प्रचारमा हाम्रो वेबसाइट चलाउनुहोस्—“अक्सर सोधिने प्रश्नहरू”
हाम्रो वेबसाइट jw.org/ne मा “हाम्रो बारेमा” अन्तर्गत “अक्सर सोधिने प्रश्नहरू” भन्ने भाग पाइन्छ। यस भागमा दिइएका प्रश्नहरूसित परिचित भयौं भने घरधनीले हामीबारे कुनै प्रश्न सोधेमा त्यसको बाइबलआधारित जवाफ हाम्रो वेबसाइटमा कसरी भेट्टाउन सकिन्छ भनी देखाउन सक्छौं। तपाईंले प्रचारमा कुराकानी थाल्न पनि यी प्रश्नहरू चलाउन सक्नुहुन्छ। त्यसको लागि इलाकाका मानिसहरूलाई चासो लाग्ने कुनै एउटा प्रश्न छान्नुहोस्, त्यस प्रश्नबारे घरधनीको विचार के छ भनी सोध्नुहोस् अनि वेबसाइटमा दिइएको जानकारी प्रयोग गर्दै बाइबलआधारित जवाफ दिनुहोस्। त्यसपछि तपाईंले त्यो जानकारी कहाँ पाउनुभयो, घरधनीलाई बताउन वा देखाउन सक्नुहुन्छ। अथवा तपाईं घरधनीलाई सीधै वेबसाइटबाट प्रश्नको जवाफ पढ्न पनि लगाउन सक्नुहुन्छ। उदाहरणको लागि, तपाईं यसो भन्दै कुराकानी थाल्न सक्नुहुन्छ: “यहोवाका साक्षीहरू किन ढोका-ढोकामा गएर प्रचार गर्छन् भनेर थुप्रै मानिसहरू सोच्ने गर्छन्। तपाईंलाई यसको जवाफ थाह पाउन मन छ कि?” त्यसपछि वेबसाइटबाट यस प्रश्नको जवाफ देखाउनुहोस्। मिल्छ भने बाइबलले सिकाउँछ किताबको कुनै एउटा शीर्षकमा घरधनीको ध्यान खिच्न सक्नुहुन्छ।