अन्त नजिक भएकोले साक्षी कार्यमा जोडतोडले भाग लिनुहोस्
१ कटनीको समय रमाइलो हुन्छ। साथै यो कडा परिश्रम गर्ने समय पनि हो। फसल जम्मा गर्न प्रशस्त समय हुँदैन। खेतालाहरूले आफ्नो काममा अल्याङटल्याङ गर्न पाउँदैनन्।
२ येशूले प्रतीकात्मक रूपमा फसलको समयलाई “जगत्को अन्त[सित]” तुलना गर्नुभयो। (मत्ती १३:३९) हामी यस जगत्को अन्तको समयमा बाँचिरहेका छौं अनि “सारा संसारमा सब जातिहरूलाई” साक्षी दिने समय एकदमै थोरै छ। (मत्ती २४:१४) अन्त झन् झनै नजिकिंदै गएकोले हामीले सेवकाईमा जोडतोडले भाग लिनुपर्छ। किन? किनभने येशूले भन्नुभयो: “फसल ता साँच्चिनै प्रशस्त छ, तर खेतालाहरू भने थोरै छन्।”—मत्ती ९:३७, ३८; रोमी १२:११.
३ ढिलासुस्ती नगरी साक्षीकार्यमा लाग्नुहोस्: येशूले आफ्नो महान् प्रचारकार्य थाल्नुहुँदा उहाँसित आफूलाई दिइएको काम पूरा गर्न जम्मा साढे तीन वर्ष मात्र थियो। उहाँले यसो भन्नुहुँदै अविलम्बी भावसहित प्रचार गर्नुभयो: “मैले अवश्य परमेश्वरको राज्यको सुसमाचार अरू शहरहरूमा पनि सुनाउनुपर्छ किनकि म यसैको निम्ति पठाइएको हुँ।”—लूका ४:४३.
४ येशूले आफ्ना चेलाहरूको मनमा पनि त्यस्तै अविलम्बी भाव जगाउनुभयो। (मर्कू. १३:३२-३७) त्यसैकारण, “दिनदिनै तिनीहरूले मन्दिरमा र घरघरमा गएर शिक्षा दिन र येशूनै ख्रीष्ट हुन् भन्ने सुसमाचार सुनाउन बन्द गरेनन्।” (प्रेरि. ५:४२) तिनीहरूले आफ्नो जीवनमा कम महत्त्वका कुराहरूलाई प्राथमिकता दिएनन्। तिनीहरू थोरै भए तापनि “स्वर्गमनि भएका सारा सृष्टिमा” सुसमाचार प्रचार गर्न सफल भए।—कल. १:२३.
५ हामीले त्यस्तै अविलम्बी भाव खेती गर्नुपर्ने अझ ठूलो कारण छ किनभने “सबै कुराको अन्त नजीकै आएको छ।” (१ पत्रु. ४:७) यहोवाले यस रीतिरिवाजको अन्तको दिन र समय तोक्नुभएको छ। (मत्ती २४:३६) बाँकी रहेको समयमा प्रचारकार्य सिध्याइनेछ। त्यसैकारण हामी यथासम्भव धेरै मानिसहरूलाई सुसमाचार सुनाउन अझ बढी प्रयास गर्दै जुटिरहेका छौं।
६ अन्त नजिक भएकोले साक्षीकार्यमा जोडतोडले भाग लिएर हामीले पनि येशूले जस्तै खुसीसाथ यहोवालाई यसो भन्नसक्छौं: ‘हामीलाई तपाईंले गर्नदिनुभएको काम पूरा गऱ्यौं।’—यूह. १७:४.