बुद्धिमानीपूर्वक पैसाको प्रयोग गर्नुहोस्‌

यसो गर्नु किन महत्त्वपूर्ण छ?

पैसाको प्रयोग राम्ररी गर्नुभएन भने तपाईँको आर्थिक अवस्था डामाडोल हुनेछ र तपाईँलाई चिन्ता फिक्रीले पिरोल्नेछ। तपाईँसित खासै पैसा छैन होला तैपनि केही तरिकाहरू अपनाउँदा तपाईँले आफूसित भएको पैसा ठीकसित प्रयोग गर्न सक्नुहुनेछ।

तपाईँ के गर्न सक्नुहुन्छ?

अनावश्‍यक खर्च नगर्नुहोस्‌। अनावश्‍यक कुरामा पैसा खेर फाल्नुभएन भने तपाईँले केही पैसा बचत गर्न सक्नुहुनेछ र भइपरी आउने अवस्थाको लागि तयार रहन सक्नुहुनेछ।

अनावश्‍यक खर्च हुन नदिन एउटा बजेट तयार पार्नुहोस्‌। आफ्नो कमाइ कति छ र खर्च कति हुन्छ भनेर सूची बनाउनुहोस्‌। त्यसरी सूची बनाउँदा आफूलाई अत्यन्तै आवश्‍यक कुराहरू मात्र लेख्नुहोस्‌। तपाईँले बनाउनुभएको बजेटअनुसारै चल्ने कोसिस गर्नुहोस्‌ र पछि गएर आफ्नो आम्दानी वा खर्चमा केही घटबढ भयो भने आवश्‍यक छाँटकाँट गर्नुहोस्‌। यदि तपाईँ विवाहित हुनुहुन्छ भने आफ्नो जोडीसँगै मिलेर यससम्बन्धी निर्णयहरू गर्नुहोस्‌।

यसो गरे कसो होला? उधारोमा वा ऋण लिएर सरसामान नकिन्‍नुहोस्‌। केही सामान किन्दै हुनुहुन्छ भने अनलाइनमार्फत तिर्नुको सट्टा सकेसम्म नगद प्रयोग गर्नुहोस्‌। यसो गर्दा थुप्रैलाई आफ्नो बजेटमै रहन र अनावश्‍यक खर्चदेखि जोगिन सजिलो भएको छ। साथै आफ्नो बैङ्‌क खातामा कति रकम बाँकी छ भनी बेलाबेला हेर्ने गर्नुहोस्‌। यसो गर्दा तपाईँ आफ्नो बजेटअनुसारै चल्न सक्नुहुनेछ र तपाईँको चिन्ता पनि कम हुनेछ।

कम खर्चमा गुजारा टार्न सजिलो त छैन तर व्यावहारिक हुँदै अनि सोचविचार गर्दै बजेट बनाउँदा तपाईँलाई निकै मदत मिल्नेछ। पैसाले गर्दा हुने चिन्ता-फिक्रीदेखि पनि तपाईँ अलग रहन सक्नुहुनेछ।

आफ्नो जागिरको मोल गर्नुहोस्‌। तपाईँले आफ्नो जागिर नगुमाउन कस्ता व्यावहारिक कदमहरू चाल्न सक्नुहुन्छ? समयनिष्ठ हुनुहोस्‌, कामप्रति सकारात्मक दृष्टिकोण राख्नुहोस्‌, अरूलाई मदत गर्न अग्रसर हुनुहोस्‌, मेहनती हुनुहोस्‌ र आदर देखाउनुहोस्‌। साथै नियमहरू पालन गर्नुहोस्‌ र आफ्नो सिप तिखार्नुहोस्‌।

पैसा खेर नफाल्नुहोस्‌। आफैलाई सोध्नुहोस्‌: ‘के मेरो पैसा खेर फाल्ने बानी छ?’ उदाहरणको लागि, थुप्रै मानिसहरूले आफ्नो मेहनतको कमाइ चुरोट, रक्सी, लागूऔषध र जुवातासजस्ता कुराहरूमा उडाउने गर्छन्‌। यस्तो बानीले तिनीहरूको स्वास्थ्य र जागिर दुवैमा असर पुऱ्‍याउँछ।

आकस्मिक अवस्थाको लागि बचत गर्नुहोस्‌। यदि सक्नुहुन्छ भने आकस्मिक अवस्थाको लागि केही पैसा छुट्ट्याएर राख्नुहोस्‌। यसो गर्नुभयो भने परिवारमा कसैलाई स्वास्थ्य समस्या आइपर्दा, जागिर गुम्दा वा कुनै नचिताएको घटना घट्‌दा तपाईँ अत्तालिनुहुनेछैन।