एकअर्कालाई दह्रिलो पारौं
१ सँगी विश्वासीहरूलाई दह्रिलो पार्न प्रेरित पावल मरिमेटे। (प्रेरि. १४:१९-२२) हामी पनि हाम्रा भाइबहिनीहरू कठिनाइमा पर्दा चिन्तित हुन्छौं र मदत गर्न हतारिन्छौं। प्राचीनहरूले मात्र होइन, सबैले नै एकअर्काको ख्याल राख्नुपर्छ भनेर बाइबलले बताउँछ। (रोमी १५:१, २) आउनुहोस्, “एउटाले अर्कालाई प्रोत्साहन देओ, र एउटाले अर्कालाई दह्रिलो पार्ने काम गर,” भन्ने बाइबलको सल्लाह लागू गर्ने दुई तरिका विचार गरौं।—१ थिस्स. ५:११, NRV.
२ अरूको आवश्यकता आफै बुझ्नुहोस्: तबीता “असल काम गर्न र दान-पुण्यमा निपुण थिइन्” भनी बाइबल बताउँछ। (प्रेरि. ९:३६, ३९) तिनले अरूको आवश्यकता आफै बुझिन् र मदत गर्न सक्दो गरिन्। कति राम्रो उदाहरण! मण्डलीका वृद्धहरूलाई सभामा उपस्थित हुन राज्यभवनसम्म ल्याइदिनु परेको छ कि? अग्रगामीहरूलाई दिउँसोतिर प्रचारमा जान कुनै साथी पो चाहिएको छ कि? यस्ता आवश्यकताहरू आफै बुझेर मदत गर्नुभयो भने तिनीहरू कत्ति खुसी होलान्, सोच्नुहोस् त!
३ आध्यात्मिक कुराकानी गर्नुहोस्: कुराकानी गरेर पनि अरूलाई दह्रिलो पार्न सकिन्छ। (एफि. ४:२९) एक अनुभवी प्राचीनले यसो भने: “अरूलाई दह्रिलो पार्न चाहनुहुन्छ भने आध्यात्मिक कुराकानी गर्नुहोस्। एउटा सरल प्रश्न सोधेर मात्र पनि प्रोत्साहनदायी कुराकानी सुरु गर्न सकिन्छ, जस्तै ‘तपाईंले कसरी सच्चाइ पाउनुभयो?’ ” मण्डलीका युवाहरूप्रति निष्कपट चासो देखाउनुहोस्। कोही निराश छन् कि? कोही लजालु पो छन् कि? चासो देखाइहाल्नुहोस्। (हितो. १२:२५) सँगी विश्वासीहरूसित गरिने आध्यात्मिक कुराकानीको समय संसारको मनोरञ्जनले नखाओस्।—रोमी १:११, १२.
४ अरूलाई दह्रिलो पार्न कस्तो आध्यात्मिक कुराकानी गर्ने त? बाइबल पढाइ र व्यक्तिगत अध्ययन गर्दा यहोवाप्रति कृतज्ञता बढ्ने कुनै बुँदा पाउनु भएको छ कि? प्रहरीधरहरा अध्ययन वा जनभाषणको कुनै कुरा तपाईंलाई राम्रो लागेको छ कि? विश्वास बलियो पार्ने कुनै अनुभवले तपाईंको मन छोएको छ कि? यदि तपाईंसित यस्ता आध्यात्मिक खजाना छन् भने आध्यात्मिक कुराकानी त स्वतः आइहाल्छ।—हितो. २:१; लूका ६:४५.
५ चाहिएको व्यावहारिक मदत दिएर र आध्यात्मिक कुराकानी गरेर सधैं एकअर्कालाई दह्रिलो पारौं।—हितो. १२:१८.