अध्याय तीन
परमेश्वरको वचन दह्रिलो गरी पक्रिराख्नुहोस्
१.(क) पुरातन इस्राएलले कसरी परमेश्वरको वचनको सत्यता बुझ्यो? (ख) त्यो हाम्रोलागि किन चासोको विषय हो?
“परमप्रभु परमेश्वरले तिमीहरूका बारेमा भन्नुभएको सबै असल कुराहरूमा एउटा कुरा पनि फरक परेको छैन। तिमीहरूका निम्ति सबै पुगेको छ, र एउटा पनि त्यसबाट फरक परेको छैन भनी तिमीहरूको आफ्नो पूरा हृदयले र पूरा प्राणले थाह पाएकै छौ।” (यहोशू २३:१४-१६) प्रतिज्ञा गरिएको देशमा बसोबास गरिसकेपछि यहोशूले इस्राएलका बूढा प्रधानहरूलाई यसो भनेका थिए। हो, यहोवाका प्रतिज्ञाहरू भरपर्दो साबित भए। यो लगायत बाइबलका बाँकी सबै विवरणहरू “हामीलाई आशा होस्” भनेर सुरक्षित गरिएको थियो।—रोमी १५:४.
२. (क) कुन अर्थमा बाइबल “परमेश्वरबाट प्रेरणा भएको” छ? (ख) बाइबल ईश्वरप्रेरित पुस्तक हो भनेर थाह पाएपछि हामीमाथि कस्तो जिम्मेवारी आइपर्छ?
२ बाइबलको विवरण लगभग ४० जना मानिसहरूले लेखेको भए तापनि यसको ग्रन्थकार स्वयम् यहोवा हुनुहुन्छ। के यसको मतलब यसमा लेखिएका सबै कुरामाथि परमेश्वरको प्रत्यक्ष निगरानी थियो? अवश्य। उहाँले आफ्नो शक्तिशाली पवित्र आत्मा अर्थात् आफ्नो सक्रिय शक्तिद्वारा यस्तो निगरानी गर्नुभयो। प्रेरित पावलले सत्य कुरा बताउँदै यसो भने: “परमेश्वरबाट प्रेरणा भएको हरेक धर्मशास्त्र . . . र परमेश्वरको जन हरेक सुकर्ममा पूर्णरूपले सुसज्जित भई सिद्ध भएको होस्।” यो कुरामा विश्वस्त संसारभरका मानिसहरू बाइबलको कुरा पालन गर्छन् अनि यसैअनुसार आफ्नो जीवन बिताउँछन्।—२ तिमोथी ३:१६, १७; १ थिस्सलोनिकी २:१३.
यसको मूल्यांकन गर्न अरूलाई मदत गर्नुहोस्
३. बाइबल, परमेश्वरको वचन हो भन्ने कुरामा विश्वस्त नभएका अधिकांश मानिसहरूलाई मदत गर्ने सर्वोत्तम तरिका के हो?
३ हामीले भेट्ने धेरै मानिसहरूले बाइबल, परमेश्वरको वचन हो भनेर विश्वास गर्दैनन्। हामी तिनीहरूलाई कसरी मदत गर्न सक्छौं? प्रायजसो, बाइबल पल्टाएर त्यसमा भएको कुरा देखाइदिनु सबैभन्दा राम्रो तरिका हो। “परमेश्वरको वचन जीवित र प्रबल, र कुनै दुइ-धारे तरवारभन्दा पनि धारिलो, . . . हृदयको भावना र विचारलाई जाँच्न सक्ने हुन्छ।” (हिब्रू ४:१२) “परमेश्वरको वचन” वर्तमान समयमा महत्त्वहीन इतिहास होइन; यो जीवित छ! बाइबलमा गरिएका प्रतिज्ञाहरू पूरा हुनदेखि कुनै कुराले रोक्न सक्दैन। बाइबलबाट प्रभावित भएर मानिसको हृदयबाट निस्कने उत्प्रेरणा, हामीले व्यक्तिगत रूपमा भन्ने जस्तोसुकै कुराभन्दा निकै प्रभावकारी हुन्छ।
४. बाइबल सत्यबारे कस्ता जवाफहरूले बाइबलप्रति कसै-कसैको मनोवृत्ति बदलिएको छ र किन?
४ बाइबलमा परमेश्वरको नाउँ देख्दा धेरै मानिसहरू बाइबललाई अझ गहिरिएर केलाउन उत्प्रेरित भएका छन्। अरू कतिपयले भने, जीवनको उद्देश्य, परमेश्वरले दुष्टता रहिरहन दिनुको कारण, वर्तमान घटनाहरूको अर्थ वा पार्थिव प्रमोदवनमा अनन्त जीवनको आशाबारे थाह पाएपछि बाइबल अध्ययन गर्ने निधो गरेका छन्। विभिन्न धार्मिक प्रचलनहरूले गर्दा दुष्टात्माबाट पीडित मुलुकका मानिसहरू यसो हुनुको कारण के हो र यसबाट कसरी छुटकारा पाउन सकिन्छ भनी बाइबलको जवाफ सुन्दा तिनीहरूको चासो जागेको छ। यी बुँदाहरूले किन इमानदार मानिसहरूलाई असर गर्छ? किनभने यस्ता सबै महत्त्वपूर्ण विषयहरूको एक मात्र भरपर्दो स्रोत, बाइबल हो।—भजन ११९:१३०.
५.(क) मानिसहरूले बाइबलमा विश्वास गर्दैनौं भनी बताउनुका कारणहरू के-के हुन सक्छन्? (ख) हामी त्यस्ता मानिसहरूलाई कसरी मदत गर्न सक्छौं?
५ तथापि, मानिसहरूले बाइबलमा विश्वास लाग्दैन भनेको खण्डमा नि? के हाम्रो कुरा त्यहीं टुंग्याउनु जरुरी छ? तिनीहरू आफ्नो सोच्ने क्षमता प्रयोग गर्न इच्छुक छन् भने कुरा त्यतिमै टुंग्याउनु जरुरी छैन। हुनसक्छ, तिनीहरूलाई बाइबल, मसीहीजगत्को पुस्तकजस्तो लाग्छ। मसीहीजगत्मा व्याप्त कपट र राजनैतिक मामिलामा हस्तक्षेपको इतिहास साथै चन्दा संकलनजस्ता कुराहरूले गर्दा बाइबलप्रति तिनीहरूको नकारात्मक धारणा भएको हुन सक्छ। यसले गर्दा नकारात्मक छाप परेको हो कि भनी सोध्नुभए कसो होला? मसीहीजगत्को सांसारिक तौरतरिकामाथि बाइबलको न्यायदण्ड अनि मसीहीजगत् र साँचो मसीही धर्मबीचको भिन्नता बुझेपछि तिनीहरूको चासो जाग्न सक्छ।—मीका ३:११, १२; मत्ती १५:७-९; याकूब ४:४.
६. (क) बाइबल, परमेश्वरको वचन हो भनेर तपाईं कसरी विश्वस्त हुन सक्नुभयो? (ख) बाइबल साँच्चै परमेश्वरले दिनुभएको वचन हो भनेर अरूलाई बुझ्ने मदत दिन तपाईं कस्ता तर्कहरू प्रयोग गर्न सक्नुहुन्छ?
६ अरू कतिपयको लागि भने बाइबल, परमेश्वरको प्रेरित वचन हो भनी प्रमाणहरू प्रस्तुत गर्ने सुस्पष्ट छलफल पर्याप्त हुन सक्छ। बाइबल साँच्चै यहोवा परमेश्वरको वचन हो भनी तपाईंलाई विश्वास लागेको कारण के हो? के बाइबलले आफ्नो स्रोतबारे बताएको कुराले हो? अथवा अलौकिक स्रोतबाट भविष्यबारे विस्तृत छलफल गरिएका अनगिन्ती भविष्यवाणीहरू समावेश भएकाले पो हो कि? (२ पत्रुस १:२०, २१) बाइबल ४० जना मानिसले १,६०० वर्षको दौडान लेखेको भए तापनि यसमा भएको आपसी तालमेलले गर्दा हो कि? अथवा त्यतिबेलाका अरू लेखोटहरूको तुलनामा यसको वैज्ञानिक सत्यताले गर्दा हो? अथवा लेखकहरूको निष्कपटता? अथवा यसलाई नामेट पार्ने भीषण प्रयासको बावजुद संरक्षित भएकोले हो? तपाईंलाई व्यक्तिगत रूपमा प्रभावकारी लागेको बुँदा नै प्रयोग गरेर अरूलाई मदत गर्न सक्नुहुन्छ।a
हाम्रो बाइबल पढाइ
७, ८. (क) हामीले बाइबल के गर्नुपर्छ? (ख) व्यक्तिगत बाइबल पढाइको अलावा हामीले के गर्नुपर्छ? (ग) तपाईंले व्यक्तिगत तवरमा कसरी यहोवाका उद्देश्यहरूको समझ प्राप्त गर्नुभयो?
७ बाइबलमाथि विश्वास गर्न अरूलाई मदत दिनुको अलावा हामी आफैले पनि यो नियमित तवरमा पढ्न समय निकाल्नुपर्छ। के तपाईंले त्यसो गरिरहनुभएको छ? अहिलेसम्म प्रकाशित पुस्तकहरूमध्ये यो सबैभन्दा महत्त्वपूर्ण हो। निस्सन्देह, यसको मतलब हामी आफैले मात्र पढे पुग्छ भनेको होइन। धर्मशास्त्रले हामीलाई अरूबाट टाढिएर एक्लै बस्नदेखि सतर्क गराउँछ। हामी आफैले अनुसन्धान गरेर सबै कुरा पत्ता लगाउन सक्छौं भन्ने सोचाइ राख्नु हुँदैन। हामी सन्तुलित मसीहीहरू हुन चाहन्छौं भने व्यक्तिगत अध्ययन गर्नुका साथै परमेश्वरका जनहरूको सभामा नियमित तवरमा उपस्थित हुनु अत्यावश्यक हुन्छ।—हितोपदेश १८:१; हिब्रू १०:२४, २५.
८ यस सन्दर्भमा बाइबलले एक जना इथियोपियाली नपुंसकबारे बताउँछ जसले यशैयाको भविष्यवाणीबारे पढिरहेका थिए। एक जना स्वर्गदूतले मसीही सुसमाचारक फिलिपलाई यस्तो प्रश्न सोध्न लगायो: “के तपाईंले पढिरहनुभएको कुरा बुझ्नुहुन्छ?” नम्र भएर उक्त इथियोपियालीले यस्तो जवाफ दिए: “कसैले नबताईकन म कसरी बुझौंला र?” तिनले फिलिपलाई धर्मशास्त्रको उक्त पद्यांशबाट बुझाइदिने आग्रह गरे। फिलिप धर्मशास्त्रबारे आफ्नो धारणा व्यक्त गर्ने स्वतन्त्र बाइबल पाठक मात्र थिएनन्। तिनले परमेश्वरको दृश्य संगठनसित नजिकको सम्बन्ध राखेका थिए। त्यसैकारण, तिनले उक्त संगठनमार्फत यहोवाले उपलब्ध गराइरहनुभएको निर्देशन लिएर त्यस इथियोपियाली नपुंसकलाई मदत गर्न सके। (प्रेरित ६:५, ६; ८:५, २६-३५) त्यसरी नै आज कसैले पनि आफ्नै भरमा मात्र यहोवाका उद्देश्यहरूको सही समझ प्राप्त गर्न सक्दैन। हामी सबैलाई यहोवाले आफ्नो दृश्य संगठनमार्फत मायालु ढंगमा प्रदान गर्नुहुने सहयोग चाहिन्छ।
९. बाइबल पढाइको कस्तो तालिकाले हामीलाई फाइदा पुऱ्याउन सक्छ?
९ हामीलाई बाइबलको कुरा बुझ्ने मदत दिन यहोवाको संगठनले विभिन्न प्रकाशनहरूमार्फत उत्कृष्ट धर्मशास्त्रीय विषयवस्तु प्रदान गर्छ। साथै, संसारभरि यहोवाका साक्षीहरूको सबै मण्डलीहरूमा सञ्चालन हुने ईश्वरतान्त्रिक सेवकाई स्कूलमा नियमित बाइबल पढाइको तालिका तयार गरिएको छ। हामीले व्यक्तिगत तवरमा पवित्र धर्मशास्त्र केलाउँदा ठूलो लाभ उठाउन सक्छौं। (भजन १:१-३; १९:७, ८) नियमित तवरमा बाइबल पढ्ने विशेष प्रयास गर्नुहोस्। आफूले पढेको कुरा सबै नबुझे तापनि धर्मशास्त्रबारे मोटामोटी रूपमा ज्ञान हुनु निकै लाभदायी हुनेछ। उदाहरणका लागि, तपाईंले दिनहुँ चार पाँच पाना पढ्नुभयो भने पनि वर्षभरिमा पूरै बाइबल पढ्न सक्नुहुन्छ।
१०. (क) तपाईं कहिले बाइबल पढाइ गर्नुहुन्छ? (ख) बाइबल पढ्दा अरू क-कसलाई समावेश गर्नुपर्छ अनि यो नियमित तवरमा गर्नु किन महत्त्वपूर्ण छ?
१० तपाईंले कहिले बाइबल पढाइ गर्न सक्नुहुन्छ? तपाईंले हरेक दिन १०/१५ मिनेट छुट्याउनुभएको खण्डमा पनि ठूलो लाभ उठाउनुहुनेछ। त्यति पनि नभए, हरेक हप्ता समय छुट्याउनुहोस् अनि त्यो तालिकाअनुसारै गर्नुहोस्। तपाईं विवाहित हुनुहुन्छ भने पति र पत्नी दुवैले ठूलो स्वरमा पालै पालो बाइबल पढ्न सक्नुहुन्छ। पढ्न सक्ने उमेरका केटाकेटीहरू छन् भने पालै पालो पढ्न लगाउन सकिन्छ। बाइबल पढाइ भनेको भोजन खानेझैं आजीवन बानी हुनुपर्छ। तपाईंलाई थाहै होला, मानिसको भोजन गर्ने बानी राम्रो छैन भने उसको स्वास्थ्यमा नराम्रो असर पर्नेछ। त्यसरी नै, “परमेश्वरका मुखबाट निस्केको हरेक वचनले” दिने नियमित पोषणमा हाम्रो आध्यात्मिक जीवन अनि अनन्त जीवन निर्भर छ।—मत्ती ४:४.
हाम्रो लक्ष्य
११. बाइबल पढ्दा हाम्रो लक्ष्य के हुनुपर्छ?
११ बाइबल पढ्दा हाम्रो लक्ष्य के हुनुपर्छ? हाम्रो लक्ष्य दुई चार पाना पढ्न सिध्याउने मात्र हुनु हुँदैन। हाम्रो मनसाय परमेश्वरप्रति प्रेम बढाएर उहाँलाई स्वीकार्य ढंगमा उपासना गर्ने हेतुले उहाँलाई अझ राम्ररी चिन्ने हुनुपर्छ। (यूहन्ना ५:३९-४२) हाम्रो मनोवृत्ति यी बाइबल लेखकको जस्तो हुनुपर्छ: “तपाईंको मार्ग मलाई देखाउनुहोस्, हे परमप्रभु। तपाईंको बाटो मलाई दिनुहोस्।”—भजन २५:४.
१२. (क) “सही ज्ञान” हासिल गर्नु किन आवश्यक छ र त्यस्तो ज्ञान लिन हामीले बाइबल पढ्दा कस्तो प्रयास गर्नुपर्ने हुन सक्छ? (ख) बाइबलमा पाइने कुराहरू केलाउन कुन चारवटा बुँदाहरू प्रयोग गरेर हामी लाभ उठाउन सक्छौं? (पृष्ठ ३० को पेटी हेर्नुहोस्।) (ग) यस अनुच्छेदमा दिइएका प्रश्नहरू प्रयोग गरेर यी बुँदाहरू स्पष्ट पार्नुहोस्। उद्धरण नगरी उल्लेख मात्र गरिएका शास्त्रपदहरू पल्टाएर हेर्नुहोस्।
१२ यहोवाबाट शिक्षा प्राप्त गर्दा हाम्रो इच्छा “सही ज्ञान” हासिल गर्ने हुनुपर्छ। सही ज्ञान नभएको खण्डमा हामी परमेश्वरको वचन आफ्नो जीवनमा लागू गर्न वा अरूलाई सही ढंगमा कसरी बुझाउन सक्छौं? (कलस्सी ३:१०, NW; २ तिमोथी २:१५) सही ज्ञान हासिल गर्न हामीले ध्यान दिएर पढ्नुपर्छ अनि कुनै भाग बुझ्न गाह्रो भएमा त्यसको पूरा अर्थ बुझ्न धेरै चोटि पढ्नुपर्ने हुन सक्छ। हामीले विषयवस्तुमाथि विभिन्न दृष्टिकोणबाट मनन गर्न समय निकाल्यौं भने पनि लाभ उठाउन सक्नेछौं। हामीले विचार गर्न सक्ने चारवटा महत्त्वपूर्ण पक्ष पृष्ठ ३० मा देखाइएको छ। यी दृष्टिकोणमध्ये एउटा वा बढी प्रयोग गरेर धर्मशास्त्र केलायौं भने लाभ उठाउन सक्नेछौं। यसपछिका पानाहरूमा दिइएका प्रश्नहरूको जवाफ केलाउनुहुँदा यो कुरा प्रस्ट हुनेछ।
(१) प्रायजसो, तपाईंले पढ्नुहुने धर्मशास्त्रको अंशले यहोवा कस्तो परमेश्वर हुनुहुन्छ भनेर बताउँछ। उदाहरणका लागि, भजन १३९:१३, १४ मा गर्भमा भएको शिशुप्रति परमेश्वरको ठूलो चासोबारे बुझ्छौं: “तपाईंले मलाई मेरी आमाको गर्भैमा रच्नुभयो। म तपाईंलाई धन्यवाद दिनेछु। किनकि म भयानक र आश्चर्य रीतिले बनिएको छु। तपाईंका कार्यहरू आश्चर्यका छन्। र ती कुरा मेरो आत्माले राम्ररी जान्दछ।” यहोवाको सृजनात्मक कार्यहरू कत्ति अद्भुत छन्! मानिसको बनोटले नै हामीप्रति उहाँको महान् प्रेमको पुष्टि दिन्छ।
यूहन्ना १४:९, १० मा बताइएको कुरालाई विचार गर्दै येशूले अरूसित गर्नुभएको व्यवहारबारे पढ्दा हामी यहोवाले कस्तो व्यवहार गर्नुहुन्छ भनी बुझिरहेका हुन्छौं। यो कुरालाई मनमा राख्दै लूका ५:१२, १३ र लूका ७:११-१५ मा लिपिबद्ध घटनाहरूबाट यहोवाबारे कस्तो निष्कर्षमा पुग्न सक्छौं?
(२) उक्त विवरण बाइबलको मूल ध्येयसित कसरी सम्बन्धित छ, विचार गर्नुहोस्: प्रतिज्ञा गरिएको सन्तान, येशू ख्रीष्ट अन्तर्गतको राज्यमार्फत यहोवाको सार्वभौमिकता उच्च पार्ने तथा उहाँको नाउँ पवित्र गर्ने।
इजकिएल र दानियलले कसरी बाइबलको मूल ध्येयलाई जोड दिए? (इजकिएल ३८:२१-२३; दानियल २:४४; ४:१७; ७:९-१४)
बाइबलले प्रतिज्ञा गरिएको सन्तान येशू नै हुनुहुन्छ भनेर कसरी स्पष्टसित चिनाउँछ? (गलाती ३:१६)
प्रकाशको पुस्तकले परमेश्वरको राज्यको मूल ध्येयको चरमोत्कर्ष कसरी वर्णन गर्छ? (प्रकाश ११:१५; १२:७-१०; १७:१६-१८; १९:११-१६; २०:१-३; २१:१-५)
(३) आफूले पढेको कुराको व्यक्तिगत उपयोग कसरी गर्न सक्नुहुन्छ, आफैलाई सोध्नुहोस्। उदाहरणका लागि, हामी प्रस्थानदेखि व्यवस्थासम्मको विवरणमा इस्राएलको अनैतिकता र विद्रोहबारे पढ्छौं। यस्तो मनोवृत्ति र कार्यले खराब परिणाम ल्यायो भनेर हामीले थाह पायौं। तसर्थ, हामी इस्राएलको खराब उदाहरण अनुकरण नगरेर यहोवालाई प्रसन्न तुल्याउन उत्प्रेरित हुनुपर्छ। “यी कुराहरू तिनीहरूलाई उदाहरणको रूपमा भएथे, र हाम्रो चेताउनीको निम्ति लेखिएका हुन्, जसमाथि पुस्ताहरूको अन्त हुनलागेको छ।”—१ कोरिन्थी १०:११.
कयिनले हाबिललाई मारेको विवरणबाट हामी कस्तो पाठ सिक्न सक्छौं? (उत्पत्ति ४:३-१२; हिब्रू ११:४; १ यूहन्ना ३:१०-१५; ४:२०, २१)
बाइबलले स्वर्गमा जाने आशा भएका मसीहीहरूलाई दिने सल्लाह के पृथ्वीमा अनन्त जीवन बिताउने आशा भएका मानिसहरूलाई पनि लागू हुन्छ? (गन्ती १५:१६; यूहन्ना १०:१६)
मसीही मण्डलीमा हामी आदरणीय छौं भने पनि हामीले थाह पाइसकेका बाइबलको सल्लाह कसरी लागू गर्न सक्छौं भनी किन अझ बढी विचार गर्नुपर्छ? (२ कोरिन्थी १३:५; १ थिस्सलोनिकी ४:१)
(४) आफूले पढेको कुरा अरूलाई मदत दिन कसरी प्रयोग गर्न सकिन्छ भनेर विचार गर्नुहोस्। सबै मानिसहरू स्वास्थ्य समस्याबारे चिन्तित छन्, त्यसकारण हामीले तिनीहरूलाई परमेश्वरको राज्यका राजाको हैसियतमा अझ विस्तृत तवरमा येशूले के गर्नुहुनेछ भनेर देखाउन यो पढेर सुनाउन सक्छौं: “तब त्यहाँ लंगडा, अन्धा, लाटा, कूँजो र धेरै अरूहरूसित भएका ठूलो भीड उहाँकहाँ आए . . . र उहाँले तिनीहरूलाई निको पार्नुभयो।”—मत्ती १५:३०.
याइरसकी छोरीको पुनरुत्थानको विवरणबाट कसलाई मदत दिन सकिन्छ? (लूका ८:४१, ४२, ४९-५६)
१३. यहोवाको संगठनले प्रदान गरेको बाइबल पढाइ र अध्ययन तालिकाअनुसार गर्दा हामी कस्तो परिणाम आशा गर्न सक्छौं?
१३ माथि उल्लिखित चारवटा बुँदा विचार गर्दा बाइबल पढाइ कस्तो इनामदायी हुन्छ! हुन त, बाइबल पढ्नु चुनौतीपूर्ण कार्य हो। तर यसले हामीलाई आजीवन लाभ पुऱ्याउँछ किनभने धर्मशास्त्र पढ्दा हामी आध्यात्मिक तवरमा बलियो हुन्छौं। नियमित बाइबल पढाइले हामीलाई हाम्रो मायालु पिता, यहोवा र हाम्रा मसीही भाइहरूसित नजिक बनाउनेछ। यसले हामीलाई “जीवनको वचन दह्रिलो गरी पक्रिराख” भन्ने सल्लाह पालन गर्न मदत गर्नेछ।—फिलिप्पी २:१६, नयाँ संशोधित संस्करण।
[फुटनोट]
a बाइबल, छलफल गर्न योग्य हुनुको कारणबारे यहोवाका साक्षीहरूद्वारा प्रकाशित सबैका लागि उपयोगी किताब भन्ने पुस्तिका हेर्नुहोस्।
पुनरावृत्ति छलफल
• बाइबल किन लेखियो र हाम्रो समयसम्म संरक्षित गरियो?
• हामी अरूलाई बाइबल बुझ्न कसरी मदत गर्न सक्छौं?
• नियमित बाइबल पढ्नु किन लाभदायी हुन्छ? कुन चारवटा बुँदा प्रयोग गरेर केलाउँदा लाभदायक हुन सक्छ?
[पृष्ठ ३०-मा भएको पेटी/चित्र]
बाइबलको कुनै अंश पढ्नुहुँदा विचार गर्नुहोस्,
यसले यहोवा कस्तो परमेश्वर हुनुहुन्छ भनेर बताउँछ
यो सम्पूर्ण बाइबलको मूल ध्येयसित कसरी सम्बन्धित छ
यसले हाम्रो आफ्नो जीवनमा कस्तो असर पार्नुपर्छ
अरूलाई मदत दिन यो तपाईं कसरी प्रयोग गर्न सक्नुहुन्छ