मण्डली पुस्तक अध्ययन निरीक्षकहरूले कसरी व्यक्तिगत चासो देखाउँछन्
१ “प्रत्येक व्यक्तिविशेषको आध्यात्मिक प्रगतिलाई व्यक्तिगत तवरमा सकेसम्म बढी ध्यान दिन सकियोस्” भनेर मण्डली पुस्तक अध्ययनको प्रबन्ध गरिएको हो। “. . . यसमा आफ्ना जनहरूप्रति यहोवाको करुणा र कोमल व्यवहार झल्किन्छ।” (om अनु. ७५; यशै. ४०:११) यस्तो व्यक्तिगत ध्यान दिने सन्दर्भमा मण्डली पुस्तक अध्ययन निरीक्षकले महत्त्वपूर्ण भूमिका खेल्छन्।
२ मण्डली पुस्तक अध्ययनमा: पुस्तक अध्ययन समूहहरू जानाजानी सानो बनाइने हुनाले पुस्तक अध्ययन निरीक्षकले आफ्नो समूहका सदस्यहरूलाई राम्ररी चिन्न सक्छन्। (हितो. २७:२३) साधारणतया प्रत्येक हप्ता अध्ययनअघि अथवा पछि सरसंगति गर्ने मौका मिल्छ। महिनाभरिमा तिनले समूहका लगभग-लगभग प्रत्येक व्यक्तिसित कुराकानी गर्न सक्नेछन्। यसो गर्दा पुस्तक अध्ययन समूहका सदस्यहरूले परीक्षाहरूको सामना गर्दा अथवा प्रोत्साहनको खाँचो पर्दा मदतको लागि तिनीकहाँ जान सजिलो महसुस गर्न सक्नेछन्।—यशै. ३२:२.
३ पुस्तक अध्ययन निरीक्षकले अध्ययनको दौडान समूहका सबैलाई भाग लिन प्रोत्साहन दिने कोसिस गर्छन्। तिनले यसो गर्ने एउटा तरिका एकदमै दयालु तथा विनम्र भई अध्ययन सञ्चालन गरेर हो। (१ थिस्स. २:७, ८) तिनले स-साना केटाकेटीलगायत सबैलाई समावेश गर्ने तरिकाहरू खोज्छन्। यदि कोही-कोही टिप्पणी दिन डराउँछन् भने, तिनले उनीहरूलाई शास्त्रपद पढ्न वा कुनै अनुच्छेदको टिप्पणी दिन पहिल्यै तयार गराएर व्यक्तिगत तवरमा सहयोग गर्न सक्छन्। अथवा तिनले उनीहरूलाई आफ्नै शब्दमा कसरी टिप्पणी दिन सकिन्छ भनेर देखाउनेछन्।
४ यदि पुस्तक अध्ययन निरीक्षकको सहायक सेवकाई सेवक हुन् भने, निरीक्षकले तिनलाई दुई महिनाको एक चोटि अध्ययन सञ्चालन गर्न दिने प्रबन्ध मिलाउँछन्। यसो गर्दा निरीक्षकले सहायकलाई नियालेर हेर्न र मदतकारी सुझावहरू दिन सक्छन्। भाइहरूलाई उनीहरूको शिक्षण कला तिखार्न मदत गर्ने कस्तो राम्रो प्रबन्ध!—ती. १:९.
५ क्षेत्र सेवामा: पुस्तक अध्ययन निरीक्षकको एउटा मुख्य जिम्मेवारी प्रचार कार्यमा अगुवाइ लिनु हो। (गन्ती २७:१६, १७) तिनले समूहमा प्रचार गर्नको लागि व्यावहारिक प्रबन्धहरू मिलाउनुका साथै समूहका सबैलाई आफ्नो सेवकाईबाट आनन्द उठाउन मदत गर्ने प्रयास गर्छन्। (एफि. ४:११, १२) यसको लागि तिनले समूहका प्रत्येक सदस्यसित सेवामा सँगै काम गर्ने लक्ष्य बनाउँछन्। आफ्नो सेवकाईका कुनै-कुनै पक्षमा उन्नति गर्न एकदमै अनुभवी प्रकाशकको मदत चाहनेहरूको लागि प्रबन्ध मिलाउन तिनी सेवा निरीक्षकसँग पनि काम गर्छन्।
६ मायालु गोठालोको हैसियतमा: आफ्नो परिस्थितिको कारण प्रचार कार्यमा धेरै भाग लिन नसक्ने व्यक्तिहरूप्रति पुस्तक अध्ययन निरीक्षकले चासो राख्छन्। ढल्कँदो उमेर वा बिरामीको कारण थला परेकोले चलहल गर्नै नसक्ने र गम्भीर बिरामी अथवा चोटपटकको कारण केही समयको लागि घरबाहिर निस्कन नसकेकाहरूले महिनामा पूरा घण्टा रिपोर्ट बुझाउन नसकेको खण्डमा १५/१५ मिनेटको हिसाबले रिपोर्ट दिन सकिने प्रबन्ध मिलाइएको छ भन्ने कुरा उनीहरूलाई थाह छ कि छैन तिनले पक्का गर्छन्। (यस प्रबन्धको लागि को योग्य छ भन्ने कुरा मण्डली सेवा समितिले तय गर्नेछ।) तिनले आफ्नो समूहमा खटाइएका निस्क्रियहरूलाई मण्डलीसित मिलेर आफ्नो गतिविधि पुनः सुरु गर्न मदत गर्ने प्रयास गरेर उनीहरूप्रति पनि चासो देखाउँछन्।—लूका १५:४-७.
७ पुस्तक अध्ययन निरीक्षकले देखाएको मायालु चासोको लागि हामी साह्रै कृतज्ञ छौं! तिनीहरूले व्यक्तिगत तवरमा ध्यान दिंदा त्यसले “सबै जना विश्वासको . . . एकता . . . ख्रीष्टको पूर्णताको कदको नापसम्मको पूरा पाको मानिस” हुन मदत गर्छ।—एफि. ४:१३.