प्रेमले उत्प्रेरित भएर साक्षीकार्यमा लागिरहनुहोस्‌!

१. सन्‌ २०२३ को वार्षिक सभामा हामीले के थाह पायौँ?

सन्‌ २०२३ को वार्षिक सभामाa हाम्रो बुझाइमा केही छाँटकाँट भए र साक्षीकार्यबारे रोमाञ्चक घोषणाहरू भए। जस्तै: महान्‌ बेबिलोनको विनाश भएपछि पनि केही मानिसले यहोवाका जनहरूसितै मिलेर उहाँको सेवा गर्ने मौका पाउन सक्छन्‌। अनि नोभेम्बर २०२३ देखि प्रकाशकहरूले क्षेत्र सेवाको विस्तृत रिपोर्ट बुझाउनुपर्दैन भनेर पनि हामीले थाह पायौँ। के यस्ता छाँटकाँटहरूले हाम्रो साक्षीकार्य पहिलाभन्दा कम जरुरी भएको छ भनेर देखाउँछ? त्यसो त पटक्कै होइन!

२. दिनप्रतिदिन हामीले मानिसहरूलाई साक्षी दिनु किन झनै जरुरी भएको छ? (मर्कुस १३:१०)

^२ दिनप्रतिदिन हामीले मानिसहरूलाई साक्षी दिनु झनै जरुरी भएको छ। किन? किनभने समय थोरै मात्र बाँकी छ। अन्तको दिनमा हुने साक्षीकार्यबारे येसुले कस्तो भविष्यवाणी गर्नुभयो, विचार गरौँ। (मर्कुस १३:१० पढ्‌नुहोस्‌।) मत्तिको विवरणअनुसार “अन्त” आउनुअघि राज्यको सुसमाचार सारा पृथ्वीभरि प्रचार गरिनेछ भनेर येसुले बताउनुभयो। (मत्ति २४:१४) “अन्त” भन्‍ने शब्दले सैतानको दुष्ट युगको पूर्ण विनाशलाई बुझाउँछ। यहोवाले निकट भविष्यमा हुने घटनाहरूको “दिन र समय” तोकिसक्नुभएको छ। (मत्ति २४:३६; २५:१३; प्रेषि. १:७) एक दिन बित्दा हामी त्यस दिनको एक दिन नजिक पुगिरहेका हुन्छौँ। (रोमी १३:११) अन्त नआएसम्म हामी साक्षीकार्यमा लागिरहनुपर्छ।

३. हामी किन सुसमाचार सुनाउँछौँ?

^३ साक्षीकार्यबारे विचार गर्दा हामीले आफैलाई यस्तो प्रश्‍न सोध्नु बेस हुन्छ: हामी किन सुसमाचार सुनाउँछौँ? प्रेमले गर्दा। साक्षीकार्यमा भाग लिँदा हामीले सुसमाचारप्रति, मानिसहरूप्रति अनि सबैभन्दा महत्त्वपूर्ण कुरा, यहोवा र उहाँको नामप्रति प्रेम देखाइरहेका हुन्छौँ। आउनुहोस्‌, एक-एक गर्दै छलफल गरौँ।

सुसमाचारप्रतिको प्रेमले गर्दा

४. कुनै राम्रो समाचार सुन्दा हामी कस्तो प्रतिक्रिया देखाउँछौँ?

^४ तपाईँले कुनै राम्रो समाचार सुन्दा कस्तो महसुस गर्नुभएको थियो? जस्तै: परिवारमा कसैको बच्चा जन्मँदा वा चाहिरहेकै बेला काम पाउँदा। तपाईँ त्यो खबर आफ्नो परिवार र साथीभाइलाई सुनाउन पक्कै उत्सुक हुनुभएको थियो होला। त्यसैगरि सबैभन्दा राम्रो खबर अर्थात्‌ परमेश्‍वरको राज्यको सुसमाचार सुन्दा पनि के तपाईँ अरूलाई त्यसबारे बताउन आतुर हुनुभएको थियो?

५. बाइबलको सत्य थाह पाउँदा तपाईँले कस्तो महसुस गर्नुभएको थियो? (चित्रहरू पनि हेर्नुहोस्‌।)

^५ सुरु-सुरुमा परमेश्‍वरको वचनबाट बहुमूल्य सत्यहरू सिक्दा तपाईँले कस्तो महसुस गर्नुभएको थियो, सम्झनुहोस्‌ त। जस्तै: स्वर्गमा बस्नुहुने बुबा तपाईँलाई प्रेम गर्नुहुन्छ, तपाईँ उहाँको परिवारको सदस्य भएको उहाँ चाहनुहुन्छ र उहाँले दुःखकष्ट हटाउने अनि मरिसकेका प्रियजनहरूलाई फेरि जीवित पार्ने प्रतिज्ञा गर्नुभएको छ। (मर्कु. १०:२९, ३०; युह. ५:२८, २९; रोमी ८:३८, ३९; प्रका. २१:३, ४) ती बहुमूल्य सत्यहरूले तपाईँको मन छोयो। (लुका २४:३२) आफूले सिकिरहेका कुराहरूलाई तपाईँले प्रेम गर्न थाल्नुभयो र त्यसबारे अरूलाई नबताई बस्नै सक्नुभएन!​—यर्मिया २०:९ तुलना गर्नुहोस्‌।

६. अरनेस्ट र रोजको अनुभवबाट तपाईँले के सिक्नुभयो?

^६ एउटा अनुभव विचार गरौँ। अरनेस्टb भाइ लगभग १० वर्षको हुँदा तिनको बुबाको मृत्यु भयो। तिनी यसो भन्छन्‌: “‘के उहाँ स्वर्ग जानुभयो? के उहाँ कहीँ पनि हुनुहुन्‍न?’ यस्ता प्रश्‍नहरूबारे म सोचिरहन्थेँ। बुबा भएका अरू बच्चाहरूलाई देख्दा मलाई ईर्ष्या लाग्थ्यो।” तिनी वर्षौँसम्म हरेक दिनजसो बुबाको चिहानमा जान्थे र त्यहाँ घुँडा टेकेर यसरी प्रार्थना गर्थे: “हे ईश्‍वर म जान्‍न चाहन्छु, बुबा अहिले कहाँ हुनुहुन्छ?” आफ्नो बुबाको मृत्यु भएको लगभग १७ वर्षपछि अरनेस्टले बाइबल अध्ययनको प्रस्ताव स्विकारे। मरिसकेकाहरू गहिरो निद्रामा परेजस्तै अचेत अवस्थामा छन्‌ र तिनीहरू फेरि जीवित हुनेछन्‌ भनेर सिक्दा तिनी एकदमै खुसी भए। (उप. ९:५, १०; प्रेषि. २४:१५) आफूले सिकिरहेका बाइबल सत्यहरूले अरनेस्टको मन छोयो। तिनले आफूलाई लामो समयदेखि सताइरहेका प्रश्‍नहरूको जवाफ पाए। तिनकी श्रीमती रोजले पनि बाइबल अध्ययन गर्न थालिन्‌ र सत्यलाई प्रेम गर्न थालिन्‌। तिनीहरूले १९७८ मा बप्तिस्मा गरे। तिनीहरूले आफ्नो अनमोल विश्‍वासबारे परिवार, साथीहरू र अरूलाई सुनाए। अरनेस्ट र रोजले ७० जनाभन्दा धेरैलाई बप्तिस्मासम्म पुग्न मदत गरे।

७. बाइबलको सत्यलाई प्रेम गर्न थालेपछि हामी कस्तो महसुस गर्छौँ? (लुका ६:४५)

^७ बाइबलको सत्यलाई प्रेम गर्न थालेपछि हामी त्यसबारे अरूलाई नबताई बस्नै सक्दैनौँ। (लुका ६:४५ पढ्‌नुहोस्‌।) हामी प्रथम शताब्दीका येसुका चेलाहरूले जस्तै महसुस गर्छौँ। तिनीहरूले यसो भने: “हामी आफूले देखेको अनि सुनेको कुरा नबोली बस्न सक्दै सक्दैनौँ।” (प्रेषि. ४:२०) हामी सत्यलाई धेरै प्रेम गर्छौँ; त्यसैले सकेसम्म धेरै मानिसलाई यसबारे बताउन चाहन्छौँ।

मानिसहरूप्रतिको प्रेमले गर्दा

८. मानिसहरूसम्म सुसमाचार पुऱ्‍याउन हामीलाई केले उत्प्रेरित गर्छ? (“मानिसलाई प्रेम गर्नुहोस्‌—चेला बनाउनुहोस्‌” भन्‍ने पेटी हेर्नुहोस्‌।) (चित्र पनि हेर्नुहोस्‌।)

^८ यहोवा र उहाँको छोरा येसुजस्तै हामी पनि मानिसहरूलाई प्रेम गर्छौँ। (हितो. ८:३१; युह. ३:१६) ‘परमेश्‍वरलाई नचिनेका’ र ‘आशा नभएका’ मानिसहरू देख्दा हामी दयाले भरिन्छौँ। (एफि. २:१२) तिनीहरूको जीवनमा यत्ति धेरै समस्या छ कि मानौँ तिनीहरू समस्याहरूको खाल्टोमा परेका छन्‌। तर हामीसित डोरीरूपी सुसमाचार छ, जसले तिनीहरूलाई समस्याहरूको त्यस खाल्टोबाट निस्कन मदत गर्छ। सुसमाचार सुनाउने काममा सक्दो गर्न हामीलाई मानिसहरूप्रतिको प्रेम र दयाले उत्प्रेरित गर्छ। यस्तो अनमोल सन्देशले तिनीहरूलाई आशा दिन्छ, अहिल्यै सुखी जीवन बिताउन मदत गर्छ र तिनीहरूले “साँच्चैको जीवन” बिताउने मौका पाउन सक्छन्‌।​—१ तिमो. ६:१९.

९. भविष्यबारे हामी कस्तो चेतावनी दिन्छौँ र किन? (इजकिएल ३३:७, ८)

^९ मानिसहरूप्रतिको प्रेमले गर्दा हामी आउनै लागेको यस दुष्ट संसारको विनाशबारे पनि मानिसहरूलाई चेतावनी दिन उत्प्रेरित हुन्छौँ। (इजकिएल ३३:७, ८ पढ्‌नुहोस्‌।) हामी आफ्ना छिमेकीहरू र विश्‍वासमा नभएका परिवारका सदस्यहरूलाई प्रेम गर्छौँ। तिनीहरूमध्ये धेरैजसो आफ्नो दिनचर्यामा यत्ति व्यस्त छन्‌ कि तिनीहरूलाई आउँदै गरेको “महासङ्‌कष्ट”-बारे अत्तोपत्तो छैन। त्यस्तो महासङ्‌कष्ट “संसारको सुरुवातदेखि अहिलेसम्म भएको छैन न त फेरि कहिल्यै हुनेछ।” (मत्ति २४:२१) हामी न्यायको दिनमा के-के हुनेछ भनेर पनि तिनीहरूलाई बताउन चाहन्छौँ। जस्तै: सुरुमा झूटो धर्मलाई नाश गरिनेछ र त्यसपछि आरमागेडोनमा सम्पूर्ण दुष्ट संसारलाई नाश गरिनेछ। (प्रका. १६:१४, १६; १७:१६, १७; १९:११, १९, २०) धेरैभन्दा धेरै मानिसले चेतावनी सुनून्‌ र अहिले नै हामीसँगै शुद्ध उपासनामा भाग लेऊन्‌ भनेर हामी प्रार्थना गर्छौँ। तर हाम्रो चेतावनी नसुन्‍ने परिवारका सदस्यहरू र अरूबारे चाहिँ के भन्‍न सक्छौँ?

१०. चेतावनीमूलक सन्देश सुनाइरहनु किन एकदमै जरुरी छ?

^१० अघिल्लो लेखमा बताइएझैँ महान्‌ बेबिलोनको विनाश देखेपछि आफ्नो मन परिवर्तन गरेर यहोवामा विश्‍वास गर्न थाल्नेहरूलाई उहाँले बचाउने निर्णय पनि गर्न सक्नुहुन्छ। त्यसैले चेतावनीमूलक सन्देश सुनाउनु अहिले झनै जरुरी भएको छ। यो कुरा याद गर्नुहोस्‌: अहिले हामीले तिनीहरूलाई बताउने कुरा तिनीहरूले पछि सम्झिन पनि सक्छन्‌। (इजकिएल ३३:३३ तुलना गर्नुहोस्‌।) सायद त्यतिबेला तिनीहरूले हाम्रो सन्देश सम्झनेछन्‌ र ढिलो हुनुअघि हामीसँगै शुद्ध उपासना चढाउन उत्प्रेरित हुनेछन्‌। फिलिप्पीका जेलरले “ठूलो भूकम्प” गएपछि मात्र आफ्नो मन परिवर्तन गरेका थिए। त्यसैगरि अहिले हाम्रो सन्देश नसुन्‍ने मानिसहरूले पनि महान्‌ बेबिलोनको विनाश देखेपछि मात्र आफ्नो मन परिवर्तन गर्न सक्छन्‌।​—प्रेषि. १६:२५-३४.

यहोवा र उहाँको नामप्रतिको प्रेमले गर्दा

११. हामी कसरी यहोवाको महिमा र आदर गर्छौँ अनि उहाँ शक्‍ति ग्रहण गर्न योग्य हुनुहुन्छ भनेर देखाउँछौँ? (प्रकाश ४:११) (चित्रहरू पनि हेर्नुहोस्‌।)

^११ हामीले सुसमाचार सुनाउनुको सबैभन्दा महत्त्वपूर्ण कारण हो, यहोवा र उहाँको पवित्र नामप्रतिको प्रेम। हामी साक्षीकार्यलाई परमेश्‍वरको प्रशंसा गर्ने माध्यमको रूपमा हेर्छौँ। (प्रकाश ४:११ पढ्‌नुहोस्‌।) हामी स्वर्गदूतहरूसँगै यसरी उहाँको गुणगान गाउन चाहन्छौँ: “हे यहोवा हाम्रा परमेश्‍वर, तपाईँ महिमा, आदर अनि शक्‍ति ग्रहण गर्न योग्य हुनुहुन्छ।” उहाँले नै “सबै थोक सृष्टि” गर्नुभएको हो र हामी उहाँले गर्दा नै अस्तित्वमा आएका हौँ भनेर मानिसहरूलाई चित्तबुझ्दो प्रमाण दिँदा हामीले उहाँको महिमा र आदर गरिरहेका हुन्छौँ। अनि परिस्थितिले दिएसम्म आफ्नो समय, शक्‍ति र स्रोतसाधन साक्षीकार्यमा प्रयोग गर्दा हामीले उहाँ शक्‍ति ग्रहण गर्न योग्य हुनुहुन्छ भनेर देखाइरहेका हुन्छौँ। (मत्ति ६:३३; लुका १३:२४; कल. ३:२३) हो, हामी मायालु परमेश्‍वरबारे बोल्न मन पराउँछौँ। अनि हामी उहाँको नाम र उहाँ कस्तो परमेश्‍वर हुनुहुन्छ भन्‍नेबारे अरूलाई नबताई बस्नै सक्दैनौँ। किन?

१२. साक्षीकार्यमा हामी कसरी यहोवाको नाम पवित्र पार्छौँ?

^१२ यहोवाप्रतिको प्रेमले गर्दा हामी उहाँको नाम पवित्र पार्न उत्प्रेरित हुन्छौँ। (मत्ति ६:९) त्यसैले हामी सैतानले यहोवाबारे फैलाएका कुराहरू सरासर झूटा हुन्‌ भनेर अरूलाई बताउन चाहन्छौँ। (उत्प. ३:१-५; अय्यु. २:४; युह. ८:४४) साक्षीकार्यमा हामी मानिसहरूलाई यहोवा को हुनुहुन्छ र उहाँ कस्तो परमेश्‍वर हुनुहुन्छ भनेर बताउन उत्सुक छौँ। यहोवाको प्रमुख गुण प्रेम हो, उहाँको शासन न्यायी छ, उहाँको राज्यले चाँडै सबै दुःखकष्ट हटाउनेछ र मानिसहरू सुख-शान्तिमा बस्न सक्नेछन्‌ भनेर सबैले थाह पाएको हामी चाहन्छौँ। (भज. ३७:१०, ११, २९; १ युह. ४:८) मानिसहरूलाई यी कुराहरू बताउँदा हामीले उहाँको नाम पवित्र पारिरहेका हुन्छौँ। हामीले यहोवाको साक्षी भन्‍ने नाम पाएका छौँ र त्यस नामअनुसार जीवन बिताउन पाएकोमा खुसी छौँ। हामी किन यसो भन्‍न सक्छौँ?

१३. यहोवाको साक्षी भनेर चिनिनु किन सम्मानको कुरा हो? (यसैया ४३:१०-१२)

^१३ यहोवाले हामीलाई उहाँको “साक्षी” हुन रोज्नुभएको छ। (यसैया ४३:१०-१२ पढ्‌नुहोस्‌।) केही वर्षअघि परिचालक निकायको एउटा पत्रमा यसो भनिएको थियो: “यहोवाका साक्षीहरू भनेर चिनिने विशेष सम्मान हामीले मात्र पाएका छौँ।”c हामी किन यसलाई विशेष सम्मान भन्‍न सक्छौँ? मानौँ, कसैले तपाईँमाथि झूटो आरोप लगाउँदै मुद्दा हाल्यो। त्यो आरोप झूटो हो र तपाईँबाट त्यस्तो गलत काम कहिल्यै हुन सक्दैन भनेर बयान दिने एक जना साक्षी चाहिन्छ। तपाईँ कस्तो व्यक्‍तिलाई रोज्नुहुन्छ? तपाईँलाई राम्ररी चिन्‍ने, तपाईँले भरोसा गर्ने अनि समाजमा राम्रो नाम कमाएको व्यक्‍तिलाई रोज्नुहुन्छ नि होइन? यहोवाले हामीलाई उहाँको साक्षी हुन रोज्नुभएको छ। किनकि उहाँ हामीलाई राम्ररी चिन्‍नुहुन्छ र हामीले उहाँबारे साक्षी दिन सक्छौँ भनेर उहाँ भरोसा गर्नुहुन्छ। हामी उहाँको साक्षी हुन पाएकोमा गर्व गर्छौँ। त्यसैले उहाँको नामबारे अरूलाई बताउने र उहाँबारे फैलाइएका कुराहरू झूटो साबित गर्ने हरेक मौकाको सदुपयोग गर्छौँ। यसो गर्दा हामीले यहोवाका साक्षीहरू भन्‍ने नामअनुसारै जीवन बिताइरहेका हुन्छौँ!​—भज. ८३:१८; रोमी १०:१३-१५.

अन्त नआउन्जेल हामी साक्षी दिइरहन्छौँ

१४. कस्ता घटनाहरू हेर्न हामी उत्सुक छौँ?

^१४ भविष्यमा हुने घटनाहरू हेर्न हामी उत्सुक छौँ! महासङ्‌कष्ट सुरु हुनुअघि सायद अझ धेरै मानिसले सत्य स्विकारेको हामीले देख्नेछौँ। अनि मानव इतिहासको सबैभन्दा अन्धकारमय समय अर्थात्‌ महासङ्‌कष्टमा समेत सायद थुप्रै मानिस सैतानको संसारबाट निस्केर आउनेछन्‌ र हामीसँगै यहोवाको प्रशंसा गर्न थाल्नेछन्‌।​—प्रेषि. १३:४८.

१५-१६. हामी कुन काममा लागिरहनेछौँ र कहिलेसम्म?

^१५ त्यतिन्जेल हामीले गर्नुपर्ने एउटा महत्त्वपूर्ण काम छ, जुन पछि कहिल्यै दोहोरिनेछैन। हामीले सारा संसारभरि परमेश्‍वरको राज्यको सुसमाचार सुनाउने सुअवसर पाएका छौँ। साथै सैतानको यस दुष्ट युगको विनाश नजिकै छ भनेर हामीले मानिसहरूलाई सुनाइरहनुपर्छ। मानिसहरूले यो चेतावनीमूलक सन्देश सुन्‍नु जरुरी छ। अनि न्यायको दिन आउँदा हामीले सुनाएको सन्देश यहोवा परमेश्‍वरबाटै आएको हो भनेर तिनीहरूले थाह पाउनेछन्‌।—इज. ३८:२३.

^१६ त्यसोभए हामी के गर्न कटिबद्ध छौँ? सुसमाचारप्रति, मानिसहरूप्रति अनि सबैभन्दा महत्त्वपूर्ण कुरा, यहोवा र उहाँको नामप्रतिको प्रेमले गर्दा हामी साक्षीकार्यमा लागिरहन कटिबद्ध छौँ। त्यसैले यहोवाले “अब पुग्यो!” नभन्‍नुभएसम्म साक्षीकार्य एकदमै जरुरी छ भन्‍ने कुरा मनमा राख्दै जोसका साथ यस काममा लागिरहौँ!