आमाबाबुहरू हो—आफ्ना छोराछोरीहरूलाई बाल्यकालदेखि नै प्रशिक्षण दिनुहोस्
१ “बालकलाई ठीक बाटोमा लगाऊ, र बृद्धावस्थामा पनि त्यसले त्यो त्याग्दैन।” (हितो. २२:६) आमाबाबुहरू हो, तपाईं आफ्ना छोराछोरीहरूले सच्चाइको मार्ग ‘त्यागेको’ चाहनुहुन्न भने, यस्तो प्रशिक्षण कहिलेदेखि दिन सुरु गर्नुपर्छ? बाल्यकालदेखि नै!
२ तिमोथीले “बाल्यकालदेखि” नै आध्यात्मिक शिक्षा पाएका थिए भनेर पावलले बताउँदा तिनले स्पष्टतः शैशवकालदेखि नै भन्न खोजिरहेका थिए। (२ तिमो. ३:१४, १५) फलतः यसले गर्दा पछि तिमोथी उत्कृष्ट आध्यात्मिक मानिस बन्न सके। (फिलि. २:१९-२२) आमाबाबुहरू हो, ‘परमप्रभुको सामने बढ़नको’ लागि तपाईंका छोराछोरीहरूलाई चाहिने प्रशिक्षण तपाईंले पनि “बाल्यकालदेखि” नै दिन सुरु गर्नै पर्छ।—१ शमू. २:२१.
३ बढ्नको लागि उनीहरूलाई चाहिने पानी दिनुहोस्: सानो टुसा बढेर ठूलो रूख बन्न प्रशस्त मात्रामा पानी चाहिएझैं परमेश्वरको परिपक्व सेवक बन्न सबै उमेरका बच्चाहरूलाई बाइबल सच्चाइको प्रशस्त पानी चाहिन्छ। छोराछोरीलाई बाइबल सच्चाइ सिकाउने र उनीहरूलाई यहोवासँग घनिष्ठ हुन मदत दिने प्रमुख तरिका, नियमित रूपमा पारिवारिक बाइबल अध्ययन गरेर हो। तर आमाबाबुहरू हो, हरेक बच्चाले कति बेरसम्म ध्यान दिएर सुन्न सक्छ, त्यसबारे विचार गर्नुहोस्। साना बच्चाहरूको लागि, थोरै पटक तर धेरै बेरसम्म सिकाउनुभन्दा थोरै तर बारम्बार सिकाउनु नै प्रभावकारी हुन्छ।—व्यव. ११:१८, १९.
४ तपाईंका छोराछोरीहरूको सिक्न सक्ने क्षमतालाई कहिल्यै पनि हल्कासित नलिनुहोस्। उनीहरूलाई बाइबल पात्रहरूको कथा सुनाउनुहोस्। उनीहरूलाई बाइबलमा वर्णन गरिएका दृश्यहरूको चित्र कोर्न वा अभिनय गर्न लगाउनुहोस्। बाइबल नाटकहरूलगायत भिडियो तथा श्रव्य क्यासेटहरूको सदुपयोग गर्नुहोस्। तपाईंका छोराछोरीहरूको उमेर तथा सिक्ने क्षमताअनुसार पारिवारिक अध्ययनमा काँटछाँट गर्नुहोस्। सुरु-सुरुको प्रशिक्षण आधारभूत तथा थोरै मात्रामा हुनुपर्छ; तर जसै बच्चा हुर्कंदै जान्छ, उसलाई दिइने प्रशिक्षण पनि त्यसैअनुसार विस्तृत र बढाउँदै लैजानुपर्छ। बाइबल निर्देशनलाई जीवन्त बनाउनुहोस् र विभिन्न तरिकामा सिकाउनुहोस्। तपाईं आफ्ना छोराछोरीहरूले वचनको “तृष्णा” जगाएको चाहनुहुन्छ, त्यसकारण अध्ययनलाई सकेसम्म रोचक बनाउनुहोस्।—१ पत्रु. २:२.
५ उनीहरूलाई मण्डलीमा सामेल गराउनुहस्: आफ्ना छोराछोरीहरूलाई मण्डलीमा पूर्ण रूपमा सामेल गराउन उनीहरूको लागि उमेर सुहाउँदा लक्ष्यहरू राख्नुहोस्। उनीहरूको पहिलो लक्ष्य के हुन सक्छ? दुई साना छोराछोरीका आमाबाबुले यसो भने: “दुवै छोराछोरीले राज्यभवनमा चकचक नगरी बस्न प्रशिक्षण पाउन थाले।” पछि, छोराछोरीहरूलाई सभाहरूमा आफ्नै शब्दमा टिप्पणी गर्न र ईश्वरतान्त्रिक सेवकाई स्कूलमा भाग लिने लक्ष्य राख्न मदत दिनुहोस्। क्षेत्र सेवकाईमा जाँदा पर्चा दिने, शास्त्रपद पढ्ने, पत्रिका प्रस्तुत गर्ने वा घरधनीसँग अर्थपूर्ण वार्तालाप गर्न लगाउने लक्ष्यहरू राख्नु राम्रो हो।
६ जोसि उदाहरण बसाल्नुहोस्: के तपाईंका छोराछोरीहरूले तपाईंले दिनहुँ यहोवाबारे कुरा गरेको र उहाँलाई प्रार्थना गरेको सुन्छन्? के तिनीहरूले तपाईंले उहाँको वचन पढेको, सभाहरूमा उपस्थित भएको, क्षेत्र सेवकाईमा भाग लिएको र परमेश्वरको इच्छा गर्दा आनन्दित भएको देख्छन्? (भज. ४०:८) उनीहरूले यस्ता कामहरू गर्नु महत्त्वपूर्ण छ र यसो गर्दा तपाईं र उनीहरू एकसाथ मिलेर गर्नुहोस्। छ जना छोराछोरीलाई हुर्काएर विश्वासी साक्षी बनाउन सफल भएकी आमाबारे एउटी छोरी यसो भन्छिन्: “हामीलाई सबैभन्दा छाप पारेको कुराचाहिं आमाकै उदाहरण थियो। मुखले भन्नुभन्दा काम गरेर देखाउनु प्रभावकारी हुन्छ।” चार छोराछोरीका आमाबाबुले यसो भने: “ ‘यहोवालाई प्राथमिकता दिनुपर्छ’ भन्ने कथन एउटा सामान्य पदावली मात्र थिएन तर हामी त्यहीअनुरूप जीवन बिताउँथ्यौं।”
७ आमाबाबु हो, परमेश्वरको वचनबाट सच्चाइ सिकाएर, उमेर सुहाउँदा लक्ष्यहरू राखेर र सर्वोत्तम उदाहरण बसालेर आफ्ना छोराछोरीहरूलाई सानै उमेरदेखि प्रशिक्षण दिन थाल्नुहोस्। आफूले गरेको कामको लागि तपाईं खुसी हुनुहुनेछ!