यो महिनाको मुख्य विषय: “जोडतोडले वचन प्रचार गर।”—२ तिमोथी ४:२.
राज्यको समाचार फैलाउन आफूले पाएको मौकाको सदुपयोग गर्नुहोस्!
१. दाऊदको उदाहरणबाट हामी के सिक्न सक्छौं?
१ राजा दाऊदले जीवनमा कठिन परिस्थितिहरूको सामना गर्नुपरे तापनि त्यस्ता परिस्थितिहरूका कारण आफूलाई कमजोर हुन दिएनन्। उदाहरणका लागि, तिनी यहोवा परमेश्वरको लागि मन्दिर निर्माण गर्न चाहन्थे। तर तिनलाई यो काम गर्न नदिइँदा तिनले आफ्नो उद्देश्यमा छाँटकाँट गरे। मन्दिर बनाउने सुअवसर सुलेमानले पाए अनि यस काममा थुप्रै कुरा तयार गर्न दाऊदले सुलेमानलाई मदत गरे। (१ राजा ८:१७-१९; १ इति. २९:३-९) दाऊदले आफूले गर्न नसक्ने काममा भन्दा गर्न सक्ने काममा ध्यान केन्द्रित गरे। हामी पनि विभिन्न तरिकामा परमेश्वरको राज्यको समाचार फैलाउने काममा भाग लिन्छौं। यी तरिकाहरूबारे विचार गर्दा हामी कसरी दाऊदको उदाहरण अनुकरण गर्न सक्छौं?
२. हामी के गर्न सक्छौं?
२ सक्दो गर्नुहोस्। सहायक वा नियमित अग्रगामी सेवा सुरु गर्न थुप्रैले आफ्नो जीवन सरल बनाएका छन्। (मत्ती ६:२२, फुटनोट) के तपाईं पनि त्यसै गर्न सक्नुहुन्छ? प्रार्थनापूर्वक आफ्नो परिस्थिति केलाउनुभयो भने तपाईंको लागि “सेवा गर्ने मौकाको ठूलो ढोका” खुलेको छ भनेर तपाईंले देख्नुहुनेछ। यसो हो भने मौकाको सदुपयोग गर्नुहोस्!—१ कोरि. १६:८, ९.
३. परिस्थितिले गर्दा अग्रगामी सेवा गर्न सक्नुभएन भने पनि तपाईंसित साक्षी दिने कस्ता मौकाहरू छन्?
३ अग्रगामी सेवा गर्न तपाईंको परिस्थितिले दिंदैन भने नि? तपाईंसित अरू मौका छन् भनेर नबिर्सनुहोस्। उदाहरणको लागि, सायद तपाईंको काम गर्ने ठाउँमा थुप्रै मानिससित भेट हुन्छ होला। तिनीहरूलाई साक्षी दिने मौका छोप्नुभए कसो होला? अथवा तपाईंलाई स्वास्थ्य समस्या छ भने तपाईंको हेरविचार गर्ने डाक्टर तथा नर्सहरूलाई साक्षी दिन सक्नुहुन्छ कि? वृद्ध अथवा गम्भीर स्वास्थ्य समस्या भएकोले प्रचारमा धेरै भाग लिन नसक्ने भाइबहिनीले १५ मिनेट मात्रै भए पनि क्षेत्र सेवाको रिपोर्ट दिन सक्छन् भनेर नबिर्सनुहोस्। क्षेत्र सेवाको रिपोर्टमा अनौपचारिक साक्षी दिंदा बिताएको समयका साथै आफूले प्रस्तुत गरेका प्रकाशनहरू, पर्चाहरू अनि स्मरणार्थ र अधिवेशनका निम्तो पर्चाहरूको सङ्ख्या लेख्न नभुल्नुहोस्। सानातिना देखिने यस्ता मौकाको सदुपयोग गर्नुभयो भने थोरै-थोरै गर्दै धेरै समय जम्मा हुन्छ र यो देख्दा तपाईं छक्कै पर्नु हुनेछ!
४. तपाईंले के गर्ने अठोट गर्नुभएको छ?
४ हाम्रो परिस्थिति जस्तोसुकै भए पनि सुसमाचार फैलाउन आफूले पाएको हरेक मौकाको सदुपयोग गरौं। परमेश्वरको राज्यको लागि आफूले सकेजति गरिरहेको छु भनेर थाह पाउँदा हामी आनन्दित हुनेछौं।—मर्कू. १४:८; लूका २१:२-४.