै एल्डरलाई खटाउनुपर्छ। सम्मेलन वा अधिवेशनको मिति घोषणा भएपछि मात्र छलफल थाल्नुपर्छ भन्ने छैन।
एक चोटिमा एउटा भाग छलफल गर्नुपर्छ। प्रत्येक छलफल लगभग एक घण्टामा सिद्ध्याउन सकिन्छ। आवश्यकताअनुसार एक घण्टाभन्दा धेरै समय लिन पनि सकिन्छ। प्रत्येक छलफलको सुरु र अन्तमा प्रार्थना गर्नुपर्छ। छलफल गर्दा बप्तिस्मा गर्न लागेको व्यक्ति र एल्डर दुवैले हतार गर्नु हुँदैन। छलफल गर्ने जिम्मेवारी पाएका एल्डरहरूले अरू कामकुरालाई भन्दा बप्तिस्माको छलफललाई प्राथमिकता दिनुपर्छ।
बप्तिस्मा गर्न चाहनेहरूसित सामूहिक रूपमा भन्दा व्यक्तिगत रूपमा छलफल गर्नु बेस हुन्छ। बप्तिस्मा गर्न चाहने व्यक्तिसित एल्डरहरूले प्रत्येक प्रश्नको छलफल गर्दा तिनले बाइबलको सत्य कुरा कत्तिको राम्ररी बुझेका छन् र तिनी बप्तिस्माको लागि योग्य छन् कि छैनन् भनेर पक्का गर्न सक्नेछन्। साथै यसरी व्यक्तिगत रूपमा छलफल गर्दा बप्तिस्मा गर्न चाहने प्रकाशकलाई आफ्नो मनको कुरा खुलेर बताउन अझ सजिलो हुन सक्छ। पति-पत्नीसित भने सँगै छलफल गर्न सकिन्छ।
बप्तिस्मा गर्न चाहने प्रकाशक बहिनी हुन् भने अरूले देख्ने ठाउँमा बसेर छलफल गर्नुपर्छ तर अरूले सुन्नेगरि छलफल गर्नु हुँदैन। यदि छलफलको लागि अरू कसैलाई सँगै लैजानुपर्छ भने छलफल गरिने भागको आधारमा एल्डर अथवा सहायक सेवकलाई लैजान सकिन्छ। यसबारे तलको अनुच्छेदमा थप जानकारी दिइएको छ।
एल्डर थोरै भएको मण्डलीमा सहायक सेवकको मदत लिन सकिन्छ। तिनी सुझबुझ चलाएर निर्णय गर्न सक्ने र समझदार हुनुपर्छ। तिनले “भाग १: ख्रिष्टियन विश्वास” छलफल गर्न सक्छन्। तर “भाग २: ख्रिष्टियन जीवन” एल्डरहरूले मात्र छलफल गर्नुपर्छ। मण्डलीमा जिम्मेवार भाइहरू थोरै छन् भने छलफलको लागि नजिकैको मण्डलीको मदत लिन सकिन्छ कि भनेर क्षेत्रीय निरीक्षकसित सम्पर्क गर्नुपर्छ।
बप्तिस्मा गर्न चाहने प्रकाशक नाबालिग हुन् भने तिनको साक्षी आमा अथवा बुबा (वा दुवै) सँगै बस्नुपर्छ। आमाबुबा उपस्थित हुन असमर्थ भएमा प्रत्येक छलफलमा दुई जना एल्डर (वा छलफल गरिने भागको आधारमा एल्डर र सहायक सेवक) बस्नुपर्छ।
बप्तिस्मा गर्न चाहने प्रकाशकले बाइबलको आधारभूत शिक्षा राम्ररी बुझेका छन् कि छैनन्, एल्डरहरूले पक्का गर्नुपर्छ। साथै तिनले बाइबलको सत्य कुरालाई गम्भीरतासाथ लिएका छन् कि छैनन् र यहोवाको सङ्गठनप्रति आदर देखाउँछन् कि देखाउँदैनन्, त्यो कुरा एल्डरहरूले पत्ता लगाउनुपर्छ। प्रकाशकले बाइबलको आधारभूत शिक्षा राम्ररी बुझेका छैनन् भने तिनी भविष्यमा बप्तिस्माको लागि योग्य हुन सकून् भनेर एल्डरहरूले तिनलाई मदत गर्न प्रबन्ध मिलाउनेछन्। कसै-कसैलाई चाहिँ प्रचारकार्यमा भाग लिने अथवा सङ्गठनको प्रबन्धहरूको अधीनमा बस्ने सन्दर्भमा अझै उन्नति गर्न समय दिनुपर्ने हुन्छ। बप्तिस्मा गर्न चाहने प्रकाशक बप्तिस्माको लागि तयार छन् कि छैनन् भनेर पक्का गर्न एल्डरहरूले सुझबुझ चलाउँदै प्रत्येक भागको लागि छुट्ट्याइएको लगभग एक घण्टाको समय कसरी चलाउने भनेर विचार गर्नुपर्छ। कुनै प्रश्नलाई छलफल गर्न धेरै समय लाग्न सक्छ भने कुनैलाई थोरै। तर सबै प्रश्न छलफल गर्नुपर्छ।
भाग २ को छलफल सकेपछि छलफल गर्न खटाइएका सबै एल्डर एकै ठाउँमा भेला हुन्छन्। अनि उक्त प्रकाशक बप्तिस्माको लागि योग्य छन् कि छैनन् भनेर निर्णय गर्छन्। एल्डरहरूले हरेक प्रकाशकको पृष्ठभूमि, क्षमता र अरू परिस्थिति पनि विचार गर्छन्। हामी त्यस्ता व्यक्तिहरूमा चासो राख्छौँ, जसले आफ्नो हृदय यहोवातिर फर्काउनुका साथै बाइबलको आधारभूत शिक्षा बुझेका छन्। बप्तिस्मा गर्न तयार भएकाहरूलाई तपाईँले गर्नुहुने मदतले तिनीहरूलाई सुसमाचार प्रचार गर्ने महत्त्वपूर्ण जिम्मेवारी पूरा गर्न तयार पार्नेछ।
त्यसपछि छलफल गर्न खटाइएको एक जना वा दुवै जना एल्डरले प्रकाशकलाई भेट्नेछन् र तिनी बप्तिस्माको लागि योग्य छन् कि छैनन् भनेर बताउनेछन्। योग्य छन् भने एल्डरहरूले तिनीसित यस किताबको पृष्ठ २०६-२०७ मा भएको “बप्तिस्मा गर्न तयार भएका व्यक्तिसित गरिने अन्तिम छलफल” भन्ने भाग छलफल गर्नेछन्। यदि प्रकाशकले सधैँभरि जीवनको आनन्द उठाउनुहोस्!-बाट अध्ययन गरिसिध्याएका छैनन् भने एल्डरहरूले तिनलाई बप्तिस्मापछि त्यस किताबबाट अध्ययन सिध्याउन प्रोत्साहन दिनुपर्छ। बप्तिस्मा गर्न लागेका प्रकाशकलाई तिनले बप्तिस्मा गरेको मिति मण्डलीको प्रकाशकको रेकर्ड-मा थपिनेछ भनेर जानकारी दिनुहोस्। एल्डरहरूले तिनको यो व्यक्तिगत जानकारी सङ्कलन गर्नुको उद्देश्य सङ्गठनले यहोवाका साक्षीहरूको विश्वव्यापी धार्मिक गतिविधिको निरीक्षण गर्न सकोस् अनि तिनले आध्यात्मिक गतिविधिहरूमा भाग लिन र आध्यात्मिक मदत पाउन सकून् भनेर हो भनी तिनलाई बताउनुहोस्। साथै कुनै पनि व्यक्तिगत जानकारी jw.org/ne मा भएको ‘जानकारी सुरक्षित राख्नेबारे यहोवाका साक्षीहरूको विश्वव्यापी नीति’-अनुसारै प्रयोग गरिन्छ भनेर पनि एल्डरहरूले नयाँ प्रकाशकहरूलाई बताउन सक्छन्। यो छलफल साधारणतया दस मिनेटभन्दा कम समयमा सिद्ध्याउनुपर्छ।
बप्तिस्मा गरेको एक वर्षपछि दुई जना एल्डरले बप्तिस्मा गरेका प्रकाशकलाई भेटेर प्रोत्साहन र आवश्यक सुझाव दिनुपर्छ। ती दुई जना एल्डरमध्ये एक जना ती प्रकाशकको समूह निरीक्षक हुनुपर्छ। यदि ती प्रकाशक नाबालिग हुन् भने तिनको साक्षी आमा अथवा बुबा (वा दुवै) सँगै बस्नुपर्छ। यो भेट न्यानो र प्रोत्साहनदायी हुनुपर्छ। एल्डरहरूले तिनको आध्यात्मिक उन्नतिबारे छलफल गर्नेछन्। तिनलाई व्यक्तिगत अध्ययन गर्ने र दिनहुँ बाइबल पढ्ने राम्रो बानी बसाल्न, हरेक हप्ता पारिवारिक उपासना गर्न, नियमित रूपमा सभामा जान र टिप्पणी दिन अनि हरेक हप्ता प्रचारमा जान मदतकारी हुने व्यावहारिक सल्लाह दिनेछन्। (एफि. ५:१५, १६) सधैँभरि जीवनको आनन्द उठाउनुहोस्! किताबबाट तिनको अध्ययन सिद्धिएको छैन भने एल्डरहरूले त्यस किताबबाट तिनीसित अध्ययन गर्न कसैलाई खटाउनुपर्छ। एल्डरहरूले खुला मनले तिनको प्रशंसा गर्नुपर्छ। साधारणतया एउटा वा दुइटा बुँदामा सल्लाह-सुझाव दिनु पर्याप्त हुन्छ।