परिवार मिलेर यहोवाको उपासना गर्ने
१ प्राचीन समयमा इस्राएली परिवारका सदस्यहरू थुप्रै काम मिलेर गर्थे। तिनीहरू दिनहुँ सँगै मिलेर घरायसी काम र विशेषगरि यहोवाको उपासना गर्थे। (लेवी १०:१२-१४; व्यव. ३१:१२) अहिले प्रायजसो ठाउँमा पूरै परिवार मिलेर काम गर्ने चलन लगभग हराइसक्यो। तर, परिवार मिलेर काम गर्नुपर्ने र त्यसमा पनि विशेषगरि परिवारका सबै सदस्य मिलेर उपासना गर्नुपर्ने महत्त्वलाई यहोवाका साक्षीहरूले राम्ररी बुझेका छन्। यसरी परिवारको सबै जना मिलेर उहाँको उपासना गरेको देख्दा परिवारको आरम्भक पक्कै खुसी हुनुहुन्छ!
२ सँगै मिलेर प्रचार गर्नुहोस्: सँगै मिलेर सुसमाचार प्रचार गर्दा पारिवारिक एकता बलियो हुन्छ। त्यसकारण, मण्डलीका अरू भाइबहिनीसँग प्रचारमा जाने प्राचीन आफ्नी पत्नी र छोराछोरीसित पनि नियमित तवरमा प्रचारमा जानुपर्छ। (१ तिमो. ३:४, ५) व्यस्त तालिका हुने परिभ्रमण निरीक्षकहरूले समेत आफ्नी पत्नीसित सँगै प्रचार जाने समय मिलाउँछन्।
३ छोराछोरीलाई प्रचारमा लाँदा आमाबाबुले तिनीहरूलाई सुसमाचारका प्रचारक बन्न मदत गर्ने मौका पाउँछन्। यसरी सँगै प्रचारमा जाँदा आमाबाबुले पाएको आनन्द अनि सन्तुष्टि देख्नुका साथै यहोवा र सँगी मानिसहरूलाई आमाबाबुले कत्ति माया गर्दा रहेछन्, त्यो पनि छोराछोरीले अनुभव गर्न पाउँछन्। (व्यव. ६:५-७) छोराछोरी हुर्केपछि पनि तिनीहरू सँग प्रचारमा गइरहनुपर्छ। पन्ध्रदेखि २१ वर्षका तीन छोराहरूका आमाबाबु अहिले पनि नियमित तवरमा छोराहरूसित प्रचारमा जान्छन्। बुबा यसो भन्छन्: “हरेक पटक प्रचारमा निस्कँदा हामी उनीहरूलाई केही न केही कुरा सिकाइरहेका हुन्छौं। छोराहरूलाई प्रचारकार्य रमाइलो अनि प्रोत्साहनदायी लागोस् भनेर हामी कोसिस गरिरहन्छौं।
४ सँगै मिलेर तयारी गर्नुहोस्: प्रचारमा जान सँगै मिलेर तयारी गर्दा सबैलाई फाइदा भएको परिवारहरूले अनुभव गरेका छन्। पालैपालो प्रचारक वा घरधनी बनेर अभ्यास गर्न पाउँदा केटाकेटीहरू अक्सर रमाइलो मान्छन्। केही परिवारले त पारिवारिक अध्ययनको अन्तमा केही मिनेट यस्ता अभ्यासहरू गर्ने गर्छन्।
५ आफूलाई मनपर्ने मानिससित मिलेर महत्त्वपूर्ण र सन्तोषप्रद काम गर्दा त हामीलाई रमाइलो लाग्छ भने परिवारसित मिलेर घरघर प्रचार, पुनःभेटहरू र बाइबल अध्ययनहरू सञ्चालन गर्दा हामी झन् कत्ति आनन्दित हुनेछौं! यसरी परिवारसित मिलेर यहोवाको उपासना गर्दा रमाई-रमाई तपाईं यसो भन्न सक्नुहुनेछ: “म र मेरो घरानाले परमप्रभुकै सेवा गर्नेछौं।”—यहो. २४:१५.