कसका स्तरहरूमाथि तपाईं भरोसा गर्न सक्नुहुन्छ?
पहिलो चोटि अफ्रिका गएका पर्यटक सडक छेउ ठिंग उभिरहेको मान्छे देखेर छक्क परे। हरेक केही मिनेटमा त्यस मानिसले उभिएरै आफ्नो खुट्टा मात्र अलिकति सार्ने गरेको तिनले याद गरे। त्यस मानिसले त्यसरी खुट्टा सार्नुको कारण पर्यटकले पछि मात्र बुझे। तिनी वास्तवमा टेलिग्राफको खम्बाको छहारीमा बस्न कोसिस गरिरहेका रहेछन्। दिउँसो घाम बिस्तारै सर्दै जाँदा छायाँ पनि बिस्तारै सर्दै गइरहेको थियो।
घामको छायाँजस्तै मानव मामिला तथा स्तरहरू पनि अस्थिर हुनका साथै फेरबदल भइरहन्छन्। त्यसको ठीक विपरीत “ज्योतिका पिता” यहोवा परमेश्वर कहिल्यै परिवर्तन हुनुहुन्न। चेला याकूबले यस्तो लेखे: “कहिल्यै अदल-बदल, हुने र फेरिने छाया छैन।” (याकूब १:१७) हिब्रू अगमवक्ता मलाकीले स्वय्म यहोवा परमेश्वरको घोषणा यसप्रकार रेकर्ड गरे: “म परमप्रभु कहिल्यै परिवर्त्तन हुँदिनँ।” (मलाकी ३:६) यशैयाको दिनमा इस्राएल राष्ट्रलाई परमेश्वरले यसो भन्नुभयो: “तिमीहरूको बूढ़ेसकालसम्म पनि म उही हुनेछु। औ तिमीहरूका कपाल फुलेको अवस्थासम्म पनि म तिमीहरूलाई बोक्नेछु। मैले बनाएको हुँ, र म बोक्नेछु।” (यशैया ४६:४) तसर्थ, सर्वोच्चका प्रतिज्ञाहरूमाथि हामीले राख्नसक्ने भरोसालाई समयको अन्तरालले बदल्न सक्दैन।
व्यवस्थाबाट पाठ
जसरी यहोवाका प्रतिज्ञाहरू भरपर्दा र अपरिवर्तनीय छन्, त्यसरी नै सही र गलतबारे उहाँका स्तरहरू पनि भरपर्दा अनि अपरिवर्तनीय छन्। के तपाईं दुई प्रकारको ढक चलाउने व्यापारीलाई भरोसा गर्नुहुन्छ, र तपाईंलाई थाह छ त्यसमध्ये एउटा मात्र सही हो? निश्चय पनि गर्नुहुन्न। त्यस्तै गरी, “छलको तराजू परमप्रभुलाई घीन लाग्छ, ठीक ढकदेखि उहाँ प्रसन्न हुनुहुन्छ।” (हितोपदेश ११:१; २०:१०) यहोवाले इस्राएलीहरूलाई दिनुभएको व्यवस्थामा यो आज्ञा पनि समावेश गर्नुभयो: “तिमीहरूले न्याय गर्दा, नाप्दा, जोख्दा र भर्दा छल नगर्नू। तिमीहरूसँग ठीक ठीक तराजू, ढक र ठीक ठीक नाप र तौलहरू राख्नू। तिमीहरूलाई मिश्रबाट निकालेर ल्याउने म परमप्रभु, तिमीहरूका परमेश्वर हुँ।”—लेवी १९:३५, ३६.
यो आज्ञा पालन गरेर इस्राएलीहरूले परमेश्वरको अनुग्रह पाउनुका साथसाथै आर्थिक लाभ पनि उठाए। त्यस्तै गरी, ढक र नापमा मात्र होइन तर जीवनको हरेक क्षेत्रमा परमेश्वरको अपरिवर्तनीय स्तरहरू पालन गर्दा उहाँमा भरोसा गर्ने उपासकहरूले आशिष् पाउनेछन्। परमेश्वर यस्तो घोषणा गर्नुहुन्छ: “म परमप्रभु तेरा परमेश्वर हुँ, जसले तेरो फायदाको निम्ति तँलाई सिकाउँछ। जसले तँ जाने बाटोमा तँलाई डोऱ्याउँछ।”—यशैया ४८:१७.
आज किन स्तरहरू खस्कँदै छन् ?
बाइबलले आज स्तरहरू खस्कँदै जानुको कारण बताउँछ। बाइबलको अन्तिम पुस्तक प्रकाशले स्वर्गको युद्धबारे वर्णन गर्छ जसको नतिजा अहिलेसम्म पनि मानिसजातिले भोगिरहेका छन्। प्रेरित यूहन्नाले यस्तो लेखे: “स्वर्गमा लड़ाइँ भयो। माइकल र तिनका दूतहरू त्यस अजीङ्गरजस्तै पशुसँग लड़ाइँ गर्न गए, र अजीङ्गरजस्तै पशु र त्यसका दूतहरूले युद्ध गरे। औ तिनीहरूले जित्नसकेनन्, नता तिनीहरूका निम्ति स्वर्गमा फेरि कुनै ठाउँ रह्यो। अनि त्यो अजीङ्गरजस्तै पशु तल फ्याँकियो त्यो वृद्ध साँप, दियाबल र शैतान भनिने, सारा संसारलाई ठग्ने, पृथ्वीतलमा फ्याँकियो, र त्यसका दूतहरू त्यसका साथसाथै फ्याँकिए।”—प्रकाश १२:७-९.
युद्धले तुरुन्तै कस्तो असर पाऱ्यो? यूहन्नाले अझ यस्तो लेखे: “यसकारण हे स्वर्गहरू र तिनमा रहनेहरू हो, सबै रमाओ। पृथ्वी र समुद्रलाई धिक्कार छ, किनभने आफ्नो अल्प समय थाह पाएर शैतान ठूलो क्रोधसँग तिमीहरूकहाँ तल गएको छ।”—प्रकाश १२:१२.
सन् १९१४ मा प्रथम विश्वयुद्ध सुरु हुँदा “पृथ्वी[लाई] . . . धिक्कार” छ भन्ने वचन पूरा भयो र आजभन्दा अत्यन्तै भिन्न स्तरहरू भएको युगको अन्त भयो। इतिहासकार बार्बरा टुकम्यानले यस्तो टिप्पणी गरिन्, “सन् १९१४-१८ को महायुद्धले हाम्रो समय र पहिलाको समयबीच स्पष्ट रेखा कोरेको छ। त्यसपछिका वर्षहरूमा फलदायी हुनसक्ने त्यति धेरै जीवनलाई सखाप पारेर, भरोसालाई तोडेर, विचारहरू परिवर्तन गरेर र कहिल्यै निको नहुने निराशाका चोटहरू लगाएर यसले दुई युगबीच अपूरणीय मानसिक तथा शारीरिक खाडल उत्पन्न गऱ्यो।” सँगी इतिहासकार एरिक हब्सबम यसरी सहमति जनाउँछन्: “सन् १९१४ देखि यता विकसित राष्ट्रहरूमा सामान्य ठानिने स्तरहरू उल्लेखनीय ढंगमा खस्कँदै छन्। . . . दुःखको कुरा, अहिलेको स्तर जुन रफ्तारमा खस्किरहेको छ, त्यसलाई हाम्रो १९ औं शताब्दीका पुर्खाहरूले असभ्य संसारको चिनारी भन्नेछन्।”
ह्युम्यानिटी—ए मोरल हिस्ट्री अफ द ट्वेन्टिइथ सेन्चुरी नामक पुस्तकका लेखक जोनाथन ग्लोभर यस्तो टिप्पणी गर्छन्: “हाम्रो समयको एउटा चिनारी ह्रास हुँदै गइरहेको नैतिक व्यवस्था हो।” पश्चिमी संसारमा खस्कँदै गइरहेको धर्मको कारण तिनी बाह्य स्रोतबाट आएको नैतिक व्यवस्थाबारे शंकालु भए तापनि तिनी यस्तो चेताउनी दिन्छन्: “धार्मिक नैतिक व्यवस्थामाथि विश्वास गर्न नचाहनेहरू समेत, खस्कँदै गइरहेको नैतिक व्यवस्था देखेर चिन्तित हुनुपर्छ।”
व्यापार, राजनीति वा धर्म वा व्यक्तिगत वा पारिवारिक सम्बन्ध आदि जहाँसुकै होस् विश्वासघात अनि त्यसको कारण हुने भयानक परिणामहरू यस संसारका बासिन्दाहरूमा विपत्ति ल्याउने दियाबलको धूर्त चाल हो। शैतान युद्ध गर्न र आफूसँगसँगै परमेश्वरका स्तरहरूअनुरूप जीवन बिताउन चाहनेहरूलाई पनि नाश गर्न तल्लीन छ।—प्रकाश १२:१७.
व्याप्त विश्वासघातको के कुनै समाधान वा हल छ? प्रेरित पत्रुस यस्तो उत्तर दिन्छन्: “[परमेश्वरको] प्रतिज्ञाबमोजिम हामी नयाँ स्वर्ग र नयाँ पृथ्वीको बोटो हेर्छौं, जसमा धार्मिकताले बास गर्छ।” (२ पत्रुस ३:१३) यस प्रतिज्ञामाथि हामीले भरोसा गर्नसक्छौं। किनभने परमेश्वरसँग ती प्रतिज्ञाहरू पूरा गर्ने शक्ति छ र पूरा गर्ने ग्यारेन्टी पनि दिनुभएको छ। ‘आफ्नो मुखबाट निस्कने वचनको’ सन्दर्भमा यहोवाले यस्तो घोषणा गर्नुभएको छ: “त्यो मकहाँ व्यर्थै फर्कनेछैन, तर मैले इच्छा गरेको काम त्यसले पूरा गर्नेछ, र जुन कामको निम्ति म त्यसलाई पठाउँछु, त्यसमा त्यो सफल हुनेछ।” साँच्चै कत्ति भरोसायोग्य प्रतिज्ञा!—यशैया ५५:११; प्रकाश २१:४, ५.
परमेश्वरका स्तरहरूअनुरूप जीवन बिताउने
फेरबदल भइरहने खस्कँदो स्तरहरूको संसारमा यहोवाका साक्षीहरू बाइबलमा दिइएको आचरणका स्तरअनुरूप जीवन बिताउने प्रयास गर्छन्। फलस्वरूप, तिनीहरू अधिकांश मानिसहरूभन्दा भिन्न देखिन्छन् र यसले गर्दा तिनीहरू अरूको ध्यान अनि गिल्लाका पात्र भएका छन्।
लण्डनमा आयोजित यहोवाका साक्षीहरूको अधिवेशनमा एक पटक टिभी संवाददाताले एक प्रवक्तालाई यहोवाका साक्षीहरू साँच्चै मसीही हुन् कि होइनन् भनी प्रश्न गरे। उक्त प्रवक्ताले यस्तो उत्तर दिए: “निश्चय पनि हौं, किनभने हाम्रो आदर्श येशू हुनुहुन्छ। आज संसारमा स्वार्थ व्याप्त छ र हामी येशू नै जीवन, सत्य र मार्ग हुनुहुन्छ भनी विश्वास गर्छौं। उहाँ त्रिएकको भाग होइन तर परमेश्वरको पुत्र हुनुहुन्छ भनी हामी विश्वास गर्छौं। त्यसैले, बाइबलबारे हाम्रो समझ अन्य प्रचलित धर्महरूको भन्दा बेग्लै छ।”
बी बी सी टेलिभिजनमा उक्त अन्तरवार्ता प्रसारण गरिंदा त्यस रिपोर्टरले आफ्नो कार्यक्रमको अन्त यसो भनेर गरे: “यहोवाका साक्षीहरू घरघरमा किन आउने गर्छन् भनेर मैले धेरै कुरा सिकेको छु। मैले अहिलेसम्म भद्र पहिरन र राम्रो आचरण भएका २५,००० मानिसहरू एकै ठाउँमा यसरी भेला भएको कहिल्यै देखेको छैन।” परमेश्वरको अपरिवर्तनीय स्तरहरूअनुरूप चल्नु कत्तिको बुद्धिमानी रहेछ, सो बाहिरको मानिसले समेत याद गरेको यो असाध्यै राम्रो गवाही हो!
अरू कसैले बनाएको स्तरअनुरूप जीवन बिताउने विचार कसैकसैलाई मन नपर्ला तर हामी तपाईंहरूलाई आ-आफ्नो बाइबल खोलेर परमेश्वरका स्तरहरू के हुन् सिक्न प्रोत्साहन दिन्छौं। तर सतही जाँच गरेर सन्तुष्ट नहुनुहोस्। प्रेरित पावलको सल्लाह पालन गर्नुहोस्: “यस संसारसित एकै चालका नहोओ, तर तिमीहरूको मनको परिवर्त्तनले तिमीहरू बदलियौ। औ परमेश्वरका असल, मनपर्ने र सिद्ध इच्छा के रहेछ भनी तिमीहरू जाँचेर पत्ता लगाओ।” (रोमी १२:२) तपाईंको टोलछिमेकमा भएको राज्यभवनमा जानुहोस् र त्यहाँका साक्षीहरूलाई राम्ररी चिन्नुहोस्। तपाईंले तिनीहरू बाइबलका प्रतिज्ञाहरूमाथि विश्वास गर्ने र उहाँका स्तरहरूअनुरूप जीवन बिताउने प्रयास गर्दै परमेश्वरमाथि आफ्नो भरोसा प्रदर्शन गर्ने सामान्य व्यक्तिहरू रहेछन् भन्ने कुरा देख्नुहुनेछ।
परमेश्वरको अपरिवर्तनीय र भरोसायोग्य स्तरहरू पालन गर्दा तपाईंले आफ्नो व्यक्तिगत जीवनमा अवश्य पनि थुप्रै आशिष् पाउनुहुनेछ। स्वय्म परमेश्वरको यस्तो निमन्त्रणा स्वीकार्नुहोस्: “यदि तैंले मेरा आज्ञाहरू पालन गरेको भएता तेरो शान्ति नदीझैं र तेरो धार्मिकता समुद्रका छालहरूझैं हुनेथियो!”—यशैया ४८:१८.
[पृष्ठ ५-मा भएका चित्रहरू]
आज व्यापार, राजनीति, धर्म र पारिवारिक सम्बन्धमा समेत विश्वासघात भइरहेको छ