म प्रचार गर्न योग्यको छु?
१. हामीले प्रचार गर्न आफूलाई अयोग्य महसुस गर्नुपर्दैन, किन?
१ यदि तपाईं पनि कहिलेकाहीं आफूलाई यस्तै प्रश्न सोध्नुहुन्छ भने चिन्ता नलिनुहोस्! सेवकको रूपमा हामीलाई योग्य बनाउने कुरा औपचारिक शिक्षा वा हामीसित भएको जन्मजात खुबी होइन। प्रथम शताब्दीका केही चेलाहरूलाई “अपठित र अजान” भनी चिनाइएको थियो। तैपनि, तिनीहरू सुसमाचारका प्रभावकारी प्रचारकहरू थिए किनभने तिनीहरू येशूले बसाल्नुभएको उदाहरण पछ्याउन कटिबद्ध थिए।—प्रेरि. ४:१३; १ पत्रु. २:२१.
२. येशूका शिक्षाका केही विशेषता के थिए?
२ येशूले कसरी सिकाउनुभयो? उहाँको शिक्षा सरल, व्यावहारिक र सजिलैसँग बुझिने थियो। उहाँले प्रयोग गर्ने प्रश्न, दृष्टान्त तथा सरल परिचयले श्रोताको ध्यान खिच्थ्यो। (मत्ती ६:२६) उहाँ मानिसहरूमा निष्कपट चासो देखाउनुहुन्थ्यो। (मत्ती १४:१४) त्यसका साथै, येशू विश्वस्त हुँदै र अख्तियारसहित बोल्नुहुन्थ्यो किनकि उहाँलाई थाह थियो, यो जिम्मेवारी यहोवाले दिनुभएको हो र यो पूरा गर्ने शक्ति उहाँले दिनुहुन्छ।—लूका ४:१८.
३. सेवाको काम पूरा गर्न यहोवा हामीलाई कसरी मदत गर्नुहुन्छ?
३ यहोवा हामीलाई मदत गर्नुहुन्छ: आफ्नो वचन र संगठनमार्फत हाम्रो महान् शिक्षक हामीलाई सफलतासाथ सुसमाचार प्रचार गर्न चाहिने प्रशिक्षण प्रदान गर्नुहुन्छ। (यशै. ५४:१३) येशूले सिकाउनुभएका तरिकाहरूको रेकर्ड यहोवाले सुरक्षित राखेकोले गर्दा हामी उहाँका तरिकाहरू विश्लेषण गर्न र अनुकरण गर्न सक्छौं। यहोवा हामीलाई उहाँको पवित्र आत्मा र मण्डलीका सभाहरूद्वारा प्रशिक्षण दिनुहुन्छ। (यूह. १४:२६) साथै, अझै प्रभावकारी हुन मदत गर्न सक्ने अनुभवी प्रकाशकहरू उहाँ हामीलाई दिनुहुन्छ।
४. अरूलाई सुसमाचार बाँड्न योग्य महसुस गर्नुपर्ने कस्तो कारण हामीसित छ?
४ “हाम्रो योग्यता परमेश्वरबाट आउँछ।” (२ कोरि. ३:५, NRV) त्यसैले प्रचार गर्न योग्य महसुस गर्नुपर्ने हर कारण हामीसित छन्। यहोवामा भर पर्दा र विश्वासी भई उहाँका मायालु प्रबन्धहरूको सदुपयोग गर्दा हामी ‘हरेक सुकर्ममा पूर्णरूपले सुसज्जित भई सिद्ध हुन’ सक्नेछौं।—२ तिमो. ३:१७.