ख्रिष्टियन जीवन
विवाह—जीवनभर रहने बन्धन
यहोवालाई साँच्चै प्रेम गर्ने व्यक्तिहरूबीचको वैवाहिक बन्धनले उहाँको महिमा गर्छ र पतिपत्नी दुवैलाई खुसी बनाउँछ। (मर्कु १०:९) जीवनसाथी छान्ने सन्दर्भमा बाइबल सिद्धान्तहरू राम्ररी लागू गऱ्यौँ भने वैवाहिक जीवन सफल हुन्छ र जीवनभर टिकिरहन्छ।
‘बैंस पार गरिसकेपछि’ मात्र कसैसित विवाह गर्ने उद्देश्यले चिनजान बढाउनुहोस्। (१को ७:३६) किनभने त्यो समयमा यौन इच्छा प्रबल हुन्छ र सही निर्णयहरू गर्न गाह्रो हुन सक्छ। अविवाहित छँदा नै यहोवासितको सम्बन्ध बलियो बनाउन कदम चाल्नुहोस् अनि उहाँलाई मन पर्ने गुणहरू विकास गर्नुहोस्। यसो गर्नुभयो भने वैवाहिक जीवनलाई सफल बनाउन तपाईँले अझ धेरै योगदान दिन सक्नुहुनेछ।
कसैसित विवाह गर्ने निर्णय गर्नुअघि तिनी वास्तवमा कस्तो व्यक्ति हुन् अनि तिनीसित के-कस्ता गुणहरू छन् भनेर थाह पाउन प्रशस्तै समय लगाउनुहोस्। (१प ३:४) तिनीसित विवाह गर्नु ठीक हो कि होइन भनेर दोधारमा पर्नुभएको छ भने दुई जना बसेर खुलस्त कुरा गर्नुहोस्। अरू मानिसहरूसितको सम्बन्धजस्तै वैवाहिक जीवन पनि आफूले के पाउन सक्छु भन्ने कुरामा भन्दा आफूले के दिन सक्छु भन्ने कुरामा केन्द्रित हुनुपर्छ। (फिलि २:३, ४) यदि तपाईँले विवाह गर्नुअघि नै बाइबल सिद्धान्तहरू लागू गर्नुभएको छ भने सफल वैवाहिक जीवनको लागि राम्रो जग बसालिरहनुभएको हुनेछ।
विवाहको लागि तयारी गर्ने—भाग ३: ‘पहिला खर्च हिसाब गर्नुहोस्’ भिडियो हेर्नुहोस् अनि निम्न प्रश्नहरूको जवाफ दिनुहोस्:
भिडियोमा देखाइएकी बहिनी र शेनको सम्बन्ध कस्तो चलिरहेको थियो?
शेनलाई चिन्दै जाँदा तिनले के-कस्ता कुरा याद गरिन्?
आमाबुबाले तिनलाई कसरी मदत गरे र तिनले कस्तो बुद्धिमानी निर्णय गरिन्?