आफ्नो समय प्रयोग गर्ने सन्दर्भमा सजग हुनुहोस्
१. आज सबै मानिसहरूले कस्तो चुनौतीको सामना गर्छन्?
१ समय तथा श्रम बचत गर्ने उपकरणहरू भएको आजको युगमा, थुप्रै मानिसहरूले गर्नुपर्ने कामचाहिं तीन थुप्रो तर ती काम गर्ने समय भने अत्यन्त कम भएको महसुस गर्छन्। यस्तो समयमा के तपाईंलाई राम्रो आध्यात्मिक तालिका कायम राख्न गाह्रो लाग्छ? के तपाईंलाई सेवकाईको लागि अझ बढी समय भइदिएको भए पनि हुन्थ्यो जस्तो लाग्छ? हामी कसरी आफ्नो समयको सदुपयोग गर्न सक्छौं?—भज. ९०:१२; फिलि. १:९-११.
२, ३. सूचना प्रविधिले कस्तो चुनौती खडा गर्छ र हामी प्रत्येकले कसरी आत्म-परीक्षण गर्न सक्छौं?
२ समय खेर जाने कुराहरू चिन्नुहोस्: हामी कसरी आफ्नो समय प्रयोग गर्छौं, त्यसबारे समय-समयमा हामी सबैले जाँच्नुपर्छ। बाइबल यस्तो आग्रह गर्छ: “यसकारण कसरी हिंड़छौ ठीकसँग हेर, निर्बुद्धि जस्तो होइन, तर बुद्धिमान मानिसजस्तो, समयको अवसर विचार गरेर सम्झ, किनभने समय खराब छ।” (एफि. ५:१५, १६) सूचना प्रविधिमा भएको विकासले खडा गरेका चुनौतीहरूलाई विचार गर्नुहोस्। कम्प्युटर तथा अन्य इलेक्ट्रोनिक उपकरणहरूको सही उपयोगिता भए तापनि समय प्रयोग गर्ने सन्दर्भमा हामी सजग भएनौं भने यी कुराहरू एउटा पासो बन्न सक्छ।—१ कोरि. ७:२९, ३१.
३ हामी प्रत्येकले आफैलाई यस्तो प्रश्न सोध्नुपर्छ: ‘के म बेकारमा हरेक दिन इ-मेल सन्देशहरू पढ्न वा पठाउन समय बिताउँछु? के म बेकारका कुराहरूको लागि अक्सर फोन गर्न वा इलेक्ट्रोनिक सन्देशहरू पठाउन व्यस्त हुन्छु? (१ तिमो. ५:१३) के म बिनसित्ति इन्टरनेट चलाइरहन्छु वा टेलिभिजन हेर्दा काम न काज च्यानल फेऱ्या-फेऱ्यै गरिरहन्छु? इलेक्ट्रोनिक गेम्सको धुन लागेको हुँदा के मैले परमेश्वरको वचनको अध्ययन गर्ने समय पाइरहेको छैनँ?’ यस्ता कुराहरूले चालै नपाउने गरी हाम्रो आध्यात्मिकतालाई खत्तम पार्न सक्छन्।—हितो. १२:११.
४. एक जना युवाले कस्तो छाँटकाँट गरे र किन?
४ बुद्धिमानीपूर्वक समय प्रयोग गर्ने: इलेक्ट्रोनिक उपकरणहरूले हाम्रो ध्यान र समय दुवै खान खोज्छ। कम्प्युटर गेम्समा लग्गू भएका एक जना युवाले यस प्रकार स्वीकारे: “कहिलेकाहीं सेवकाई वा मसीही सभामा जानुअघि खेल्दा मलाई ध्यान दिनै गाह्रो पर्थ्यो। म सधैं त्यस गेममा आइपरेको समस्या कसरी घरमा पुग्ने बित्तिकै समाधान गरूँ भनेर सोचिरहेको हुन्थें। यसले मेरो व्यक्तिगत बाइबल अध्ययन र पढाइमा असर गऱ्यो। परमेश्वरको सेवा गर्दाको आनन्द घट्न थाल्यो।” आफूले परिवर्तन गर्नुपर्ने आवश्यकता महसुस गरेको कारण तिनले सबै कम्प्युटर गेमहरू मेटाइदिए। तिनी सम्झन्छन्, “यसो गर्न सजिलो भएन। म ती गेमहरूप्रति कत्तिको आसक्त भइसकेको रहेछु भनेर बल्ल बुझें। तर आफूले ठूलो विजय हासिल गरेजस्तो पनि मैले महसुस गरें किनभने यसैमा मेरो हित छ भनेर मलाई थाह थियो।”—मत्ती ५:२९, ३०.
५. आध्यात्मिक कुराहरूको लागि हामी कसरी समय निकाल्न सक्छौं र यसो गरेर हामी कसरी लाभ उठाउन सक्छौं?
५ छाँटकाँट गर्नुपर्ने क्षेत्रहरू छन् भने यस्ता कदमहरू चाल्नु पनि आवश्यक पर्न सक्छ। अनावश्यक गतिविधिबाट के तपाईं आधा घण्टा समय निकाल्न सक्नुहुन्छ? एक वर्षमा सम्पूर्ण बाइबल पढिसिध्याउन तपाईंले हरेक दिन त्यति समय छुट्याउनुभए पुग्छ। त्यो आध्यात्मिक तवरमा साँच्चै इनामदायी साबित हुनेछ! (भज. १९:७-११; ११९:९७-१००) बाइबल पढाइ, सभाको तयारी र क्षेत्र सेवकाईको लागि निश्चित समय तोक्नुहोस्। (१ कोरि. १५:५८) यसो गर्दा आफ्नो समय खेर गइरहेका कुराहरूलाई नियन्त्रण गर्ने मदत पाउनुका साथै “प्रभुको इच्छा के रहेछ,” सो बुझ्ने मदत पाउनुहुनेछ।—एफि. ५:१७.