विश्वासी जनहरूसित गर्नुभएका प्रतिज्ञाहरू यहोवाले पूरा गर्नुहुन्छ
“प्रतिज्ञा गर्नुहुने जो हुनुहुन्छ, उहाँ विश्वासयोग्य हुनुहुन्छ।”—हिब्रू १०:२३.
१, २. यहोवाले गर्नुभएका प्रतिज्ञाहरूमा किन पूर्ण विश्वस्त हुनसक्छौं?
आफ्ना जनहरूले उहाँ तथा उहाँका प्रतिज्ञाहरूमा दृढ विश्वास राखून् भन्ने यहोवा चाहनुहुन्छ। यस्तो विश्वास भएमा यहोवाले आफ्ना प्रतिज्ञाहरू अवश्य पूरा गर्नुहुन्छ भनेर पूर्ण विश्वास राख्न सकिन्छ। उहाँको प्रेरित वचन घोषणा गर्छ: “सेनाहरूका परमप्रभुले यसो भनेर शपथ खानुभएको छ, जो युक्ति मैले गरेको छु, त्यो निश्चय पूरा हुनेछ, जो अभिप्राय मैले गरेको छु, त्यो स्थिर रहनेछ।”—यशैया १४:२४.
२ “सेनाहरूका परमप्रभुले यसो भनेर शपथ खानुभएको छ” भन्ने वाक्यले उहाँले आफ्ना प्रतिज्ञाहरू पूरा गर्ने गम्भीर शपथ खानुभएको छ भनी जनाउँछ। त्यसैले त उहाँको वचन यसो भन्छ: “तेरो सारा भरोसा परमेश्वरमा राख् र तेरो आफ्नै समझ-शक्तिमा भरोसा नगर्। आफ्नो सबै चालमा उहाँलाई सम्झी र उहाँले तेरा बाटोहरू सुगम तुल्याइदिनुहुनेछ।” (हितोपदेश ३:५, ६) यहोवामा पूरा भरोसा राख्यौं र उहाँको ज्ञानलाई जीवनको मार्गदर्शक बनायौं भने हामी हिंड्ने बाटोले अनन्त जीवनतर्फ डोऱ्याउने छ भन्ने कुरामा रत्तिभर शंका हुनेछैन। किनकि परमेश्वरको वचन “समात्नेहरू सबैका निम्ति त्यो जीवनको सहारा हो।”—हितोपदेश ३:१८; यूहन्ना १७:३.
प्राचीन समयमा साँचो विश्वास
३. नूहले कसरी यहोवामाथि विश्वास प्रदर्शित गरे?
३ यहोवाले साँचो विश्वास भएका मानिसहरूसँग गर्नुभएका व्यवहारहरूको रेकर्डले उहाँ भरोसायोग्य हुनुहुन्छ भन्ने प्रमाण दिन्छ। उदाहरणका लागि, नूहको समयको संसार विश्वव्यापी जलप्रलयद्वारा नाश गरिनेछ भनी आजभन्दा ४,४०० वर्षअघि परमेश्वरले तिनलाई बताउनुभयो। उहाँले मानिस र पशुप्राणीहरू बचाउन नूहलाई एउटा विशाल जहाज बनाउने आज्ञा दिनुभयो। नूहले के गरे? हिब्रू ११:७ भन्छ: “विश्वासैबाट त्यस बेलासम्म नदेखिएका कुरामा परमेश्वरबाट जनाउ पाएपछि आफ्ना परिवारलाई बचाउन नूहले जहाज तयार पारे।” त्योभन्दा पहिले कहिल्यै नभएका वा “त्यस बेलासम्म नदेखिएका कुरामा” नूहले किन विश्वास गरे? किनकि परमेश्वरले भन्नुभएका एक एक कुरा पूरा हुनेछ भनेर मूल्यांकन गर्न नूहलाई परमेश्वरले त्यसअघिका मानव परिवारसँग गर्नुभएका व्यवहारहरू थाह थियो। त्यसैकारण, जलप्रलय पक्कै आउनेछ भनेर नूह विश्वस्त थिए।—उत्पत्ति ६:९-२२.
४, ५. अब्राहामले यहोवामा किन पूर्ण भरोसा राखे?
४ साँचो विश्वासको अर्को उदाहरण अब्राहाम हुन्। आजभन्दा झन्डै ३,९०० वर्षअघि, परमेश्वरले अब्राहामलाई तिनकी पत्नी सारातर्फको एकमात्र छोरो इसहाक बलिदान चढाउने आज्ञा दिनुभयो। (उत्पत्ति २२:१-१०) अब्राहामले के गरे? हिब्रू ११:१७ भन्छ: “विश्वासैबाट अब्राहामले परीक्षा हुँदा इसहाकलाई चढ़ाए।” तथापि, इसहाकलाई बलिदान चढाउनै लाग्दा यहोवाको दूतले अब्राहामलाई रोके। (उत्पत्ति २२:११, १२) यद्यपि, त्यस्तो काम गर्न अब्राहाम किन तयार भए? किनकि हिब्रू ११:१९ भन्छ, “मरेकोबाट पनि परमेश्वरले [इसहाकलाई] बिउँताउनसक्नुहुन्छ भन्ने [तिनले] विचार गरे।” तर पुनरुत्थान भएको व्यक्ति नै नदेखी अनि त्यतिखेर पुनरुत्थान भएको कुनै रेकर्ड नै नभए पनि अब्राहामले पुनरुत्थानमा कसरी विश्वास गर्नसके त?
५ नबिर्सनुहोस्, परमेश्वरले तिनीहरूको छोरो जन्मने प्रतिज्ञा गर्नुहुँदा सारा ८९ वर्ष पुगिसकेकी थिइन्। सारा गर्भधारण गर्न नसक्ने अवस्थामा पुगिसकेकी थिइन्। अर्को शब्दमा भन्ने हो भने निष्क्रिय भइसकेकी थिइन्। (उत्पत्ति १८:९-१४) परमेश्वरले साराको गर्भ फेरि सक्रिय बनाउनुभयो र तिनले इसहाक जन्माइन्। (उत्पत्ति २१:१-३) परमेश्वरले साराको निष्क्रिय गर्भ त फेरि सक्रिय बनाउनुभयो भने आवश्यक परेमा इसहाकलाई पनि फिर्ता ल्याउन सक्नुहुन्छ भनेर अब्राहामलाई थाह थियो। अब्राहामको विषयमा रोमी ४:२०, २१ यसो भन्छ: “परमेश्वरको प्रतिज्ञाको बारेमा अविश्वासले डग्मगाएनन्, तर परमेश्वरलाई महिमा दिएर विश्वासमा स्थिर भइरहे। औ जे उहाँले प्रतिज्ञा गर्नुभएको छ, त्यो पूरा पनि गर्नसक्नुहुन्छ भन्ने कुरा उनलाई बिल्कुल निश्चय भए।”
६. यहोशूले यहोवामाथिको विश्वस्तता कसरी व्यक्त गरे?
६ आजभन्दा ३,४०० वर्षअघिको कुरा हो। सय वर्ष नाघिसकेका यहोशूले परमेश्वर भरोसायोग्य हुनुहुन्छ भनेर जीवनभर अनुभव गरिसकेपछि यहोवाप्रति विश्वस्त हुनुको कारण यसरी बताए: “परमप्रभु परमेश्वरले तिमीहरूका बारेमा भन्नुभएको सबै असल कुराहरूमा एउटा कुरा पनि फरक परेको छैन। तिमीहरूका निम्ति सबै पुगेको छ, र एउटा पनि त्यसबाट फरक परेको छैन भनी तिमीहरूको आफ्नो पूरा हृदयले र पूरा प्राणले थाह पाएकै छौ।”—यहोशू २३:१४.
७, ८. विश्वासी मसीहीहरूले प्रथम शताब्दीमा कस्तो जीवन रक्षक कदम चाले र किन?
७ आजभन्दा लगभग १,९०० वर्षअघि थुप्रै नम्र मानिसहरूले साँचो विश्वास प्रदर्शित गरे। बाइबल भविष्यवाणी पूर्तिअनुरूप येशू नै मसीह हुनुहुन्छ भनी तिनीहरूले बुझे र उहाँका शिक्षाहरू ग्रहण गरे। तिनीहरूसँग येशूबारे विभिन्न तथ्य तथा हिब्रू धर्मशास्त्रको ठोस आधार थियो। फलतः तिनीहरूले येशूका शिक्षाहरू विश्वास गरे। तसर्थ, येशूले अविश्वासको कारण यहूदीया र यरूशलेममाथि न्याय हुनेछ भन्नुहुँदा तिनीहरूले उहाँको कुरा पत्याए। अनि तिनीहरूले आफ्नो ज्यान जोगाउन कस्तो कदम चाल्नुपर्छ भनी येशूले भन्नुहुँदा तिनीहरूले त्यसै गरे।
८ यरूशलेमलाई फौजले घेरेपछि तिनीहरू भाग्नुपर्छ भनी येशूले विश्वासी जनहरूलाई भन्नुभयो। रोमी फौज यरूशलेम विरुद्ध सा.यु. ६६ मा जाइलाग्यो। तर त्यतिखेर कुनै कारणबिना नै रोमी फौज त्यसै फर्क्यो। त्यसरी रोमी फौज फर्कनु मसीहीहरूका लागि शहरबाट भाग्ने संकेत थियो किनकि येशूले यसो भन्नुभएथ्यो: “जब यरूशलेमलाई फौजले घेरेको देखौला, तब त्यसको विनाश नजीकै आइपुगेछ भनेर जान। तब यहूदियामा हुनेहरू डाँड़ाहरूतिर भागून्। औ शहरभित्र हुनेहरू निस्किजाऊन्, र गाउँमा हुनेहरू त्यहाँभित्र नपसून्।” (लूका २१:२०, २१) साँचो विश्वास हुनेहरू यरूशलेम तथा वरिपरिका इलाकाबाट सुरक्षित ठाउँमा भागे।
विश्वासमा कमी हुनुका परिणामहरू
९, १०. (क) धार्मिक नेताहरूले येशूमाथि कसरी विश्वासको कमी देखाए? (ख) तिनीहरूको त्यस्तो विश्वासको कमीका परिणाम कस्ता भए?
९ साँचो विश्वास नहुनेहरूले के गरे? मौका पाएर पनि भागेनन्। आफ्ना नेताहरूले बचाइहाल्छन् नि भन्ने तिनीहरूले सोचे। यद्यपि, ती नेताहरू तथा तिनीहरूका चम्चाहरूले येशू नै मसीह हुनुहुन्छ भन्ने प्रमाण नपाएका भने होइनन्। त्यसोभए, तिनीहरूले उहाँको कुरा किन स्वीकारेनन् त? तिनीहरूको दुष्ट हृदयले गर्दा। येशूले लाजरसको पुनरुत्थान गर्नुभएपछि जनसाधारणको भीड देख्दा तिनीहरूको दुष्टता उदांग भयो। यूहन्ना ११:४७, ४८ भन्छ: “मुख्य पूजाहारीहरू र फरिसीहरूले एउटा महासभा [यहूदी उच्च अदालत] गरेर भने, ‘अब हामी के गरौं? किनभने यस मानिसले [येशूले] ता धेरै चिह्नहरू गरिरहेछ। यसलाई यसै छोड़िदियौं भने सबैले यसलाई विश्वास गर्नेछ, र रोमीहरूले आएर हाम्रा ठाउँ र जातिलाई समेत लैजानेछ।’ ” पद ५३ भन्छ: “यसैले त्यस दिनदेखि तिनीहरूले उहाँलाई मार्ने मतो बाँधे।”
१० मृत लाजरसलाई फेरि जीवित बनाउनुभएर येशूले कस्तो अद्भुत चमत्कार गर्नुभएको थियो! तर धार्मिक नेताहरू त्यही कारण येशूको हत्या गर्न चाहन्थे। तिनीहरूको घोर दुष्ट्याइँ झनै उदांग भयो किनकि “मुख्य पूजाहारीहरूले लाजरसलाई समेत मार्नालाई मतो गरे। किनभने तिनैले गर्दा यहूदीहरूमध्ये धेरै जना गएर येशूलाई विश्वास गरेका थिए।” (यूहन्ना १२:१०, ११) लाजरस भर्खरै बिउँतेका मात्र के थिए, ती पूजाहारीहरू फेरि तिनको लाश देख्न चाहन्थे! तिनीहरूलाई परमेश्वरको इच्छा तथा मानिसहरूको हितको केही वास्ता नै थिएन। तिनीहरू स्वार्थी थिए र आफ्नो ओहदा र फाइदा मात्र हेर्थे। “तिनीहरूले परमेश्वरको प्रशंसाभन्दा मानिसहरूको प्रशंसालाई बढ़ता रूचाउँथे।” (यूहन्ना १२:४३) तर तिनीहरूले विश्वासको कमीको मोल तिर्नुपऱ्यो। सा.यु. ७० मा रोमी फौज फर्केर आए। अनि तिनीहरूको घरबार तथा राष्ट्र तहसनहस पार्नुका साथै तिनीहरूमध्ये थुप्रैलाई मारे।
हाम्रो समयमा प्रदर्शित विश्वास
११. यस शताब्दीको प्रारम्भमा कसरी साँचो विश्वास प्रदर्शित भयो?
११ यस शताब्दीमा पनि थुप्रै पुरुष तथा स्त्रीहरूले साँचो विश्वास देखाएका छन्। उदाहरणका लागि, १९०० दशकको प्रारम्भतिर साधारणतया सबै मानिसहरू शान्तिमय, समृद्ध भविष्यको प्रत्याशामा थिए। तथापि, त्यतिखेर यहोवामा विश्वास राख्ने मानिसहरू चाहिं अब मानिसजाति भयंकर डरलाग्दो समयमा प्रवेश गर्नै लागेको छ भनी घोषणा गरिरहेका थिए। यही खराब समयबारे मत्ती अध्याय २४, २ तिमोथी अध्याय ३ तथा अन्य ठाउँहरूमा अगमवाणी गरिएका थिए। ती विश्वासी मानिसहरूले भनेका कुरा १९१४ मा प्रथम विश्वयुद्ध सुरु भएपछि चरितार्थ हुनथाले। अगमवाणी गरिएअनुसार नै संसार ‘आखिरी दिनको डरलाग्दो समयमा’ प्रवेश गऱ्यो। (२ तिमोथी ३:१) संसारको परिस्थितिबारे यहोवाका साक्षीहरूलाई कसरी पहिल्यै थाह भयो जबकि अन्य मानिसहरूलाई थाह भएन? किनकि यहोवाले भन्नुभएको एउटै कुरा पनि फरक पर्नेछैन भनी तिनीहरू यहोशूजस्तै विश्वस्त थिए।
१२. यहोवाले गर्नुभएको कुन चाहिं प्रतिज्ञामा आज उहाँका सेवकहरू पूर्ण विश्वस्त छन्?
१२ आज यहोवालाई विश्वास गर्ने उहाँका सेवकहरूको संख्या संसारभरि झन्डै ६० लाख पुगिसकेको छ। परमेश्वरको भविष्यसूचक वचन पूर्ति भएको प्रमाणको आधारमा उहाँले चाँडै यस हिंसात्मक तथा अनैतिक रीतिरिवाजको नामोनिसान मेटाउनुहुनेछ भनी तिनीहरूलाई थाह छ। अतः १ यूहन्ना २:१७ पूरा भएको देख्ने समय नजिकै आइपुगेको छ भनी तिनीहरू विश्वस्त छन्। त्यहाँ यसो भनिएको छ: “संसार बितिजान्छ, र त्यसको अभिलाषा पनि बितेर जान्छ, तर परमेश्वरको इच्छाबमोजिम गर्ने चाहिं सधैंभरि रहिरहन्छ।” यहोवाले उक्त भविष्यवाणी अवश्य पूरा गर्नुहुनेछ भनी उहाँका सेवकहरू पूर्णतया विश्वस्त छन्।
१३. तपाईं यहोवालाई कुन हदसम्म विश्वास गर्न सक्नुहुन्छ?
१३ तपाईं यहोवालाई कत्तिको विश्वास गर्न सक्नुहुन्छ? तपाईं आफ्नो ज्यान बाजी लगाउन सक्नुहुन्छ! उहाँको सेवाको खातिर आफ्नो ज्यान गुमाउनुपरे तापनि उहाँले पुनरुत्थानद्वारा झन् सुन्दर जीवन दिनुहुनेछ। येशू हामीलाई यस्तो आश्वासन दिनुहुन्छ: “बेला आउँछ, जब चिहानमा हुनेहरू [अर्थात् परमेश्वरको स्मरणमा रहनेहरू] सबैले उसको सोर सुन्नेछन्। [र] . . . निस्किआउनेछन्।” (यूहन्ना ५:२८, २९) के यस्तो कार्य फत्ते गर्नसक्ने कुनै डाक्टर, राजनैतिक नेता, वैज्ञानिक, व्यापारी या अरू मानिस तपाईंलाई थाह छ? तिनीहरू यस्तो कार्य गर्न सक्दैनन् भनेर तिनीहरूको विगतको रेकर्डले देखाउँछ। तर यहोवाले सक्नुहुन्छ, अनि उहाँले गर्नुहुनेछ!
विश्वासी जनहरूका लागि अद्भुत भविष्य
१४. विश्वासी जनहरूका लागि परमेश्वरको वचनले कस्तो अद्भुत भविष्यको प्रतिज्ञा गर्छ?
१४ येशूले परमेश्वरको स्वर्गीय राज्यअन्तर्गत चल्ने नयाँ संसार पक्कै आउनेछ भनी औंल्याउनुभयो। उहाँले भन्नुभयो: “धन्य नम्र हुनेहरू, किनभने तिनीहरूले पृथ्वीको अधिकार पाउनेछन्।” (मत्ती ५:५) यसले भजन ३७:२९ मा परमेश्वरले गर्नुभएको यो प्रतिज्ञालाई जोड दिन्छ: “धर्मात्माहरूले देश अधिकार गर्नेछन्, र त्यसैमा सधैंभरि रहन्छन्।” अनि येशूको मृत्यु हुनैलाग्दा एक अपराधीले उहाँमा विश्वास जाहेर गर्दा येशूले त्यसलाई भन्नुभयो: “आज, म तिमीलाई साँच्चै भन्दछु तिमी मसित प्रमोदवनमा हुनेछौ।” (लूका २३:४३, NW) हो, परमेश्वरको राज्यका राजाको हैसियतमा येशूले उक्त अपराधीलाई प्रमोदवनमा सधैंभरि बाँच्ने सुअवसरसहित पुनरुत्थान गर्नुहुनेछ। आज यहोवाको राज्यमा विश्वास गर्नेहरू त्यस्तो प्रमोदवनमा बाँच्ने उत्कट आशा गर्नसक्छन् जहाँ “[परमेश्वरले] तिनीहरूका आँखाबाट सबै आँसु पुछिदिनुहुनेछ, र फेरि मृत्यु हुनेछैन। औ शोक, रुवाइ, पीड़ा फेरि केही हुनेछैन।”—प्रकाश २१:४.
१५, १६. नयाँ संसारमा जीवन किन शान्तिमय हुनेछ?
१५ आउनुहोस्, हामी आफैलाई त्यो नयाँ संसारमा उभ्याऔं। त्यो संसारमा बाँचिरहेको कल्पना गरौं। प्रथमतः चारैतिर आनन्दित मानिसहरू पूर्ण शान्तिसित एकसाथ रहेको देख्छौं। यशैया १४:७ मा उल्लेख गरिएको जस्तै परिस्थितिमा तिनीहरू आनन्द उठाइरहेका छन्: “सारा पृथ्वीले विश्राम पाएको छ, र शान्त छ। तिनीहरू गाउनलागेका छन्।” तिनीहरू किन रमाहट गरिरहेका छन्? एउटा कारण, यसो ध्यान दिनुहोस् त, तिनीहरूको ढोकामा ताल्चा नै छैन। हिंसा वा अपराधको नामोनिसान नभएकोले ताल्चाको आवश्यकता पनि छैन। त्यो संसार परमेश्वरको वचनले बताएबमोजिम हुनेछ: “हरेक मानिस आफ्नो आफ्नो दाखको बोट र नेभाराको बोटमनि बस्नेछ। कसैले तिनीहरूलाई डर देखाउनेछैन।”—मीका ४:४.
१६ युद्धको पनि नामोनिसान छैन किनकि यस नयाँ संसारमा युद्ध गर्न मनाही छ। सम्पूर्ण हातहतियारहरू शान्ति कायम गर्ने औजार बनाइएको छ। यशैया २:४ पूर्णतया पूरा भएको छ: “तिनीहरूले आफ्ना आफ्ना तरवार पिटेर हलोको फाली र भाला चाहिं हँसिया बनाउनेछन्। एउटा जातिले अर्को जातिको विरुद्धमा तरवार उठाउनेछैन, औ तिनीहरूले अब उप्रान्त युद्ध गर्न सिक्नेछैनन्।” हामीले अपेक्षा गरेको त्यही त हो नि, होइन र? किन? किनकि त्यस संसारका बासिन्दा हुने धेरैजसो मानिसहरूले पुरानो संसारमा परमेश्वरको सेवा गर्दा उक्त कुरा व्यवहारमा उतारिसकेका छन्।
१७. परमेश्वरको राज्यअन्तर्गत जीवनस्तर कस्तो हुनेछ?
१७ तपाईंको आँखाअघि गरिबीको दृश्य नाचेको पनि देख्नुहुन्न। कतै फोहरै फोहरले भरिएको झुपडी छैन, कसैले झुत्रेझात्रे लुगा लगाएको छैन अथवा कोही घरबारविहीन छैन। सबैसँग मनोहर बोटबिरुवा तथा फूलै फूलले ढाकिएको आरामदायी घर र सुरक्षित सम्पत्ति छ। (यशैया ३५:१, २; ६५:२१, २२; इजकिएल ३४:२७) अनि भोक मार्न कसैले पेटमा पटुका कसेको छैन किनकि सबैका लागि प्रशस्त भोजन हुनेछ भनी परमेश्वरले गर्नुभएको प्रतिज्ञा उहाँले पूरा गर्नुभएको छ: “पृथ्वीमा पहाड़का टाकुराहरूमा प्रशस्तगरी अन्न हुनेछ।” (भजन ७२:१६) परमेश्वरले अदनमा राख्नुभएको उद्देश्यझैं परमेश्वरको राज्यको निर्देशनमा गौरवमय विश्वव्यापी प्रमोदवन बनिरहेको छ।—उत्पत्ति २:८.
१८. नयाँ संसारमा मानिसहरूलाई कस्ता कुराहरूको डर हुनेछैन?
१८ प्रत्येक मानिसको अदम्य बल देखेर पनि तपाईं चकित हुनुहुन्छ। तिनीहरूको शरीर तथा दिमाग सिद्ध भएकोले तिनीहरू बलवान् भएका छन्। बिरामी, पीडा वा मृत्यु केही छैन। ह्विलचेर या अस्पतालको शय्यामा कोही छैन। ती सबै सधैंका लागि बितिसकेका छन्। (यशैया ३३:२४; ३५:५, ६) अझ भनौं भने, कुनै पशुप्राणीको डर छैन किनकि परमेश्वरको शक्तिद्वारा तिनीहरू शान्तिप्रिय भइसकेका छन्!—यशैया ११:६-८; ६५:२५; इजकिएल ३४:२५.
१९. नयाँ संसारमा बिताइने हरेक दिन किन ‘खुशीले भरिएको’ हुनेछ?
१९ नयाँ संसारका विश्वासी बासिन्दाहरूले बनिएको कति सुन्दर सभ्यता! तिनीहरूको बल तथा खुबी अनि पृथ्वीका सम्पदा प्रतिस्पर्धा गर्न वा एकअर्कालाई हानि पुऱ्याउन नभइकन सहयोगी भावना लिएर फायदाजनक कामको लागि प्रयोग भइरहेको छ। अनि तपाईंले भेट्नुहुने हरेक व्यक्ति विश्वासयोग्य छ किनकि परमेश्वरले प्रतिज्ञा गर्नुभएबमोजिम सबै “परमप्रभुबाट सिकाइएका” छन्। (यशैया ५४:१३) सबै मानिस परमेश्वरको व्यवस्थाअनुरूप चलिरहेका छन्। “समुद्र पानीले भरिएझैं पृथ्वी परमप्रभुको ज्ञानले भरिपूर्ण” छ। (यशैया ११:९) साँच्चै, यो नयाँ संसारमा बिताइने हरेक दिन भजन ३७:११ ले भनेझैं ‘खुशीले भरिएको’ छ।
आनन्दित भविष्य निश्चित छ
२०. शान्तिमय भविष्यको आनन्द उठाउन हामीले के गर्नैपर्छ?
२० त्यो आनन्दित भविष्यको सहभागी बन्न हामीले के गर्नैपर्छ? यशैया ५५:६ हामीलाई यसो भन्छ: “जबसम्म परमप्रभुलाई पाउनसक्छ उहाँलाई खोज। उहाँ नजीक हुनुहुँदानै उहाँलाई पुकार।” अनि परमेश्वरलाई खोज्दा हाम्रो मनोवृत्ति भजन १४३:१० मा उल्लेख गरेझैं हुनुपर्छ: “तपाईंको इच्छाबमोजिम गर्न मलाई सिकाउनुहोस्, किनकि तपाईं मेरा परमेश्वर हुनुहुन्छ।” यसो गर्नेहरू यस आखिरी दिनमा यहोवासामु निष्खोट भई हिंड्नसक्छन् र उत्तम भविष्यको बाटो हेर्नसक्छन्। “सिद्ध मानिसलाई दृष्टि लगा, र धर्मात्मालाई हेर्, किनभने त्यस्ता मानिसको आखिरको अवस्था शान्तिमय हुन्छ। अपराधीहरू चाहिं सबै सँगसँगै नाश हुनेछन्, दुष्टको आखिर अवस्था सर्वनाशको हुनेछ।”—भजन ३७:३७, ३८.
२१, २२. परमेश्वरले अहिले के बनाउँदै हुनुहुन्छ र त्यसका लागि प्रशिक्षण दिने काम कसरी पूरा भइरहेको छ?
२१ यहोवाले अहिले उहाँको इच्छाबमोजिम गर्न चाहने हरेक राष्ट्रका मानिसहरू जम्मा गर्दै हुनुहुन्छ। उहाँले तिनीहरूलाई नयाँ पार्थिव समाजको जग बनाउँदै हुनुहुन्छ। किनकि बाइबल यस्तो अगमवाणी गर्छ: “पछिल्ला दिनमा [हामी बाँचिरहेको समय] . . . धेरै मानिसहरू त्यहाँ गएर भन्नेछन्, ‘आऊ हामी परमप्रभुको पर्वतमा [उच्च पारिएको उहाँको साँचो उपासना] उक्लेर . . . जाऔं। उहाँले हामीलाई आफ्नो मार्ग देखाउनुहुनेछ, र हामी उहाँको बाटोमा हिंडनेछौं।’ ”—यशैया २:२, ३.
२२ प्रकाश ७:९ मा तिनीहरूलाई “हरेक जातिबाटको र सबै कुलको र मानिसको, र भाषा भाषाहरूको एक ठूलो भीड” भनी वर्णन गरिएको छ। पद १४ भन्छ: “यी तिनै हुन् जो महा सङ्कष्टबाट आएका छन्” अर्थात् वर्तमान रीतिरिवाजको अन्तबाट बाँचेकाहरू। नयाँ संसारको जग हुनेहरूको संख्या अहिले झन्डै ६० लाख पुगिसकेको छ र हरेक वर्ष नयाँ व्यक्तिहरू थपिंदै छन्। यहोवाका यी सबै विश्वासी सेवकहरूलाई उहाँले ल्याउनुहुने नयाँ संसारको जीवनको लागि प्रशिक्षण दिइँदैछ। तिनीहरूले यस पृथ्वीलाई प्रमोदवन बनाउन आवश्यक पर्ने आध्यात्मिक तथा अन्य खुबीहरू सिकिरहेका छन्। अनि त्यो प्रमोदवन वास्तविकता हुनेछ भनी तिनीहरू पूर्ण भरोसा राख्छन् किनकि “प्रतिज्ञा गर्नुहुने जो हुनुहुन्छ, उहाँ विश्वासयोग्य हुनुहुन्छ।”—हिब्रू १०:२३.
पुनरावलोकनका निम्ति प्रश्नहरू
◻ विश्वासको कमीले गर्दा प्रथम शताब्दीमा कस्ता परिणामहरू भए?
◻ परमेश्वरका सेवकहरू उहाँलाई कत्तिको विश्वास गर्नसक्छन्?
◻ विश्वासी जनहरूका लागि कस्तो भविष्य साँचेर राखिएको छ?
◻ परमेश्वरले ल्याउनुहुने नयाँ संसारमा आनन्दित भविष्य प्राप्त गर्न हामीले के गर्नैपर्छ?
[पृष्ठ १८-मा भएको चित्र]
यहोवाले अहिल्यै नयाँ पार्थिव समाजको जग बसाल्दै हुनुहुन्छ