बाइबलले हाम्रो समयको महत्त्वपूर्ण प्रश्नहरूको जवाफ दिन्छ
केआज बाइबल सान्दर्भिक छ? सकारात्मक जवाफ पाउनको लागि यस पुरानो पुस्तकले पाठकहरूलाई वर्तमान चासो र चर्चाको विषयमा निर्देशन दिनुपर्ने हो। वर्तमान समयका गहन विषयहरूमा के बाइबलले फाइदाजनक सल्लाह दिन्छ?
हामी दुइटा जल्दाबल्दा विषयमा ध्यान देऔं। यी विषयबारे बाइबलको भनाइ पनि हामी जाँच्नेछौं।
परमेश्वरले किन दुःखकष्ट हुन दिनुहुन्छ?
अहिले संसारको परिस्थिति विचार गर्ने हो भने साधारणतया यो प्रश्न उठ्छ: किन परमेश्वरले निर्दोष मानिसहरूमाथि दुःख आइपर्न दिनुहुन्छ? धेरै मानिसहरूलाई हिंसात्मक अपराध, भ्रष्टाचार, जातिहत्या, असह्य पीडा र अन्य थुप्रै कुराहरूले असर गरिरहेकोले यस्तो प्रश्न उठ्नु स्वाभाविकै हो।
उदाहरणका लागि, जून १९९८ को दिन उत्तर जर्मनीको एउटा पुलमा रेल ठोक्किएर दुर्घटनाग्रस्त हुँदा एक सयभन्दा बढी यात्रुहरूको मृत्यु भयो। ती घाइते र मृतकहरूको उद्धार कार्यमा संलग्न अनुभवी डाक्टर र वारुणकर्मीहरू पनि त्यस्तो हत्याकाण्ड देखेर मर्माहत भए। इभान्जेलिकल चर्चका एक पादरीले यस्तो प्रश्न गरे: “हे परमेश्वर! किन यस्तो हुनु परेको होला?” उक्त पादरीसित पनि यसको जवाफ थिएन।
अनुभवहरूले देखाएअनुसार निर्दोष मानिसहरूले कारणै बिना दुःख भोग्नु पर्दा कहिलेकाहीं तिनीहरू चिढिन्छन्। यस्तो अवस्थामा बाइबलले मदत गर्नसक्छ किनभने यसले निर्दोष मानिसहरूले दुष्टता र दुःख भोग्नु परेको कारणबारे बताउँछ।
मानिसजातिले दुष्टता र दुःख भोग्नु परोस् भन्ने मनसायले यहोवा परमेश्वरले पृथ्वी र त्यसमा भएका यावत् थोकहरू सृष्टि गर्नुभएको थिएन। हामी कसरी निश्चित भएर यसो भन्न सक्छौं? किनभने सबै थोक सृष्टि गरिसक्नुभएपछि “आफुले बनाउनुभएको हरेक कुरा परमेश्वरले हेर्नुभयो। औ हेर, त्यो साह्रै राम्रो थियो।” (उत्पत्ति १:३१) आफैलाई सोध्नुहोस्, ‘के मैले कुनै दुष्ट कुरा हेरेर त्यसलाई “साह्रै राम्रो” भन्छु होला?’ अहँ, तपाईं भन्नुहुन्न! त्यसै गरी, परमेश्वरले सबै कुरा “साह्रै राम्रो” भन्नुहुँदा पृथ्वीमा दुष्टताको नाम निसानै थिएन। त्यसो भए दुष्टताको सुरुआत कहिले र कसरी भयो त?
हाम्रा पहिलो आमाबाबु, आदम र हव्वालाई सृष्टि गरिएको केही समयपछि एक शक्तिशाली आत्मिक व्यक्ति स्त्रीकहाँ आएर परमेश्वरको सत्यता र उहाँको सार्वभौमिकताको औचित्यलाई चुनौती दियो। (उत्पत्ति ३:१-५) पछि यो प्राणी शैतान अर्थात् दियाबलले आपद्-विपद् आइपरेमा मानिसजाति परमेश्वरप्रति वफादार रहनेछैन भन्ने कुराको पनि आरोप लगायो। (अय्यूब २:१-५) यहोवाले यस्तो अवस्थामा कस्तो प्रतिक्रिया व्यक्त गर्नुभयो? परमेश्वरदेखि स्वतन्त्र रहेर मानिसजातिले सफलतासाथ आफ्नो पाइला ठीक मार्गमा चाल्न सक्दैन भन्ने कुरा प्रमाणित गर्न उहाँले समय दिनुभयो। (यर्मिया १०:२३) मानिसले परमेश्वरको व्यवस्था र सिद्धान्तविरुद्ध काम गर्दा पाप हुन्छ जसले गर्दा हानिकारक परिस्थिति सृजना हुन्छ। (उपदेशक ८:९; १ यूहन्ना ३:४) तथापि, यस्ता कठिन परिस्थितिहरूमा पनि केही मानिसहरू आफूप्रति निष्ठावान् रहनेछन् भनेर यहोवालाई थाह थियो।
अदनमा त्यो दुःखदायी विद्रोह भएको लगभग ६,००० वर्ष भइसक्यो। के त्यो अत्यन्तै लामो समय हो? यहोवाले शताब्दीऔंअघि नै शैतान र त्यसका समर्थकहरूलाई नाश गर्नसक्नुहुन्थ्यो। तर यहोवाको सार्वभौमिकताको औचित्य र उहाँप्रति मानिसको निष्ठाबारे सम्भाव्य सबै शंका नहटुञ्जेल पर्खनु नै बेस होइन र? को सही छ र को गलत भन्ने मुद्दा फैसला गर्न अहिलेको न्यायिक प्रणालीलाई वर्षौं लाग्न सक्दैन र?
यहोवा र मानिसले सामना गर्नुपर्ने सार्वभौमिकता अनि मानिसजातिको निष्ठाको महत्त्वलाई ध्यानमा राख्दै परमेश्वरले समय दिनु कत्ति बुद्धिमानी छ! मानिसले परमेश्वरको व्यवस्था उल्लंघन गरेर आफै निर्णय गर्दा के हुन्छ भनेर अब हामीले राम्ररी बुझ्यौं। यसको परिणाम व्यापक दुष्टता हो। त्यसैकारण आज थुप्रै निर्दोष मानिसहरूले दुःखकष्ट भोग्नु परिरहेको छ।
तथापि, खुसीको कुरा के हो भने दुष्टता सधैंभरि रहने छैन भनेर परमेश्वरको वचनले देखाउँछ। भनौं भने यहोवाले चाँडै दुष्टता र दुष्ट काम गर्नेहरूको अन्त गर्नुहुनेछ। हितोपदेश २:२२ भन्छ, “दुष्टहरू त्यहाँबाट जरैसमेत उखेलिनेछन्, र विश्वासघातीहरू झारझैं फ्याँकिनेछन्।” अर्कोतिर, परमेश्वरप्रति विश्वासी रहनेहरूले चाँडै आउने त्यो समयको प्रतिक्षा गर्नसक्छन् जब “फेरि मृत्यु हुनेछैन। औ शोक, रुवाइ, पीडा फेरि केही हुनेछैन।”—प्रकाश २१:४.
निर्दोष मानिसहरूले दुःख भोग्नुको कारण यसरी बाइबलले स्पष्ट पार्छ। दुष्टता र दुःख चाँडै अन्त हुनेछ भनेर पनि यसले हामीलाई आश्वासन दिन्छ। तथापि, अहिले हामीले जीवनका कठिनाइहरू अनुभव गर्दै जाँदा अर्को महत्त्वपूर्ण प्रश्नको जवाफ पाउनु आवश्यक छ।
जीवनको उद्देश्य के हो?
मानिसहरूले जीवनको उद्देश्य पत्ता लगाउन अहिले जत्ति प्रयास पहिले कहिल्यै गरेका थिएनन्। थुप्रैले आफूलाई यस्तो प्रश्न गर्छन्, ‘मेरो जीवनको उद्देश्य के होला? मेरो जीवनको उद्देश्य कसरी पत्ता लगाउन सकिएला?’ अनेकन् परिस्थितिका कारण तिनीहरू यस्ता प्रश्न गर्न तम्सन्छन्।
व्यक्तिगत तवरमा भोग्नुपर्ने पीडाले गर्दा पनि मानिसको जीवन दुःखदायी हुनसक्छ। उदाहरणका लागि, १९९८ को सुरुतिर जर्मनीस्थित बभेरीयामा बस्ने एउटी १२ वर्षीया केटीलाई अपहरण गरेर मारियो। उक्त केटीकी आमाले आफ्नो जीवनको उद्देश्य के होला भन्ने सोचेर हरेक दिन बिताउने कुरा एक वर्षपछि बताइन्। तर तिनले जीवनको उद्देश्य भने पत्ता लगाउन सकिनन्। कोही कोही जवान मानिसहरू आफ्नो जीवनको उद्देश्य के होला भनेर सोच्ने गर्छन्। तिनीहरू सुरक्षा, सन्तुष्टि र मानिसहरूले आफूलाई माया गरेको चाहन्छन्। तर चारैतिर कपटपूर्ण व्यवहार र भ्रष्टाचार मात्र देखेर निराश हुन्छन्। अन्य कोहीचाहिं पेशालाई आफ्नो जीवनको मुख्य कुरा बनाउँछन् तर आफ्नो अस्तित्वको कारण पत्ता लगाउने आन्तरिक तृष्णा शक्ति, मान-मर्यादा र धन-सम्पत्तिले मेटाउन सक्दैन भनेर तिनीहरूलाई थाह छ।
मानिसले आफ्नो जीवनको उद्देश्य खोज्नुको कारण जेसुकै किन नहोस् तर यस प्रश्नको गम्भीर र सन्तोषजनक जवाफ पाउनैपर्छ। यस सन्दर्भमा पनि बाइबलले नै मदत दिनसक्छ। यसले, यहोवा उद्देश्यको परमेश्वर हुनुहुन्छ अर्थात् उहाँले गर्नुहुने हरेक कामको ठोस कारण हुन्छ भनेर बुझाउँछ। तपाईंलाई एउटा प्रश्न गरौं, के तपाईं कारणै बिना घर बनाउनुहुन्छ? सायद बनाउनुहुन्न किनभने घर बनाउँदा थुप्रै पैसा खर्च हुन्छ र घर बनाउन महिनौं वा वर्षौं लाग्न सक्छ। आफू अथवा अरू कोही बसोस् भन्ने मनसायले तपाईं घर बनाउनुहुन्छ। यही कुरा यहोवामा पनि लागू हुनसक्छ। उहाँले कारणै बिना अथवा उद्देश्यै बिना पृथ्वी र त्यसमा जीवित वस्तुहरू सृष्टि गर्नुभएको होइन। (हिब्रू ३:४ तुलना गर्नुहोस्।) पृथ्वीको लागि उहाँको उद्देश्य के हो त?
यशैयाको भविष्यवाणीले यहोवालाई ‘पृथ्वी रच्नुहुने र बनाउनुहुने परमेश्वर’ भनेर चिनाउँछ। निस्सन्देह, उहाँले नै “[पृथ्वी] स्थिर गर्नुभयो, उहाँले त्यो व्यर्थको वस्तु सृष्टि गर्नुभएन, उहाँले त्यो आबाद गर्नलाई बनाउनुभयो।” (यशैया ४५:१८) हो, यहोवाले पृथ्वी सृष्टि गर्नुहुँदा नै त्यो आबाद होस् भन्ने उद्देश्य राख्नुभएको थियो। भजन ११५:१६ भन्छ: “स्वर्ग ता परमप्रभुकै हो। तर पृथ्वीचाहिं उहाँले मानिस जातिलाई दिनुभएको छ।” तसर्थ, आज्ञाकारी मानिसहरू पृथ्वीमा बसून् र त्यसको रेखदेख गरून् भन्ने उद्देश्य राखेर यहोवाले पृथ्वी सृष्टि गर्नुभयो।—उत्पत्ति १:२७, २८.
के आदम र हव्वाले विद्रोह गरे भन्दैमा यहोवाले आफ्नो उद्देश्य परिवर्तन गर्नुभयो र? अहँ, गर्नुभएन। ठोकुवा गरेर हामी कसरी भन्न सक्छौं? यो बुँदालाई विचार गर्नुहोस्: अदनमा विद्रोह भएको हजारौं वर्षपछि बाइबल लेखिएको थियो। यदि परमेश्वरले सुरुको आफ्नो उद्देश्य परिवर्तन गर्नुभएको भए त्यसबारे बाइबलमा किन लेखिएन? यसको स्पष्ट निष्कर्ष हो, पृथ्वी र मानिसजातिको लागि उहाँको उद्देश्य अहिलेसम्म परिवर्तन भएको छैन।
साथै, यहोवाको उद्देश्य कहिल्यै असफल हुँदैन। यशैया मार्फत यहोवा यस्तो आश्वासन दिनुहुन्छ: “जसरी वृष्टि र हिउँ आकाशबाट झर्छ र त्यतैतिर फर्केर जाँदैन, तर जमीनलाई भिजाएर बाली उमार्छ, औ छर्नेलाई बिउ र खानेलाई भोजन दिन्छ, त्यसरीनै मेरो मुखबाट निस्कने मेरो वचन पनि हुनेछ। त्यो मकहाँ व्यर्थै फर्कनेछैन, तर मैले इच्छा गरेको काम त्यसले पूरा गर्नेछ, र जुन कामको निम्ति म त्यसलाई पठाउँछु, त्यसमा त्यो सफल हुनेछ।”—यशैया ५५:१०, ११.
परमेश्वर हामीबाट के चाहनुहुन्छ
स्पष्टतया, पृथ्वीमा आज्ञाकारी मानिसहरूलाई सधैंभरि राख्ने परमेश्वरको उद्देश्य अवश्यै पूरा हुनेछ भनेर हामी ढुक्क हुनसक्छौं। पृथ्वीमा सधैंभरि बस्ने मानिसहरूमध्ये हामी पनि हुन चाहन्छौं भने बुद्धिमान् राजा सुलेमानको यो कुरा मान्नैपर्छ: “परमेश्वरको भय राख्, र उहाँका आज्ञा पालन गर्। योबाहेक मानिसले गर्नुपर्ने अरू केही छैन।”—उपदेशक १२:१३; यूहन्ना १७:३.
यहोवाले मानिसजातिको लागि गर्नुभएको उद्देश्यअनुरूप चल्न साँचो परमेश्वरलाई चिन्नुपर्छ र पवित्र धर्मशास्त्रमा दिइएका उहाँको इच्छाबमोजिम चल्नुपर्छ। अहिले नै हामीले यसो गऱ्यौं भने परमेश्वर र उहाँको अद्भुत सृष्टिबारे सधैंभरि सिक्न पाउने पार्थिव प्रमोदवनमा अनन्त जीवन पाउने आशा राख्न सक्छौं। (लूका २३:४३) कस्तो रोमाञ्चकारी प्रत्याशा!
जीवनको उद्देश्य खोज्ने थुप्रैले बाइबलको मदत लिन्छन् र अहिले नै बडो आनन्द पाएका छन्। उदाहरणका लागि, जवान आल्फ्रेटले आफ्नो जीवनको उद्देश्य थाह पाएनन्। धर्महरूले युद्धमा भाग लिएको देख्दा तिनी वाक्क भइसकेका थिए भने राजनीतिमा कपट र भ्रष्टाचार देखेर तिनी दिक्क भएका थिए। जीवनको उद्देश्य पत्ता लगाउन आल्फ्रेट उत्तर अमेरिकाका इन्डियनहरूलाई भेट्न गए। तर तिनी निराश भएर युरोप फर्कनु पऱ्यो। हरेस खाएर तिनले लागू पदार्थ सेवन गर्न थाले र उत्ताउलो संगीत सुन्न थाले। तथापि, बाइबललाई नियमित रूपमा राम्ररी जाँच्नाले आल्फ्रेटले जीवनको साँचो उद्देश्य थाह पाउनुका साथै सन्तुष्टि पनि पाए।
हाम्रो मार्गको लागि भरपर्दो बत्ती
त्यसोभए हामी बाइबलबारे के निष्कर्ष निकाल्न सक्छौं? के यो अहिले पनि व्यवहारिक छ? अवश्यै छ किनभने यसले वर्तमान विषयहरूमा निर्देशन दिन्छ। परमेश्वरले गर्दा दुष्टता भएको होइन भनेर बुझाउनुका साथै जीवनको सन्तोषजनक उद्देश्य पाउन पनि बाइबलले मदत गर्छ। यसबाहेक, अहिले मुख्य चासोका विषयहरूबारे बाइबलले अझ अरू थुप्रै कुराहरू बताउँछ। परमेश्वरको वचनमा विवाह, बच्चाहरूको लालनपालन, मानव सम्बन्ध र मरेकाहरूको लागि आशाजस्ता विषयहरूबारे छलफल गरिएको छ।
तपाईंले अहिलेसम्म बाइबल पढ्नुभएको छैन भने यसका विषयवस्तुहरूलाई राम्ररी जाँच्नुहोस्। जीवनबारे यसले दिने निर्देशन साँच्चै मूल्यवान् रहेछ भनेर तपाईंले थाह पाउनुभएपछि निर्देशनको लागि यहोवा परमेश्वरमा भर पर्ने भजनरचयिताले जस्तै यस्तो भजन गाउनुहुन्छ होला: “तपाईंको वचन मेरो खुट्टाको निम्ति बत्ती र मेरो बाटोको निम्ति उज्यालो छ।”—भजन ११९:१०५.
[पृष्ठ ६-मा भएको चित्र]
परमेश्वरले निर्दोषहरूमाथि किन दुःखकष्ट आइपर्न दिनुहुन्छ भनेर के तपाईंलाई थाह छ?
[पृष्ठ ६-मा भएको चित्र]
तपाईं उद्देश्यमय जीवनको आनन्द उठाउन सक्नुहुन्छ