गिलियड स्नातकहरूलाई “महाकार्यहरूका विषयमा” बोल्न प्रोत्साहित गरियो
सेप्टेम्बर १३, २००३ का दिन वाचटावर बाइबल स्कूल अफ गिलियडको ११५ औं कक्षाको दीक्षान्त समारोहमा ५२ मुलुकका ६,६३५ जनाको ठूलो जमात उपस्थित थियो।
कक्षाका ४८ जना विद्यार्थीलाई “परमेश्वरका महाकार्यहरूका विषयमा” १७ वटा विभिन्न देशमा बताउन प्रोत्साहन दिइएको बाइबल आधारित भाषण सुने। (प्रेरित २:११) ती देशहरूमा अब उप्रान्त स्नातकहरूले आफ्नो मिसनरी कार्य सुरु गर्नेछन्।
यहोवाका साक्षीहरूको परिलाचक निकायका सदस्य र स्नातक कार्यक्रममा अध्यक्षको रूपमा सेवा गरेका स्टिभन लेट्ले आफ्नो टिप्पणीको सुरुमा विद्यार्थीहरूलाई यसरी सम्झाए: “तपाईंहरू आ-आफ्नो असाइनमेन्टको लागि जानुहुँदा, जुनसुकै ठाउँमा जानुभए तापनि वा जस्तोसुकै परिस्थितिमा आफूलाई पाउनुभए तापनि तपाईंहरूको विपक्षमा भन्दा पक्षमा धेरै जना हुनेछन्।” दोस्रो राजा अध्याय ६ को विवरण चलाउँदै भाइ लेट्ले “परमेश्वरका महाकार्यहरूका विषयमा” अरूलाई बताउँदै जाँदा तिनीहरू यहोवा परमेश्वर र अनगिन्ती स्वर्गदूतहरूको समर्थनमा भर पर्न सक्ने कुरा विद्यार्थीहरूलाई सम्झाए। (२ राजा ६:१५, १६) प्रथम शताब्दीका मसीहीहरूले आफ्नो प्रचार र शिक्षण कार्यमा विरोध र भावशून्यताको सामना गर्नुपऱ्यो अनि आज पनि मसीही मिसनरीहरूले त्यस्तै परिस्थितिको सामना गर्छन्। तथापि, तिनीहरू यहोवाको स्वर्गीय र पार्थिव संगठनको समर्थनमा भर पर्न सक्छन्।—भजन ३४:७; मत्ती २४:४५.
“परमेश्वरका महाकार्यहरूका विषयमा” बोल्नुहोस्
अध्यक्षको सुरुका टिप्पणीहरूपछि संयुक्त राज्य अमेरिकाको शाखा समितिका हारोल्ड कोर्केनले “व्यावहारिक आशाहरू—आनन्ददायी तथा सफल सेवाको कुञ्जी” भन्ने विषयमा भाषण दिए। हितोपदेश १३:१२ मा औंल्याएझैं आशा साकार नहुँदा निराशा हुन सक्छ भनी भाइ कोर्केनले औंल्याए। तथापि, अक्सर अव्यावहारिक आशाहरू राखियो र ती साकार भएनन् भने निराशा हुन्छ। स्नातकहरूले आफू र अरूबारे सन्तुलित तथा व्यावहारिक दृष्टिकोण राख्नुपर्छ। तिनीहरूले आफूबाट केही गल्तीहरू हुने अपेक्षा गर्नुपर्छ तर अरू मानिसहरूलाई “परमेश्वरका महाकार्यहरू” मूल्यांकन गर्न मदत गर्ने प्रयास गर्दै जाँदा यसले तिनीहरूलाई बढ्तै दुःखित तुल्याउनु हुँदैन। भाइ कोर्केनले नयाँ मिसनरीहरूलाई “उहाँलाई खोज्नेहरूलाई प्रतिफल” दिनुहुने यहोवामा भर पर्न प्रोत्साहन दिए।—हिब्रू ११:६.
कार्यक्रमको अर्को भाग परिचालक निकायका सदस्य डानियल सिड्लिकको थियो जसको विषय थियो, “मसीही आशा—यसको अर्थ के हो?” तिनले भने: “आशा भनेको मसीही सद्गुण हो। यो सही स्तरको मापदण्ड हो जसले परमेश्वरसँग उचित सम्बन्ध बनाउन मदत गर्छ। गैर-मसीहीले हामीले जस्तै आशा गर्नु असम्भव छ।” भाइ सिड्लिकले जीवनका कठिनाइहरूको बावजुद सकारात्मक रहन मदत गर्ने मसीही आशाको विभिन्न पक्षहरूबारे व्याख्या गरे। “आशामा हामीले नयाँ जोसका साथ लगनशील भई विजयी मनोभावका साथ दैनिक जीवनको सामना गर्न सक्छौं।” मसीहीको आशाले यहोवालाई उद्देश्यको परमेश्वरको रूपमा हेर्नुका साथै उहाँको सेवामा आनन्दित हुन मदत गर्छ।—रोमी १२:१२.
गिलियड स्कूलका रजिस्ट्रार, वालेस लिभरेन्सले विद्यार्थीहरूलाई ‘आत्माको भरमा हिंड्न’ प्रोत्साहन दिए। (गलाती ५:१६) यर्मियाका सचिव, बारूक कसरी तर्किएर बिस्तारै आत्माको भरमा हिंड्न छोड्न लागेका थिए भनी तिनले बताए। एक समय, बारूक थकित भए र आफ्नो निम्ति ठूला कुराहरू खोज्न थाले। (यर्मिया ४५:३, ५) कसै-कसैले येशूलाई पछ्याउन छोडे र उद्धारको लागि आवश्यक आध्यात्मिक सत्यलाई तिरस्कार गरे भनी भाइ वालेस लिभरेन्सले बताए। यसको कारण थियो, तिनीहरूले उहाँको शिक्षालाई पूर्णतामा बुझेनन् र त्यतिबेला आफ्ना इच्छाहरू पूरा नभएकोमा तिनीहरू निराश भए। (यूहन्ना ६:२६, २७, ५१, ६६) सृष्टिकर्ता र उहाँको उद्देश्यप्रति ध्यान खिच्ने काम पाएका मिसनरीहरूले यी विवरणहरूबाट के सिक्न सक्छन्? विद्यार्थीहरूलाई ओहदा, मानिसहरूबाट प्राप्त हुने मान्यताबारे चिन्तित नहुन वा व्यक्तिगत लाभको लागि ईश्वरतान्त्रिक असाइनमेन्ट प्रयोग नगर्न प्रोत्साहन दिइएको थियो।
“तपाईं दिने वा लिने व्यक्ति हुनुहुनेछ?” भन्ने प्रश्न गिलियड प्रशिक्षक मार्क न्यूमरले गरेका थिए। तिनका टिप्पणीहरू न्यायकर्त्ता ५:२ मा आधारित थियो जहाँ बाराकको सेनामा सेवा गर्न खुसीसित आएका इस्राएलीहरूको प्रशंसा गरियो। आध्यात्मिक युद्धमा अझ धेरै संलग्न हुन महान् बाराक, येशू ख्रीष्टद्वारा गरिएको आह्वान सुन्ने तिनीहरूको मनोभावको लागि गिलियड विद्यार्थीहरूको सराहना गरियो। ख्रीष्टका सेनाहरू तिनीहरूलाई भर्ती गर्नेको अनुमोदन प्राप्त गर्न इच्छुक हुनुपर्छ। भाइ न्यूमरले विद्यार्थीहरूलाई यसरी सम्झाए: “हामी आफैलाई खुसी पार्नेतिर लाग्यौं भने शुत्रसँग लड्न बन्द गर्छौं। . . . मिसनरी सेवामा महत्त्वपूर्ण कुरा तपाईं होइन। महत्त्वपूर्ण कुरा भनेको त यहोवा, उहाँको सार्वभौमिकता र उहाँको इच्छा पूरा गर्नु हो। यहोवाले हामीलाई खुसी बनाउनुहोला भनेर हामी मिसनरी सेवामा लागेका होइनौं, हामी उहाँको सेवा गर्छौं किनभने हामी उहाँलाई प्रेम गर्छौं।”—२ तिमोथी २:४.
गिलियड प्रशिक्षक, लरेन्स बोवेनले “सत्यले तिनीहरूलाई पवित्र गर्नुहोस्,” भन्ने भागको संयोजकको रूपमा सेवा गरे। (यूहन्ना १७:१७) तिनले ११५ औं कक्षाका विद्यार्थीहरू परमेश्वरका पवित्र तुल्याइएका सेवकहरू हुन् भनी उल्लेख गरे। स्कूलको दौडान तिनीहरूले सत्यलाई प्रेम गर्ने इमानदार हृदय भएकाहरूको खोजी गर्दै क्षेत्र सेवकाईमा पनि भाग लिए। येशू तथा उहाँका प्रारम्भिक चेलाहरूले जस्तै विद्यार्थीहरूले “आफ्नै तर्फबाट” बोलेनन्। (यूहन्ना १२:४९, ५०) तिनीहरूले जोसका साथ जीवन दिने सत्यको प्रेरित वचन प्रस्तुत गरे। विद्यार्थीहरूको पुनःअभिनय तथा अनुभवहरूले के कुरा प्रस्ट भयो भने तिनीहरूले भेटेका मानिसहरूलाई बाइबलले निकै प्रभाव पारेको थियो।
सल्लाह तथा अनुभवले प्रोत्साहन प्रदान गर्छ
संयुक्त राज्य अमेरिका शाखा कार्यालयको सेवा विभागका सदस्यहरू, एन्थोनी पेरेज र एन्थोनी ग्रिफिनले छुट्टाछुट्टै विश्वभरिका शाखा समितिका सदस्यहरूसँग अन्तरवार्ता लिए। यी भाइहरूले नयाँ मिसनरीहरूले सामना गर्ने चुनौतीहरू छलफल गर्नुका साथै व्यक्तिगत अनुभवको आधारमा व्यावहारिक सल्लाहहरू प्रदान गरे। ती चुनौतीहरूमा सांस्कृतिक भिन्नता, वर्षभरि नै गर्मी मौसम वा विद्यार्थीहरूको आफ्नो ठाउँको भन्दा अत्यन्तै भिन्न राजनैतिक वातावरण समावेश छ। यस्ता नयाँ वातावरणको सामना गर्न नयाँ मिसनरीहरूलाई कुन कुराले मदत गर्न सक्छ? यहोवाप्रतिको प्रेम, मानिसहरूप्रतिको प्रेम, आफूले छोडेर आएका कुराहरूलाई फर्केर नहेर्ने र विचारै नपुऱ्याइ कामकुरा नगर्ने। शाखा समितिका एक जना सदस्यले यसो भने: “हामीलाई खटाइएका ठाउँका मानिसहरू हामीभन्दा शताब्दीयौं अघिदेखि त्यहाँ बसोबास गर्दै आएका थिए। हामी पक्कै पनि त्यहाँ बसेर घुलमिल हुन सक्छौं। हरेक चोटि कठिनाइहरूको सामना गर्दा त्यसलाई हामीले आफ्नो व्यक्तित्व विकास गर्ने सुअवसरको रूपमा लियौं। तपाईं प्रार्थना र यहोवाको आत्मामा भर पर्नुहोस् अनि तपाईंले ‘तिमीहरूका साथमा छँदैछु’ भन्ने येशूका शब्दहरूको सत्यता अनुभव गर्नुहुनेछ।”—मत्ती २८:२०.
परिचालक निकायका सदस्य, साम्यल हर्डले “परमेश्वरका महाकार्यहरूका विषयमा बोलिरहनुहोस्” भन्ने विषयमा दिएको भाषण कार्यक्रमको चरमोत्कर्ष थियो। सा.यु. ३३ पेन्तिकोसको दिन पवित्र आत्मा खन्याइँदा येशूका चेलाहरू “परमेश्वरका महाकार्यहरूका विषयमा” बोल्न जोसले भरिए। नयाँ मिसनरीहरूलाई परमेश्वरको राज्यबारे त्यस्तै जोसले बोल्न कुन कुराले मदत गर्न सक्छ? त्यही पवित्र आत्माले। भाइ हर्डले स्नातक गर्न लागेका विद्यार्थीहरूलाई “आत्मामा जोशिलो” हुन, आफ्नो असाइनमेन्टबारे रोमाञ्चित हुन र तिनीहरूलाई दिइएको प्रशिक्षणलाई कहिल्यै नबिर्सिन प्रोत्साहन दिए। (रोमी १२:११) “बाइबल परमेश्वरको महाकार्य हो” भनी भाइ हर्डले बताए। “यसको महत्त्वलाई कहिल्यै हल्कासँग नलिनुहोस्। यसको सन्देश जीवित छ। यो कुनै पनि कुराको सारसम्म पुग्छ। आफ्नो जीवनलाई सच्याउन यसको प्रयोग गर्नुहोस्। तपाईंको सोच्ने तरिकामा यसले परिवर्तन ल्याओस्। धर्मशास्त्र अध्ययन गरेर, पढेर र मनन गरेर आफ्नो सोच्ने क्षमतालाई सुरक्षित राख्नुहोस्। . . . ‘परमेश्वरका महाकार्यहरूका विषयमा’ कुरा गर्ने तपाईंको लक्ष्य बनाउनुहोस् साथै तपाईंको गिलियड प्रशिक्षण प्रयोग गर्न कटिबद्ध हुनुहोस्।”
विश्वभरिबाट प्राप्त शुभकामना सन्देश पढेर सुनाउनुका साथै प्रमाणपत्र वितरणपछि एक जना स्नातकले सम्पूर्ण कक्षाको तर्फबाट प्राप्त प्रशिक्षणको निम्ति मूल्यांकन व्यक्त गरिएको पत्र पढेर सुनाए। त्यसपछि भाइ लेट्ले २ इतिहास ३२:७ र व्यवस्था २०:१, ४ उल्लेख गर्दै आनन्ददायी कार्यक्रमको अन्त गरे। आफ्नो सुरुका टिप्पणीहरूसँग समापन टिप्पणी जोड्दै तिनले यसरी टुंग्याए: “त्यसैले प्रिय स्नातकहरू हो, तपाईंहरू अघि बढ्दै जानुहुँदा अर्थात् आफ्नो असाइनमेन्टमा आध्यात्मिक युद्धको लागि अघि बढ्दै जानुहुँदा यहोवा तपाईंहरूको साथमा हुनुहुनेछ भनी नबिर्सनुहोस्। तपाईंको विपक्षमा भन्दा पक्षमा धेरै हुन्छन् भन्ने कुरा कहिल्यै नबिर्सनुहोस्।”
[पृष्ठ २५-मा भएको पेटी]
कक्षा तथ्यांक
प्रतिनिधित्व गरिएका देशहरूको संख्या: ७
मिसनरी सेवामा खटाइएका देशहरूको संख्या: १७
विद्यार्थीहरूको संख्या: ४८
औसत उमेर: ३३.७
सच्चाइमा बिताएको औसत वर्ष: १७.८
पूर्ण-समय सेवकाईमा बिताएको औसत वर्ष: १३.५
[पृष्ठ २६-मा भएको चित्र]
वाचटावर बाइबल स्कूल अफ गिलियडको ११५ औं स्नातक कक्षा
देहायबमोजिम सूचीमा दिइएको लहर क्रमश: अगाडिबाट पछाडि र नाउँहरू बायाँबाट दायाँतर्फ हुन्।
(१) ब्राउन, टि.; गोलर, सि.; हफम्यान, ए.; ब्रुजेजी, जि.; ट्राहन, एस.। (२) स्मार्ट, एन.; क्यासम्यान, एफ.; गार्सिया, के.; लोजान, एम.; सेफर्ट, एस.; ग्रे, के. (३) बेकेट, एम.; निकोल्ज, एस.; स्मिथ, के.; गुल्यारा, ए.; रापनेकर, ए. (४) ग्रे, एस.; भासेक, के.; फ्लेमिङ, एम.; बेथेल, एल.; हर्मान्सन, टि.; हर्मान्सन, पि. (५) रापनेकर, जि.; लोजान, डि.; डिक्की, एस.; किम, सि.; ट्राहन, ए.; वशिंगटन, ए.; स्मार्ट, एस. (६) गोलर, एल.; बर्गहर्फर, टि.; गुल्यारा, डि.; निकोल्ज, आर.; वशिंगटन, एस.; किम, जि. (७) बेकेट, एम.; डिक्की, जि.; स्मिथ, आर.; गार्सिया, आर., हफम्यान, ए.; सेफर्ट, आर.; ब्राउन, एच. (८) फ्लेमिङ, एस.; ब्रुजेजी, पि.; बर्गहर्फर, डब्ल्यु.; बेथेल, टि.; क्यासम्यान, जि.; भासेक, के.