ज्योति वाहकहरूको हैसियतमा हाम्रो महान् नमुनालाई पछ्याउने
१ येशूले आफूबारे यसरी घोषणा गर्नुभयो: “म संसारको ज्योति हुँ।” उहाँको उदाहरण पछ्याएर येशूका चेलाहरू पनि “जगत्का ज्योति” भए। (मत्ती ५:१४) “जगत्को ज्योति[को]” हैसियतमा येशूले आफूलाई पछ्याउने जति सबैले “जीवनको ज्योति पाउनेछ” भनेर भन्न सक्नुभयो। (यूह. ८:१२) हामी आध्यात्मिक ज्योति वाहक भएको हुँदा हामीले त्यस ज्योतिलाई कहिले पनि लुकाउन वा अन्धकारमा पर्न दिनु हुँदैन।
२ यहोवाको संगठनले हामीलाई प्रभावकारी ज्योति वाहक हुन प्रशिक्षणहरूको प्रबन्ध गरेको छ। यदि आफूले पाएको निर्देशन र सल्लाहहरू राम्ररी पछ्यायौं भने, हामीहरू राज्य सत्यबारे सबै खालका मानिसहरूलाई ज्योति दिन सक्षम हुनेछौं। (१ तिमो. ४:६) ज्योति वाहकको हैसियतमा काम गर्दा हरेक अवसरमा सत्यबारे कुरा गर्नु मात्र नभई असल मसीही आचरण कायम गर्नु पनि समावेश हुन्छ। हाम्रो महान् नमुनाको आचरण निष्खोट थियो। हामी उहाँका अनुयायीहरू भएकोले मसीही धर्म हाम्रो दैनिक जीवनको भाग हो भनेर प्रदर्शन गर्नै पर्छ। (एफि. ५:९; तित. २:७, ८, १०) हामीले अरूहरूले देख्नसक्ने असल कार्यका फलहरू फलाउनै पर्छ जसले गर्दा उनीहरू पनि परमेश्वरको महिमा गर्न उत्प्रेरित हुनसक्छन्।—मत्ती ५:१६.
३ एक साक्षी घर-घर प्रचारमा जाँदा एक जना मानिसले असाधारण आग्रह गरेछन्। त्यस घरको मानिस र उनकी पत्नी दुवै बिरामी रहेछन् तर उनीहरूलाई बैंकमा केही पैसा जम्मा गर्नु परेको रहेछ। उनीहरूले त्यस साक्षीलाई सो काम गरिदिन सक्छन् कि भनेर सोधे। त्यस साक्षी सहमत भए र तिनलाई २,००० अमेरिकी डलर बैंकमा जम्मा गर्न दिइयो! तिनले फर्केर सोधे: “तपाईंहरूले मलाई चिन्दै नचिने तापनि कसरी विश्वास गर्न सक्नुभयो?” जवाफ यस्तो थियो: “यहोवाका साक्षीहरू मात्रै विश्वासयोग्य छन् भनेर हामीलगायत अरू सबैलाई थाह छ।” बाइबल सिद्धान्तहरू यथाशक्य पछ्याउँदा परमेश्वरको आदर हुने त्यस्तो राम्रो नाउँ कमाएकोमा हामी कति कृतज्ञ हुनसक्छौं!
४ कक्षा एकमा पढाउने शिक्षिकाले छ वर्षको साक्षी विद्यार्थीले किन हालोइन चित्रहरूमा रंग लगाउन भाग नलिएको भनी अरू विद्यार्थीहरूलाई बुझाइन्। आफ्नो विश्वासको कारणले गर्दा अरूभन्दा भिन्न हुने साहस गरेकोमा उसको तारिफ गर्छु भनी सो शिक्षिकाले बताइन्। यदि हामी केही कुरामा दृढ विश्वास गर्छौं भने, त्यसको लागि खडा हुनुपर्छ भनेर शिक्षिकाले टिप्पणी गरिन्। शिक्षिकाले त्यस रात आफ्नो विश्वास विश्लेषण गरेपछि आफूसित भने त्यस्तो साहस नभएको कुरा स्वीकार्नु पऱ्यो। अर्को दिन, उनले आफूलाई विश्वास नभएको कुनै पनि बिदाका उत्सवहरू कक्षामा नमनाउने घोषणा गरिन्!
५ यहोवाका जनहरू जहाँसुकै बसे तापनि तिनीहरू आफ्नो ज्योति चम्काउन इच्छुक छन्। जवानहरूको उदाहरणीय आचरणले स्कूलका साथीहरू र शिक्षकहरूमाथि अनुकूल प्रभाव पारेको छ। वयस्क साक्षीहरूले छर-छिमेकमा देखाएको असल आचरणले गर्दा राज्य समाचारबारे राम्रो टिपोट गर्न अरूलाई उत्प्रेरित गर्छ। विभिन्न परिस्थितिहरूमा अनौपचारिक साक्षी दिंदा सिक्न इच्छुक निष्कपट व्यक्तिहरूको ध्यानाकर्षण हुन्छ। साथै काम गर्ने ठाउँमा हामीले देखाएको लगनशीलता र इमान्दारीले पनि साक्षी दिन्छ। हो, हामी जहाँसुकै बसौं वा जेसुकै गरौं सत्यप्रति अरूको इच्छा जगाउन सक्छौं।
६ हाम्रो महान् नमुनाको निष्खोट जीवनपद्धति दृष्टिगत गर्दै हामीले उहाँको अनुयायीको हैसियतमा आफ्ना सीपहरूलाई दक्ष बनाउनसक्छौं। उहाँको उदाहरण नक्कल गरेमा हाम्रो ज्योति ‘सबैको निम्ति चम्कने’ कुरा निश्चित छ।—मत्ती ५:१५; १ पत्रु. २:२१.