यहोवाले आफ्ना उद्देश्यहरू पूरा गर्नुहुन्छ भनी भरोसा गर्नुहोस्
“धर्मात्माहरूले देश अधिकार गर्नेछन्, र त्यसैमा सधैंभरि रहन्छन्।”—भजनसंग्रह ३७:२९.
यहोवाले हाम्रा प्रथम मातापिता, आदम र हव्वालाई सिद्ध सृजनु भएको थियो। तिनीहरूले परमेश्वरको व्यवस्था पालन गरेमा सधैंभरि यसै पृथ्वीमा बाँच्न सक्ने किसिमले उहाँले सृष्टि गर्नुभएको थियो। (उत्पत्ति १:२६, २७; २:१७) यसको अतिरिक्त परमेश्वरले तिनीहरूलाई प्रमोदवनरूपी वातावरणमा राख्नुभयो। (उत्पत्ति २:८, ९) यहोवाले तिनीहरूलाई भन्नुभयो: “फल्दै फुल्दै, वृद्धि हुँदै, पृथ्वीमा भरिंदै त्यसलाई आफ्नो वशमा पार्दै जाओ।” (उत्पत्ति १:२८) अन्ततः तिनीहरूका सन्तानहरू संसारभरि फैलिने थिए र यस ग्रह आनन्दित, सिद्ध मानवजातिले भरिएको प्रमोदवन हुनेथियो। मानव परिवारको कस्तो राम्रो सुरुआत! “आफूले बनाउनुभएको हरेक कुरा परमेश्वरले हेर्नुभयो। औ हेर, त्यो साह्रै राम्रो थियो।”—उत्पत्ति १:३१.
२ यद्यपि, हजारौं वर्षदेखि मानव गतिविधिहरूले परमेश्वरको सुरुको उद्देश्यलाई प्रतिविम्बित गर्दैन। मानवजाति सिद्धताभन्दा धेरै टाढा पुगिसकेको छ र निश्चय पनि आनन्दित छैनन्। संसारका परिस्थितिहरू पीडाजनक भएका छन् र भविष्यवाणी गरिएझैं हाम्रो समयमा नाटकीय ढङ्गमा परिस्थिति झन् झन् खस्कँदो छ। (२ तिमोथी ३:१-५, १३) उसो भए निकटतम भविष्यमा मानवजातिको निम्ति परमेश्वरले गर्नुभएका भविष्यवाणीहरू पूरा हुनेछन् भनी हामी कसरी ढुक्क हुन सक्छौं? के अझै लामो समयसम्म यस्तै पीडाजनक परिस्थितिहरू रहिरहनेछन्?
परिस्थिति कसरी बिग्रियो?
३ यहोवाले पृथ्वीमा खराब परिस्थिति रहिरहने अनुमति किन दिनुभयो भनेर परमेश्वरको प्रेरित वचनबारे सही ज्ञान भएका व्यक्तिहरूलाई थाहा छ। यसबारे उहाँले के गर्नुहुनेछ भनेर पनि तिनीहरूलाई थाहा छ। परमेश्वरले मानिसहरूलाई स्वेच्छापूर्वक निर्णय गर्ने अद्भुत उपहार दिनुभएको थियो। तर हाम्रा प्रथम मातापिताले त्यसको कसरी दुरुपयोग गरे भनेर बाइबलको विवरणबाट तिनीहरूले थाहा पाएका छन्। (१ पत्रुस २:१६ तुलना गर्नुहोस्।) तिनीहरूले परमेश्वरबाट अलग हुने स्वाधीनताको गलत मार्ग रोजे। (उत्पत्ति अध्यायहरू २ र ३) तिनीहरूको विद्रोहले निकै महत्त्वपूर्ण प्रश्नहरू खडा गऱ्यो। जस्तो कि: के सार्वभौम सत्ताधारीसित मानवजातिमाथि शासन गर्ने अधिकार छ? के उहाँको शासन मानवजातिको निम्ति सर्वोत्तम हो? के परमेश्वरको निरीक्षण विना मानव शासन सफल हुन सक्छ? यी प्रश्नहरूको उत्तर पत्ता लगाउने विश्वसनीय तरिका मानिसहरूलाई शासन गर्ने समय दिनु हुनेथियो। त्यसबाट प्राप्त परिणामले सृजनहारबाट विमुख मानिसहरू सफल हुन सक्छन् या सक्दैनन् भनेर निस्सन्देह प्रमाणित गर्नेथियो।
४ आदम र हव्वाले परमेश्वरलाई त्यागेपछि उहाँले तिनीहरूलाई सिद्धताबाट झर्नदेखि बचाउनुभएन। उहाँको सहारा नपाउँदा तिनीहरू खस्किंदै गए। परिणामस्वरूप असिद्धता, वृद्धावस्था र अन्त्यमा मृत्यु भयो। वंशाणुको नियमअनुसार ती हानिकारक दुर्गुणहरू हाम्रा प्रथम मातापिताबाट हामी लगायत आफ्ना सारा सन्ततिहरूमा सर्न गयो। (रोमी ५:१२) हजारौं वर्ष लामो मानव शासनको परिणाम के भएको छ? उपदेशक ८:९ ले सत्यतापूर्वक भनेझैं यसको परिणाम बित्यासपूर्ण भएको छ: “एउटा मानिसले अर्को मानिसलाई दुःख दिने अधिकारको समय थियो।”
५ सृष्टिकर्त्ताबाट विमुख भएर सफलतापूर्वक कामकुराहरू सह्माल्नु मानिसको वशमा छैन भनी समयको दौडानले निस्सन्देह स्पष्टसित प्रमाणित गरेको छ। बाइबलका प्रेरित लेखक यर्मियाले घोषणा गरे: “हे परमप्रभु, मलाई थाह छ, कि मानिसहरूको मार्ग त्यो आफैमा छैन। आफ्नो पाइलालाई ठीक मार्गमा हिंडाउने शक्ति मानिसमा छैन।”—यर्मिया १०:२३; व्यवस्था ३२:४, ५; उपदेशक ७:२९.
परमेश्वरको उद्देश्य परिवर्तन भएको छैन
६ दुष्टता र दुःखले भरिएको मानव इतिहासको हजारौं वर्षले के परमेश्वरको उद्देश्यमा कुनै परिवर्तन ल्याएको छ? उहाँको वचनले यसो भन्छ: “स्वर्ग सृजने परमप्रभु यसो भन्नहुन्छ, (उहाँ परमेश्वर हुनुहुन्छ!) जसले पृथ्वी रच्नुभयो र बनाउनुभयो। (उहाँले त्यो स्थिर गर्नुभयो, उहाँले त्यो व्यर्थको वस्तु सृष्टि गर्नुभएन, उहाँले त्यो आबाद गर्नलाई बनाउनुभयो।) म परमप्रभु हुँ, मबाहेक अरू कोही छैन।” (यशैया ४५:१८) अतः मानिसहरूले आबाद गर्न यो पृथ्वी परमेश्वरले बनाउनुभयो र अहिले पनि उहाँको उद्देश्य त्यही नै छ।
७ यहोवाले पृथ्वी आबाद गर्न मात्र हैन तर सिद्ध, आनन्दित मानिसहरूले उपभोग गर्ने प्रमोदवन होस् भन्ने उद्देश्य राखेर बनाउनुभयो। त्यसकारण त “धार्मिकताले बास” गर्ने नयाँ मानव समाजद्वारा निर्मित “नयाँ पृथ्वी” बारे बाइबलमा भविष्यवाणी गरिएको छ। (२ पत्रुस ३:१३) अनि प्रकाश २१:४ मा परमेश्वरको वचनमा भनिएझैं उहाँको नयाँ संसारमा “उहाँले तिनीहरूका [मानवजातिको] आँखाबाट आँसु पुछिदिनुहुनेछ, र फेरि मृत्यु हुनेछैन। औ शोक, रूवाइ, पीड़ा फेरि केही हुनेछैन।” यी सबै कारणहरूले गर्दा यस पृथ्वीमा आउँदै गरेको त्यस नयाँ संसारलाई येशूले “प्रमोदवन” भन्नसक्नुभयो।—लूका २३:४३ न्यु व०.
८ यहोवा सारा ब्रह्माण्डको सर्वशक्तिमान र सर्वज्ञ सृष्टिकर्त्ता हुनुहुन्छ। त्यसकारण उहाँका उद्देश्यहरू कसैले पनि निष्फल पार्न सक्दैन। “सेनाहरूका परमप्रभुले यसो भनेर शपथ खानुभएको छ, जो युक्ति मैले गरेको छु, त्यो निश्चय पूरा हुनेछ, जो अभिप्राय मैले गरेको छु, त्यो स्थिर रहनेछ।” (यशैया १४:२४) तसर्थ, यस पृथ्वीलाई सिद्ध मानिसहरूले भरिएको प्रमोदवन बनाउनेछु भनी परमेश्वरले भन्नुभएको कुरा निश्चय नै पूरा हुनेछ। येशूले भन्नुभयो: “धन्य नम्र हुनेहरू, किनभने तिनीहरूले पृथ्वीको अधिकार गर्नेछन्।” (मत्ती ५:५; भजनसंग्रह ३७:२९ तुलना गर्नुहोस्।) त्यो प्रतिज्ञा पूरा हुनेछ भनी हामी ढुक्क हुन सक्छौं। वास्तवमा भन्ने हो भने, त्यस प्रतिज्ञाको खातिर हामी आफ्नो जीवन समेत खतरामा पार्न सक्छौं।
तिनीहरूले यहोवामा भरोसा राखे
९ यस पृथ्वीसम्बन्धी परमेश्वरको उद्देश्यको खातिर इतिहासभरि धेरै ईश्वरभीरू व्यक्तिहरूले आफ्नो ज्यान खतरामा पारे किनभने उहाँले ती अवश्य पूरा गर्नुहुनेछ भनी तिनीहरू विश्वस्त थिए। त्यसबारे आफूसित सीमित ज्ञान भए तापनि तिनीहरूले परमेश्वरमा भरोसा राखे र उहाँको इच्छाअनुरूप गर्न आफ्नो जीवन बिताए। उदाहरणको लागि, येशू पृथ्वीमा आउनुभन्दा २,००० वर्षअघि—बाइबल लेखिनुभन्दा धेरैअघि पृथ्वीमा अब्राहाम थिए। यहोवाले आफ्ना उद्देश्यहरू पूरा गर्नु हुन्छ भनी तिनले उहाँमा भरोसा राखे। सम्भवतः, नूहद्वारा सिकाइएको आफ्नो विश्वासी पुर्खा शेमबाट अब्रा- हामले सृष्टिकर्त्ताबारे सिकेका थिए होलान्। त्यसैकारण परमेश्वरले अब्राहामलाई कल्दीहरूको समृद्ध देश ऊर छोडेर अपरिचित तथा खतरनाक शहर कनानमा जाने आज्ञा दिनुहुँदा यहोवामा भरोसा राख्न सकिन्छ भन्ने यस कुलपितालाई थाहा थियो। त्यसैले तिनी गए। (हिब्रू ११:८) समयमा यहोवाले तिनलाई भन्नुभयो: “म तँबाट एउटा ठूलो जाति खड़ा गर्नेछु।”—उत्पत्ति १२:२.
१० इसहाक जन्मेपछि अब्राहामलाई के भयो? इसहाकद्वारा तिनका सन्तानहरू वृद्धि भएर एउटा ठूलो जाति बन्नेछ भन्ने सङ्केत यहोवाले अब्राहामलाई दिनुभयो। (उत्पत्ति २१:१२) तसर्थ, अब्राहामको विश्वासको जाँच गर्न इसहाकलाई बलि चढाउने आदेश यहोवाले दिनुहुँदा कुरा निकै विरोधाभासपूर्ण देखिएको हुनुपर्छ। (उत्पत्ति २२:२) तापनि यहोवामा पूर्ण भरोसा राखेर त्यसो गर्न अब्राहाम अग्रसर भए र इसहाकलाई मार्न तिनले साँच्चै छुरी उठाए। तर अन्तिम घडीमा अब्राहामलाई रोक्न परमेश्वरले एक जना स्वर्गदूत पठाउनुभयो।—उत्पत्ति २२:९-१४.
११ अब्राहाम यत्तिको आज्ञाकारी किन हुन सके? हिब्रू ११:१७-१९ ले प्रकाश पार्छ: “विश्वासैबाट अब्राहामले परीक्षा हुँदा इसहाकलाई चढ़ाए। औ जसले खुशीसाथ प्रतिज्ञाहरू ग्रहण गरेका थिए, तिनले आफ्नो भएको एउटै मात्र छोरालाई चढ़ाउनलागेका थिए। यिनैमा यसो भनिएको थियो, ‘इसहाकनै तेरो वंश कहलिनेछ।’ मरेकोबाट पनि परमेश्वरले बिउँताउन सक्नुहुन्छ भन्ने विचार गरेर यसैले दृष्टान्तको रूपमा तिनलाई फिर्ता पाए।” त्यस्तैगरि रोमी ४:२०, २१ ले पनि यसो भन्छ: “औ परमेश्वरको प्रतिज्ञाको बारेमा [अब्राहाम] डग्मगाएनन्, . . . जे जे [परमेश्वरले] प्रतिज्ञा गर्नुभएको छ, त्यो पूरा पनि गर्न सक्नुहुन्छ भन्ने कुरा उनलाई बिलकुल निश्चय भए।”
१२ इसहाकलाई बचाउनु भएर र तिनीद्वारा एउटा “ठूलो जाति” बनाउनु भएर मात्र होइन तर अर्को ढङ्गमा पनि अब्राहामले आफ्नो विश्वासको प्रतिफल पाए। परमेश्वरले अब्राहामलाई भन्नुभयो: “तेरै सन्तानद्वारा पृथ्वीका सबै जातिहरू आर्शीवादी हुनेछन्, किनकि तैंले मेरो वचन पालन गरिस्।” (उत्पत्ति २२:१८) तर कसरी? परमेश्वरको स्वर्गीय राज्यको राजा अब्राहामको वंशावलीद्वारा आउनेथियो। त्यस राज्यले शैतान अधिनस्थ यस दुष्ट संसारलाई चकनाचूर पार्ने थियो। (दानिएल २:४४; रोमी १६:२०; प्रकाश १९:११-२१) त्यसपश्चात् राज्य शासन अन्तर्गत सफा पारिएको पृथ्वी विश्वव्यापी तवरमा एउटा प्रमोदवन बन्नेछ। अनि परमेश्वरको इच्छा गर्न “सबै जाति” बाट आएका मानिसहरूले सिद्ध स्वास्थ्यको आनन्द उठाएर सधैंभरि बाँच्नेछन्। (१ यूहन्ना २:१५-१७) हुनत त्यस राज्यबारे अब्राहामसित सीमित ज्ञान मात्र थियो तापनि तिनले परमेश्वरमा भरोसा राखे र त्यो राज्य स्थापना हुने प्रतीक्षा गरे।—हिब्रू ११:१०.
१३ अब्राहामभन्दा सयौं वर्षपश्चात्, सा.यु.पू. १७ औं र १६ औं शताब्दीतिर हाल अरब भनिने क्षेत्रमा अय्यूब बस्थे। तिनी पनि बाइबल लेख्न थालिनुभन्दा अघिका व्यक्ति हुन्। अय्यूब “निर्दोष र सोझो जीवन बिताउँथे। तिनी परमेश्वरसँग डराउँथे र खराब काम गर्नबाट अलग रहन्थे।” (अय्यूब १:१) शैतानले अय्यूबमाथि घीनलाग्दो, कष्टदायी रोगले प्रहार गर्दा त्यस कठीन परीक्षाभरि यस विश्वासी मानिसको “मुखबाट एउटै पापको कुरा निस्केन।” (अय्यूब २:१०) अय्यूबले परमेश्वरमा भरोसा राखे। आफूले त्यति विघ्न दुःख भोग्नु परेको कारण थाहा नपाए तापनि तिनले परमेश्वर अनि उहाँको उद्देश्यको खातिर आफ्नो जीवन खतरामा पारे।
१४ मर्नै परे पनि पुनरुत्थानद्वारा परमेश्वरले एक दिन जीवन दिन सक्नुहुन्छ भनेर अय्यूबलाई थाहा थियो। यस आशाबारे सङ्केत दिंदै अय्यूबले यहोवा परमेश्वरलाई यसो भने: “तपाईंले मलाई पातालमा [चिहान] लुकाउनुभएता, . . . तपाईंले मेरो समयको सीमा तोकिदिएर मलाई सम्झनुभएता हुनेथियो! तर मेरो सेवा जतिसुकै लामो भए तापनि म आशा मार्नेथिइनँ। . . . तपाईंले मलाई आज्ञा गर्नुहुनेथियो, र म जवाफ दिनेथिएँ।” (अय्यूब १४:१३-१५) पीडा भोग्दा भोग्दै पनि यहोवाको सार्वभौमिकताप्रति अय्यूबले विश्वास प्रदर्शन गर्दै यसो भने: “नमरूञ्जेल म निर्दोष छु भन्ने मेरो दाबीलाई म छोड़नेछैनँ।”—अय्यूब २७:५.
१५ अय्यूबभन्दा झन्डै छ शताब्दीपछि र येशू यस पृथ्वीमा आउनुभन्दा लगभग हजार वर्षअघि दाऊदले नयाँ संसारबारे आफ्नो भरोसा व्यक्त गरे। भजनहरूमा तिनले भने: “परमप्रभुको बाटो हेर्ने जतिले देश अधिकार गर्नेछन्। किनकि थोरै बेरपछि, दुष्ट रहनेछैन। . . . तर नम्रहरूले देश अधिकार गर्नेछन्। र प्रशस्त शान्तिमा आफै खुशी मनाउनेछन्। धर्मात्माहरूले देश अधिकार गर्नेछन्, र त्यसैमा सधैंभरि रहन्छन्।” तिनीसित अटल आशा भएको कारण दाऊदले आग्रह गरे: “परमप्रभुमा भरोसा राख, . . . तँ आफै परमप्रभुमा मग्न हो। र उहाँले सो पुर्याइदिनुहुनेछ।”—भजनसंग्रह ३७:३, ४, ९-११, २९.
१६ कैयन् शताब्दीदेखि विश्वासी पुरुष तथा स्त्रीहरूले यस पृथ्वीमा अनन्त जीवनको यस्तै आशा राख्दै आएका छन्। वास्तवमा भन्ने हो भने, यहोवाका प्रतिज्ञाहरूको खातिर साँच्चै नै आफ्नो जीवन खतरामा पारेर तिनीहरू ‘गवाहीहरूका मेघ’ भए। प्राचीनकालका यहोवाका साक्षीहरूमध्ये थुप्रैलाई तिनीहरूको विश्वासको कारण सताइयो र मारियो ताकि तिनीहरूले “बढ़ता उत्तम पुनरुत्थान प्राप्त गर्न” सकोस्। तर कसरी? नयाँ संसारमा तिनीहरूलाई उत्तम पुनरुत्थान र अनन्त जीवनको प्रबन्ध गरिदिनुभएर परमेश्वरले आशिष दिनुहुनेछ।—यूहन्ना ५:२८, २९; हिब्रू ११:३५; १२:१.
मसीही साक्षीहरूले परमेश्वरमा भरोसा राख्छन्
१७ प्रथम शताब्दी सा.यु. मा यहोवाले भर्खरै स्थापित मसीही मण्डलीलाई त्यस राज्य र पृथ्वीमाथि त्यसको शासनबारे विस्तृत विवरणहरू प्रकट गर्नुभयो। उदाहरणको लागि, स्वर्गको राज्यमा येशू ख्रीष्टसित १,४४,००० जना संलग्न हुनेछन् भनी लेख्न प्रेरित यूहन्नालाई उहाँको आत्माले उत्प्रेरित गऱ्यो। तिनीहरू “पृथ्वीबाट किनिएका” परमेश्वरका विश्वासी सेवकहरू हुनेछन्। (प्रकाश ७:४; १४:१-४) तिनीहरूले स्वर्गमा ख्रीष्टसित “राजाहरू” भएर पृथ्वीमाथि शासन गर्नेछन्। (प्रकाश २०:४-६) यहोवाले स्वर्गीय राज्य र पृथ्वीसम्बन्धी उद्देश्य पूरा गर्नुहुन्छ भनी प्रथम शताब्दीका मसीहीहरूले उहाँमाथि पूर्ण भरोसा राखेकोले तिनीहरू आफ्नो विश्वासको निम्ति मर्न समेत पछि परेनन्। धेरैले त्यस्तै नै गरे।
१८ शताब्दीयौं अघिका साक्षीहरूले जस्तै आज पनि यहोवाका झन्डै ५० लाख साक्षीहरूले परमेश्वरमा त्यस्तै भरोसा राख्छन्। आधुनिक समयका यी साक्षीहरूले पनि परमेश्वरको प्रतिज्ञाको निम्ति आफ्नो जीवन खतरामा पारेका छन्। तिनीहरूले आफ्नो जीवन उहाँलाई समर्पण गरेका छन् र आफ्नो विश्वास सुदृढ गर्न तिनीहरूसित सम्पूर्ण बाइबल छ। (२ तिमोथी ३:१४-१७) यहोवाको आधुनिक समयका साक्षीहरूले येशूका प्रथम शताब्दीका अनुयायीहरूको अनुसरण गर्छन् जसले घोषणा गरेका थिए, “मानिसहरूको भन्दा परमेश्वरको आज्ञा अवश्य” मान्नेछौं। (प्रेरित ५:२९) यस शताब्दीमा यस्ता थुप्रै मसीही साक्षीहरूले निर्मम सतावट भोगेका छन्। केही आफ्नो विश्वासको निम्ति मारिएका पनि छन्। बाँकि अरू बिमारी, दुर्घटना र वृद्धावस्थाको कारण मरेका छन्। यद्यपि, प्राचीन समयका विश्वासी साक्षीहरूझैं तिनीहरूले परमेश्वरमा भरोसा राखे किनभने उहाँले नयाँ संसारमा पुनरुत्थानद्वारा जीवित पार्नुहुनेछ भनी तिनीहरूलाई थाहा छ।—यूहन्ना ५:२८, २९; प्रेरित २४:१५; प्रकाश २०:१२, १३.
१९ सारा जातिबाट तिनीहरू एउटा विश्वव्यापी भ्रातृत्वमा बाँधिनेछन् भनी बाइबलमा धेरैअघि गरिएको भविष्यवाणीलाई यहोवाका साक्षीहरूले बुझेका छन्। (यशैया २:२-४; प्रकाश ७:४, ९-१७) अनि सोझा हृदय भएका अरू थुप्रै व्यक्तिहरूलाई उहाँको अनुग्रह र सुरक्षामा ल्याउन यहोवाले तिनीहरूलाई विश्वव्यापी प्रचार कार्य गर्न अह्राउनुभएको छ। (हितोपदेश १८:१०; मत्ती २४:१४; रोमी १०:१३) उहाँले उदेकलाग्दो नयाँ संसारमा छिट्टै डोऱ्याउनुहुनेछ भनेर थाहा भएकोले तिनीहरू सबैले यहोवामा पूर्ण भरोसा राख्छन्।—तुलना गर्नुहोस् १ कोरिन्थी १५:५८; हिब्रू ६:१०.
२० सन् १९१४ को निर्णायक वर्षदेखि शैतानको संसार अन्तिम दिनमा रहिरहेको झन्डै ८० वर्ष भइसक्यो भनी बाइबलका भविष्यवाणीहरूले सङ्केत गर्छ। यस संसारको अन्त हुनै लागेको छ। (रोमी १६:२०; २ कोरिन्थी ४:४; २ तिमोथी ३:१-५) सारा पृथ्वीको क्रियाकलापहरू चाँडै परमेश्वरको राज्यको पूर्ण नियन्त्रणमा हुनेछ भनी थाहा पाएकोले यहोवाका साक्षीहरू साहसी र कटिबद्ध छन्। यस वर्तमान दुष्ट संसारको नाशपछि आफ्नो धार्मिक नयाँ संसारले प्रतिस्थापन गर्नु भएर पृथ्वीमा लामो समयदेखि विद्यमान खराब परिस्थितिलाई उहाँले पूर्णतया नामेट गरिदिनुहुनेछ।—हितोपदेश २:२१, २२.
२१ त्यसपछि बितेका समयमा हामीले भोग्नुपरेको जस्तोसुकै आघातको क्षतिपूर्ति गर्न अनन्तकालसम्म प्रशस्त आशिषहरू बर्साउनु भएर परमेश्वरले हामीलाई भरण-पोषण गर्नुहुनेछ। नयाँ संसारमा थुप्रै राम्रा कुराहरू हुनेछन् जसले गर्दा पहिले भोगेका सबै दुःखकष्टहरू हाम्रो स्मरणबाट विलिन भएर जानेछन्। त्यतिबेला यहोवाले ‘आफ्नो मुठी खोल्नुहुनेछ र सबै जीवित प्राणीहरूको इच्छालाई सन्तुष्ट पार्नुहुनेछ’ भनी थाहा पाउनु कस्तो सान्त्वनादायी कुरा हो।—भजनसंग्रह १४५:१६; यशैया ६५:१७, १८.
२२ नयाँ संसारमा विश्वासी मानवजातिले रोमी ८:२१ को पूर्ति देख्नेछन्: “परमेश्वरको सन्तानको महिमाको स्वतन्त्रतामा सृष्टि आफैले पनि विनाशको बन्धनबाट छुटकारा पाउनेछ।” येशूले आफ्ना अनुयायीहरूलाई सिकाउनुभएको यस प्रार्थना पूर्ति भएको पनि तिनीहरूले देख्नेछन्। “तपाईंको राज्य आओस्। तपाईंको इच्छा स्वर्गमाझैं यस पृथ्वीमा पूरा होस्।” (मत्ती ६:१०) त्यसकारण तपाईंको पूर्ण भरोसा यहोवामा राख्नुहोस् किनभने उहाँको अचूक प्रतिज्ञाले यसो भन्छ: “धर्मात्माहरूले देश अधिकार गर्नेछन्, र त्यसैमा सधैंभरि रहनेछन्।”—भजनसंग्रह ३७:२९. (w94 3/15)
तपाईंले कसरी जवाफ दिनुहुनेछ?
▫ मानवहरू र यस पृथ्वीको निम्ति यहोवाको उद्देश्य के हो?
▫ पृथ्वीमा खराब अवस्था रहिरहने अनुमति परमेश्वरले किन दिनुभयो?
▫ प्राचीन समयका विश्वासी जनहरूले यहोवामा आफ्नो भरोसा कसरी देखाए?
▫ आज परमेश्वरका सेवकहरू यहोवामा किन भरोसा राख्छन्?
[अध्ययनका लागि प्रश्नहरू]
१. मानवहरू र यस पृथ्वीको निम्ति यहोवाको उद्देश्य के हो?
२. मानव गतिविधिहरूले कस्ता प्रश्नहरू खडा गर्छन्?
३. मानवजातिको विद्रोहलाई यहोवाले किन तुरुन्तै नाश गर्नु भएन?
४, ५. (क) मानवजातिले परमेश्वरको शासन इन्कार गर्नुको परिणाम के भएको छ? (ख) समयको दौडान कुन कुरा निस्सन्देह प्रमाणित भएको छ?
६, ७. (क) के हजारौं वर्षको इतिहासले यहोवाको उद्देश्य परिवर्तन गरेको छ? (ख) यहोवाको उद्देश्यमा कस्ता कुराहरू समावेश छन्?
८. यहोवाले आफ्नो उद्देश्य पूरा गर्नुहुनेछ भनी हामी किन ढुक्क हुन सक्छौं?
९. यहोवामा आफ्नो भरोसा देखाउन अब्राहामले के गरे?
१०, ११. आफ्नो एक मात्र पुत्र इसहाकलाई बलि चढाउन अब्राहाम किन राजी भए?
१२. आफ्नो विश्वासको प्रतिफल अब्राहामले कसरी पाए?
१३, १४. अय्यूबले यहोवामा किन भरोसा राखे?
१५. यहोवाको उद्देश्यप्रति आफ्नो विश्वस्तता दाऊदले कसरी व्यक्त गरे?
१६. ‘गवाहीहरूका मेघको’ के आशा थियो?
१७. प्रथम शताब्दीका मसीहीहरूको यहोवामा कस्तो दृढ विश्वास थियो?
१८. आज यहोवाका साक्षीहरूले पहिलेका साक्षीहरूको अनुसरण कसरी गरिरहेका छन्?
१९, २०. हाम्रो समयको लागि गरिएको बाइबलको भविष्यवाणीबारे हामीलाई के थाहा छ?
२१. वर्तमान दुःखकष्टहरूको अलावा हामी किन आनन्दित हुन सक्छौं?
२२. हामीले हाम्रो भरोसा यहोवामा किन राख्नुपर्छ?
[पृष्ठ २९-मा भएको चित्र]
पार्थिव प्रमोदवनमा सधैंभरि आनन्दपूर्वक बाँच्न परमेश्वरले मानिसहरूलाई बनाउनु भएको थियो
[पृष्ठ ३१-मा भएको चित्र]
मरेकाहरूलाई पुनरुत्थान गर्न सक्नु हुने यहोवाको क्षमतामा अब्राहामले भरोसा राखे